৫. কুলসঙ্গহৱিনিচ্ছযকথা

২৭. কুলসঙ্গহোতি পুপ্ফফলাদীহি কুলানং সঙ্গহো কুলসঙ্গহো. তত্ৰাযং ৱিনিচ্ছযো (পাৰা. অট্ঠ. ২.৪৩১) – কুলসঙ্গহত্থায মালাৱচ্ছাদীনি ৰোপেতুং ৱা ৰোপাপেতুং ৱা সিঞ্চিতুং ৱা সিঞ্চাপেতুং ৱা পুপ্ফানি ওচিনিতুং ৱা ওচিনাপেতুং ৱা গন্থিতুং ৱা গন্থাপেতুং ৱা ন ৱট্টতি. তত্থ অকপ্পিযৱোহাৰো কপ্পিযৱোহাৰো পৰিযাযো ওভাসো নিমিত্তকম্মন্তি ইমানি পঞ্চ জানিতব্বানি.

২৮. তত্থ অকপ্পিযৱোহাৰো নাম অল্লহৰিতানং কোট্টনং কোট্টাপনং, আৱাটস্স খণনং খণাপনং, মালাৱচ্ছস্স ৰোপনং ৰোপাপনং, আড়িযা বন্ধনং বন্ধাপনং, উদকস্স সেচনং সেচাপনং, মাতিকায সম্মুখকৰণং, কপ্পিযউদকসিঞ্চনং, হত্থপাদমুখধোৱননহানোদকসিঞ্চনং. কপ্পিযৱোহাৰো নাম ‘‘ইমং ৰুক্খং জান, ইমং আৱাটং জান, ইমং মালাৱচ্ছং জান, এত্থ উদকং জানা’’তিআদিৱচনং সুক্খমাতিকায উজুকৰণঞ্চ. পৰিযাযো নাম ‘‘পণ্ডিতেন মালাৱচ্ছাদযো ৰোপাপেতব্বা, নচিৰস্সেৱ উপকাৰায সংৱত্তন্তী’’তিআদিৱচনং. ওভাসো নাম কুদালখণিত্তাদীনি চ মালাৱচ্ছে চ গহেত্ৱা ঠানং. এৱং ঠিতঞ্হি সামণেৰাদযো দিস্ৱা ‘‘থেৰো কাৰাপেতুকামো’’তি গন্ত্ৱা কৰোন্তি. নিমিত্তকম্মং নাম কুদালখণিত্তিৱাসিফৰসুউদকভাজনানি আহৰিত্ৱা সমীপে ঠপনং.

২৯. ইমানি পঞ্চপি কুলসঙ্গহত্থায ৰোপনৰোপাপনাদীসু ন ৱট্টন্তি. ফলপৰিভোগত্থায কপ্পিযাকপ্পিযৱোহাৰদ্ৱযমেৱ ন ৱট্টতি, ইতৰত্তযং ৱট্টতি. মহাপচ্চৰিযং পন ‘‘কপ্পিযৱোহাৰোপি ৱট্টতি, যঞ্চ অত্তনো পৰিভোগত্থায ৱট্টতি, তং অঞ্ঞপুগ্গলস্স ৱা সঙ্ঘস্স ৱা চেতিযস্স ৱা অত্থাযপি ৱট্টতী’’তি ৱুত্তং. আৰামত্থায পন ৱনত্থায ছাযত্থায চ অকপ্পিযৱোহাৰমত্তমেৱ ন ৱট্টতি, সেসং ৱট্টতি. ন কেৱলঞ্চ সেসং, যং কিঞ্চি মাতিকম্পি উজুং কাতুং কপ্পিযউদকং সিঞ্চিতুং নহানকোট্ঠকং কত্ৱা নহাযিতুং হত্থপাদমুখধোৱনউদকানি চ তত্থ ছড্ডেতুম্পি ৱট্টতি. মহাপচ্চৰিযং পন কুৰুন্দিযঞ্চ ‘‘কপ্পিযপথৱিযং সযং ৰোপেতুম্পি ৱট্টতী’’তি ৱুত্তং. আৰামাদিঅত্থায পন ৰোপিতস্স ৱা ৰোপাপিতস্স ৱা ফলং পৰিভুঞ্জিতুম্পি ৱট্টতি.

৩০. অযং পন আদিতো পট্ঠায ৱিত্থাৰেন আপত্তিৱিনিচ্ছযো – কুলদূসনত্থায অকপ্পিযপথৱিযং মালাৱচ্ছং ৰোপেন্তস্স পাচিত্তিযঞ্চেৱ দুক্কটঞ্চ, তথা অকপ্পিযৱোহাৰেন ৰোপাপেন্তস্স. কপ্পিযপথৱিযং ৰোপনেপি ৰোপাপনেপি দুক্কটমেৱ. উভযত্ৰাপি সকিং আণত্তিযা বহূনম্পি ৰোপনে একমেৱ সপাচিত্তিযদুক্কটং ৱা সুদ্ধদুক্কটং ৱা হোতি. পৰিভোগত্থায কপ্পিযভূমিযং ৱা অকপ্পিযভূমিযং ৱা কপ্পিযৱোহাৰেন ৰোপাপনে অনাপত্তি. আৰামাদিঅত্থাযপি অকপ্পিযপথৱিযং ৰোপেন্তস্স ৱা অকপ্পিযৱচনেন ৰোপাপেন্তস্স ৱা পাচিত্তিযং. অযং পন নযো মহাঅট্ঠকথাযং ন সুট্ঠু ৱিভত্তো, মহাপচ্চৰিযং পন ৱিভত্তোতি.

সিঞ্চনসিঞ্চাপনে পন অকপ্পিযউদকেন সব্বত্থ পাচিত্তিযং, কুলদূসনপৰিভোগত্থায দুক্কটম্পি. কপ্পিযেন তেসংযেৱ দ্ৱিন্নং অত্থায দুক্কটং, পৰিভোগত্থায চেত্থ কপ্পিযৱোহাৰেন সিঞ্চাপনে অনাপত্তি. আপত্তিট্ঠানে পন ধাৰাৱচ্ছেদৱসেন পযোগবহুলতায চ আপত্তিবহুলতা ৱেদিতব্বা.

কুলসঙ্গহত্থায ওচিননে পুপ্ফগণনায দুক্কটপাচিত্তিযানি, অঞ্ঞত্থ পাচিত্তিযানেৱ. বহূনি পন পুপ্ফানি একপযোগেন ওচিনন্তো পযোগৱসেন কাৰেতব্বো. ওচিনাপনে কুলদূসনত্থায সকিং আণত্তো বহুম্পি ওচিনাতি, একমেৱ সপাচিত্তিযদুক্কটং, অঞ্ঞত্ৰ পাচিত্তিযমেৱ.

৩১. গন্থনগন্থাপনেসু পন সব্বাপি ছ পুপ্ফৱিকতিযো ৱেদিতব্বা – গন্থিমং গোপ্ফিমং ৱেধিমং ৱেঠিমং পূৰিমং ৱাযিমন্তি. তত্থ গন্থিমং নাম সদণ্ডকেসু ৱা উপ্পলপদুমাদীসু অঞ্ঞেসু ৱা দীঘৱণ্টেসু পুপ্ফেসু দট্ঠব্বং. দণ্ডকেন ৱা দণ্ডকং, ৱণ্টেন ৱা ৱণ্টং গন্থেত্ৱা কতমেৱ হি গন্থিমং. তং ভিক্খুস্স ৱা ভিক্খুনিযা ৱা কাতুম্পি অকপ্পিযৱচনেন কাৰাপেতুম্পি ন ৱট্টতি, ‘‘এৱং জান, এৱং কতে সোভেয্য, যথা এতানি পুপ্ফানি ন ৱিকিৰিযন্তি, তথা কৰোহী’’তিআদিনা পন কপ্পিযৱচনেন কাৰাপেতুং ৱট্টতি.

গোপ্ফিমং নাম সুত্তেন ৱা ৱাকাদীহি ৱা ৱস্সিকপুপ্ফাদীনং একতোৱণ্টিকউভতোৱণ্টিকমালাৱসেন গোপ্ফনং, ৱাকং ৱা ৰজ্জুং ৱা দিগুণং কত্ৱা তত্থ অৱণ্টকানি নীপপুপ্ফাদীনি পৱেসেত্ৱা পটিপাটিযা বন্ধন্তি, এতম্পি গোপ্ফিমমেৱ. সব্বং পুৰিমনযেনেৱ ন ৱট্টতি.

ৱেধিমং নাম সৱণ্টকানি ৱস্সিকপুপ্ফাদীনি ৱণ্টে, অৱণ্টকানি ৱকুলপুপ্ফাদীনি অত্তনো ছিদ্দেসু সূচিতালহীৰাদীহি ৱিনিৱিজ্ঝিত্ৱা আৱুনন্তি, এতং ৱেধিমং নাম. তং পুৰিমনযেনেৱ ন ৱট্টতি. কেচি পন কদলিক্খন্ধম্হি কণ্টকে ৱা তালহীৰাদীনি ৱা পৱেসেত্ৱা তত্থ পুপ্ফানি ৱিনিৱিজ্ঝিত্ৱা ঠপেন্তি, কেচি কণ্টকসাখাসু, কেচি পুপ্ফছত্তপুপ্ফকূটাগাৰকৰণত্থং ছত্তে চ ভিত্তিযঞ্চ পৱেসেত্ৱা ঠপিতকণ্টকেসু, কেচি ধম্মাসনৱিতানে বদ্ধকণ্টকেসু, কেচি কণিকাৰপুপ্ফাদীনি সলাকাহি ৱিজ্ঝন্তি, ছত্তাধিছত্তং ৱিয কৰোন্তি, তং অতিওড়াৰিকমেৱ. পুপ্ফৱিজ্ঝনত্থং পন ধম্মাসনৱিতানে কণ্টকম্পি বন্ধিতুং কণ্টকাদীহি ৱা একপুপ্ফম্পি ৱিজ্ঝিতুং পুপ্ফেযেৱ ৱা পুপ্ফং পৱেসেতুং ন ৱট্টতি. জালৱিতানৱেদিকনাগদন্তকপুপ্ফপটিচ্ছকতালপণ্ণগুড়কাদীনং পন ছিদ্দেসু অসোকপিণ্ডিযা ৱা অন্তৰেসু পুপ্ফানি পৱেসেতুং ন দোসো. ন হেতং ৱেধিমং হোতি. ধম্মৰজ্জুযম্পি এসেৱ নযো.

ৱেঠিমং নাম পুপ্ফদামপুপ্ফহত্থকেসু দট্ঠব্বং. কেচি হি মত্থকদামং কৰোন্তা হেট্ঠা ঘটকাকাৰং দস্সেতুং পুপ্ফেহি ৱেঠেন্তি, কেচি অট্ঠ অট্ঠ ৱা দস দস ৱা উপ্পলপুপ্ফাদীনি সুত্তেন ৱা ৱাকেন ৱা দণ্ডকেসু বন্ধিত্ৱা উপ্পলহত্থকে ৱা পদুমহত্থকে ৱা কৰোন্তি, তং সব্বং পুৰিমনযেনেৱ ন ৱট্টতি. সামণেৰেহি উপ্পাটেত্ৱা থলে ঠপিতউপ্পলাদীনি কাসাৱেন ভণ্ডিকম্পি বন্ধিতুং ন ৱট্টতি. তেসংযেৱ পন ৱাকেন ৱা দণ্ডকেন ৱা বন্ধিতুং অংসভণ্ডিকং ৱা কাতুং ৱট্টতি. অংসভণ্ডিকং নাম খন্ধে ঠপিতকাসাৱস্স উভো অন্তে আহৰিত্ৱা ভণ্ডিকং কত্ৱা তস্মিং পসিব্বকে ৱিয পুপ্ফানি পক্খিপন্তি, অযং ৱুচ্চতি অংসভণ্ডিকা, এতং কাতুং ৱট্টতি. দণ্ডকেহি পদুমিনিপণ্ণং ৱিজ্ঝিত্ৱা উপ্পলাদীনি পণ্ণেন ৱেঠেত্ৱা গণ্হন্তি, তত্ৰাপি পুপ্ফানং উপৰি পদুমিনিপণ্ণমেৱ বন্ধিতুং ৱট্টতি, হেট্ঠা দণ্ডকং পন বন্ধিতুং ন ৱট্টতি.

পূৰিমং নাম মালাগুণে চ পুপ্ফপটে চ দট্ঠব্বং. যো হি মালাগুণেন চেতিযং ৱা বোধিং ৱা ৱেদিকং ৱা পৰিক্খিপন্তো পুন আনেত্ৱা পুৰিমট্ঠানং অতিক্কামেতি, এত্তাৱতা পূৰিমং নাম হোতি, কো পন ৱাদো অনেকক্খত্তুং পৰিক্খিপন্তস্স. নাগদন্তকন্তৰেহি পৱেসেত্ৱা হৰন্তো ওলম্বকং কত্ৱা পুন নাগদন্তকং পৰিক্খিপতি, এতম্পি পূৰিমং নাম. নাগদন্তকে পন পুপ্ফৱলযং পৱেসেতুং ৱট্টতি. মালাগুণেহি পুপ্ফপটং কৰোন্তি, তত্ৰাপি একমেৱ মালাগুণং হৰিতুং ৱট্টতি. পুন পচ্চাহৰতো পূৰিমমেৱ হোতি. তং সব্বং পুৰিমনযেনেৱ ন ৱট্টতি. মালাগুণেহি পন বহূহিপি কতং পুপ্ফদামং লভিত্ৱা আসনমত্থকাদীসু বন্ধিতুং ৱট্টতি. অতিদীঘং পন মালাগুণং একৱাৰং হৰিত্ৱা পৰিক্খিপিত্ৱা পুন ইতৰস্স ভিক্খুনো দাতুং ৱট্টতি, তেনপি তথেৱ কাতুং ৱট্টতি.

ৱাযিমং নাম পুপ্ফজালপুপ্ফপটপুপ্ফৰূপেসু দট্ঠব্বং. চেতিযে পুপ্ফজালং কৰোন্তস্স একমেকম্হি জালছিদ্দকে দুক্কটং. ভিত্তিছত্তবোধিত্থম্ভাদীসুপি এসেৱ নযো. পুপ্ফপটং পন পৰেহি পূৰিতম্পি ৱাযিতুং ন লব্ভতি. গোপ্ফিমপুপ্ফেহেৱ হত্থিঅস্সাদিৰূপকানি কৰোন্তি, তানিপি ৱাযিমট্ঠানে তিট্ঠন্তি. পুৰিমনযেনেৱ সব্বং ন ৱট্টতি. অঞ্ঞেহি কতপৰিচ্ছেদে পন পুপ্ফানি ঠপেন্তেন হত্থিঅস্সাদিৰূপকম্পি কাতুং ৱট্টতি. মহাপচ্চৰিযং পন কড়ম্বকেন অড্ঢচন্দকেন চ সদ্ধিং অট্ঠ পুপ্ফৱিকতিযো ৱুত্তা.

৩২. তত্থ কড়ম্বকোতি অড্ঢচন্দকন্তৰে ঘটিকদামওলম্বকো ৱুত্তো. অড্ঢচন্দকোতি অড্ঢচন্দাকাৰেন মালাগুণপৰিক্খেপো. তদুভযম্পি পূৰিমেযেৱ পৱিট্ঠং. কুৰুন্দিযং পন ‘‘দ্ৱে তযো মালাগুণে একতো কত্ৱা পুপ্ফদামকৰণম্পি ৱাযিমংযেৱা’’তি ৱুত্তং. তম্পি ইধ পূৰিমট্ঠানেযেৱ পৱিট্ঠং. ন কেৱলঞ্চ পুপ্ফদামমেৱ, পিট্ঠমযদামম্পি গেণ্ডুকপুপ্ফদামম্পি কুৰুন্দিযং ৱুত্তং. খৰপত্তদামম্পি সিক্খাপদস্স সাধাৰণত্তা ভিক্খূনম্পি ভিক্খুনীনম্পি নেৱ কাতুং, ন কাৰাপেতুং ৱট্টতি, পূজানিমিত্তং পন কপ্পিযৱচনং সব্বত্থ ৱত্তুং ৱট্টতি. পৰিযাযওভাসনিমিত্তকম্মানি ৱট্টন্তিযেৱ.

যো হৰিত্ৱা ৱা হৰাপেত্ৱা ৱা পক্কোসিত্ৱা ৱা পক্কোসাপেত্ৱা ৱা সযং ৱা উপগতানং যং কিঞ্চি অত্তনো সন্তকং পুপ্ফং কুলসঙ্গহত্থায দেতি, তস্স দুক্কটং, পৰসন্তকং দেতি, দুক্কটমেৱ. থেয্যচিত্তেন দেতি, ভণ্ডগ্ঘেন কাৰেতব্বো. এস নযো সঙ্ঘিকেপি. অযং পন ৱিসেসো – সেনাসনত্থায নিযমিতং ইস্সৰৱতায দদতো থুল্লচ্চযন্তি.

৩৩. পুপ্ফং নাম কস্স দাতুং ৱট্টতি, কস্স ন ৱট্টতীতি? মাতাপিতূনং তাৱ হৰিত্ৱাপি হৰাপেত্ৱাপি পক্কোসিত্ৱাপি পক্কোসাপেত্ৱাপি দাতুং ৱট্টতি, সেসঞাতকানং পক্কোসাপেত্ৱাৱ. তঞ্চ খো ৱত্থুপূজনত্থায, মণ্ডনত্থায পন সিৱলিঙ্গাদিপূজনত্থায ৱা কস্সচিপি দাতুং ন ৱট্টতি. মাতাপিতূনঞ্চ হৰাপেন্তেন ঞাতিসামণেৰেহেৱ হৰাপেতব্বং. ইতৰে পন যদি সযমেৱ ইচ্ছন্তি, ৱট্টতি. সম্মতেন পুপ্ফভাজকেন পুপ্ফভাজনকালে সম্পত্তানং সামণেৰানং উপড্ঢভাগং দাতুং ৱট্টতি. কুৰুন্দিযং পন ‘‘সম্পত্তগিহীনং উপড্ঢভাগং’’, মহাপচ্চৰিযং ‘‘চূড়কং দাতুং ৱট্টতী’’তি ৱুত্তং. অসম্মতেন অপলোকেত্ৱা দাতব্বং. আচৰিযুপজ্ঝাযেসু সগাৰৱা সামণেৰা বহূনি পুপ্ফানি আহৰিত্ৱা ৰাসিং কত্ৱা ঠপেন্তি, থেৰা পাতোৱ সম্পত্তানং সদ্ধিৱিহাৰিকাদীনং উপাসকাদীনং ৱা ‘‘ত্ৱং ইদং গণ্হ, ত্ৱং ইদং গণ্হা’’তি দেন্তি, পুপ্ফদানং নাম ন হোতি. ‘‘চেতিযং পূজেস্সামা’’তি গহেত্ৱা গচ্ছন্তাপি পূজং কৰোন্তাপি তত্থ তত্থ সম্পত্তানং চেতিযপূজনত্থায দেন্তি, এতম্পি পুপ্ফদানং নাম ন হোতি. উপাসকে অক্কপুপ্ফাদীহি পূজেন্তে দিস্ৱা ‘‘ৱিহাৰে কণিকাৰপুপ্ফাদীনি অত্থি, উপাসকা তানি গহেত্ৱা পূজেথা’’তি ৱত্তুম্পি ৱট্টতি. ভিক্খূ পুপ্ফপূজং কত্ৱা দিৱাতৰং গামং পৱিট্ঠে ‘‘কিং, ভন্তে, অতিদিৱা পৱিট্ঠত্থা’’তি পুচ্ছন্তি, ‘‘ৱিহাৰে পুপ্ফানি বহূনি, পূজং অকৰিম্হা’’তি ৱদন্তি. মনুস্সা ‘‘বহূনি কিৰ ৱিহাৰে পুপ্ফানী’’তি পুনদিৱসে পহূতং খাদনীযং ভোজনীযং গহেত্ৱা ৱিহাৰং গন্ত্ৱা পুপ্ফপূজঞ্চ কৰোন্তি দানঞ্চ দেন্তি, ৱট্টতি.

৩৪. মনুস্সা ‘‘মযং, ভন্তে, অসুকদিৱসং নাম পূজেস্সামা’’তি পুপ্ফৱাৰং যাচিত্ৱা অনুঞ্ঞাতদিৱসে আগচ্ছন্তি, সামণেৰেহি চ পগেৱ পুপ্ফানি ওচিনিত্ৱা ঠপিতানি হোন্তি, তে ৰুক্খেসু পুপ্ফানি অপস্সন্তা ‘‘কুহিং, ভন্তে, পুপ্ফানী’’তি ৱদন্তি, সামণেৰেহি ওচিনিত্ৱা ঠপিতানি, তুম্হে পন পূজেত্ৱা গচ্ছথ, সঙ্ঘো অঞ্ঞং দিৱসং পূজেস্সতীতি. তে পূজেত্ৱা দানং দত্ৱা গচ্ছন্তি, ৱট্টতি. মহাপচ্চৰিযং পন কুৰুন্দিযঞ্চ ‘‘থেৰা সামণেৰেহি দাপেতুং ন লভন্তি, সচে সযমেৱ তানি পুপ্ফানি তেসং দেন্তি, ৱট্টতি. থেৰেহি পন ‘সামণেৰেহি ওচিনিত্ৱা ঠপিতানী’তি এত্তকমেৱ ৱত্তব্ব’’ন্তি ৱুত্তং. সচে পন পুপ্ফৱাৰং যাচিত্ৱা অনোচিতেসু পুপ্ফেসু যাগুভত্তাদীনি আদায আগন্ত্ৱা সামণেৰে ‘‘ওচিনিত্ৱা দেথা’’তি ৱদন্তি, ঞাভিসামণেৰানংযেৱ ওচিনিত্ৱা দাতুং ৱট্টতি. অঞ্ঞাতকে উক্খিপিত্ৱা ৰুক্খসাখায ঠপেন্তি, ন ওৰোহিত্ৱা পলাযিতব্বং, ওচিনিত্ৱা দাতুং ৱট্টতি. সচে পন কোচি ধম্মকথিকো ‘‘বহূনি উপাসকা ৱিহাৰে পুপ্ফানি, যাগুভত্তাদীনি আদায গন্ত্ৱা পুপ্ফপূজং কৰোথা’’তি ৱদতি, তস্সেৱ ন কপ্পতীতি মহাপচ্চৰিযঞ্চ কুৰুন্দিযঞ্চ ৱুত্তং. মহাঅট্ঠকথাযং পন ‘‘এতং অকপ্পিযং ন ৱট্টতী’’তি অৱিসেসেন ৱুত্তং.

৩৫. ফলম্পি অত্তনো সন্তকং ৱুত্তনযেনেৱ মাতাপিতূনঞ্চ সেসঞাতীনঞ্চ দাতুং ৱট্টতি. কুলসঙ্গহত্থায পন দেন্তস্স ৱুত্তনযেনেৱ অত্তনো সন্তকে পৰসন্তকে সঙ্ঘিকে সেনাসনত্থায নিযমিতে চ দুক্কটাদীনি ৱেদিতব্বানি. অত্তনো সন্তকংযেৱ গিলানমনুস্সানং ৱা সম্পত্তইস্সৰানং ৱা খীণপৰিব্বযানং ৱা দাতুং ৱট্টতি, ফলদানং ন হোতি. ফলভাজকেনপি সম্মতেন সঙ্ঘস্স ফলভাজনকালে সম্পত্তমনুস্সানং উপড্ঢভাগং দাতুং ৱট্টতি, অসম্মতেন অপলোকেত্ৱা দাতব্বং. সঙ্ঘাৰামেপি ফলপৰিচ্ছেদেন ৱা ৰুক্খপৰিচ্ছেদেন ৱা কতিকা কাতব্বা ‘‘ততো গিলানমনুস্সানং ৱা অঞ্ঞেসং ৱা ফলং যাচন্তানং যথাপৰিচ্ছেদেন চত্তাৰি পঞ্চ ফলানি দাতব্বানি, ৰুক্খা ৱা দস্সেতব্বা ‘ইতো গহেতুং লব্ভতী’’’তি. ‘‘ইধ ফলানি সুন্দৰানি, ইতো গণ্হথা’’তি এৱং পন ন ৱত্তব্বং. অত্তনো সন্তকং সিৰীসচুণ্ণং ৱা অঞ্ঞং ৱা যং কিঞ্চি কসাৱং কুলসঙ্গহত্থায দেতি, দুক্কটং. পৰসন্তকাদীসুপি ৱুত্তনযেনেৱ ৱিনিচ্ছযো ৱেদিতব্বো. অযং পন ৱিসেসো – সঙ্ঘস্স ৰক্খিতগোপিতাপি ৰুক্খছল্লি গৰুভণ্ডমেৱাতি. মত্তিকদন্তকট্ঠৱেড়ুপণ্ণেসুপি গৰুভণ্ডূপগং ঞত্ৱা চুণ্ণে ৱুত্তনযেনেৱ ৱিনিচ্ছযো ৱেদিতব্বো.

৩৬. জঙ্ঘপেসনিযন্তি গিহীনং দূতেয্যং সাসনহৰণকম্মং ৱুচ্চতি, তং ন কাতব্বং. গিহীনঞ্হি সাসনং গহেত্ৱা গচ্ছন্তস্স পদে পদে দুক্কটং. তং কম্মং নিস্সায লদ্ধভোজনং ভুঞ্জন্তস্সপি অজ্ঝোহাৰে অজ্ঝোহাৰে দুক্কটং. পঠমং সাসনং অগ্গহেত্ৱাপি পচ্ছা ‘‘অযং দানি সো গামো, হন্দ নং সাসনং আৰোচেমী’’তি মগ্গা ওক্কমন্তস্সপি পদে পদে দুক্কটং. সাসনং আৰোচেত্ৱা লদ্ধভোজনং ভুঞ্জতো পুৰিমনযেনেৱ দুক্কটং. সাসনং অগ্গহেত্ৱা আগতেন পন ‘‘ভন্তে, তস্মিং গামে ইত্থন্নামস্স কা পৱত্তী’’তি পুচ্ছিযমানেন কথেতুং ৱট্টতি, পুচ্ছিতপঞ্হে দোসো নত্থি. পঞ্চন্নং পন সহধম্মিকানং মাতাপিতূনং পণ্ডুপলাসস্স অত্তনো ৱেয্যাৱচ্চকৰস্স সাসনং হৰিতুং ৱট্টতি, গিহীনঞ্চ কপ্পিযসাসনং, তস্মা ‘‘মম ৱচনেন ভগৱতো পাদে ৱন্দথা’’তি ৱা ‘‘চেতিযং পটিমং বোধিং সঙ্ঘত্থেৰং ৱন্দথা’’তি ৱা ‘‘চেতিযে গন্ধপূজং কৰোথা’’তি ৱা ‘‘পুপ্ফপূজং কৰোথা’’তি ৱা ‘‘ভিক্খূ সন্নিপাতেথ, দানং দস্সাম, ধম্মং দেসাপযিস্সামা’’তি ৱা ঈদিসেসু সাসনেসু কুক্কুচ্চং ন কাতব্বং. কপ্পিযসাসনানি হি এতানি, ন গিহীনং গিহিকম্মপটিসংযুত্তানীতি. ইমেহি পন অট্ঠহি কুলদূসককম্মেহি উপ্পন্নপচ্চযা পঞ্চন্নম্পি সহধম্মিকানং ন কপ্পন্তি. অভূতাৰোচনৰূপিযসংৱোহাৰেহি উপ্পন্নপচ্চযসদিসাৱ হোন্তি.

পব্বাজনীযকম্মকতো পন যস্মিং গামে ৱা নিগমে ৱা কুলদূসককম্মং কতং, যস্মিঞ্চ ৱিহাৰে ৱসতি, নেৱ তস্মিং গামে ৱা নিগমে ৱা চৰিতুং লভতি, ন ৱিহাৰে ৱসিতুং. পটিপ্পস্সদ্ধকম্মেনপি চ তেন যেসু কুলেসু পুব্বে কুলদূসককম্মং কতং, ততো উপ্পন্নপচ্চযা ন গহেতব্বা, আসৱক্খযপত্তেনপি ন গহেতব্বা, অকপ্পিযাৱ হোন্তি. ‘‘কস্মা ন গণ্হথা’’তি পুচ্ছিতেন ‘‘পুব্বে এৱং কতত্তা’’তি ৱুত্তে সচে ৱদন্তি ‘‘ন মযং তেন কাৰণেন দেম, ইদানি সীলৱন্ততায দেমা’’তি, গহেতব্বা. পকতিযা দানট্ঠানেযেৱ কুলদূসককম্মং কতং হোতি, ততো পকতিদানমেৱ গহেতুং ৱট্টতি. যং ৱড্ঢেত্ৱা দেন্তি, তং ন ৱট্টতি. যস্মা চ পুচ্ছিতপঞ্হে দোসো নত্থি, তস্মা অঞ্ঞম্পি ভিক্খুং পুব্বণ্হে ৱা সাযন্হে ৱা অন্তৰঘৰং পৱিট্ঠং কোচি পুচ্ছেয্য ‘‘কস্মা, ভন্তে, চৰথা’’তি. যেনত্থেন চৰতি, তং আচিক্খিত্ৱা ‘‘লদ্ধং ন লদ্ধ’’ন্তি ৱুত্তে সচে ন লদ্ধং, ‘‘ন লদ্ধ’’ন্তি ৱত্ৱা যং সো দেতি, তং গহেতুং ৱট্টতি.

৩৭. ‘‘ন চ, ভিক্খৱে, পণিধায অৰঞ্ঞে ৱত্থব্বং, যো ৱসেয্য, আপত্তি দুক্কটস্স. ন চ, ভিক্খৱে, পণিধায পিণ্ডায চৰিতব্বং…পে… ন চ, ভিক্খৱে, পণিধায চঙ্কমিতব্বং…পে… ন চ, ভিক্খৱে, পণিধায ঠাতব্বং…পে… ন চ, ভিক্খৱে, পণিধায নিসীদিতব্বং…পে… ন চ, ভিক্খৱে, পণিধায সেয্যা কপ্পেতব্বা, যো কপ্পেয্য, আপত্তি দুক্কটস্সা’’তি (পাৰা. ২২৩ আদযো) ৱুত্তত্তা ‘‘এৱং (পাৰা. অট্ঠ. ২.২২৩) অৰঞ্ঞে ৱসন্তং মং জনো অৰহত্তে ৱা সেক্খভূমিযং ৱা সম্ভাৱেস্সতি, ততো লোকস্স সক্কতো ভৱিস্সামি গৰুকতো মানিতো পূজিতো’’তি এৱং পত্থনং কত্ৱা অৰঞ্ঞে ন ৱসিতব্বং. এৱং পণিধায ‘‘অৰঞ্ঞে ৱসিস্সামী’’তি গচ্ছন্তস্স পদৱাৰে পদৱাৰে দুক্কটং, তথা অৰঞ্ঞে কুটিকৰণচঙ্কমননিসীদননিৱাসনপাৰুপনাদীসু সব্বকিচ্চেসু পযোগে পযোগে দুক্কটং, তস্মা এৱং অৰঞ্ঞে ন ৱসিতব্বং. এৱং ৱসন্তো হি সম্ভাৱনং লভতু ৱা মা ৱা, দুক্কটং আপজ্জতি. যো পন সমাদিন্নধুতঙ্গো ‘‘ধুতঙ্গং ৰক্খিস্সামী’’তি ৱা ‘‘গামন্তে মে ৱসতো চিত্তং ৱিক্খিপতি, অৰঞ্ঞং সপ্পায’’ন্তি চিন্তেত্ৱা ৱা ‘‘অদ্ধা অৰঞ্ঞে তিণ্ণং ৱিৱেকানং অঞ্ঞতৰং পাপুণিস্সামী’’তি ৱা ‘‘অৰঞ্ঞং পৱিসিত্ৱা অৰহত্তং অপাপুণিত্ৱা ন নিক্খমিস্সামী’’তি ৱা ‘‘অৰঞ্ঞৱাসো নাম ভগৱতা পসত্থো, মযি চ অৰঞ্ঞে ৱসন্তে বহূ সব্ৰহ্মচাৰী গামন্তং হিত্ৱা আৰঞ্ঞকা ভৱিস্সন্তী’’তি ৱা এৱং অনৱজ্জৱাসং ৱসিতুকামো হোতি, তেনেৱ ৱসিতব্বং. পিণ্ডায চৰন্তস্সপি ‘‘অভিক্কন্তাদীনি সণ্ঠপেত্ৱা পিণ্ডায চৰিস্সামী’’তি নিৱাসনপাৰুপনকিচ্চতো পভুতি যাৱ ভোজনপৰিযোসানং, তাৱ পযোগে পযোগে দুক্কটং, সম্ভাৱনং লভতু ৱা মা ৱা, দুক্কটমেৱ. খন্ধকৱত্তসেখিযৱত্তপৰিপূৰণত্থং পন সব্ৰহ্মচাৰীনং দিট্ঠানুগতিআপজ্জনত্থং ৱা পাসাদিকেহি অভিক্কমপটিক্কমাদীহি পিণ্ডায পৱিসন্তো অনুপৱজ্জো ৱিঞ্ঞূনং. চঙ্কমনাদীসুপি এসেৱ নযো.

ইতি পাড়িমুত্তকৱিনযৱিনিচ্ছযসঙ্গহে

কুলসঙ্গহৱিনিচ্ছযকথা সমত্তা.