২৬. ৱস্সূপনাযিকৱিনিচ্ছযকথা

১৭৯. ৱস্সূপনাযিকাতি এত্থ পুৰিমিকা পচ্ছিমিকাতি দুৱে ৱস্সূপনাযিকা. তত্থ (মহাৱ. অট্ঠ. ১৮৪ আদযো) আসাড়্হীপুণ্ণমায অনন্তৰে পাটিপদদিৱসে পুৰিমিকা উপগন্তব্বা, পচ্ছিমিকা পন আসাড়্হীপুণ্ণমতো অপৰায পুণ্ণমায অনন্তৰে পাটিপদদিৱসে. উপগচ্ছন্তেন চ ৱিহাৰং পটিজগ্গিত্ৱা পানীযং পৰিভোজনীযং উপট্ঠাপেত্ৱা সব্বং চেতিযৱন্দনাদিসামীচিকম্মং নিট্ঠাপেত্ৱা ‘‘ইমস্মিং ৱিহাৰে ইমং তেমাসং ৱস্সং উপেমী’’তি সকিং ৱা দ্ৱত্তিক্খত্তুং ৱা ৱাচং নিচ্ছাৰেত্ৱা ৱস্সং উপগন্তব্বং. সচেপি ‘‘ইধ ৱসিস্সামী’’তি আলযো অত্থি, অসতিযা পন ৱস্সং ন উপেতি, গহিতসেনাসনং সুগ্গহিতং, ছিন্নৱস্সো ন হোতি, পৱাৰেতুং লভতিযেৱ. ৱিনাপি হি ৱচীভেদং আলযকৰণমত্তেনপি ৱস্সং উপগতমেৱ হোতি. ‘‘ইধ ৱস্সং ৱসিস্সামী’’তি চিত্তুপ্পাদোযেৱেত্থ আলযো নাম.

‘‘ন, ভিক্খৱে, তদহুৱস্সূপনাযিকায ৱস্সং অনুপগন্তুকামেন সঞ্চিচ্চ আৱাসো অতিক্কমিতব্বো, যো অতিক্কমেয্য, আপত্তি দুক্কটস্সা’’তি (মহাৱ. ১৮৬) ৱচনতো ৱস্সূপনাযিকদিৱসে ৱস্সং অনুপগন্তুকামো ৱিহাৰসীমং অতিক্কমতি, ৱিহাৰগণনায দুক্কটং. সচে হি তং দিৱসং ৱিহাৰসতস্স উপচাৰং ওক্কমিত্ৱা অতিক্কমতি, সতং আপত্তিযো. সচে পন ৱিহাৰং অতিক্কমিত্ৱা অঞ্ঞস্স ৱিহাৰস্স উপচাৰং অনোক্কমিত্ৱাৱ নিৱত্ততি, একাৱ আপত্তি. কেনচি অন্তৰাযেন পুৰিমিকং অনুপগতেন পচ্ছিমিকা উপগন্তব্বা.

‘‘ন, ভিক্খৱে, অসেনাসনিকেন ৱস্সং উপগন্তব্বং, যো উপগচ্ছেয্য, আপত্তি দুক্কটস্সা’’তি (মহাৱ. ২০৪) ৱচনতো যস্স পঞ্চন্নং ছদনানং অঞ্ঞতৰেন ছন্নং যোজিতদ্ৱাৰবন্ধনং সেনাসনং নত্থি, তেন ন উপগন্তব্বং. ‘‘ন, ভিক্খৱে, ছৱকুটিকায ৱস্সং উপগন্তব্বং, যো উপগচ্ছেয্য, আপত্তি দুক্কটস্সা’’তি(মহাৱ. ২০৪) আদিৱচনতো ছৱকুটিকাযং ছত্তে চাটিযঞ্চ উপগন্তুং ন ৱট্টতি. তত্থ ছৱকুটিকা নাম টঙ্কিতমঞ্চাদিভেদা কুটি. তত্থেৱ উপগন্তুং ন ৱট্টতি, সুসানে পন অঞ্ঞং কুটিকং কত্ৱা উপগন্তুং ৱট্টতি, ছত্তেপি চতূসু থম্ভেসু ছত্তং ঠপেত্ৱা আৱৰণং কত্ৱা দ্ৱাৰং যোজেত্ৱা উপগন্তুং ৱট্টতি, ছত্তকুটি নামেসা হোতি. চাটিযাপি মহন্তেন কপল্লেন ছত্তে ৱুত্তনযেন কুটিকং কত্ৱা উপগন্তুং ৱট্টতি.

‘‘ন, ভিক্খৱে, ৰুক্খসুসিৰে ৱস্সং উপগন্তব্বং, যো উপগচ্ছেয্য, আপত্তি দুক্কটস্সা’’তি (মহাৱ. ২০৪) ৱচনতো সুদ্ধে ৰুক্খসুসিৰে উপগন্তুং ন ৱট্টতি, মহন্তস্স পন ৰুক্খসুসিৰস্স অন্তো পদৰচ্ছদনং কুটিকং কত্ৱা পৱিসনদ্ৱাৰং যোজেত্ৱা উপগন্তুং ৱট্টতি, ৰুক্খং ছিন্দিত্ৱা খাণুকমত্থকে পদৰচ্ছদনং কুটিকং কত্ৱাপি ৱট্টতিযেৱ. ‘‘ন, ভিক্খৱে, ৰুক্খৱিটভিযা’’তি(মহাৱ. ২০৪) আদিৱচনতো সুদ্ধে ৱিটভিমত্তে উপগন্তুং ন ৱট্টতি, মহাৱিটপে পন অট্টকং বন্ধিত্ৱা তত্থ পদৰচ্ছদনং কুটিকং কত্ৱা দ্ৱাৰং যোজেত্ৱা উপগন্তব্বং.

‘‘অনুজানামি, ভিক্খৱে, ৱজে ৱস্সং উপগন্তু’’ন্তিআদিৱচনতো ৱজে সত্থে নাৱাযঞ্চ উপগন্তুং ৱট্টতি. তত্থ ৱজোতি গোপালকানং নিৱাসট্ঠানং. ৱজে ৱুট্ঠিতে ৱজেন সদ্ধিং গতস্স ৱস্সচ্ছেদে অনাপত্তি ‘‘অনুজানামি, ভিক্খৱে, যেন ৱজো, তেন গন্তু’’ন্তি (মহাৱ. ২০৩) ৱুত্তত্তা. সত্থে ৱস্সং উপগচ্ছন্তেন পন ৱস্সূপনাযিকদিৱসে উপাসকা ৱত্তব্বা ‘‘কুটিকা লদ্ধুং ৱট্টতী’’তি. সচে কৰিত্ৱা দেন্তি, তত্থ পৱিসিত্ৱা ‘‘ইধ ৱস্সং উপেমী’’তি তিক্খত্তুং ৱত্তব্বং. নো চে দেন্তি, সালাসঙ্খেপেন ঠিতসকটস্স হেট্ঠা উপগন্তব্বং. তম্পি অলভন্তেন আলযো কাতব্বো, সত্থে পন ৱস্সং উপগন্তুং ন ৱট্টতি. আলযো নাম ‘‘ইধ ৱস্সং ৱসিস্সামী’’তি চিত্তুপ্পাদমত্তং. সচে মগ্গপ্পটিপন্নেযেৱ সত্থে পৱাৰণাদিৱসো হোতি, তত্থেৱ পৱাৰেতব্বং. অথ সত্থো অন্তোৱস্সেযেৱ ভিক্খুনা পত্থিতট্ঠানং পত্ৱা অতিক্কমতি, পত্থিতট্ঠানে ৱসিত্ৱা তত্থ ভিক্খূহি সদ্ধিং পৱাৰেতব্বং. অথাপি সত্থো অন্তোৱস্সেযেৱ অন্তৰা একস্মিং গামে তিট্ঠতি ৱা ৱিপ্পকিৰতি ৱা, তস্মিংযেৱ গামে ভিক্খূহি সদ্ধিং ৱসিত্ৱা পৱাৰেতব্বং, অপ্পৱাৰেত্ৱা ততো পৰং গন্তুং ন ৱট্টতি. নাৱায ৱস্সং উপগচ্ছন্তেনপি কুটিযংযেৱ উপগন্তব্বং, পৰিযেসিত্ৱা অলভন্তেন আলযো কাতব্বো. সচে অন্তোতেমাসং নাৱা সমুদ্দেযেৱ হোতি, তত্থেৱ পৱাৰেতব্বং. অথ নাৱা কূলং লভতি, অযঞ্চ পৰতো গন্তুকামো হোতি, গন্তুং ন ৱট্টতি, নাৱায লদ্ধগামেযেৱ ৱসিত্ৱা ভিক্খূহি সদ্ধিং পৱাৰেতব্বং. সচেপি নাৱা অনুতীৰমেৱ অঞ্ঞত্থ গচ্ছতি, ভিক্খু চ পঠমং লদ্ধগামেযেৱ ৱসিতুকামো, নাৱা গচ্ছতু, ভিক্খুনা তত্থেৱ ৱসিত্ৱা ভিক্খূহি সদ্ধিং পৱাৰেতব্বং. ইতি ৱজে সত্থে নাৱাযন্তি তীসু ঠানেসু নত্থি ৱস্সচ্ছেদে আপত্তি, পৱাৰেতুঞ্চ লভতি.

‘‘ন, ভিক্খৱে, ৱস্সং উপগন্ত্ৱা পুৰিমং ৱা তেমাসং পচ্ছিমং ৱা তেমাসং অৱসিত্ৱা চাৰিকা পক্কমিতব্বা, যো পক্কমেয্য, আপত্তি দুক্কটস্সা’’তি (মহাৱ. ১৮৬) ৱচনতো পুৰিমিকায ৱস্সং উপগতেন পুৰিমং তেমাসং, পচ্ছিমিকায উপগতেন পচ্ছিমং তেমাসং অৱসিত্ৱা চাৰিকা ন পক্কমিতব্বা, ৱস্সং উপগন্ত্ৱা পন অৰুণং অনুট্ঠাপেত্ৱাপি তদহেৱ সত্তাহকৰণীযেন পক্কমন্তস্সপি অন্তোসত্তাহে নিৱত্তন্তস্স অনাপত্তি, কো পন ৱাদো দ্ৱীহতীহং ৱসিত্ৱা সত্তাহকৰণীযেন পক্কমন্তস্স অন্তোসত্তাহে নিৱত্তন্তস্স.

১৮০. ‘‘অনুজানামি, ভিক্খৱে, সত্তন্নং সত্তাহকৰণীযেন পহিতে গন্তুং, ন ত্ৱেৱ অপ্পহিতে. ভিক্খুস্স ভিক্খুনিযা সিক্খমানায সামণেৰস্স সামণেৰিযা উপাসকস্স উপাসিকাযা’’তি (মহাৱ. ১৮৭) ৱচনতো পঞ্চন্নং সহধম্মিকানং অঞ্ঞতৰেন সঙ্ঘগণপুগ্গলে উদ্দিস্স অত্তনো ৱা অত্থায ৱিহাৰং অড্ঢযোগং পাসাদং হম্মিযং গুহং পৰিৱেণং কোট্ঠকং উপট্ঠানসালং অগ্গিসালং কপ্পিযকুটিং ৱচ্চকুটিং চঙ্কমং চঙ্কমনসালং উদপানং উদপানসালং জন্তাঘৰং জন্তাঘৰসালং পোক্খৰণিং মণ্ডপং আৰামং আৰামৱত্থুং ৱা কাৰেত্ৱা ‘‘আগচ্ছন্তু ভিক্খূ, ইচ্ছামি দানঞ্চ দাতুং ধম্মঞ্চ সোতুং ভিক্খূ চ পস্সিতু’’ন্তি এৱং নিদ্দিসিত্ৱা পেসিতে গন্তব্বং সত্তাহকৰণীযেন, ন ত্ৱেৱ অপ্পহিতে. উপাসকো ৱা উপাসিকা ৱা তথেৱ সঙ্ঘগণপুগ্গলে উদ্দিস্স ৱিহাৰাদীসু অঞ্ঞতৰং কাৰেত্ৱা অত্তনো ৱা অত্থায নিৱেসনসযনিঘৰাদীসু অঞ্ঞতৰং কাৰাপেত্ৱা অঞ্ঞং ৱা কিচ্চকৰণীযং নিদ্দিসিত্ৱা গিলানো ৱা হুত্ৱা ভিক্খূনং সন্তিকে দূতং পহিণেয্য ‘‘আগচ্ছন্তু ভদন্তা, ইচ্ছামি দানঞ্চ দাতুং ধম্মঞ্চ সোতুং ভিক্খূ চ পস্সিতু’’ন্তি, গন্তব্বং সত্তাহকৰণীযেন, ন ত্ৱেৱ অপ্পহিতে.

‘‘অনুজানামি, ভিক্খৱে, সত্তন্নং সত্তাহকৰণীযেন অপ্পহিতেপি গন্তুং, পগেৱ পহিতে. ভিক্খুস্স ভিক্খুনিযা সিক্খমানায সামণেৰস্স সামণেৰিযা মাতুযা চ পিতুস্স চা’’তি (মহাৱ. ১৯৮) ৱচনতো ‘‘গিলানানং এতেসং ভিক্খুআদীনং সহধম্মিকানং মাতাপিতূনঞ্চ গিলানানংযেৱ গিলানভত্তং ৱা গিলানুপট্ঠাকভত্তং ৱা ভেসজ্জং ৱা পৰিযেসিস্সামি, পুচ্ছিস্সামি ৱা উপট্ঠহিস্সামি ৱা’’তি ইমিনা কাৰণেন অপ্পহিতেপি গন্তব্বং, পগেৱ পহিতে. অন্ধকট্ঠকথাযং পন ‘‘যে মাতাপিতূনং উপট্ঠাকা ঞাতকা ৱা অঞ্ঞাতকা ৱা, তেসম্পি অপ্পহিতে গন্তুং ৱট্টতী’’তি ৱুত্তং, তং নেৱ অট্ঠকথাযং, ন পাড়িযং ৱুত্তং, তস্মা ন গহেতব্বং.

সচে পন ভিক্খুনো ভাতা ৱা অঞ্ঞো ৱা ঞাতকো গিলানো হোতি, সো চে ভিক্খুস্স সন্তিকে দূতং পহিণেয্য ‘‘অহং গিলানো, আগচ্ছতু ভদন্তো, ইচ্ছামি ভদন্তস্স আগত’’ন্তি, গন্তব্বং সত্তাহকৰণীযেন, ন ত্ৱেৱ অপ্পহিতে. সচে একস্মিং ৱিহাৰে ভিক্খূহি সদ্ধিং ৱসন্তো ভিক্খুভত্তিকো গিলানো হোতি, সো চে ভিক্খূনং সন্তিকে দূতং পহিণেয্য ‘‘অহং গিলানো, আগচ্ছন্তু ভিক্খূ, ইচ্ছামি ভিক্খূনং আগত’’ন্তি, গন্তব্বং সত্তাহকৰণীযেন, ন ত্ৱেৱ অপ্পহিতে.

সচে ভিক্খুস্স ভিক্খুনিযা সিক্খমানায সামণেৰস্স সামণেৰিযা অনভিৰতি ৱা কুক্কুচ্চং ৱা দিট্ঠিগতং ৱা উপ্পন্নং হোতি, গন্তব্বং সত্তাহকৰণীযেন অপ্পহিতেপি ‘‘অনভিৰতিং ৱূপকাসেস্সামি ৱা ৱূপকাসাপেস্সামি ৱা কুম্কুচ্চং ৱিনোদেস্সামি ৱা ৱিনোদাপেস্সামি ৱা দিট্ঠিগতং ৱিৱেচেস্সামি ৱা ৱিৱেচাপেস্সামি ৱা ধম্মকথং ৱা কৰিস্সামী’’তি, পগেৱ পহিতে. সচে কোচি ভিক্খু গৰুধম্মং অজ্ঝাপন্নো হোতি পৰিৱাসাৰহো মূলাযপটিকস্সনাৰহো মানত্তাৰহো অব্ভানাৰহো ৱা, অপ্পহিতেপি গন্তব্বং ‘‘পৰিৱাসদানাদীসু উস্সুক্কং আপজ্জিস্সামি, অনুস্সাৱেস্সামি, গণপূৰকো ৱা ভৱিস্সামী’’তি, পগেৱ পহিতে. ভিক্খুনিযাপি মানত্তাৰহায মূলাযপটিকস্সনাৰহায অব্ভানাৰহায ৱা এসেৱ নযো. সচে সামণেৰো উপসম্পজ্জিতুকামো হোতি, ৱস্সং ৱা পুচ্ছিতুকামো, সিক্খমানা ৱা উপসম্পজ্জিতুকামা হোতি, সিক্খা ৱাস্সা কুপিতা, সামণেৰী ৱা সিক্খা সমাদিযিতুকামা হোতি, ৱস্সং ৱা পুচ্ছিতুকামা, অপ্পহিতেপি গন্তব্বং, পগেৱ পহিতে.

সচে ভিক্খুস্স ভিক্খুনিযা ৱা সঙ্ঘো কম্মং কাতুকামো হোতি, তজ্জনীযং ৱা নিযস্সং ৱা পব্বাজনীযং ৱা পটিসাৰণীযং ৱা উক্খেপনীযং ৱা, অপ্পহিতেপি গন্তব্বং, পগেৱ পহিতে ‘‘কিং নু খো সঙ্ঘো কম্মং ন কৰেয্য, লহুকায ৱা পৰিণামেয্যা’’তি. সচেপি কতংযেৱ হোতি কম্মং, অপ্পহিতেপি গন্তব্বং ‘‘কিং নু খো সম্মা ৱত্তেয্য, লোমং পাতেয্য, নেত্থাৰং ৱত্তেয্য, সঙ্ঘো তং কম্মং পটিপ্পস্সম্ভেয্যা’’তি.

১৮১. ‘‘অনুজানামি, ভিক্খৱে, সঙ্ঘকৰণীযেন গন্তু’’ন্তি (মহাৱ. ১৯৯) ৱচনতো সেনাসনপটিবদ্ধসঙ্ঘকৰণীযেনপি গন্তুং ৱট্টতি. এত্থ (মহাৱ. অট্ঠ. ১৯৯) হি যং কিঞ্চি উপোসথাগাৰাদীসু সেনাসনেসু চেতিযছত্তৱেদিকাদীসু ৱা কত্তব্বং, অন্তমসো ভিক্খুনো পুগ্গলিকসেনাসনম্পি সব্বং সঙ্ঘকৰণীযমেৱাতি অধিপ্পেতং, তস্মা তস্স নিপ্ফাদনত্থং দব্বসম্ভাৰাদীনি ৱা আহৰিতুং ৱড্ঢকীপভুতীনং ভত্তৱেতনাদীনি ৱা দাতুং গন্তব্বং. অপিচেত্থ অযম্পি পাড়িমুত্তকনযো ৱেদিতব্বো – ধম্মস্সৱনত্থায অনিমন্তিতেন গন্তুং ন ৱট্টতি, সচে একস্মিং মহাৱাসে পঠমংযেৱ কতিকা কতা হোতি ‘‘অসুকদিৱসং নাম সন্নিপতিতব্ব’’ন্তি, নিমন্তিতোযেৱ নাম হোতি, গন্তুং ৱট্টতি. ‘‘ভণ্ডকং ধোৱিস্সামী’’তি গন্তুং ন ৱট্টতি. সচে পন আচৰিযুপজ্ঝাযা পহিণন্তি, ৱট্টতি. নাতিদূৰে ৱিহাৰো হোতি, ‘‘তত্থ গন্ত্ৱা অজ্জেৱ আগমিস্সামী’’তি সম্পাপুণিতুং ন সক্কোতি, ৱট্টতি. উদ্দেসপৰিপুচ্ছাদীনং অত্থাযপি গন্তুং ন লভতি, ‘‘আচৰিযং পন পস্সিস্সামী’’তি গন্তুং লভতি. সচে নং আচৰিযো ‘‘অজ্জ মা গচ্ছা’’তি ৱদতি, ৱট্টতি, উপট্ঠাককুলং ৱা ঞাতিকুলং ৱা দস্সনায গন্তুং ন লভতি.

সচে ভিক্খূসু ৱস্সূপগতেসু গামো চোৰেহি ৱুট্ঠাতি, তত্থ কিং কাতব্বন্তি? যেন গামো, তেন গন্তব্বং. সচে গামো দ্ৱিধা ভিজ্জতি, যত্থ বহুতৰা মনুস্সা, তত্থ গন্তব্বং. সচে বহুতৰা অস্সদ্ধা হোন্তি অপ্পসন্না, যত্থ সদ্ধা পসন্না, তত্থ গন্তব্বং. এত্থ চ সচে গামো অৱিদূৰগতো হোতি, তত্থ পিণ্ডায চৰিত্ৱা ৱিহাৰমেৱ আগন্ত্ৱা ৱসিতব্বং. সচে দূৰং গতো, সত্তাহৱাৰেন অৰুণো উট্ঠাপেতব্বো, ন সক্কা চে হোতি, তত্থেৱ সভাগট্ঠানে ৱসিতব্বং. সচে মনুস্সা যথাপৱত্তানি সলাকভত্তাদীনি দেন্তি, ‘‘ন মযং তস্মিং ৱিহাৰে ৱসিম্হা’’তি ৱত্তব্বা. ‘‘মযং ৱিহাৰস্স ৱা পাসাদস্স ৱা ন দেম, তুম্হাকং দেম, যত্থ কত্থচি ৱসিত্ৱা ভুঞ্জথা’’তি ৱুত্তে পন যথাসুখং ভুঞ্জিতব্বং, তেসংযেৱ তং পাপুণাতি. ‘‘তুম্হাকং ৱসনট্ঠানে পাপুণাপেত্ৱা ভুঞ্জথা’’তি ৱুত্তে পন যত্থ ৱসন্তি, তত্থ নেত্ৱা ৱস্সগ্গেন পাপুণাপেত্ৱা ভুঞ্জিতব্বং. সচে পৱাৰিতকালে ৱস্সাৱাসিকং দেন্তি, যদি সত্তাহৱাৰেন অৰুণং উট্ঠাপযিংসু, গহেতব্বং. ছিন্নৱস্সেহি পন ‘‘ন মযং তত্থ ৱসিম্হ, ছিন্নৱস্সা ময’’ন্তি ৱত্তব্বং. যদি ‘‘যেসং অম্হাকং সেনাসনং পাপিতং, তে গণ্হন্তূ’’তি ৱদন্তি, গহেতব্বং. যং পন ‘‘ৱিহাৰে উপনিক্খিত্তকং মা ৱিনস্সী’’তি ইধ আহটং চীৱৰাদিৱেভঙ্গিযভণ্ডং, তং তত্থেৱ গন্ত্ৱা অপলোকেত্ৱা ভাজেতব্বং. ‘‘ইতো অয্যানং চত্তাৰো পচ্চযে দেথা’’তি কপ্পিযকাৰকানং দিন্নে খেত্তৱত্থুআদিকে তত্ৰুপ্পাদেপি এসেৱ নযো. সঙ্ঘিকঞ্হি ৱেভঙ্গিযভণ্ডং অন্তোৱিহাৰে ৱা বহিসীমায ৱা হোতু, বহিসীমায ঠিতানং অপলোকেত্ৱা ভাজেতুং ন ৱট্টতি. উভযত্থ ঠিতম্পি পন অন্তোসীমায ঠিতানং অপলোকেত্ৱা ভাজেতুং ৱট্টতিযেৱ.

সচে পন ৱস্সূপগতা ভিক্খূ ৱাড়েহি উব্বাড়্হা হোন্তি, গণ্হন্তিপি পৰিপাতেন্তিপি, সৰীসপেহি ৱা উব্বাড়্হা হোন্তি, ডংসন্তিপি পৰিপাতেন্তিপি, চোৰেহি ৱা উব্বাড়্হা হোন্তি, ৱিলুম্পন্তিপি আকোটেন্তিপি, পিসাচেহি ৱা উব্বাড়্হা হোন্তি, আৱিসন্তিপি হনন্তিপি, ‘‘এসেৱ অন্তৰাযো’’তি পক্কমিতব্বং, নত্থি ৱস্সচ্ছেদে আপত্তি. সচে গামো অগ্গিনা ৱা দড্ঢো হোতি, উদকেন ৱা ৱুড়্হো. ভিক্খূ পিণ্ডকেন কিলমন্তি, ‘‘এসেৱ অন্তৰাযো’’তি পক্কমিতব্বং, ৱস্সচ্ছেদে অনাপত্তি. সেনাসনং অগ্গিনা ৱা দড্ঢং হোতি, উদকেন ৱা ৱুড়্হং, ভিক্খূ সেনাসনেন কিলমন্তি, ‘‘এসেৱ অন্তৰাযো’’তি পক্কমিতব্বং, ৱস্সচ্ছেদে অনাপত্তি. সচে ৱস্সূপগতা ভিক্খূ ন লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, ‘‘এসেৱ অন্তৰাযো’’তি পক্কমিতব্বং. সচে লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, ন লভন্তি সপ্পাযানি ভোজনানি, ‘‘এসেৱ অন্তৰাযো’’তি পক্কমিতব্বং. সচেপি লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, লভন্তি সপ্পাযানি ভোজনানি, ন লভন্তি সপ্পাযানি ভেসজ্জানি, ‘‘এসেৱ অন্তৰাযো’’তি পক্কমিতব্বং. সচে লভন্তি লূখস্স ৱা পণীতস্স ৱা ভোজনস্স যাৱদত্থং পাৰিপূৰিং, লভন্তি সপ্পাযানি ভোজনানি, লভন্তি সপ্পাযানি ভেসজ্জানি, ন লভন্তি পতিৰূপং উপট্ঠাকং, ‘‘এসেৱ অন্তৰাযো’’তি পক্কমিতব্বং, সব্বত্থ ৱস্সচ্ছেদে অনাপত্তি.

সচে পন ৱস্সূপগতং ভিক্খুং ইত্থী নিমন্তেতি ‘‘এহি, ভন্তে, হিৰঞ্ঞং ৱা তে দেমি, সুৱণ্ণং ৱা খেত্তং ৱা ৱত্থুং ৱা গাৱুং ৱা গাৱিং ৱা দাসং ৱা দাসিং ৱা তে দেমি, ধীতৰং ৱা তে দেমি ভৰিযত্থায, অহং ৱা তে ভৰিযা হোমি, অঞ্ঞং ৱা তে ভৰিযং আনেমী’’তি, তত্ৰ চে ভিক্খুনো এৱং হোতি ‘‘লহুপৰিৱত্তং খো চিত্তং ৱুত্তং ভগৱতা, সিযাপিমে ব্ৰহ্মচৰিযস্স অন্তৰাযো’’তি, পক্কমিতব্বং, নত্থি ৱস্সচ্ছেদে আপত্তি. ৱুত্তনযেনেৱ ৱেসী ৱা নিমন্তেতি, থুল্লকুমাৰী ৱা নিমন্তেতি, পণ্ডকো ৱা নিমন্তেতি, ঞাতকা ৱা নিমন্তেন্তি, ৰাজানো ৱা নিমন্তেন্তি, চোৰা ৱা নিমন্তেন্তি, ধুত্তা ৱা নিমন্তেন্তি, এসেৱ নযো. সচে ৱস্সূপগতো ভিক্খু পস্সতি অসামিকং নিধিং, তত্ৰ চে ভিক্খুনো এৱং হোতি ‘‘লহুপৰিৱত্তং খো চিত্তং ৱুত্তং ভগৱতা, সিযাপি মে ব্ৰহ্মচৰিযস্স অন্তৰাযো’’তি, পক্কমিতব্বং, অনাপত্তি ৱস্সচ্ছেদে.

সচে ৱস্সূপগতো ভিক্খু পস্সতি সম্বহুলে ভিক্খূ সঙ্ঘভেদায পৰক্কমন্তে, সুণাতি ৱা ‘‘সম্বহুলা ভিক্খূ সঙ্ঘভেদায পৰক্কমন্তী’’তি, তত্ৰ চে ভিক্খুনো এৱং হোতি ‘‘গৰুকো খো সঙ্ঘভেদো ৱুত্তো ভগৱতা, মা মযি সম্মুখীভূতে সঙ্ঘো ভিজ্জী’’তি, পক্কমিতব্বং, অনাপত্তি ৱস্সচ্ছেদে. সচে ৱস্সূপগতো ভিক্খু সুণাতি ‘‘অসুকস্মিং কিৰ আৱাসে সম্বহুলা ভিক্খূ সঙ্ঘভেদায পৰক্কমন্তী’’তি, তত্ৰ চে ভিক্খুনো এৱং হোতি ‘‘তে চ খো মে ভিক্খূ মিত্তা, ত্যাহং ৱক্খামি ‘গৰুকো খো, আৱুসো, সঙ্ঘভেদো ৱুত্তো ভগৱতা, মা আযস্মন্তানং সঙ্ঘভেদো ৰুচ্চিত্থা’তি, কৰিস্সন্তি মে ৱচনং সুস্সূসিস্সন্তি, সোতং ওদহিস্সন্তী’’তি, পক্কমিতব্বং, অনাপত্তি ৱস্সচ্ছেদে, ভিন্নে পন সঙ্ঘে গন্ত্ৱা কৰণীযং নত্থি.

সচে পন কোচি ভিক্খু ‘‘ইমং তেমাসং ইধ ৱস্সং ৱসথা’’তি ৱুত্তে পটিস্সুণিত্ৱা ৱিসংৱাদেতি, দুক্কটং. ন কেৱলং তস্সেৱ পটিস্সৱস্স ৱিসংৱাদে দুক্কটং, ‘‘ইমং তেমাসং ভিক্খং গণ্হথ, উভোপি মযং ইধ ৱস্সং ৱসিস্সাম, একতো উদ্দিসাপেস্সামা’’তি এৱমাদিনাপি তস্স তস্স পটিস্সৱস্স ৱিসংৱাদে দুক্কটং. তঞ্চ খো পঠমং সুদ্ধচিত্তস্স পচ্ছা ৱিসংৱাদনপচ্চযা, পঠমম্পি অসুদ্ধচিত্তস্স পন পটিস্সৱে পাচিত্তিযং. ৱিসংৱাদে দুক্কটন্তি পাচিত্তিযেন সদ্ধিং দুক্কটং যুজ্জতি.

১৮২. ৱস্সূপগতেহি (চূড়ৱ. অট্ঠ. ৩১৮) অন্তোৱস্সে নিবদ্ধৱত্তং ঠপেত্ৱা ৱস্সূপগতা ভিক্খূ ‘‘সম্মুঞ্জনিযো বন্ধথা’’তি ৱত্তব্বা. সুলভা চে দণ্ডকা চেৱ সলাকাযো চ হোন্তি, এককেন ছ পঞ্চ মুট্ঠিসম্মুঞ্জনিযো দ্ৱে তিস্সো যট্ঠিসম্মুঞ্জনিযো ৱা বন্ধিতব্বা. দুল্লভা হোন্তি, দ্ৱে তিস্সো মুট্ঠিসম্মুঞ্জনিযো একা যট্ঠিসম্মুঞ্জনী বন্ধিতব্বা. সামণেৰেহি পঞ্চ পঞ্চ উক্কা ৱা কোট্টেতব্বা, ৱসনট্ঠানেসু কসাৱপৰিভণ্ডং কাতব্বং. ৱত্তং কৰোন্তেহি চ ন উদ্দিসিতব্বং ন উদ্দিসাপেতব্বং, ন সজ্ঝাযো কাতব্বো, ন পব্বাজেতব্বং ন উপসম্পাদেতব্বং, ন নিস্সযো দাতব্বো, ন ধম্মস্সৱনং কাতব্বং. সব্বেৱ হি এতে পপঞ্চা, নিপ্পপঞ্চা হুত্ৱা সমণধম্মমেৱ কৰিস্সামাতি ৱা সব্বে তেৰস ধুতঙ্গানি সমাদিযন্তু, সেয্যং অকপ্পেত্ৱা ঠানচঙ্কমেহি ৱীতিনামেন্তু, মূগব্বতং গণ্হন্তু, সত্তাহকৰণীযেন গতাপি ভাজনীযভণ্ডং লভন্তূতি ৱা এৱৰূপং অধম্মিকৱত্তং ন কাতব্বং. এৱং পন কাতব্বং – পৰিযত্তিধম্মো নাম তিৱিধম্পি সদ্ধম্মং পতিট্ঠাপেতি, তস্মা সক্কচ্চং উদ্দিসথ উদ্দিসাপেথ, সজ্ঝাযং কৰোথ, পধানঘৰে ৱসন্তানং সঙ্ঘট্টনং অকত্ৱা অন্তোৱিহাৰে নিসীদিত্ৱা উদ্দিসথ উদ্দিসাপেথ, সজ্ঝাযং কৰোথ, ধম্মস্সৱনং সমিদ্ধং কৰোথ, পব্বাজেন্তা সোধেত্ৱা পব্বাজেথ, সোধেত্ৱা উপসম্পাদেথ, সোধেত্ৱা নিস্সযং দেথ. একোপি হি কুলপুত্তো পব্বজ্জঞ্চ উপসম্পদঞ্চ লভিত্ৱা সকলং সাসনং পতিট্ঠাপেতি, অত্তনো থামেন যত্তকানি সক্কোথ, তত্তকানি ধুতঙ্গানি সমাদিযথ, অন্তোৱস্সং নামেতং সকলদিৱসং ৰত্তিযা চ পঠমযামপচ্ছিমযামেসু অপ্পমত্তেহি ভৱিতব্বং, ৱীৰিযং আৰভিতব্বং. পোৰাণকমহাথেৰাপি সব্বপলিবোধে ছিন্দিত্ৱা অন্তোৱস্সে একচাৰিযৱত্তং পূৰযিংসু, ভস্সে মত্তং জানিত্ৱা দসৱত্থুকথং দসঅসুভদসানুস্সতিঅট্ঠতিংসাৰম্মণকথং কাতুং ৱট্টতি, আগন্তুকানং ৱত্তং কাতুং, সত্তাহকৰণীযেন গতানং অপলোকেত্ৱা দাতুং ৱট্টতীতি এৱৰূপং ৱত্তং কাতব্বং.

অপিচ ভিক্খূ ওৱদিতব্বা ‘‘ৱিগ্গাহিকপিসুণফৰুসৱচনানি মা ৱদথ, দিৱসে দিৱসে সীলানি আৱজ্জেন্তা চতুৰাৰক্খং অহাপেন্তা মনসিকাৰবহুলা ৱিহৰথা’’তি. দন্তকট্ঠখাদনৱত্তং আচিক্খিতব্বং, চেতিযং ৱা বোধিং ৱা ৱন্দন্তেন গন্ধমালং ৱা পূজেন্তেন পত্তং ৱা থৱিকায পক্খিপন্তেন ন কথেতব্বং, ভিক্খাচাৰৱত্তং আচিক্খিতব্বং, অন্তোগামে মনুস্সেহি সদ্ধিং পচ্চযসঞ্ঞুত্তকথা ৱা ৱিসভাগকথা ৱা ন কথেতব্বা, ৰক্খিতিন্দ্ৰিযেহি ভৱিতব্বং, খন্ধকৱত্তঞ্চ সেখিযৱত্তঞ্চ পূৰেতব্বন্তি এৱৰূপা বহুকাপি নিয্যানিককথা আচিক্খিতব্বাতি.

ইতি পাড়িমুত্তকৱিনযৱিনিচ্ছযসঙ্গহে

ৱস্সূপনাযিকৱিনিচ্ছযকথা সমত্তা.