৩০. গৰুভণ্ডৱিনিচ্ছযকথা

২২৭. গৰুভণ্ডানীতি এত্থ ‘‘পঞ্চিমানি, ভিক্খৱে, অৱিস্সজ্জিযানি ন ৱিস্সজ্জেতব্বানি সঙ্ঘেন ৱা গণেন ৱা পুগ্গলেন ৱা, ৱিস্সজ্জিতানিপি অৱিস্সজ্জিতানি হোন্তি, যো ৱিস্সজ্জেয্য, আপত্তি থুল্লচ্চযস্সা’’তিআদিনা (চূড়ৱ. ৩২১) নযেন দস্সিতানি আৰামো আৰামৱত্থু, ৱিহাৰো ৱিহাৰৱত্থু, মঞ্চো পীঠং ভিসি বিম্বোহনং, লোহকুম্ভী লোহভাণকং লোহৱাৰকো লোহকটাহং ৱাসি ফৰসু কুঠাৰী কুদালো নিখাদনং, ৱল্লি ৱেড়ু মুঞ্জং পব্বজং তিণং মত্তিকা দাৰুভণ্ডং মত্তিকাভণ্ডন্তি ইমানি পঞ্চ গৰুভণ্ডানি নাম.

তত্থ (চূড়ৱ. অট্ঠ. ৩২১) আৰামো নাম পুপ্ফাৰামো ৱা ফলাৰামো ৱা. আৰামৱত্থু নাম তেসংযেৱ আৰামানং অত্থায পৰিচ্ছিন্দিত্ৱা ঠপিতোকাসো, তেসু ৱা আৰামেসু ৱিনট্ঠেসু তেসং পোৰাণকভূমিভাগো. ৱিহাৰো নাম যং কিঞ্চি পাসাদাদি সেনাসনং. ৱিহাৰৱত্থু নাম তস্স পতিট্ঠানোকাসো. মঞ্চো নাম মসাৰকো বুন্দিকাবদ্ধো কুড়ীৰপাদকো আহচ্চপাদকোতি ইমেসং চতুন্নং মঞ্চানং অঞ্ঞতৰো. পীঠং নাম মসাৰকাদীনংযেৱ চতুন্নং পীঠানং অঞ্ঞতৰং. ভিসি নাম উণ্ণভিসিআদীনং পঞ্চন্নং অঞ্ঞতৰা. বিম্বোহনং নাম ৰুক্খতূললতাতূলপোটকীতূলানং অঞ্ঞতৰং. লোহকুম্ভী নাম কাড়লোহেন ৱা তম্বলোহেন ৱা যেন কেনচি লোহেন কতকুম্ভী. লোহভাণকাদীসুপি এসেৱ নযো. এত্থ পন ভাণকন্তি অৰঞ্জৰো ৱুচ্চতি. ৱাৰকোতি ঘটো. কটাহং কটাহমেৱ. ৱাসিআদীসু ৱল্লিআদীসু চ দুৱিঞ্ঞেয্যং নাম নত্থি. পঞ্চাতি চ ৰাসিৱসেন ৱুত্তং, সৰূপৱসেন পনেতানি পঞ্চৱীসতিৱিধানি হোন্তি. ৱুত্তঞ্হেতং –

‘‘দ্ৱিসঙ্গহানি দ্ৱে হোন্তি, ততিযং চতুসঙ্গহং;

চতুত্থং নৱকোট্ঠাসং, পঞ্চমং অট্ঠভেদনং.

‘‘ইতি পঞ্চহি ৰাসীহি, পঞ্চনিম্মললোচনো;

পঞ্চৱীসৱিধং নাথো, গৰুভণ্ডং পকাসযী’’তি.

তত্ৰাযং ৱিনিচ্ছযকথা – ইদঞ্হি সব্বম্পি গৰুভণ্ডং সেনাসনক্খন্ধকে ‘‘অৱিস্সজ্জিয’’ন্তি ৱুত্তং, কীটাগিৰিৱত্থুস্মিং ‘‘অৱেভঙ্গিয’’ন্তি দস্সিতং, পৰিৱাৰে পন –

‘‘অৱিস্সজ্জিযং অৱেভঙ্গিযং,

পঞ্চ ৱুত্তা মহেসিনা;

ৱিস্সজ্জেন্তস্স পৰিভুঞ্জন্তস্স অনাপত্তি,

পঞ্হামেসা কুসলেহি চিন্তিতা’’তি. (পৰি. ৪৭৯) –

আগতং. তস্মা মূলচ্ছেজ্জৱসেন অৱিস্সজ্জিযঞ্চ অৱেভঙ্গিযঞ্চ, পৰিৱত্তনৱসেন পন ৱিস্সজ্জেন্তস্স পৰিভুঞ্জন্তস্স চ অনাপত্তীতি এৱমেত্থ অধিপ্পাযো ৱেদিতব্বো.

২২৮. তত্ৰাযং অনুপুব্বিকথা – ইদং তাৱ পঞ্চৱিধম্পি চীৱৰপিণ্ডপাতভেসজ্জত্থায উপনেতুং ন ৱট্টতি, থাৱৰেন চ থাৱৰং, গৰুভণ্ডেন চ গৰুভণ্ডং পৰিৱত্তেতুং ৱট্টতি. থাৱৰে পন খেত্তং ৱত্থু তড়াকং মাতিকাতি এৱৰূপং ভিক্খুসঙ্ঘস্স ৱিচাৰেতুং ৱা সম্পটিচ্ছিতুং ৱা অধিৱাসেতুং ৱা ন ৱট্টতি, কপ্পিযকাৰকেহেৱ ৱিচাৰিততো কপ্পিযভণ্ডং ৱট্টতি. আৰামেন পন আৰামং আৰামৱত্থুং ৱিহাৰং ৱিহাৰৱত্থুন্তি ইমানি চত্তাৰিপি পৰিৱত্তেতুং ৱট্টতি.

তত্ৰাযং পৰিৱত্তননযো – সঙ্ঘস্স নাড়িকেৰাৰামো দূৰে হোতি, কপ্পিযকাৰকা বহুতৰং খাদন্তি, যম্পি ন খাদন্তি, ততো সকটৱেতনং দত্ৱা অপ্পমেৱ আহৰন্তি, অঞ্ঞেসং পন তস্স আৰামস্স অৱিদূৰে গামৱাসীনং মনুস্সানং ৱিহাৰস্স সমীপে আৰামো হোতি, তে সঙ্ঘং উপসঙ্কমিত্ৱা সকেন আৰামেন তং আৰামং যাচন্তি, সঙ্ঘেন ‘‘ৰুচ্চতি সঙ্ঘস্সা’’তি অপলোকেত্ৱা সম্পটিচ্ছিতব্বো. সচেপি ভিক্খূনং ৰুক্খসহস্সং হোতি, মনুস্সানং পঞ্চ সতানি, ‘‘তুম্হাকং আৰামো খুদ্দকো’’তি ন ৱত্তব্বং. কিঞ্চাপি হি অযং খুদ্দকো, অথ খো ইতৰতো বহুতৰং আযং দেতি. সচেপি সমকমেৱ দেতি, এৱম্পি ইচ্ছিতিচ্ছিতক্খণে পৰিভুঞ্জিতুং সক্কাতি গহেতব্বমেৱ. সচে পন মনুস্সানং বহুতৰা ৰুক্খা হোন্তি, ‘‘ননু তুম্হাকং বহুতৰা ৰুক্খা’’তি ৱত্তব্বং. সচে ‘‘অতিৰেকং অম্হাকং পুঞ্ঞং হোতু, সঙ্ঘস্স দেমা’’তি ৱদন্তি, জানাপেত্ৱা সম্পটিচ্ছিতুং ৱট্টতি. ভিক্খূনং ৰুক্খা ফলধাৰিনো, মনুস্সানং ৰুক্খা ন তাৱ ফলং গণ্হন্তি, কিঞ্চাপি ন গণ্হন্তি, ‘‘ন চিৰেন গণ্হিস্সন্তী’’তি সম্পটিচ্ছিতব্বমেৱ. মনুস্সানং ৰুক্খা ফলধাৰিনো, ভিক্খূনং ৰুক্খা ন তাৱ ফলং গণ্হন্তি, ‘‘ননু তুম্হাকং ৰুক্খা ফলধাৰিনো’’তি ৱত্তব্বং. সচে ‘‘গণ্হথ, ভন্তে, অম্হাকং পুঞ্ঞং ভৱিস্সতী’’তি দেন্তি, জানাপেত্ৱা সম্পটিচ্ছিতুং ৱট্টতি. এৱং আৰামেন আৰামো পৰিৱত্তেতব্বো. এতেনেৱ নযেন আৰামৱত্থুপি ৱিহাৰোপি ৱিহাৰৱত্থুপি আৰামেন পৰিৱত্তেতব্বং, আৰামৱত্থুনা চ মহন্তেন ৱা খুদ্দকেন ৱা আৰামআৰামৱত্থুৱিহাৰৱিহাৰৱত্থূনি.

কথং ৱিহাৰেন ৱিহাৰো পৰিৱত্তেতব্বো? সঙ্ঘস্স অন্তোগামে গেহং হোতি, মনুস্সানং ৱিহাৰমজ্ঝে পাসাদো হোতি, উভোপি অগ্ঘেন সমকা, সচে মনুস্সা তেন পাসাদেন তং গেহং যাচন্তি, সম্পটিচ্ছিতুং ৱট্টতি. ভিক্খূনং চে মহগ্ঘতৰং গেহং হোতি, ‘‘মহগ্ঘতৰং অম্হাকং গেহ’’ন্তি ৱুত্তে চ ‘‘কিঞ্চাপি মহগ্ঘতৰং পব্বজিতানং অসাৰুপ্পং, ন সক্কা তত্থ পব্বজিতেহি ৱসিতুং, ইদং পন সাৰুপ্পং, গণ্হথা’’তি ৱদন্তি, এৱম্পি সম্পটিচ্ছিতুং ৱট্টতি. সচে পন মনুস্সানং মহগ্ঘং হোতি, ‘‘ননু তুম্হাকং গেহং মহগ্ঘ’’ন্তি ৱত্তব্বং. ‘‘হোতু, ভন্তে, অম্হাকং পুঞ্ঞং ভৱিস্সতি, গণ্হথা’’তি ৱুত্তে পন সম্পটিচ্ছিতুং ৱট্টতি. এৱম্পি ৱিহাৰেন ৱিহাৰো পৰিৱত্তেতব্বো. এতেনেৱ নযেন ৱিহাৰৱত্থুপি আৰামোপি আৰামৱত্থুপি ৱিহাৰেন পৰিৱত্তেতব্বং, ৱিহাৰৱত্থুনা চ মহগ্ঘেন ৱা অপ্পগ্ঘেন ৱা ৱিহাৰৱিহাৰৱত্থুআৰামআৰামৱত্থূনি. এৱং থাৱৰেন থাৱৰপৰিৱত্তনং ৱেদিতব্বং.

গৰুভণ্ডেন গৰুভণ্ডপৰিৱত্তনে পন মঞ্চপীঠং মহন্তং ৱা হোতু খুদ্দকং ৱা, অন্তমসো চতুৰঙ্গুলপাদকং গামদাৰকেহি পংস্ৱাগাৰকেসু কীড়ন্তেহি কতম্পি সঙ্ঘস্স দিন্নকালতো পট্ঠায গৰুভণ্ডং হোতি. সচেপি ৰাজৰাজমহামত্তাদযো একপ্পহাৰেনেৱ মঞ্চসতং ৱা মঞ্চসহস্সং ৱা দেন্তি, সব্বে কপ্পিযমঞ্চা সম্পটিচ্ছিতব্বা, সম্পটিচ্ছিত্ৱা ‘‘ৱুড্ঢপটিপাটিযা সঙ্ঘিকপৰিভোগেন পৰিভুঞ্জথা’’তি দাতব্বা, পুগ্গলিকৱসেন ন দাতব্বা. অতিৰেকমঞ্চে ভণ্ডাগাৰাদীসু পঞ্ঞপেত্ৱা পত্তচীৱৰং নিক্খিপিতুম্পি ৱট্টতি. বহিসীমায ‘‘সঙ্ঘস্স দেমা’’তি দিন্নমঞ্চো সঙ্ঘত্থেৰস্স ৱসনট্ঠানে দাতব্বো. তত্থ চে বহূ মঞ্চা হোন্তি, মঞ্চেন কম্মং নত্থি. যস্স ৱসনট্ঠানে কম্মং অত্থি, তত্থ ‘‘সঙ্ঘিকপৰিভোগেন পৰিভুঞ্জথা’’তি দাতব্বো. মহগ্ঘেন সতগ্ঘনকেন ৱা সহস্সগ্ঘনকেন ৱা মঞ্চেন অঞ্ঞং মঞ্চসতং লভতি, পৰিৱত্তেত্ৱা গহেতব্বং. ন কেৱলং মঞ্চেন মঞ্চোযেৱ, আৰামআৰামৱত্থুৱিহাৰৱিহাৰৱত্থুপীঠভিসিবিম্বোহনানিপি পৰিৱত্তেতুং ৱট্টন্তি. এস নযো পীঠভিসিবিম্বোহনেসুপি. এতেসু পন অকপ্পিযং ন পৰিভুঞ্জিতব্বং, কপ্পিযং সঙ্ঘিকপৰিভোগেন পৰিভুঞ্জিতব্বং. অকপ্পিযং ৱা মহগ্ঘং কপ্পিযং ৱা পৰিৱত্তেত্ৱা ৱুত্তৱত্থূনি গহেতব্বানি. অগৰুভণ্ডুপগং পন ভিসিবিম্বোহনং নাম নত্থি.

২২৯. লোহকুম্ভী লোহভাণকং লোহকটাহন্তি ইমানি তীণি মহন্তানি ৱা হোন্তু খুদ্দকানি ৱা, অন্তমসো পসতমত্তউদকগণ্হনকানিপি গৰুভণ্ডানিযেৱ. লোহৱাৰকো পন কাড়লোহতম্বলোহৱট্টলোহকংসলোহানং যেন কেনচি কতো সীহড়দীপে পাদগণ্হনকো ভাজেতব্বো. পাদো চ নাম মগধনাড়িযা পঞ্চনাড়িমত্তং গণ্হাতি, ততো অতিৰেকগণ্হনকো গৰুভণ্ডং. ইমানি তাৱ পাড়িযং আগতানি লোহভাজনানি. পাড়িযং পন অনাগতানি ভিঙ্গাৰপটিগ্গহউড়উঙ্কদব্বিকটচ্ছুপাতিতট্টকসৰকসমুগ্গঅঙ্গাৰকপল্লধূমকটচ্ছুআদীনি খুদ্দকানি ৱা মহন্তানি ৱা সব্বানি গৰুভণ্ডানি. পত্তো অযথালকং তম্বলোহথালকন্তি ইমানি পন ভাজনীযানি. কংসলোহৱট্টলোহভাজনৱিকতি সঙ্ঘিকপৰিভোগেন ৱা গিহিৱিকটা ৱা ৱট্টতি, পুগ্গলিকপৰিভোগেন ন ৱট্টতি. কংসলোহাদিভাজনং সঙ্ঘস্স দিন্নম্পি হি পাৰিহাৰিযং ন ৱট্টতি, গিহিৱিকটনীহাৰেনেৱ পৰিভুঞ্জিতব্বন্তি মহাপচ্চৰিযং ৱুত্তং.

ঠপেত্ৱা পন ভাজনৱিকতিং অঞ্ঞস্মিম্পি কপ্পিযলোহভণ্ডে অঞ্জনী অঞ্জনিসলাকা কণ্ণমলহৰণী সূচি পণ্ণসূচি খুদ্দকো পিপ্ফলকো খুদ্দকং আৰকণ্টকং কুঞ্চিকা তাড়ং কত্তৰযট্ঠি ৱেধকো নত্থুদানং ভিণ্ডিৱালো লোহকূটো লোহকুত্তি লোহগুড়ো লোহপিণ্ডি লোহচক্কলিকং অঞ্ঞম্পি ৱিপ্পকতলোহভণ্ডং ভাজনীযং. ধূমনেত্তফালদীপৰুক্খদীপকপল্লকওলম্বকদীপইত্থিপুৰিসতিৰচ্ছানগতৰূপকানি পন অঞ্ঞানি ৱা ভিত্তিচ্ছদনকৱাটাদীসু উপনেতব্বানি অন্তমসো লোহখিলকং উপাদায সব্বানি লোহভণ্ডানি গৰুভণ্ডানিযেৱ হোন্তি, অত্তনা লদ্ধানিপি পৰিহৰিত্ৱা পুগ্গলিকপৰিভোগেন ন পৰিভুঞ্জিতব্বানি, সঙ্ঘিকপৰিভোগেন ৱা গিহিৱিকটানি ৱা ৱট্টন্তি. তিপুভণ্ডেপি এসেৱ নযো. খীৰপাসাণমযানি তট্টকসৰকাদীনি গৰুভণ্ডানিযেৱ.

ঘটকো পন তেলভাজনং ৱা পাদগণ্হনকতো অতিৰেকমেৱ গৰুভণ্ডং. সুৱণ্ণৰজতহাৰকূটজাতিফলিকভাজনানি গিহিৱিকটানিপি ন ৱট্টন্তি, পগেৱ সঙ্ঘিকপৰিভোগেন ৱা পুগ্গলিকপৰিভোগেন ৱা. সেনাসনপৰিভোগে পন আমাসম্পি অনামাসম্পি সব্বং ৱট্টতি.

ৱাসিআদীসু যায ৱাসিযা ঠপেত্ৱা দন্তকট্ঠচ্ছেদনং ৱা উচ্ছুতচ্ছনং ৱা অঞ্ঞং মহাকম্মং কাতুং ন সক্কা, অযং ভাজনীযা. ততো মহন্ততৰা যেন কেনচি আকাৰেন কতা ৱাসি গৰুভণ্ডমেৱ. ফৰসু পন অন্তমসো ৱেজ্জানং সিৰাৱেধনফৰসুপি গৰুভণ্ডমেৱ. কুঠাৰিযং ফৰসুসদিসোযেৱ ৱিনিচ্ছযো. যা পন আৱুধসঙ্খেপেন কতা, অযং অনামাসা. কুদালো অন্তমসো চতুৰঙ্গুলমত্তোপি গৰুভণ্ডমেৱ. নিখাদনং চতুৰস্সমুখং ৱা হোতু দোণিমুখং ৱা ৱঙ্কং ৱা উজুকং ৱা, অন্তমসো সম্মুঞ্জনীদণ্ডকৱেধনম্পি দণ্ডবদ্ধং চে, গৰুভণ্ডমেৱ. সম্মুঞ্জনীদণ্ডখণনকং পন অদণ্ডকং ফলমত্তমেৱ. যং সক্কা সিপাটিকায পক্খিপিত্ৱা পৰিহৰিতুং, তং ভাজনীযং. সিখৰম্পি নিখাদনেনেৱ সঙ্গহিতং. যেহি মনুস্সেহি ৱিহাৰে ৱাসিআদীনি দিন্নানি হোন্তি, তে চে ঘৰে দড্ঢে ৱা চোৰেহি ৱা ৱিলুত্তে ‘‘দেথ নো, ভন্তে, উপকৰণে, পুন পাকতিকে কৰিস্সামা’’তি ৱদন্তি, দাতব্বা. সচে আহৰন্তি, ন ৱাৰেতব্বা, অনাহৰন্তাপি ন চোদেতব্বা.

কম্মাৰতচ্ছকাৰচুন্দকাৰনড়কাৰমণিকাৰপত্তবন্ধকানং অধিকৰণিমুট্ঠিকসণ্ডাসতুলাদীনি সব্বানি লোহমযউপকৰণানি সঙ্ঘে দিন্নকালতো পট্ঠায গৰুভণ্ডানি. তিপুকোট্টকসুৱণ্ণকাৰচম্মকাৰউপকৰণেসুপি এসেৱ নযো. অযং পন ৱিসেসো – তিপুকোট্টকউপকৰণেসুপি তিপুচ্ছেদনকসত্থকং, সুৱণ্ণকাৰউপকৰণেসু সুৱণ্ণচ্ছেদনকসত্থকং, চম্মকাৰউপকৰণেসু কতপৰিকম্মচম্মচ্ছেদনকখুদ্দকসত্থকন্তি ইমানি ভাজনীযভণ্ডানি. নহাপিততুন্নকাৰউপকৰণেসুপি ঠপেত্ৱা মহাকত্তৰিং মহাসণ্ডাসং মহাপিপ্ফলিকঞ্চ সব্বং ভাজনীযং, মহাকত্তৰিআদীনি গৰুভণ্ডানি.

ৱল্লিআদীসু ৱেত্তৱল্লিআদিকা যা কাচি অড্ঢবাহুপ্পমাণা ৱল্লি সঙ্ঘস্স দিন্না ৱা তত্থজাতকা ৱা ৰক্খিতগোপিতা গৰুভণ্ডং হোতি, সা সঙ্ঘকম্মে চ চেতিযকম্মে চ কতে সচে অতিৰেকা হোতি, পুগ্গলিককম্মেপি উপনেতুং ৱট্টতি. অৰক্খিতা পন গৰুভণ্ডমেৱ ন হোতি. সুত্তমকচিৱাকনাড়িকেৰহীৰচম্মমযা ৰজ্জুকা ৱা যোত্তানি ৱা ৱাকে চ নাড়িকেৰহীৰে চ ৱট্টেত্ৱা কতা একৱট্টা ৱা দ্ৱিৱট্টা ৱা সঙ্ঘস্স দিন্নকালতো পট্ঠায গৰুভণ্ডং. সুত্তং পন অৱট্টেত্ৱা দিন্নং মকচিৱাকনাড়িকেৰহীৰা চ ভাজনীযা. যেহি পনেতানি ৰজ্জুকযোত্তাদীনি দিন্নানি হোন্তি, তে অত্তনো কৰণীযেন হৰন্তা ন ৱাৰেতব্বা.

যো কোচি অন্তমসো অট্ঠঙ্গুলসূচিদণ্ডকমত্তোপি ৱেড়ু সঙ্ঘস্স দিন্নো ৱা তত্থজাতকো ৱা ৰক্খিতগোপিতো গৰুভণ্ডং, সোপি সঙ্ঘকম্মে চ চেতিযকম্মে চ কতে অতিৰেকো পুগ্গলিককম্মে চ দাতুং ৱট্টতি. পাদগণ্হনকতেলনাড়ি পন কত্তৰযট্ঠি উপাহনদণ্ডকো ছত্তদণ্ডকো ছত্তসলাকাতি ইদমেত্থ ভাজনীযভণ্ডং. দড্ঢগেহমনুস্সা গণ্হিত্ৱা গচ্ছন্তা ন ৱাৰেতব্বা. ৰক্খিতগোপিতং ৱেড়ুং গণ্হন্তেন সমকং ৱা অতিৰেকং ৱা থাৱৰং অন্তমসো তংঅগ্ঘনকৱল্লিকাযপি ফাতিকম্মং কত্ৱা গহেতব্বো, ফাতিকম্মং অকত্ৱা গণ্হন্তেন তত্থেৱ ৱড়ঞ্জেতব্বো. গমনকালে সঙ্ঘিকে আৱাসে ঠপেত্ৱা গন্তব্বং, অসতিযা গহেত্ৱা গতেন পহিণিত্ৱা দাতব্বো. দেসন্তৰগতেন সম্পত্তৱিহাৰো সঙ্ঘিকাৱাসে ঠপেতব্বো.

তিণন্তি মুঞ্জঞ্চ পব্বজঞ্চ ঠপেত্ৱা অৱসেসং যং কিঞ্চি তিণং. যত্থ পন তিণং নত্থি, তত্থ পণ্ণেহি ছাদেন্তি, তস্মা পণ্ণম্পি তিণেনেৱ সঙ্গহিতং. ইতি মুঞ্জাদীসু যং কিঞ্চি মুট্ঠিপ্পমাণং তিণং তালপণ্ণাদীসু চ একপণ্ণম্পি সঙ্ঘস্স দিন্নং ৱা তত্থজাতকং ৱা বহাৰামে সঙ্ঘস্স তিণৱত্থুতো জাততিণং ৱা ৰক্খিতগোপিতং গৰুভণ্ডং হোতি, তম্পি সঙ্ঘকম্মে চ চেতিযকম্মে চ কতে অতিৰেকং পুগ্গলিককম্মে দাতুং ৱট্টতি, দড্ঢগেহমনুস্সা গহেত্ৱা গচ্ছন্তা ন ৱাৰেতব্বা. অট্ঠঙ্গুলপ্পমাণোপি ৰিত্তপোত্থকো গৰুভণ্ডমেৱ.

মত্তিকা পকতিমত্তিকা ৱা হোতু পঞ্চৱণ্ণা ৱা সুধা ৱা সজ্জুৰসকঙ্গুট্ঠসিলেসাদীসু ৱা যং কিঞ্চি দুল্লভট্ঠানে আনেত্ৱা দিন্নং তত্থজাতকং ৱা, ৰক্খিতগোপিতং তালফলপক্কমত্তং গৰুভণ্ডং হোতি, তম্পি সঙ্ঘকম্মে চ চেতিযকম্মে চ নিট্ঠিতে অতিৰেকং পুগ্গলিককম্মে চ দাতুং ৱট্টতি, হিঙ্গুহিঙ্গুলকহৰিতালমনোসিলঞ্জনানি পন ভাজনীযভণ্ডানি.

দাৰুভণ্ডে ‘‘যো কোচি অট্ঠঙ্গুলসূচিদণ্ডমত্তোপি দাৰুভণ্ডকো দাৰুদুল্লভট্ঠানে সঙ্ঘস্স দিন্নো ৱা তত্থজাতকো ৱা ৰক্খিতগোপিতো, অযং গৰুভণ্ডং হোতী’’তি কুৰুন্দিযং ৱুত্তং. মহাঅট্ঠকথাযং পন সব্বম্পি দাৰুৱেড়ুচম্মপাসাণাদিৱিকতিং দাৰুভণ্ডেন সঙ্গণ্হিত্ৱা আসন্দিকতো পট্ঠায দাৰুভণ্ডে ৱিনিচ্ছযো ৱুত্তো. তত্ৰাযং নযো – আসন্দিকো সত্তঙ্গো ভদ্দপীঠং পীঠিকা একপাদকপীঠং আমণ্ডকৱণ্টকপীঠং ফলকং কোচ্ছং পলালপীঠন্তি ইমেসু তাৱ যং কিঞ্চি খুদ্দকং ৱা হোতু মহন্তং ৱা, সঙ্ঘস্স দিন্নং গৰুভণ্ডং হোতি. পলালপীঠেন চেত্থ কদলিপত্তাদিপীঠানিপি সঙ্গহিতানি. ব্যগ্ঘচম্মওনদ্ধম্পি ৱাড়ৰূপপৰিক্খিত্তং ৰতনপৰিসিব্বিতং কোচ্ছং গৰুভণ্ডমেৱ, ৱঙ্কফলকং দীঘফলকং চীৱৰধোৱনফলকং ঘট্টনফলকং ঘট্টনমুগ্গৰো দন্তকট্ঠচ্ছেদনগণ্ঠিকা দণ্ডমুগ্গৰো অম্বণং ৰজনদোণি উদকপটিচ্ছকো দাৰুমযো ৱা দন্তমযো ৱা ৱেড়ুমযো ৱা সপাদকোপি অপাদকোপি সমুগ্গো মঞ্জূসা পাদগণ্হনকতো অতিৰেকপ্পমাণো কৰণ্ডো উদকদোণি উদককটাহং উড়ুঙ্কো কটচ্ছু পানীযসৰাৱং পানীযসঙ্খোতি এতেসুপি যং কিঞ্চি সঙ্ঘে দিন্নং গৰুভণ্ডং. সঙ্খথালকং পন ভাজনীযং, তথা দাৰুমযো উদকতুম্বো.

পাদকথলিকমণ্ডলং দাৰুমযং ৱা হোতু চোড়পণ্ণাদিমযং ৱা, সব্বং গৰুভণ্ডং. আধাৰকো পত্তপিধানং তালৱণ্টং বীজনী চঙ্কোটকং পচ্ছি যট্ঠিসম্মুঞ্জনী মুট্ঠিসম্মুঞ্জনীতি এতেসুপি যং কিঞ্চি খুদ্দকং ৱা হোতু মহন্তং ৱা, দাৰুৱেড়ুপণ্ণচম্মাদীসু যেন কেনচি কতং গৰুভণ্ডমেৱ. থম্ভতুলাসোপানফলকাদীসু দাৰুমযং ৱা পাসাণমযং ৱা যং কিঞ্চি গেহসম্ভাৰৰূপং যো কোচি কটসাৰকো যং কিঞ্চি ভূমত্থৰণং যং কিঞ্চি অকপ্পিযচম্মং, সব্বং সঙ্ঘে দিন্নং গৰুভণ্ডং, ভূমত্থৰণং কাতুং ৱট্টতি. এড়কচম্মং পন পচ্চত্থৰণগতিকং হোতি, তম্পি গৰুভণ্ডমেৱ. কপ্পিযচম্মানি ভাজনীযানি. কুৰুন্দিযং পন ‘‘সব্বং মঞ্চপ্পমাণং চম্মং গৰুভণ্ড’’ন্তি ৱুত্তং.

উদুক্খলং মুসলং সুপ্পং নিসদং নিসদপোতো পাসাণদোণি পাসাণকটাহং তুৰিৱেমভস্তাদি সব্বং পেসকাৰাদিভণ্ডং সব্বং কসিভণ্ডং সব্বং চক্কযুত্তকং যানং গৰুভণ্ডমেৱ. মঞ্চপাদো মঞ্চঅটনী পীঠপাদো পীঠঅটনী ৱাসিফৰসুআদীনং দণ্ডাতি এতেসু যং কিঞ্চি ৱিপ্পকততচ্ছনকম্মং অনিট্ঠিতমেৱ ভাজনীযং, তচ্ছিতমট্ঠং পন গৰুভণ্ডং হোতি. অনুঞ্ঞাতৱাসিযা পন দণ্ডো ছত্তমুট্ঠিপণ্ণং কত্তৰযট্ঠি উপাহনা অৰণিসহিতং ধম্মকৰণো পাদগণ্হনকতো অনতিৰিত্তং আমলকতুম্বং আমলকঘটো লাবুকতুম্বং লাবুঘটো ৱিসাণকতুম্বন্তি সব্বমেৱেতং ভাজনীযং, ততো মহন্ততৰং গৰুভণ্ডং. হত্থিদন্তো ৱা যং কিঞ্চি ৱিসাণং ৱা অতচ্ছিতং যথাগতমেৱ ভাজনীযং. তেহি কতমঞ্চপাদাদীসু পুৰিমসদিসোযেৱ ৱিনিচ্ছযো. তচ্ছিতনিট্ঠিতোপি হিঙ্গুকৰণ্ডকো গণ্ঠিকা ৱিধো অঞ্জনী অঞ্জনীসলাকা উদকপুঞ্ছনীতি ইদং সব্বং ভাজনীযমেৱ.

মত্তিকাভণ্ডে সব্বং মনুস্সানং উপভোগপৰিভোগং ঘটপীঠৰাদিকুলালভাজনং পত্তকটাহং অঙ্গাৰকটাহং ধূমদানং দীপৰুক্খকো দীপকপল্লিকা চযনিট্ঠকা ছদনিট্ঠকা থূপিকাতি সঙ্ঘস্স দিন্নকালতো পট্ঠায গৰুভণ্ডং, পাদগণ্হনকতো অনতিৰিত্তপ্পমাণো পন ঘটকো পত্তং থালকং কঞ্চনকো কুণ্ডিকাতি ইদমেত্থ ভাজনীযভণ্ডং. যথা চ মত্তিকাভণ্ডে, এৱং লোহভণ্ডেপি কুণ্ডিকা ভাজনীযকোট্ঠাসমেৱ ভজতীতি অযমেত্থ অনুপুব্বিকথা.

ইতি পাড়িমুত্তকৱিনযৱিনিচ্ছযসঙ্গহে

গৰুভণ্ডৱিনিচ্ছযকথা সমত্তা.