৭. অনামাসৱিনিচ্ছযকথা

৪০. অনামাসন্তি ন পৰামসিতব্বং. তত্ৰাযং ৱিনিচ্ছযো (পাৰা. অট্ঠ. ২.২৮১) – যস্মা মাতা ৱা হোতু ধীতা ৱা ভগিনী ৱা, ইত্থী নাম সব্বাপি ব্ৰহ্মচৰিযস্স পাৰিবন্থিকাৱ অনামাসা চ, তস্মা ‘‘অযং মে মাতা, অযং মে ধীতা, অযং মে ভগিনী’’তি গেহস্সিতপেমেন আমসতোপি দুক্কটমেৱ ৱুত্তং. ইমং পন ভগৱতো আণং অনুস্সৰন্তেন সচেপি নদীসোতেন ৱুয্হমানং মাতৰং পস্সতি, নেৱ হত্থেন পৰামসিতব্বা, পণ্ডিতেন পন ভিক্খুনা নাৱা ৱা ফলকং ৱা কদলিক্খন্ধো ৱা দাৰুক্খন্ধো ৱা উপসংহৰিতব্বো. তস্মিং অসতি কাসাৱম্পি উপসংহৰিত্ৱা পুৰতো ঠপেতব্বং, ‘‘এত্থ গণ্হাহী’’তি পন ন ৱত্তব্বা. গহিতে ‘‘পৰিক্খাৰং কড্ঢামী’’তি কড্ঢন্তেন গন্তব্বং. সচে পন ভাযতি, পুৰতো পুৰতো গন্ত্ৱা ‘‘মা ভাযী’’তি সমস্সাসেতব্বা. সচে ভাযমানা পুত্তস্স সহসা খন্ধে ৱা অভিৰুহতি, হত্থে ৱা গণ্হাতি, ন ‘‘অপেহি মহল্লিকে’’তি নিদ্ধুনিতব্বা, থলং পাপেতব্বা. কদ্দমে লগ্গাযপি কূপে পতিতাযপি এসেৱ নযো. তত্ৰাপি হি যোত্তং ৱা ৱত্থং ৱা পক্খিপিত্ৱা হত্থেন গহিতভাৱং ঞত্ৱা উদ্ধৰিতব্বা, ন ত্ৱেৱ আমসিতব্বা.

ন কেৱলঞ্চ মাতুগামস্স সৰীৰমেৱ অনামাসং, নিৱাসনপাৰুপনম্পি আভৰণভণ্ডম্পি অন্তমসো তিণণ্ডুপকং ৱা তালপণ্ণমুদ্দিকং ৱা উপাদায অনামাসমেৱ. তঞ্চ খো নিৱাসনপাৱুৰণং পিড়ন্ধনত্থায ঠপিতমেৱ. সচে পন নিৱাসনং ৱা পাৰুপনং ৱা পৰিৱত্তেত্ৱা চীৱৰত্থায পাদমূলে ঠপেতি, ৱট্টতি. আভৰণভণ্ডেসু পন সীসপসাধনদন্তসূচিআদিকপ্পিযভণ্ডং ‘‘ইমং, ভন্তে, তুম্হাকং দেম, গণ্হথা’’তি দীযমানং সিপাটিকাসূচিআদিউপকৰণত্থায গহেতব্বং. সুৱণ্ণৰজতমুত্তাদিমযং পন অনামাসমেৱ, দীযমানম্পি ন গহেতব্বং. ন কেৱলঞ্চ এতাসং সৰীৰূপগমেৱ অনামাসং, ইত্থিসণ্ঠানেন কতং কট্ঠৰূপম্পি দন্তৰূপম্পি অযৰূপম্পি লোহৰূপম্পি তিপুৰূপম্পি পোত্থকৰূপম্পি সব্বৰতনৰূপম্পি অন্তমসো পিট্ঠমযৰূপম্পি অনামাসমেৱ. পৰিভোগত্থায পন ‘‘ইদং তুম্হাকং হোতূ’’তি লভিত্ৱা ঠপেত্ৱা সব্বৰতনমযং অৱসেসং ভিন্দিত্ৱা উপকৰণাৰহং উপকৰণে, পৰিভোগাৰহং পৰিভোগে উপনেতুং ৱট্টতি.

৪১. যথা চ ইত্থিৰূপকং, এৱং সত্তৱিধং ধঞ্ঞম্পি অনামাসমেৱ. তস্মা খেত্তমজ্ঝেন গচ্ছন্তেন তত্থজাতকম্পি ধঞ্ঞফলং ন আমসন্তেন গন্তব্বং. সচে ঘৰদ্ৱাৰে ৱা অন্তৰামগ্গে ৱা ধঞ্ঞং পসাৰিতং হোতি, পস্সেন চ মগ্গো অত্থি, ন মদ্দন্তেন গন্তব্বং. গমনমগ্গে অসতি মগ্গং অধিট্ঠায গন্তব্বং. অন্তৰঘৰে ধঞ্ঞস্স উপৰি আসনং পঞ্ঞপেত্ৱা দেন্তি, নিসীদিতুং ৱট্টতি. কেচি আসনসালায ধঞ্ঞং আকিৰন্তি, সচে সক্কা হোতি হৰাপেতুং, হৰাপেতব্বং. নো চে, একমন্তং ধঞ্ঞং অমদ্দন্তেন পীঠকং পঞ্ঞপেত্ৱা নিসীদিতব্বং. সচে ওকাসো ন হোতি, মনুস্সা ধঞ্ঞমজ্ঝেযেৱ পঞ্ঞপেত্ৱা দেন্তি, নিসীদিতব্বং. তত্থজাতকানি মুগ্গমাসাদীনি অপৰণ্ণানিপি তালপনসাদীনি ৱা ফলানি কীড়ন্তেন ন আমসিতব্বানি. মনুস্সেহি ৰাসিকতেসুপি এসেৱ নযো. অৰঞ্ঞে পন ৰুক্খতো পতিতানি ফলানি ‘‘অনুপসম্পন্নানং দস্সামী’’তি গণ্হিতুং ৱট্টতি.

৪২. মুত্তা মণি ৱেড়ুৰিযো সঙ্খো সিলা পৱাড়ং ৰজতং জাতৰূপং লোহিতঙ্কো মসাৰগল্লন্তি ইমেসু দসসু ৰতনেসু মুত্তা অধোতা অৱিদ্ধা যথাজাতাৱ আমসিতুং ৱট্টতি, সেসা অনামাসাতি ৱদন্তি, তং ন গহেতব্বং. মহাপচ্চৰিযং পন ‘‘মুত্তা ধোতাপি অধোতাপি অনামাসা, ভণ্ডমূলত্থায চ সম্পটিচ্ছিতুং ন ৱট্টতি, কুট্ঠৰোগস্স ভেসজ্জত্থায পন ৱট্টতী’’তি ৱুত্তং, তং যুত্তং. অন্তমসো জাতিফলিকং উপাদায সব্বোপি নীলপীতাদিৱণ্ণভেদো মণি ধোতৱিদ্ধৱট্টিতো অনামাসো, যথাজাতো পন আকৰমুত্তো পত্তাদিভণ্ডমূলত্থং সম্পটিচ্ছিতুং ৱট্টতীতি ৱুত্তং, তম্পি মহাপচ্চৰিযং পটিক্খিত্তং. পচিত্ৱা কতো কাচমণিযেৱেকো ৱট্টতীতি ৱুত্তং. ৱেড়ুৰিযেপি মণিসদিসোৱ ৱিনিচ্ছযো.

সঙ্খো ধমনসঙ্খো চ ধোতৱিদ্ধো চ ৰতনমিস্সো অনামাসো, পানীযসঙ্খো ধোতোপি অধোতোপি আমাসোৱ. সেসঞ্চ অঞ্জনাদিভেসজ্জত্থাযপি ভণ্ডমূলত্থাযপি সম্পটিচ্ছিতুং ৱট্টতি. সিলা ধোতৱিদ্ধা ৰতনসংযুত্তা মুগ্গৱণ্ণাৱ অনামাসা, সেসা সত্থকনিঘংসনাদিঅত্থায গণ্হিতুং ৱট্টতি. এত্থ চ ৰতনসংযুত্তাতি সুৱণ্ণেন সদ্ধিং যোজেত্ৱা পচিত্ৱা কতাতি ৱদন্তি. পৱাড়ং ধোতৱিদ্ধং অনামাসং, সেসং আমাসঞ্চ ভণ্ডমূলত্থঞ্চ সম্পটিচ্ছিতুং ৱট্টতীতি ৱদন্তি, তং ন গহেতব্বং. মহাপচ্চৰিযং পন ‘‘ধোতম্পি অধোতম্পি সব্বং অনামাসঞ্চ ন চ সম্পটিচ্ছিতুং ৱট্টতী’’তি ৱুত্তং, তং যুত্তং.

ৰজতঞ্চ জাতৰূপঞ্চ কতভণ্ডম্পি অকতভণ্ডম্পি সব্বেন সব্বং বীজতো পট্ঠায অনামাসঞ্চ অসম্পটিচ্ছনীযঞ্চ. উত্তৰৰাজপুত্তো কিৰ সুৱণ্ণচেতিযং কাৰাপেত্ৱা মহাপদুমত্থেৰস্স পেসেসি. থেৰো ‘‘ন কপ্পতী’’তি পটিক্খিপি. চেতিযঘৰে সুৱণ্ণপদুমসুৱণ্ণবুব্বুড়কাদীনি হোন্তি, এতানিপি অনামাসানি. চেতিযঘৰগোপকা পন ৰূপিযছড্ডকট্ঠানে ঠিতা, তস্মা তেসং কেড়াপযিতুং ৱট্টতীতি ৱুত্তং. কুৰুন্ধিযং পন তম্পি পটিক্খিত্তং, সুৱণ্ণচেতিযে কচৱৰমেৱ হৰিতুং ৱট্টতীতি এত্তকমেৱ অনুঞ্ঞাতং. আৰকূটলোহম্পি জাতৰূপগতিকমেৱ অনামাসন্তি সব্বট্ঠকথাসু ৱুত্তং. সেনাসনপৰিভোগে পন সব্বোপি কপ্পিযো, তস্মা জাতৰূপৰজতমযা সব্বেপি সেনাসনপৰিক্খাৰা আমাসা, ভিক্খূনং ধম্মৱিনযৱণ্ণনট্ঠানে ৰতনমণ্ডপে কৰোন্তি ফলিকত্থম্ভে ৰতনদামপটিমণ্ডিতে, তত্থ সব্বূপকৰণানি ভিক্খূনং পটিজগ্গিতুং ৱট্টন্তি. লোহিতঙ্কমসাৰগল্লা ধোতৱিদ্ধা অনামাসা, ইতৰে আমাসা, ভণ্ডমূলত্থায চ সম্পটিচ্ছিতুং ৱট্টতীতি ৱুত্তং. মহাপচ্চৰিযং পন ‘‘ধোতাপি অধোতাপি সব্বসো অনামাসা, ন চ সম্পটিচ্ছিতুং ৱট্টন্তী’’তি পটিক্খিত্তং.

৪৩. সব্বং আৱুধভণ্ডং অনামাসং, ভণ্ডমূলত্থায দীযমানম্পি ন সম্পটিচ্ছিতব্বং. সত্থৱণিজ্জা নাম ন ৱট্টতি. সুদ্ধধনুদণ্ডোপি ধনুজিযাপি পতোদোপি তোমৰোপি অঙ্কুসোপি অন্তমসো ৱাসিফৰসুআদীনিপি আৱুধসঙ্খেপেন কতানি অনামাসানি. সচে কেনচি ৱিহাৰে সত্তি ৱা তোমৰো ৱা ঠপিতো হোতি, ৱিহাৰং জগ্গন্তেন ‘‘হৰন্তূ’’তি সামিকানং পেসেতব্বং. সচে ন হৰন্তি, তং অচালেন্তেন ৱিহাৰো পটিজগ্গিতব্বো. যুদ্ধভূমিযং পন পতিতং অসিং ৱা সত্তিং ৱা তোমৰং ৱা দিস্ৱা পাসাণেন ৱা কেনচি ৱা অসিং ভিন্দিত্ৱা সত্থকত্থায গহেতুং ৱট্টতি. ইতৰানিপি ৱিযোজেত্ৱা কিঞ্চি সত্থকত্থায, কিঞ্চি কত্তৰদণ্ডাদিঅত্থায গহেতুং ৱট্টতি. ‘‘ইদং গণ্হথা’’তি দীযমানং পন ৱিনাসেত্ৱা ‘‘কপ্পিযভণ্ডং কৰিস্সামী’’তি সব্বম্পি সম্পটিচ্ছিতুং ৱট্টতি.

মচ্ছজালপক্খিজালাদীনিপি ফলকজালিকাদীনিপি সৰপৰিত্তাণানিপি সব্বানি অনামাসানি, পৰিভোগত্থায লব্ভমানেসু পন জালং তাৱ ‘‘আসনস্স ৱা চেতিযস্স ৱা উপৰি বন্ধিস্সামি, ছত্তং ৱা ৱেঠেস্সামী’’তি গহেতুং ৱট্টতি. সৰপৰিত্তাণং সব্বম্পি ভণ্ডমূলত্থায সম্পটিচ্ছিতুং ৱট্টতি. পৰূপৰোধনিৱাৰণঞ্হি এতং, ন উপৰোধকৰন্তি. ফলকং ‘‘দন্তকট্ঠভাজনং কৰিস্সামী’’তি গহেতুং ৱট্টতি.

চম্মৱিনদ্ধানি ৱীণাভেৰিআদীনি অনামাসানি. কুৰুন্দিযং পন ‘‘ভেৰিসঙ্ঘাটোপি ৱীণাসঙ্ঘাটোপি তুচ্ছপোক্খৰম্পি মুখৱট্টিযং আৰোপিতচম্মম্পি ৱীণাদণ্ডকোপি সব্বং অনামাস’’ন্তি ৱুত্তং. ওনহিতুং ৱা ওনহাপেতুং ৱা ৱাদেতুং ৱা ৱাদাপেতুং ৱা ন লব্ভতিযেৱ. চেতিযঙ্গণে পূজং কত্ৱা মনুস্সেহি ছড্ডিতং দিস্ৱাপি অচালেত্ৱাৱ অন্তৰন্তৰে সম্মজ্জিতব্বং, কচৱৰছড্ডনকালে পন কচৱৰনিযামেনেৱ হৰিত্ৱা একমন্তং নিক্খিপিতুং ৱট্টতীতি মহাপচ্চৰিযং ৱুত্তং. ভণ্ডমূলত্থায সম্পটিচ্ছিতুম্পি ৱট্টতি, পৰিভোগত্থায লব্ভমানেসু পন ৱীণাদোণিকঞ্চ ভেৰিপোক্খৰঞ্চ দন্তকট্ঠভাজনং কৰিস্সাম, চম্মং সত্থককোসকন্তি এৱং তস্স তস্স পৰিক্খাৰস্স উপকৰণত্থায গহেত্ৱা তথা তথা কাতুং ৱট্টতি.

ইতি পাড়িমুত্তকৱিনযৱিনিচ্ছযসঙ্গহে

অনামাসৱিনিচ্ছযকথা সমত্তা.