৩. ভেসজ্জাদিকৰণৱিনিচ্ছযকথা

১৫. ভেসজ্জকৰণপৰিত্তপটিসন্থাৰেসু পন ভেসজ্জকৰণে তাৱ অযং ৱিনিচ্ছযো (পাৰা. অট্ঠ. ২.১৮৫-৭) – আগতাগতস্স পৰজনস্স ভেসজ্জং ন কাতব্বং, কৰোন্তো দুক্কটং আপজ্জতি. পঞ্চন্নং পন সহধম্মিকানং কাতব্বং ভিক্খুস্স ভিক্খুনিযা সিক্খমানায সামণেৰস্স সামণেৰিযাতি. সমসীলসদ্ধাপঞ্ঞানঞ্হি এতেসং তীসু সিক্খাসু যুত্তানং ভেসজ্জং অকাতুং ন লব্ভতি. কৰোন্তেন চ সচে তেসং অত্থি, তেসং সন্তকং গহেত্ৱা যোজেত্ৱা দাতব্বং, সচে নত্থি, অত্তনো সন্তকং কাতব্বং. সচে অত্তনোপি নত্থি, ভিক্খাচাৰৱত্তেন ৱা ঞাতকপৱাৰিতট্ঠানতো ৱা পৰিযেসিতব্বং, অলভন্তেন গিলানস্স অত্থায অকতৱিঞ্ঞত্তিযাপি আহৰিত্ৱা কাতব্বং.

১৬. অপৰেসম্পি পঞ্চন্নং কাতুং ৱট্টতি মাতু পিতু তদুপট্ঠাকানং অত্তনো ৱেয্যাৱচ্চকৰস্স পণ্ডুপলাসস্স চাতি. পণ্ডুপলাসো নাম যো পব্বজ্জাপেক্খো যাৱ পত্তচীৱৰং পটিযাদিযতি, তাৱ ৱিহাৰে ৱসতি. তেসু সচে মাতাপিতৰো ইস্সৰা হোন্তি ন পচ্চাসীসন্তি, অকাতুং ৱট্টতি. সচে পন ৰজ্জেপি ঠিতা পচ্চাসীসন্তি, অকাতুং ন ৱট্টতি. ভেসজ্জং পচ্চাসীসন্তানং ভেসজ্জং দাতব্বং, যোজেতুং অজানন্তানং যোজেত্ৱা দাতব্বং. সব্বেসং অত্থায সহধম্মিকেসু ৱুত্তনযেনেৱ পৰিযেসিতব্বং. সচে পন মাতৰং ৱিহাৰং আনেত্ৱা জগ্গতি, সব্বং পৰিকম্মং অনামসন্তেন কাতব্বং, খাদনীযভোজনীযং সহত্থা দাতব্বং. পিতা পন যথা সামণেৰো, এৱং সহত্থেন ন্হাপনসম্বাহনাদীনি কত্ৱা উপট্ঠাতব্বো. যে চ মাতাপিতৰো উপট্ঠহন্তি পটিজগ্গন্তি, তেসম্পি এৱমেৱ কাতব্বং. ৱেয্যাৱচ্চকৰো নাম যো ৱেতনং গহেত্ৱা অৰঞ্ঞে দাৰূনি ৱা ছিন্দতি, অঞ্ঞং ৱা কিঞ্চি কম্মং কৰোতি, তস্স ৰোগে উপ্পন্নে যাৱ ঞাতকা ন পস্সন্তি, তাৱ ভেসজ্জং কাতব্বং. যো পন ভিক্খুনিস্সিতকোৱ হুত্ৱা সব্বকম্মানি কৰোতি, তস্স ভেসজ্জং কাতব্বমেৱ. পণ্ডুপলাসেপি সামণেৰে ৱিয পটিপজ্জিতব্বং.

১৭. অপৰেসম্পি দসন্নং কাতুং ৱট্টতি জেট্ঠভাতু কনিট্ঠভাতু জেট্ঠভগিনিযা কনিট্ঠভগিনিযা চূড়মাতুযা মহামাতুযা চূড়পিতুনো মহাপিতুনো পিতুচ্ছায মাতুলস্সাতি. তেসং পন সব্বেসম্পি কৰোন্তেন তেসংযেৱ সন্তকং ভেসজ্জং গহেত্ৱা কেৱলং যোজেত্ৱা দাতব্বং. সচে পন নপ্পহোন্তি যাচন্তি চ ‘‘দেথ নো, ভন্তে, তুম্হাকং পটিদস্সামা’’তি, তাৱকালিকং দাতব্বং. সচেপি ন যাচন্তি, ‘‘অম্হাকং ভেসজ্জং অত্থি, তাৱকালিকং গণ্হথা’’তি ৱত্ৱা ৱা ‘‘যদা তেসং ভৱিস্সতি, তদা দস্সন্তী’’তি আভোগং ৱা কত্ৱা দাতব্বং. সচে পটিদেন্তি, গহেতব্বং. নো চে দেন্তি, ন চোদেতব্বা. এতে দস ঞাতকে ঠপেত্ৱা অঞ্ঞেসং ন কাতব্বং.

এতেসং পুত্তপৰম্পৰায পন যাৱ সত্তমা কুলপৰিৱট্টা, তাৱ চত্তাৰো পচ্চযে আহৰাপেন্তস্স অকতৱিঞ্ঞত্তি ৱা ভেসজ্জং কৰোন্তস্স ৱেজ্জকম্মং ৱা কুলদূসকাপত্তি ৱা ন হোতি. সচে ভাতু জাযা, ভগিনিযা সামিকো ৱা গিলানো হোতি, ঞাতকা চে, তেসম্পি ৱট্টতি. অঞ্ঞাতকা চে, ভাতু চ ভগিনিযা চ কত্ৱা দাতব্বং ‘‘তুম্হাকং জগ্গনট্ঠানে দেথা’’তি. অথ ৱা তেসং পুত্তানং কত্ৱা দাতব্বং ‘‘তুম্হাকং মাতাপিতূনং দেথা’’তি. এতেনুপাযেন সব্বপদেসু ৱিনিচ্ছযো ৱেদিতব্বো.

তেসং অত্থায চ সামণেৰেহি অৰঞ্ঞতো ভেসজ্জং আহৰাপেন্তেন ঞাতিসামণেৰেহি ৱা আহৰাপেতব্বং, অঞ্ঞাতকেহি অত্তনো অত্থায ৱা আহৰাপেত্ৱা দাতব্বং. তেহিপি ‘‘উপজ্ঝাযস্স আহৰামা’’তি ৱত্তসীসেন আহৰিতব্বং. উপজ্ঝাযস্স মাতাপিতৰো গিলানা ৱিহাৰং আগচ্ছন্তি, উপজ্ঝাযো চ দিসাপক্কন্তো হোতি, সদ্ধিৱিহাৰিকেন উপজ্ঝাযস্স সন্তকং ভেসজ্জং দাতব্বং. নো চে অত্থি, অত্তনো ভেসজ্জং উপজ্ঝাযস্স পৰিচ্চজিত্ৱা দাতব্বং. অত্তনোপি অসন্তে ৱুত্তনযেনেৱ পৰিযেসিত্ৱা উপজ্ঝাযস্স সন্তকং কত্ৱা দাতব্বং. উপজ্ঝাযেনপি সদ্ধিৱিহাৰিকস্স মাতাপিতূসু এৱমেৱ পটিপজ্জিতব্বং. এসেৱ নযো আচৰিযন্তেৱাসিকেসুপি. অঞ্ঞোপি যো আগন্তুকো ৱা চোৰো ৱা যুদ্ধপৰাজিতো ইস্সৰো ৱা ঞাতকেহি পৰিচ্চত্তো কপণো ৱা গমিযমনুস্সো ৱা গিলানো হুত্ৱা ৱিহাৰং পৱিসতি, সব্বেসং অপচ্চাসীসন্তেন ভেসজ্জং কাতব্বং.

১৮. সদ্ধং কুলং হোতি চতূহি পচ্চযেহি উপট্ঠাযকং ভিক্খুসঙ্ঘস্স মাতাপিতুট্ঠানিযং, তত্ৰ চে কোচি গিলানো হোতি, তস্সত্থায ৱিস্সাসেন ‘‘ভেসজ্জং কত্ৱা ভন্তে দেথা’’তি ৱদন্তি, নেৱ দাতব্বং ন কাতব্বং. অথ পন কপ্পিযং ঞত্ৱা এৱং পুচ্ছন্তি ‘‘ভন্তে, অসুকস্স নাম ৰোগস্স কিং ভেসজ্জং কৰোন্তী’’তি, ‘‘ইদঞ্চিদঞ্চ গহেত্ৱা কৰোন্তী’’তি ৱত্তুং ৱট্টতি. ‘‘ভন্তে, ময্হং মাতা গিলানা, ভেসজ্জং তাৱ আচিক্খথা’’তি এৱং পুচ্ছিতে পন ন আচিক্খিতব্বং, অঞ্ঞমঞ্ঞং পন কথা কাতব্বা ‘‘আৱুসো, অসুকস্স নাম ভিক্খুনো ইমস্মিং ৰোগে কিং ভেসজ্জং কৰিংসূ’’তি. ইদঞ্চিদঞ্চ ভেসজ্জং ভন্তেতি. তং সুত্ৱা ইতৰো মাতু ভেসজ্জং কৰোতি, ৱট্টতি. মহাপদুমত্থেৰো কিৰ ৱসভৰঞ্ঞোপি দেৱিযা ৰোগে উপ্পন্নে একায ইত্থিযা আগন্ত্ৱা পুচ্ছিতো ‘‘ন জানামী’’তি অৱত্ৱা এৱমেৱ ভিক্খূহি সদ্ধিং সমুল্লপেসি. তং সুত্ৱা তস্সা ভেসজ্জমকংসু. ৱূপসন্তে চ ৰোগে তিচীৱৰেন তীহি চ কহাপণসতেহি সদ্ধিং ভেসজ্জচঙ্কোটকং পূৰেত্ৱা আহৰিত্ৱা থেৰস্স পাদমূলে ঠপেত্ৱা ‘‘ভন্তে, পুপ্ফপূজং কৰোথা’’তি আহংসু. থেৰো ‘‘আচৰিযভাগো নাম অয’’ন্তি কপ্পিযৱসেন গাহাপেত্ৱা পুপ্ফপূজমকাসি. এৱং তাৱ ভেসজ্জে পটিপজ্জিতব্বং.

১৯. পৰিত্তে পন ‘‘গিলানস্স পৰিত্তং কৰোথ, ভন্তে’’তি ৱুত্তে ন কাতব্বং, ‘‘পৰিত্তং ভণথা’’তি ৱুত্তে পন ভণিতব্বং. সচেপিস্স এৱং হোতি ‘‘মনুস্সা নাম ন জানন্তি, অকৰিযমানে ৱিপ্পটিসাৰিনো ভৱিস্সন্তী’’তি, কাতব্বং. ‘‘পৰিত্তোদকং পৰিত্তসুত্তং কত্ৱা দেথা’’তি ৱুত্তে পন তেসংযেৱ উদকং হত্থেন চালেত্ৱা সুত্তং পৰিমজ্জিত্ৱা দাতব্বং. সচে ৱিহাৰতো উদকং অত্তনো সন্তকং ৱা সুত্তং দেতি, দুক্কটং. মনুস্সা উদকঞ্চ সুত্তঞ্চ গহেত্ৱা নিসীদিত্ৱা ‘‘পৰিত্তং ভণথা’’তি ৱদন্তি, কাতব্বং. নো চে জানন্তি, আচিক্খিতব্বং. ভিক্খূনং নিসিন্নানং পাদেসু উদকং আকিৰিত্ৱা সুত্তঞ্চ ঠপেত্ৱা গচ্ছন্তি ‘‘পৰিত্তং কৰোথ, পৰিত্তং ভণথা’’তি, ন পাদা অপনেতব্বা. মনুস্সা হি ৱিপ্পটিসাৰিনো হোন্তি. অন্তোগামেপি গিলানস্স অত্থায ৱিহাৰং পেসেন্তি ‘‘পৰিত্তং ভণন্তূ’’তি, ভণিতব্বং. অন্তোগামে ৰাজগেহাদীসু ৰোগে ৱা উপদ্দৱে ৱা উপ্পন্নে পক্কোসাপেত্ৱা ভণাপেন্তি, আটানাটিযসুত্তাদীনি ভণিতব্বানি. ‘‘আগন্ত্ৱা গিলানস্স সিক্খাপদানি দেন্তু, ধম্মং কথেন্তু, ৰাজন্তেপুৰে ৱা অমচ্চগেহে ৱা আগন্ত্ৱা সিক্খাপদানি দেন্তু, ধম্মং কথেন্তূ’’তি পেসিতেপি গন্ত্ৱা সিক্খাপদানি দাতব্বানি, ধম্মো কথেতব্বো. ‘‘মতানং পৰিৱাৰত্থং আগচ্ছন্তূ’’তি পক্কোসন্তি, ন গন্তব্বং. ‘‘সীৱথিকদস্সনে অসুভদস্সনে চ মৰণস্সতিং পটিলভিস্সামা’’তি কম্মট্ঠানসীসেন গন্তুং ৱট্টতি. ‘‘পহাৰেদিন্নে মতেপি অমৰণাধিপ্পাযস্স অনাপত্তি ৱুত্তা’’তি ন এত্তকেনেৱ অমনুস্সগহিতস্স পহাৰো দাতব্বো, তালপণ্ণং পন পৰিত্তসুত্তং ৱা হত্থে ৱা পাদে ৱা বন্ধিতব্বং, ৰতনসুত্তাদীনি পৰিত্তানি ভণিতব্বানি, ‘‘মা সীলৱন্তং ভিক্খুং ৱিহেঠেহী’’তি ধম্মকথা কাতব্বা, আটানাটিযপৰিত্তং ৱা ভণিতব্বং.

ইধ পন আটানাটিযপৰিত্তস্স পৰিকম্মং ৱেদিতব্বং (দী. নি. অট্ঠ. ৩.২৮২). পঠমমেৱ হি আটানাটিযসুত্তং ন ভণিতব্বং, মেত্তসুত্তং (খু. পা. ৯.১ আদযো; সু. নি. ১৪৩ আদযো) ধজগ্গসুত্তং (সং. নি. ১.২৪৯) ৰতনসুত্তন্তি (খু. পা. ৬.১ আদযো; সু. নি. ২২৪ আদযো) ইমানি সত্তাহং ভণিতব্বানি. সচে মুঞ্চতি, সুন্দৰং. নো চে মুঞ্চতি, আটানাটিযসুত্তং ভণিতব্বং. তং ভণন্তেন চ ভিক্খুনা পিট্ঠং ৱা মংসং ৱা ন খাদিতব্বং, সুসানে ন ৱসিতব্বং. কস্মা? অমনুস্সা ওতাৰং লভন্তি. পৰিত্তকৰণট্ঠানং হৰিতূপলিত্তং কাৰেত্ৱা তত্থ পৰিসুদ্ধং আসনং পঞ্ঞপেত্ৱা নিসীদিতব্বং. পৰিত্তকাৰকো ভিক্খু ৱিহাৰতো ঘৰং নেন্তেহি ফলকাৱুধেহি পৰিৱাৰেত্ৱা নেতব্বো. অব্ভোকাসে নিসীদিত্ৱা ন ৱত্তব্বং, দ্ৱাৰৱাতপানানি পিদহিত্ৱা নিসিন্নেন আৱুধহত্থেহি সম্পৰিৱাৰিতেন মেত্তচিত্তং পুৰেচাৰিকং কত্ৱা ৱত্তব্বং, পঠমং সিক্খাপদানি গাহাপেত্ৱা সীলে পতিট্ঠিতস্স পৰিত্তং কাতব্বং. এৱম্পি মোচেতুং অসক্কোন্তেন ৱিহাৰং নেত্ৱা চেতিযঙ্গণে নিপজ্জাপেত্ৱা আসনপূজং কাৰেত্ৱা দীপে জালাপেত্ৱা চেতিযঙ্গণং সম্মজ্জিত্ৱা মঙ্গলকথা ৱত্তব্বা, সব্বসন্নিপাতো ঘোসেতব্বো, ৱিহাৰস্স উপৱনে জেট্ঠকৰুক্খো নাম হোতি, তত্থ ‘‘ভিক্খুসঙ্ঘো তুম্হাকং আগমনং পতিমানেতী’’তি পহিণিতব্বং. সব্বসন্নিপাতট্ঠানে অনাগন্তুং নাম ন লভতি, ততো অমনুস্সগহিতকো ‘‘ত্ৱং কোনামোসী’’তি পুচ্ছিতব্বো, নামে কথিতে নামেনেৱ আলপিতব্বো, ‘‘ইত্থন্নাম তুয্হং মালাগন্ধাদীসু পত্তি, আসনপূজাযং পত্তি, পিণ্ডপাতে পত্তি, ভিক্খুসঙ্ঘেন তুয্হং পণ্ণাকাৰত্থায মহামঙ্গলকথা ৱুত্তা, ভিক্খুসঙ্ঘে গাৰৱেন এতং মুঞ্চাহী’’তি মোচেতব্বো. সচে ন মুঞ্চতি, দেৱতানং আৰোচেতব্বং ‘‘তুম্হে জানাথ, অযং অমনুস্সো অম্হাকং ৱচনং ন কৰোতি, মযং বুদ্ধআণং কৰিস্সামা’’তি পৰিত্তং কাতব্বং. এতং তাৱ গিহীনং পৰিকম্মং. সচে পন ভিক্খু অমনুস্সেন গহিতো হোতি, আসনানি ধোৱিত্ৱা সব্বসন্নিপাতং ঘোসাপেত্ৱা গন্ধমালাদীসু পত্তিং দত্ৱা পৰিত্তং ভণিতব্বং, ইদং ভিক্খূনং পৰিকম্মং. এৱং পৰিত্তে পটিপজ্জিতব্বং.

২০. পটিসন্থাৰে পন অযং ৱিনিচ্ছযো (পাৰা. অট্ঠ. ২.১৮৫-৭) – অনামট্ঠপিণ্ডপাতো কস্স দাতব্বো, কস্স ন দাতব্বো? মাতাপিতূনং তাৱ দাতব্বো. সচেপি কহাপণগ্ঘনকো হোতি, সদ্ধাদেয্যৱিনিপাতনং নত্থি. মাতাপিতুউপট্ঠাকানং ৱেয্যাৱচ্চকৰস্স পণ্ডুপলাসস্স চাতি এতেসম্পি দাতব্বো. তত্থ পণ্ডুপলাসস্স থালকে পক্খিপিত্ৱাপি দাতুং ৱট্টতি, তং ঠপেত্ৱা অঞ্ঞেসং অগাৰিকানং মাতাপিতূনম্পি ন ৱট্টতি. পব্বজিতপৰিভোগো হি অগাৰিকানং চেতিযট্ঠানিযো. অপিচ অনামট্ঠপিণ্ডপাথো নামেস সম্পত্তস্স দামৰিকচোৰস্সপি ইস্সৰিযস্সপি দাতব্বো. কস্মা? তে হি অদীযমানেপি ‘‘ন দেন্তী’’তি আমসিত্ৱা দীযমানেপি ‘‘উচ্ছিট্ঠকং দেন্তী’’তি কুজ্ঝন্তি, কুদ্ধা জীৱিতাপি ৱোৰোপেন্তি, সাসনস্সপি অন্তৰাযং কৰোন্তি. ৰজ্জং পত্থযমানস্স ৱিচৰতো চোৰনাগস্স ৱত্থু চেত্থ কথেতব্বং. এৱং অনামট্ঠপিণ্ডপাতে পটিপজ্জিতব্বং.

পটিসন্থাৰো চ নামাযং কস্স কাতব্বো, কস্স ন কাতব্বো? পটিসন্থাৰো নাম ৱিহাৰং সম্পত্তস্স যস্স কস্সচি আগন্তুকস্স ৱা দলিদ্দস্স ৱা চোৰস্স ৱা ইস্সৰস্স ৱা কাতব্বোযেৱ. কথং? আগন্তুকং তাৱ খীণপৰিব্বযং ৱিহাৰং সম্পত্তং দিস্ৱা ‘‘পানীযং পিৱা’’তি দাতব্বং, পাদমক্খনতেলং দাতব্বং, কালে আগতস্স যাগুভত্তং, ৱিকালে আগতস্স সচে তণ্ডুলা অত্থি, তণ্ডুলা দাতব্বা. অৱেলায সম্পত্তোপি ‘‘গচ্ছাহী’’তি ন ৱত্তব্বো, সযনট্ঠানং দাতব্বং. সব্বং অপচ্চাসীযন্তেনেৱ কাতব্বং. ‘‘মনুস্সা নাম চতুপচ্চযদাযকা, এৱং সঙ্গহে কৰিযমানে পুনপ্পুনং পসীদিত্ৱা উপকাৰং কৰিস্সন্তী’’তি চিত্তং ন উপ্পাদেতব্বং. চোৰানং পন সঙ্ঘিকম্পি দাতব্বং. পটিসন্থাৰানিসংসদীপনত্থঞ্চ চোৰনাগৱত্থু, ভাতৰা সদ্ধিং জম্বুদীপগতস্স মহানাগৰঞ্ঞো ৱত্থু, পিতুৰাজস্স ৰজ্জে চতুন্নং অমচ্চানং ৱত্থু, অভযচোৰৱত্থূতি এৱমাদীনি বহূনি ৱত্থূনি মহাঅট্ঠকথাযং ৱিত্থাৰতো ৱুত্তানি.

তত্ৰাযং একৱত্থুদীপনা – সীহড়দীপে কিৰ অভযো নাম চোৰো পঞ্চসতপৰিৱাৰো একস্মিং ঠানে খন্ধাৱাৰং বন্ধিত্ৱা সমন্তা তিযোজনং উব্বাসেত্ৱা ৱসতি. অনুৰাধপুৰৱাসিনো কদম্বনদিং ন উত্তৰন্তি, চেতিযগিৰিমগ্গে জনসঞ্চাৰো উপচ্ছিন্নো. অথেকদিৱসং চোৰো ‘‘চেতিযগিৰিং ৱিলুম্পিস্সামী’’তি অগমাসি. আৰামিকা দিস্ৱা দীঘভাণকঅভযত্থেৰস্স আৰোচেসুং. থেৰো ‘‘সপ্পিফাণিতাদীনি অত্থী’’তি পুচ্ছি. ‘‘অত্থি, ভন্তে’’তি. ‘‘চোৰানং দেথ’’. ‘‘তণ্ডুলা অত্থী’’তি. ‘‘অত্থি, ভন্তে, সঙ্ঘস্সত্থায আহটা তণ্ডুলা চ পক্কসাকঞ্চ গোৰসো চা’’তি. ‘‘ভত্তং সম্পাদেত্ৱা চোৰানং দেথা’’তি. আৰামিকা তথা কৰিংসু. চোৰা ভত্তং ভুঞ্জিত্ৱা ‘‘কেনাযং পটিসন্থাৰো কতো’’তি পুচ্ছিংসু. ‘‘অম্হাকং অয্যেন অভযত্থেৰেনা’’তি. চোৰা থেৰস্স সন্তিকং গন্ত্ৱা ৱন্দিত্ৱা আহংসু ‘‘মযং ‘সঙ্ঘস্স চ চেতিযস্স চ সন্তকং অচ্ছিন্দিত্ৱা গহেস্সামা’তি আগতা, তুম্হাকং পন ইমিনা পটিসন্থাৰেন মযং পসন্না, অজ্জ পট্ঠায ৱিহাৰে ধম্মিকাৰক্খা অম্হাকং আযত্তা হোতু, নাগৰা আগন্ত্ৱা দানং দেন্তু, চেতিযং ৱন্দন্তূ’’তি. ততো পট্ঠায চ নাগৰে দানং দাতুং আগচ্ছন্তে নদীতীৰেযেৱ পচ্চুগ্গন্ত্ৱা ৰক্খন্তা ৱিহাৰং নেন্তি, ৱিহাৰেপি দানং দেন্তানং ৰক্খং কত্ৱা তিট্ঠন্তি. তেপি ভিক্খূনং ভুত্তাৱসেসং চোৰানং দেন্তি. গমনকালেপি তে চোৰা নদীতীৰং পাপেত্ৱা নিৱত্তন্তি.

অথেকদিৱসং ভিক্খুসঙ্ঘে খীযনককথা উপ্পন্না ‘‘থেৰো ইস্সৰৱতায সঙ্ঘসন্তকং চোৰানং অদাসী’’তি. থেৰো সন্নিপাতং কাৰাপেত্ৱা আহ ‘‘চোৰা ‘সঙ্ঘস্স পকতিৱট্টঞ্চ চেতিযসন্তকঞ্চ অচ্ছিন্দিত্ৱা গণ্হিস্সামা’তি আগমিংসু, অথ তেসং মযা ‘এতং ন হৰিস্সন্তী’তি এত্তকো নাম পটিসন্থাৰো কতো, তং সব্বম্পি একতো সম্পিণ্ডেত্ৱা অগ্ঘাপেথ, তেন কাৰণেন অৱিলুত্তং ভণ্ডং একতো সম্পিণ্ডেত্ৱা অগ্ঘাপেথা’’তি. ততো সব্বম্পি থেৰেন দিন্নকং চেতিযঘৰে একং ৱৰপোত্থকচিত্তত্থৰণং ন অগ্ঘতি. ততো আহংসু ‘‘থেৰেন কতো পটিসন্থাৰো সুকতো, চোদেতুং ৱা সাৰেতুং ৱা ন লব্ভতি, গীৱা ৱা অৱহাৰো ৱা নত্থী’’তি. এৱং মহানিসংসো পটিসন্থাৰোতি সল্লক্খেত্ৱা কত্তব্বো পণ্ডিতেন ভিক্খুনাতি.

ইতি পাড়িমুত্তকৱিনযৱিনিচ্ছযসঙ্গহে

ভেসজ্জাদিকৰণৱিনিচ্ছযকথা সমত্তা.