২২. পব্বজ্জাৱিনিচ্ছযকথা

১২৩. পব্বজ্জাতি এত্থ পন পব্বজ্জাপেক্খং কুলপুত্তং পব্বাজেন্তেন যে পাড়িযং ‘‘ন ভিক্খৱে পঞ্চহি আবাধেহি ফুট্ঠো পব্বাজেতব্বো’’তিআদিনা (মহাৱ. ৮৯) পটিক্খিত্তা পুগ্গলা, তে ৱজ্জেত্ৱা পব্বজ্জাদোসৱিৰহিতো পুগ্গলো পব্বাজেতব্বো. তত্ৰাযং ৱিনিচ্ছযো (মহাৱ. অট্ঠ. ৮৮) – কুট্ঠং গণ্ডো কিলাসো সোসো অপমাৰোতি ইমেহি পঞ্চহি আবাধেহি ফুট্ঠো ন পব্বাজেতব্বো, পব্বাজেন্তো পন দুক্কটং আপজ্জতি ‘‘যো পব্বাজেয্য, আপত্তি দুক্কটস্সা’’তি ৱুত্তত্তা. তত্থ কুট্ঠন্তি ৰত্তকুট্ঠং ৱা হোতু কাড়কুট্ঠং ৱা, যং কিঞ্চি কিটিভদদ্দউকচ্ছুআদিপ্পভেদম্পি সব্বং কুট্ঠমেৱাতি ৱুত্তং. তঞ্চে নখপিট্ঠিপ্পমাণম্পি ৱড্ঢনকপক্খে ঠিতং হোতি, ন পব্বাজেতব্বো. সচে পন নিৱাসনপাৱুৰণেহি পকতিপটিচ্ছন্নট্ঠানে নখপিট্ঠিপ্পমাণং অৱড্ঢনকপক্খে ঠিতং হোতি, ৱট্টতি. ‘‘মুখে পন হত্থপাদপিট্ঠীসু ৱা সচেপি অৱড্ঢনকপক্খে ঠিতং, নখপিট্ঠিতো চ খুদ্দকতৰম্পি ন ৱট্টতিযেৱা’’তি কুৰুন্দিযং ৱুত্তং. তিকিচ্ছাপেত্ৱা পব্বাজেন্তেনপি পকতিৱণ্ণে জাতেযেৱ পব্বাজেতব্বো, গোধাপিট্ঠিসদিসচুণ্ণওকিৰণসৰীৰম্পি পব্বাজেতুং ন ৱট্টতি.

গণ্ডোতি মেদগণ্ডো ৱা হোতু অঞ্ঞো ৱা, যো কোচি কোলট্ঠিমত্তকোপি চে ৱড্ঢনকপক্খে ঠিতো গণ্ডো হোতি, ন পব্বাজেতব্বো. পটিচ্ছন্নট্ঠানে পন কোলট্ঠিমত্তে অৱড্ঢনকপক্খে ঠিতে ৱট্টতি, মুখাদিকে অপ্পটিচ্ছন্নট্ঠানে অৱড্ঢনকপক্খে ঠিতেপি ন ৱট্টতি. তিকিচ্ছাপেত্ৱা পব্বাজেন্তেনপি সৰীৰং সচ্ছৱিং কাৰাপেত্ৱা পব্বাজেতব্বো. উণ্ণিগণ্ডা নাম হোন্তি গোথনকা ৱিয অঙ্গুলিকা ৱিয চ তত্থ তত্থ লম্বন্তি, এতেপি গণ্ডাযেৱ, তেসু সতি পব্বাজেতুং ন ৱট্টতি. দহৰকালে খীৰপীড়কা যোব্বন্নকালে চ মুখে খৰপীড়কা নাম হোন্তি, মহল্লককালে নস্সন্তি, ন তা গণ্ডসঙ্খ্যং গচ্ছন্তি, তাসু সতি পব্বাজেতুং ৱট্টতি. অঞ্ঞা পন সৰীৰে খৰপীড়কা নাম, অপৰা পদুমকণ্ণিকা নাম হোন্তি, অঞ্ঞা সাসপবীজকা নাম সাসপমত্তাযেৱ সকলসৰীৰং ফৰন্তি, সব্বা কুট্ঠজাতিকাৱ, তাসু সতি ন পব্বাজেতব্বো.

কিলাসোতি ন ভিজ্জনকং ন পগ্ঘৰণকং পদুমপুণ্ডৰীকপত্তৱণ্ণং কুট্ঠং. যেন গুন্নং ৱিয সবলং সৰীৰং হোতি, তস্মিং কুট্ঠে ৱুত্তনযেনেৱ ৱিনিচ্ছযো ৱেদিতব্বো. সোসোতি সোসব্যাধি. তস্মিং সতি ন পব্বাজেতব্বো. অপমাৰোতি পিত্তুম্মাদো ৱা যক্খুম্মাদো ৱা. তত্থ পুব্বৱেৰিকেন অমনুস্সেন গহিতো দুত্তিকিচ্ছো হোতি, অপ্পমত্তকেপি পন অপমাৰে সতি ন পব্বাজেতব্বো.

১২৪. ‘‘ন, ভিক্খৱে, ৰাজভটো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯০) ৱচনতো ৰাজভটোপি ন পব্বাজেতব্বো. এত্থ চ অমচ্চো ৱা হোতু মহামত্তো ৱা সেৱকো ৱা কিঞ্চি ঠানন্তৰং পত্তো ৱা অপ্পত্তো ৱা, যো কোচি ৰঞ্ঞো ভত্তৱেতনভটো, সব্বো ৰাজভটোতি সঙ্খ্যং গচ্ছতি, সো ন পব্বাজেতব্বো. তস্স পন পুত্তনত্তভাতুকা যে ৰাজতো ভত্তৱেতনং ন গণ্হন্তি, তে পব্বাজেতুং ৱট্টতি. যো পন ৰাজতো লদ্ধং নিবদ্ধভোগং ৱা মাসসংৱচ্ছৰপৰিব্বযং ৱা ৰঞ্ঞোযেৱ নিয্যাদেতি, পুত্তভাতুকে ৱা তং ঠানং সম্পটিচ্ছাপেত্ৱা ৰাজানং ‘‘ন দানাহং দেৱস্স ভটো’’তি আপুচ্ছতি, যেন ৱা যংকাৰণা ৱেতনং গহিতং, তং কম্মং কতং হোতি, যো ৱা ‘‘পব্বজস্সূ’’তি ৰঞ্ঞা অনুঞ্ঞাতো হোতি, তম্পি পব্বাজেতুং ৱট্টতি.

১২৫. চোৰোপি ধজবন্ধো ন পব্বাজেতব্বো ‘‘ন, ভিক্খৱে, ধজবন্ধো চোৰো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯১) ৱুত্তত্তা. তত্থ ধজং বন্ধিত্ৱা ৱিয ৱিচৰতীতি ধজবন্ধো, মূলদেৱাদযো ৱিয লোকে পাকটোতি ৱুত্তং হোতি. তস্মা যো গামঘাতং ৱা পন্থদুহনং ৱা নগৰে সন্ধিচ্ছেদাদিকম্মং ৱা কৰোন্তো ৱিচৰতি, পঞ্ঞাযতি চ ‘‘অসুকো নাম ইদং ইদং কৰোতী’’তি, সো ন পব্বাজেতব্বো. যো পন ৰাজপুত্তো ৰজ্জং পত্থেন্তো গামঘাতাদীনি কৰোতি, সো পব্বাজেতব্বো. ৰাজানো হি তস্মিং পব্বজিতে তুস্সন্তি, সচে পন ন তুস্সন্তি, ন পব্বাজেতব্বো. পুব্বে মহাজনে পাকটো চোৰো পচ্ছা চোৰকম্মং পহায পঞ্চ সীলানি সমাদিযতি, তঞ্চে মনুস্সা এৱং জানন্তি, পব্বাজেতব্বো. যে পন অম্বলবুজাদিচোৰকা সন্ধিচ্ছেদাদিচোৰা এৱ ৱা অদিস্সমানা থেয্যং কৰোন্তি, পচ্ছাপি ‘‘ইমিনা নাম ইদং কত’’ন্তি ন পঞ্ঞাযন্তি, তেপি পব্বাজেতুং ৱট্টতি.

১২৬. কাৰভেদকো পন চোৰো ন পব্বাজেতব্বো ‘‘ন, ভিক্খৱে, কাৰভেদকো চোৰো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯২) ৱুত্তত্তা. তত্থ কাৰো ৱুচ্চতি বন্ধনাগাৰং. ইধ পন অন্দুবন্ধনং ৱা হোতু সঙ্খলিকবন্ধনং ৱা ৰজ্জুবন্ধনং ৱা গামবন্ধনং ৱা নিগমবন্ধনং ৱা নগৰবন্ধনং ৱা পুৰিসগুত্তি ৱা জনপদবন্ধনং ৱা দীপবন্ধনং ৱা, যো এতেসু যং কিঞ্চি বন্ধনং ভিন্দিত্ৱা ৱা ছিন্দিত্ৱা ৱা মুঞ্চিত্ৱা ৱা ৱিৱৰিত্ৱা ৱা অপস্সমানানং ৱা পলাযতি, সো কাৰভেদকোতি সঙ্খ্যং গচ্ছতি. তস্মা ঈদিসো কাৰভেদকো চোৰো দীপবন্ধনং ভিন্দিত্ৱা দীপন্তৰং গতোপি ন পব্বাজেতব্বো. যো পন ন চোৰো, কেৱলং হত্থকম্মং অকৰোন্তো ‘‘এৱং নো অপলাযন্তো কৰিস্সতী’’তি ৰাজযুত্তাদীহি বদ্ধো, সো কাৰং ভিন্দিত্ৱা পলাতোপি পব্বাজেতব্বো. যো পন গামনিগমপট্টনাদীনি কেণিযা গহেত্ৱা তং অসম্পাদেন্তো বন্ধনাগাৰং পৱেসিতো হোতি, সোপি পলাযিত্ৱা আগতো ন পব্বাজেতব্বো. যোপি কসিকম্মাদীহি ধনং সম্পাদেত্ৱা জীৱন্তো ‘‘নিধানং ইমিনা লদ্ধ’’ন্তি পেসুঞ্ঞং উপসংহৰিত্ৱা কেনচি বন্ধাপিতো হোতি, তং তত্থেৱ পব্বাজেতুং ন ৱট্টতি, পলাযিত্ৱা গতং পন গতট্ঠানে পব্বাজেতুং ৱট্টতি.

১২৭. ‘‘ন, ভিক্খৱে, লিখিতকো চোৰো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯৩) ৱচনতো পন লিখিতকো চোৰো ন পব্বাজেতব্বো. তত্থ লিখিতকো নাম যো কোচি চোৰিকং ৱা অঞ্ঞং ৱা গৰুং ৰাজাপৰাধং কত্ৱা পলাতো, ৰাজা চ নং পণ্ণে ৱা পোত্থকে ৱা ‘‘ইত্থন্নামো যত্থ দিস্সতি, তত্থ গহেত্ৱা মাৰেতব্বো’’তি ৱা ‘‘হত্থপাদাদীনি অস্স ছিন্দিতব্বানী’’তি ৱা ‘‘এত্তকং নাম দণ্ডং আহৰাপেতব্বো’’তি ৱা লিখাপেতি, অযং লিখিতকো নাম, সো ন পব্বাজেতব্বো.

১২৮. কসাহতো কতদণ্ডকম্মোপি ন পব্বাজেতব্বো ‘‘ন, ভিক্খৱে, কসাহতো কতদণ্ডকম্মো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯৪) ৱচনতো. এত্থ পন যো ৱচনপেসনাদীনি অকৰোন্তো হঞ্ঞতি, ন সো কতদণ্ডকম্মো. যো পন কেণিযা ৱা অঞ্ঞথা ৱা কিঞ্চি গহেত্ৱা খাদিত্ৱা পুন দাতুং অসক্কোন্তো ‘‘অযমেৱ তে দণ্ডো হোতূ’’তি কসাহি হঞ্ঞতি, অযমেৱ কসাহতো কতদণ্ডকম্মো. সো চ কসাহি ৱা হতো হোতু অড্ঢদণ্ডকাদীনং ৱা অঞ্ঞতৰেন, যাৱ অল্লৱণো হোতি, ন তাৱ পব্বাজেতব্বো, ৱণে পন পাকতিকে কত্ৱা পব্বাজেতব্বো. সচে পন জাণূহি ৱা কপ্পৰেহি ৱা নাড়িকেৰপাসাণাদীহি ৱা ঘাতেত্ৱা মুত্তো হোতি, সৰীৰে চস্স গণ্ঠিযো পঞ্ঞাযন্তি, ন পব্বাজেতব্বো, ফাসুকং কত্ৱা এৱ গণ্ঠীসু সন্নিসিন্নাসু পব্বাজেতব্বো.

১২৯. লক্খণাহতো পন কতদণ্ডকম্মো ন পব্বাজেতব্বো ‘‘ন, ভিক্খৱে, লক্খণহতো কতদণ্ডকম্মো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯৫) ৱচনতো. এত্থপি কতদণ্ডকম্মভাৱো পুৰিমনযেনেৱ ৱেদিতব্বো. যস্স পন নলাটে ৱা ঊৰুআদীসু ৱা তত্তেন লোহেন লক্খণং আহতং হোতি, সো সচে ভুজিস্সো, যাৱ অল্লৱণো হোতি, তাৱ ন পব্বাজেতব্বো. সচেপিস্স ৱণা ৰুড়্হা হোন্তি ছৱিযা সমপৰিচ্ছেদা, লক্খণং ন পঞ্ঞাযতি, তিমণ্ডলং নিৱত্থস্স উত্তৰাসঙ্গে কতে পটিচ্ছন্নোকাসে চে হোতি, পব্বাজেতুং ৱট্টতি, অপ্পটিচ্ছন্নোকাসে চে, ন ৱট্টতি.

১৩০. ‘‘ন, ভিক্খৱে, ইণাযিকো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯৬) ৱচনতো ইণাযিকোপি ন পব্বাজেতব্বো. তত্থ ইণাযিকো নাম যস্স পিতিপিতামহেহি ৱা ইণং গহিতং হোতি, সযং ৱা ইণং গহিতং হোতি, যং ৱা আঠপেত্ৱা মাতাপিতূহি কিঞ্চি গহিতং হোতি, সো তং ইণং পৰেসং ধাৰেতীতি ইণাযিকো. যং পন অঞ্ঞে ঞাতকা আঠপেত্ৱা কিঞ্চি গণ্হন্তি, সো ন ইণাযিকো. ন হি তে তং আঠপেতুং ইস্সৰা, তস্মা তং পব্বাজেতুং ৱট্টতি, ইতৰং ন ৱট্টতি. সচে পনস্স ঞাতিসালোহিতা ‘‘মযং দস্সাম, পব্বাজেথ ন’’ন্তি ইণং অত্তনো ভাৰং কৰোন্তি, অঞ্ঞো ৱা কোচি তস্স আচাৰসম্পত্তিং দিস্ৱা ‘‘পব্বাজেথ নং, অহং ইণং দস্সামী’’তি ৱদতি, পব্বাজেতুং ৱট্টতি. তেসু অসতি ভিক্খুনা তথাৰূপস্স উপট্ঠাকস্সপি আৰোচেতব্বং ‘‘সহেতুকো সত্তো ইণপলিবোধেন ন পব্বজতী’’তি. সচে সো পটিপজ্জতি, পব্বাজেতব্বো. সচেপি অত্তনো কপ্পিযভণ্ডং অত্থি, ‘‘এতং দস্সামী’’তি পব্বাজেতব্বো. সচে পন নেৱ ঞাতকাদযো পটিপজ্জন্তি, ন অত্তনো ধনং অত্থি, ‘‘পব্বাজেত্ৱা ভিক্খায চৰিত্ৱা মোচেস্সামী’’তি পব্বাজেতুং ন ৱট্টতি. সচে পব্বাজেতি, দুক্কটং. পলাতোপি আনেত্ৱা দাতব্বো. নো চে দেতি, সব্বং ইণং গীৱা হোতি. অজানিত্ৱা পব্বাজযতো অনাপত্তি, পস্সন্তেন পন আনেত্ৱা ইণসামিকানং দস্সেতব্বো, অপস্সন্তস্স গীৱা ন হোতি.

সচে ইণাযিকো অঞ্ঞং দেসং গন্ত্ৱা পুচ্ছিযমানোপি ‘‘নাহং কস্সচি কিঞ্চি ধাৰেমী’’তি ৱত্ৱা পব্বজতি, ইণসামিকো চ তং পৰিযেসন্তো তত্থ গচ্ছতি, দহৰো তং দিস্ৱা পলাযতি, সো থেৰং উপসঙ্কমিত্ৱা ‘‘অযং, ভন্তে, কেন পব্বাজিতো, মম এত্তকং নাম ধনং গহেত্ৱা পলাতো’’তি ৱদতি, থেৰেন ৱত্তব্বং ‘‘মযা, উপাসক, ‘অণণো অহ’ন্তি ৱদন্তো পব্বাজিতো, কিং দানি কৰোমি, পস্স মে পত্তচীৱৰ’’ন্তি. অযং তত্থ সামীচি. পলাতে পন গীৱা ন হোতি. সচে পন নং থেৰস্স সম্মুখাৱ দিস্ৱা ‘‘অযং মম ইণাযিকো’’তি ৱদতি, ‘‘তৱ ইণাযিকং ত্ৱমেৱ জানাহী’’তি ৱত্তব্বো, এৱম্পি গীৱা ন হোতি. সচেপি সো ‘‘পব্বজিতো অযং দানি কুহিং গমিস্সতী’’তি ৱদতি, থেৰেন ‘‘ত্ৱংযেৱ জানাহী’’তি ৱত্তব্বো. এৱম্পিস্স পলাতে গীৱা ন হোতি. সচে পন থেৰো ‘‘কুহিং দানি অযং গমিস্সতি, ইধেৱ অচ্ছতূ’’তি ৱদতি, সো চে পলাযতি, গীৱা হোতি. সচে সো সহেতুকো সত্তো হোতি ৱত্তসম্পন্নো, থেৰেন ‘‘ঈদিসো অয’’ন্তি ৱত্তব্বং. ইণসামিকো চে ‘‘সাধূ’’তি ৱিস্সজ্জেতি, ইচ্চেতং কুসলং, ‘‘উপড্ঢুপড্ঢং দেথা’’তি ৱদতি, দাতব্বং. অপৰেন সমযেন অতিআৰাধকো হোতি, ‘‘সব্বং দেথা’’তি ৱুত্তেপি দাতব্বমেৱ. সচে পন উদ্দেসপৰিপুচ্ছাদীসু কুসলো হোতি বহূপকাৰো ভিক্খূনং, ভিক্খাচাৰৱত্তেন পৰিযেসিত্ৱাপি ইণং দাতব্বমেৱ.

১৩১. দাসোপি ন পব্বাজেতব্বো ‘‘ন, ভিক্খৱে, দাসো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ৯৭) ৱচনতো. তত্থ চত্তাৰো দাসা অন্তোজাতো ধনক্কীতো কৰমৰানীতো সামং দাসব্যং উপগতোতি. তত্থ অন্তোজাতো নাম জাতিযা দাসো ঘৰদাসিযা পুত্তো. ধনক্কীতো নাম মাতাপিতূনং সন্তিকা পুত্তো ৱা সামিকানং সন্তিকা দাসো ৱা ধনং দত্ৱা দাসচাৰিত্তং আৰোপেত্ৱা কীতো. এতে দ্ৱেপি ন পব্বাজেতব্বা. পব্বাজেন্তেন তত্থ তত্থ চাৰিত্তৱসেন অদাসে কত্ৱা পব্বাজেতব্বা. কৰমৰানীতো নাম তিৰোৰট্ঠং ৱিলোপং ৱা কত্ৱা উপলাপেত্ৱা ৱা তিৰোৰট্ঠতো ভুজিস্সমানুসকানি আহৰন্তি, অন্তোৰট্ঠেযেৱ ৱা কতাপৰাধং কিঞ্চি গামং ৰাজা ‘‘ৱিলুম্পথা’’তি চ আণাপেতি, ততো মানুসকানিপি আহৰন্তি, তত্থ সব্বে পুৰিসা দাসা, ইত্থিযো দাসিযো. এৱৰূপো কৰমৰানীতো দাসো যেহি আনীতো, তেসং সন্তিকে ৱসন্তো ৱা বন্ধনাগাৰে বদ্ধো ৱা পুৰিসেহি ৰক্খিযমানো ৱা ন পব্বাজেতব্বো, পলাযিত্ৱা পন গতো গতট্ঠানে পব্বাজেতব্বো. ৰঞ্ঞা তুট্ঠেন ‘‘কৰমৰানীতকে মুঞ্চথা’’তি ৱত্ৱা ৱা সব্বসাধাৰণেন ৱা নযেন বন্ধনমোক্খে কতে পব্বাজেতব্বোৱ.

সামং দাসব্যং উপগতো নাম জীৱিতহেতু ৱা আৰক্খহেতু ৱা ‘‘অহং তে দাসো’’তি সযমেৱ দাসভাৱং উপগতো ৰাজূনং হত্থিঅস্সগোমহিংসগোপকাদযো ৱিয. তাদিসো দাসো ন পব্বাজেতব্বো. ৰঞ্ঞো ৱণ্ণদাসীনং পুত্তা হোন্তি অমচ্চপুত্তসদিসা, তেপি ন পব্বাজেতব্বা. ভুজিস্সিত্থিযো অসঞ্ঞতা ৱণ্ণদাসীহি সদ্ধিং ৱিচৰন্তি, তাসং পুত্তে পব্বাজেতুং ৱট্টতি. সচে সযমেৱ পণ্ণং আৰোপেন্তি, ন ৱট্টতি. ভটিপুত্তগণাদীনং দাসাপি তেহি অদিন্না ন পব্বাজেতব্বা. ৱিহাৰেসু ৰাজূহি আৰামিকদাসা নাম দিন্না হোন্তি, তেপি পব্বাজেতুং ন ৱট্টতি, ভুজিস্সে কত্ৱা পন পব্বাজেতুং ৱট্টতি. মহাপচ্চৰিযং ‘‘অন্তোজাতধনক্কীতকে আনেত্ৱা ভিক্খুসঙ্ঘস্স ‘আৰামিকে দেমা’তি দেন্তি, তক্কং সীসে আসিত্তকসদিসাৱ হোন্তি, তে পব্বাজেতুং ৱট্টতী’’তি ৱুত্তং. কুৰুন্দিযং পন ‘‘আৰামিকং দেমাতি কপ্পিযৱোহাৰেন দেন্তি, যেন কেনচি ৱোহাৰেন দিন্নো হোতু, নেৱ পব্বাজেতব্বো’’তি ৱুত্তং. দুগ্গতমনুস্সা ‘‘সঙ্ঘং নিস্সায জীৱিস্সামা’’তি ৱিহাৰে কপ্পিযকাৰকা হোন্তি, এতে পব্বাজেতুং ৱট্টতি. যস্স মাতাপিতৰো দাসা, মাতা এৱ ৱা দাসী, পিতা অদাসো, তং পব্বাজেতুং ন ৱট্টতি. যস্স পন মাতা অদাসী, পিতা দাসো, তং পব্বাজেতুং ৱট্টতি. ভিক্খুস্স ঞাতকা ৱা উপট্ঠাকা ৱা দাসং দেন্তি ‘‘ইমং পব্বাজেথ, তুম্হাকং ৱেয্যাৱচ্চং কৰিস্সতী’’তি, অত্তনো ৱাস্স দাসো অত্থি, ভুজিস্সো কতোৱ পব্বাজেতব্বো. সামিকা দাসং দেন্তি ‘‘ইমং পব্বাজেথ, সচে অভিৰমিস্সতি, অদাসো. ৱিব্ভমিস্সতি চে, অম্হাকং দাসোৱ ভৱিস্সতী’’তি, অযং তাৱকালিকো নাম, তং পব্বাজেতুং ন ৱট্টতীতি কুৰুন্দিযং ৱুত্তং. নিস্সামিকদাসো হোতি, সোপি ভুজিস্সো কতোৱ পব্বাজেতব্বো. অজানন্তো পব্বাজেত্ৱা উপসম্পাদেত্ৱা ৱা পচ্ছা জানন্তি, ভুজিস্সং কাতুমেৱ ৱট্টতি.

ইমস্স চ অত্থস্স পকাসনত্থং ইদং ৱত্থুং ৱদন্তি – একা কিৰ কুলদাসী একেন সদ্ধিং অনুৰাধপুৰা পলাযিত্ৱা ৰোহণে ৱসমানা পুত্তং পটিলভি, সো পব্বজিত্ৱা উপসম্পন্নকালে লজ্জী কুক্কুচ্চকো অহোসি. অথেকদিৱসং মাতৰং পুচ্ছি ‘‘কিং উপাসিকে তুম্হাকং ভাতা ৱা ভগিনী ৱা নত্থি, ন কিঞ্চি ঞাতকং পস্সামী’’তি. তাত, অহং অনুৰাধপুৰে কুলদাসী, তৱ পিতৰা সদ্ধিং পলাযিত্ৱা ইধ ৱসামীতি. সীলৱা ভিক্খু ‘‘অসুদ্ধা কিৰ মে পব্বজ্জা’’তি সংৱেগং লভিত্ৱা মাতৰং তস্স কুলস্স নামগোত্তং পুচ্ছিত্ৱা অনুৰাধপুৰং আগম্ম তস্স কুলস্স ঘৰদ্ৱাৰে অট্ঠাসি, ‘‘অতিচ্ছথ, ভন্তে’’তি ৱুত্তেপি নাতিক্কমি. তে আগন্ত্ৱা ‘‘কিং, ভন্তে’’তি পুচ্ছিংসু. ‘‘তুম্হাকং ইত্থন্নামা দাসী পলাতা অত্থী’’তি? ‘‘অত্থি, ভন্তে’’. অহং তস্সা পুত্তো, সচে মং তুম্হে অনুজানাথ, পব্বজ্জং লভামি, তুম্হে ময্হং সামিকাতি. তে হট্ঠতুট্ঠা হুত্ৱা ‘‘সুদ্ধা, ভন্তে, তুম্হাকং পব্বজ্জা’’তি তং ভুজিস্সং কত্ৱা মহাৱিহাৰে ৱসাপেসুং চতূহি পচ্চযেহি পটিজগ্গন্তা. থেৰো তং কুলং নিস্সায ৱসমানোযেৱ অৰহত্তং পাপুণীতি.

১৩২. ‘‘ন, ভিক্খৱে, হত্থচ্ছিন্নো পব্বাজেতব্বো. ন পাদচ্ছিন্নো, ন হত্থপাদচ্ছিন্নো, ন কণ্ণচ্ছিন্নো, ন কণ্ণনাসচ্ছিন্নো, ন অঙ্গুলিচ্ছিন্নো, ন অড়চ্ছিন্নো, ন কণ্ডৰচ্ছিন্নো, ন ফণহত্থকো, ন খুজ্জো, ন ৱামনো ন গলগণ্ডী, ন লক্খণাহতো, ন কসাহতো, ন লিখিতকো, ন সীপদী, ন পাপৰোগী, ন পৰিসদূসকো, ন কাণো, ন কুণী, ন খঞ্জো, ন পক্খহতো, ন ছিন্নিৰিযাপথো, ন জৰাদুব্বলো, ন অন্ধো, ন মূগো, ন বধিৰো, ন অন্ধমূগো, ন অন্ধবধিৰো, ন মূগবধিৰো, ন অন্ধমূগবধিৰো পব্বাজেতব্বো, যো পব্বাজেয্য, আপত্তি দুক্কটস্সা’’তি (মহাৱ. ১১৯) ৱচনতো পন হত্থচ্ছিন্নাদযোপি ন পব্বাজেতব্বা.

তত্থ হত্থচ্ছিন্নোতি যস্স হত্থতলে ৱা মণিবন্ধে ৱা কপ্পৰে ৱা যত্থ কত্থচি একো ৱা দ্ৱে ৱা হত্থা ছিন্না হোন্তি. পাদচ্ছিন্নোতি যস্স অগ্গপাদে ৱা গোপ্ফকেসু ৱা জঙ্ঘায ৱা যত্থ কত্থচি একো ৱা দ্ৱে ৱা পাদা ছিন্না হোন্তি. হত্থপাদচ্ছিন্নোতি যস্স ৱুত্তপ্পকাৰেনেৱ চতূসু হত্থপাদেসু দ্ৱে ৱা তযো ৱা সব্বে ৱা হত্থপাদা ছিন্না হোন্তি. কণ্ণচ্ছিন্নোতি যস্স কণ্ণমূলে ৱা কণ্ণসক্খলিকায ৱা একো ৱা দ্ৱে ৱা কণ্ণা ছিন্না হোন্তি. যস্স পন কণ্ণাৱট্টে ছিজ্জন্তি, সক্কা চ হোতি সঙ্ঘাটেতুং, সো কণ্ণং সঙ্ঘাটেত্ৱা পব্বাজেতব্বো. নাসচ্ছিন্নোতি যস্স অজপদকে ৱা অগ্গে ৱা একপুটে ৱা যত্থ কত্থচি নাসা ছিন্না হোতি. যস্স পন নাসিকা সক্কা হোতি সন্ধেতুং, সো তং ফাসুকং কত্ৱা পব্বাজেতব্বো. কণ্ণনাসচ্ছিন্নো উভযৱসেন ৱেদিতব্বো. অঙ্গুলিচ্ছিন্নোতি যস্স নখসেসং অদস্সেত্ৱা একা ৱা বহূ ৱা অঙ্গুলিযো ছিন্না হোন্তি. যস্স পন সুত্ততন্তুমত্তম্পি নখসেসং পঞ্ঞাযতি, তং পব্বাজেতুং ৱট্টতি. অড়চ্ছিন্নোতি যস্স চতূসু অঙ্গুট্ঠকেসু অঙ্গুলিযং ৱুত্তনযেনেৱ একো ৱা বহূ ৱা অঙ্গুট্ঠকা ছিন্না হোন্তি. কণ্ডৰচ্ছিন্নোতি যস্স কণ্ডৰনামকা মহান্হাৰূ পুৰতো ৱা পচ্ছতো ৱা ছিন্না হোন্তি, যেসু একস্সপি ছিন্নত্তা অগ্গপাদেন ৱা চঙ্কমতি, মূলেন ৱা চঙ্কমতি, ন পাদং পতিট্ঠাপেতুং সক্কোতি.

ফণহত্থকোতি যস্স ৱগ্গুলিপক্খকা ৱিয অঙ্গুলিযো সম্বদ্ধা হোন্তি, এতং পব্বাজেতুকামেন অঙ্গুলন্তৰিকাযো ফালেত্ৱা সব্বং অন্তৰচম্মং অপনেত্ৱা ফাসুকং কত্ৱা পব্বাজেতব্বো. যস্সপি ছ অঙ্গুলিযো হোন্তি, তং পব্বাজেতুকামেন অধিকং অঙ্গুলিং ছিন্দিত্ৱা ফাসুকং কত্ৱা পব্বাজেতব্বো. খুজ্জোতি যো উৰস্স ৱা পিট্ঠিযা ৱা পস্সস্স ৱা নিক্খন্তত্তা খুজ্জসৰীৰো. যস্স পন কিঞ্চি কিঞ্চি অঙ্গপচ্চঙ্গং ঈসকং ৱঙ্কং, তং পব্বাজেতুং ৱট্টতি. মহাপুৰিসো এৱ হি ব্ৰহ্মুজুগত্তো, অৱসেসো সত্তো অখুজ্জো নাম নত্থি. ৱামনোতি জঙ্ঘৱামনো ৱা কটিৱামনো ৱা উভযৱামনো ৱা. জঙ্ঘৱামনস্স কটিতো পট্ঠায হেট্ঠিমকাযো ৰস্সো হোতি, উপৰিমকাযো পৰিপুণ্ণো. কটিৱামনস্স কটিতো পট্ঠায উপৰিমকাযো ৰস্সো হোতি, হেট্ঠিমকাযো পৰিপুণ্ণো. উভযৱামনস্স উভোপি কাযা ৰস্সা হোন্তি, যেসং ৰস্সত্তা ভূতানং ৱিয পৰিৱটুমো মহাকুচ্ছিঘটসদিসো অত্তভাৱো হোতি, তং তিৱিধম্পি পব্বাজেতুং ন ৱট্টতি.

গলগণ্ডীতি যস্স কুম্ভণ্ডং ৱিয গলে গণ্ডো হোতি. দেসনামত্তমেৱ চেতং, যস্মিং কিস্মিঞ্চি পন পদেসে গণ্ডে সতি ন পব্বাজেতব্বো. তত্থ ৱিনিচ্ছযো ‘‘ন, ভিক্খৱে, পঞ্চহি আবাধেহি ফুট্ঠো পব্বাজেতব্বো’’তি (মহাৱ. ৮৯) এত্থ ৱুত্তনযেনেৱ ৱেদিতব্বো. লক্খণাহতকসাহতলিখিতকেসু যং ৱত্তব্বং, তং হেট্ঠা ৱুত্তমেৱ. সীপদীতি ভাৰপাদো ৱুচ্চতি. যস্স পাদো থূলো হোতি সঞ্জাতপীড়কো খৰো, সো ন পব্বাজেতব্বো. যস্স পন ন তাৱ খৰভাৱং গণ্হাতি, সক্কা হোতি উপনাহং বন্ধিত্ৱা উদকআৱাটে পৱেসেত্ৱা উদকৱালিকায পূৰেত্ৱা যথা সিৰা পঞ্ঞাযন্তি, জঙ্ঘা চ তেলনাড়িকা ৱিয হোতি, এৱং মিলাপেতুং, তস্স পাদং ঈদিসং কত্ৱা তং পব্বাজেতুং ৱট্টতি. সচে পুন ৱড্ঢতি, উপসম্পাদেন্তেনপি তথা কত্ৱাৱ উপসম্পাদেতব্বো. পাপৰোগীতি অৰিসভগন্দৰপিত্তসেম্হকাসসোসাদীসু যেন কেনচি ৰোগেন নিচ্চাতুৰো অতেকিচ্ছৰোগো জেগুচ্ছো অমনাপো, অযং ন পব্বাজেতব্বো.

১৩৩. পৰিসদূসকোতি যো অত্তনো ৱিৰূপতায পৰিসং দূসেতি, অতিদীঘো ৱা হোতি অঞ্ঞেসং সীসপ্পমাণনাভিপ্পদেসো, অতিৰস্সো ৱা উভযৱামনভূতৰূপং ৱিয, অতিকাড়ো ৱা ঝাপিতক্খেত্তে খাণুকো ৱিয, অচ্চোদাতো ৱা দধিতক্কাদীহি পমজ্জিততম্বলোহৱণ্ণো, অতিকিসো ৱা মন্দমংসলোহিতো অট্ঠিসিৰাচম্মসৰীৰো ৱিয, অতিথূলো ৱা ভাৰিযমংসো মহোদৰো মহাভূতসদিসো, অভিমহন্তসীসো ৱা পচ্ছিং সীসে কত্ৱা ঠিতো ৱিয, অতিখুদ্দকসীসো ৱা সৰীৰস্স অননুৰূপেন অতিখুদ্দকেন সীসেন সমন্নাগতো, কূটকূটসীসো ৱা তালফলপিণ্ডিসদিসেন সীসেন সমন্নাগতো, সিখৰসীসো ৱা উদ্ধং অনুপুব্বতনুকেন সীসেন সমন্নাগতো, নাড়িসীসো ৱা মহাৱেণুপব্বসদিসেন সীসেন সমন্নাগতো, কপ্পসীসো ৱা পব্ভাৰসীসো ৱা চতূসু পস্সেসু যেন কেনচি পস্সেন ওনতেন সীসেন সমন্নাগতো, ৱণসীসো ৱা পূতিসীসো ৱা কণ্ণিককেসো ৱা পাণকেহি খাযিতকেদাৰে সস্সসদিসেহি তহিং তহিং উট্ঠিতেহি কেসেহি সমন্নাগতো, নিল্লোমসীসো ৱা থূলথদ্ধকেসো ৱা তালহীৰসদিসেহি কেসেহি সমন্নাগতো, জাতিপলিতেহি পণ্ডৰকেসো ৱা পকতিতম্বকেসো ৱা আদিত্তেহি ৱিয কেসেহি সমন্নাগতো, আৱট্টসীসো ৱা গুন্নং সৰীৰে আৱট্টসদিসেহি উদ্ধগ্গেহি কেসাৱট্টেহি সমন্নাগতো, সীসলোমেহি সদ্ধিং একাবদ্ধভমুকলোমো ৱা জালবদ্ধেন ৱিয নলাটেন সমন্নাগতো.

সম্বদ্ধভমুকো ৱা নিল্লোমভমুকো ৱা মক্কটভমুকো ৱা অতিমহন্তক্খি ৱা অতিখুদ্দকক্খি ৱা মহিংসচম্মে ৱাসিকোণেন পহৰিত্ৱা কতছিদ্দসদিসেহি অক্খীহি সমন্নাগতো, ৱিসমক্খি ৱা একেন মহন্তেন, একেন খুদ্দকেন অক্খিনা সমন্নাগতো, ৱিসমচক্কলো ৱা একেন উদ্ধং, একেন অধোতি এৱং ৱিসমজাতেহি অক্খিচক্কেহি সমন্নাগতো, কেকৰো ৱা গম্ভীৰক্খি ৱা যস্স গম্ভীৰে উদপানে উদকতাৰকা ৱিয অক্খিতাৰকা পঞ্ঞাযন্তি, নিক্খন্তক্খি ৱা যস্স কক্কটস্সেৱ অক্খিতাৰকা নিক্খন্তা হোন্তি, হত্থিকণ্ণো ৱা মহন্তাহি কণ্ণসক্খলীহি সমন্নাগতো, মূসিককণ্ণো ৱা জতুককণ্ণো ৱা খুদ্দকাহি কণ্ণসক্খলীহি সমন্নাগতো, ছিদ্দমত্তকণ্ণো ৱা যস্স ৱিনা কণ্ণসক্খলীহি কণ্ণচ্ছিদ্দমত্তমেৱ হোতি, অৱিদ্ধকণ্ণো ৱা, যোনকজাতিকো পন পৰিসদূসকো ন হোতি, সভাৱোযেৱ হি সো তস্স. কণ্ণভগন্দৰিকো ৱা নিচ্চপূতিনা কণ্ণেন সমন্নাগতো, গণ্ডকণ্ণো ৱা সদা পগ্ঘৰিতপুব্বেন কণ্ণেন সমন্নাগতো, টঙ্কিতকণ্ণো ৱা গোভত্তনাড়িকায অগ্গসদিসেহি কণ্ণেহি সমন্নাগতো, অতিপিঙ্গলক্খি ৱা, মধুপিঙ্গলং পন পব্বাজেতুং ৱট্টতি. নিপ্পখুমক্খি ৱা অস্সুপগ্ঘৰণক্খি ৱা পুপ্ফিতক্খি ৱা অক্খিপাকেন সমন্নাগতক্খি ৱা.

অতিমহন্তনাসিকো ৱা অতিখুদ্দকনাসিকো ৱা চিপিটনাসিকো ৱা মজ্ঝে অপ্পতিট্ঠহিত্ৱা একপস্সে ঠিতৱঙ্কনাসিকো ৱা দীঘনাসিকো ৱা সুকতুণ্ডসদিসায জিৱ্হায লেহিতুং সক্কুণেয্যায নাসিকায সমন্নাগতো, নিচ্চং পগ্ঘৰিতসিঙ্ঘাণিকনাসো ৱা, মহামুখো ৱা যস্স পটঙ্গমণ্ডূকস্সেৱ মুখনিমিত্তংযেৱ মহন্তং হোতি, মুখং পন লাবুসদিসং অতিখুদ্দকং, ভিন্নমুখো ৱা ৱঙ্কমুখো ৱা মহাওট্ঠো ৱা উক্খলিমুখৱট্টিসদিসেহি ওট্ঠেহি সমন্নাগতো, তনুকওট্ঠো ৱা ভেৰিচম্মসদিসেহি দন্তে পিদহিতুং অসমত্থেহি ওট্ঠেহি সমন্নাগতো, মহাধৰোট্ঠো ৱা তনুকউত্তৰোট্ঠো ৱা তনুকঅধৰোট্ঠো ৱা মহাউত্তৰোট্ঠো ৱা ওট্ঠছিন্নকো ৱা এড়মুখো ৱা উপ্পক্কমুখো ৱা সঙ্খতুণ্ডকো ৱা বহি সেতেহি অন্তো অতিৰত্তেহি ওট্ঠেহি সমন্নাগতো, দুগ্গন্ধকুণপমুখো ৱা, মহাদন্তো ৱা অট্ঠকদন্তসদিসেহি দন্তেহি সমন্নাগতো, অসুৰদন্তো ৱা হেট্ঠা ৱা উপৰি ৱা বহি নিক্খন্তদন্তো, যস্স পন সক্কা হোতি ওট্ঠেহি পিদহিতুং, কথেন্তস্সেৱ পঞ্ঞাযতি, নো অকথেন্তস্স, তং পব্বাজেতুং ৱট্টতি. পূতিদন্তো ৱা নিদ্দন্তো ৱা অতিখুদ্দকদন্তো ৱা যস্স পন দন্তন্তৰে কলন্দকদন্তো ৱিয সুখুমদন্তো হোতি, তং পব্বাজেতুং ৱট্টতি.

মহাহনুকো ৱা গোহনুসদিসেন হনুনা সমন্নাগতো, দীঘহনুকো ৱা চিপিটহনুকো ৱা অন্তোপৱিট্ঠেন ৱিয অতিৰস্সেন হনুকেন সমন্নাগতো, ভিন্নহনুকো ৱা ৱঙ্কহনুকো ৱা নিম্মস্সুদাঠিকো ৱা ভিক্খুনীসদিসমুখো, দীঘগলো ৱা বকগলসদিসেন গলেন সমন্নাগতো, ৰস্সগলো ৱা অন্তোপৱিট্ঠেন ৱিয গলেন সমন্নাগতো, ভিন্নগলো ৱা ভট্ঠঅংসকূটো ৱা অহত্থো ৱা একহত্থো ৱা অতিৰস্সহত্থো ৱা অতিদীঘহত্থো ৱা ভিন্নউৰো ৱা ভিন্নপিট্ঠি ৱা কচ্ছুগত্তো ৱা কণ্ডুগত্তো ৱা দদ্দুগত্তো ৱা গোধাগত্তো ৱা যস্স গোধায ৱিয গত্ততো চুণ্ণানি পতন্তি. সব্বঞ্চেতং ৱিৰূপকৰণং সন্ধায ৱিত্থাৰিতৱসেন ৱুত্তং, ৱিনিচ্ছযো পনেত্থ পঞ্চাবাধেসু ৱুত্তনযেন ৱেদিতব্বো.

ভট্ঠকটিকো ৱা মহাআনিসদো ৱা উদ্ধনকূটসদিসেহি আনিসদমংসেহি অচ্চুগ্গতেহি সমন্নাগতো, মহাঊৰুকো ৱা ৱাতণ্ডিকো ৱা মহাজাণুকো ৱা সঙ্ঘট্টনজাণুকো ৱা দীঘজঙ্ঘো ৱা যট্ঠিসদিসজঙ্ঘো, ৱিকটো ৱা সঙ্ঘট্টো ৱা উব্বদ্ধপিণ্ডিকো ৱা, সো দুৱিধো হেট্ঠা ওৰুড়্হাহি ৱা উপৰি আৰুড়্হাহি ৱা মহতীহি জঙ্ঘপিণ্ডিকাহি সমন্নাগতো, মহাজঙ্ঘো ৱা থূলজঙ্ঘপিণ্ডিকো ৱা মহাপাদো ৱা মহাপণ্হি ৱা পিট্ঠিকপাদো ৱা পাদৱেমজ্ঝতো উট্ঠিতজঙ্ঘো, ৱঙ্কপাদো ৱা, সো দুৱিধো অন্তো ৱা বহি ৱা পৰিৱত্তপাদো, গণ্ঠিকঙ্গুলি ৱা সিঙ্গিৱেৰফণসদিসাহি অঙ্গুলীহি সমন্নাগতো, অন্ধনখো ৱা কাড়ৱণ্ণেহি পূতিনখেহি সমন্নাগতো, সব্বোপি এস পৰিসদূসকো. এৱৰূপো পৰিসদূসকো ন পব্বাজেতব্বো.

১৩৪. কাণোতি পসন্নন্ধো ৱা হোতু পুপ্ফাদীহি ৱা উপহতপসাদো, দ্ৱীহি ৱা একেন ৱা অক্খিনা ন পস্সতি, সো ন পব্বাজেতব্বো. মহাপচ্চৰিযং পন একক্খিকাণো ‘‘কাণো’’তি ৱুত্তো, দ্ৱিঅক্খিকাণো অন্ধেন সঙ্গহিতো. মহাঅট্ঠকথাযং জচ্চন্ধো ‘‘অন্ধো’’তি ৱুত্তো. তস্মা উভযম্পি পৰিযাযেন যুজ্জতি. কুণীতি হত্থকুণী ৱা পাদকুণী ৱা অঙ্গুলিকুণী ৱা, যস্স এতেসু হত্থাদীসু যং কিঞ্চি ৱঙ্কং পঞ্ঞাযতি. খঞ্জোতি নতজাণুকো ৱা ভিন্নজঙ্ঘো ৱা মজ্ঝে সংকুটিতপাদত্তা কুণ্ঠপাদকো ৱা পিট্ঠিপাদমজ্ঝেন চঙ্কমন্তো, অগ্গে সংকুটিতপাদত্তা কুণ্ঠপাদকো ৱা পিট্ঠিপাদগ্গেন চঙ্কমন্তো, অগ্গপাদেনেৱ চঙ্কমনখঞ্জো ৱা পণ্হিকায চঙ্কমনখঞ্জো ৱা পাদস্স বাহিৰন্তেন চঙ্কমনখঞ্জো ৱা পাদস্স অব্ভন্তৰেন চঙ্কমনখঞ্জো ৱা গোপ্ফকানং উপৰি ভগ্গত্তা সকলেন পিট্ঠিপাদেন চঙ্কমনখঞ্জো ৱা. সব্বোপেস খঞ্জোযেৱ, ন পব্বাজেতব্বো.

পক্খহতোতি যস্স একো হত্থো ৱা পাদো ৱা অদ্ধসৰীৰং ৱা সুখং ন ৱহতি. ছিন্নিৰিযাপথোতি পীঠসপ্পী ৱুচ্চতি. জৰাদুব্বলোতি জিণ্ণভাৱেন দুব্বলো অত্তনো চীৱৰৰজনাদিকম্মম্পি কাতুং অসমত্থো. যো পন মহল্লকোপি বলৱা হোতি, অত্তানং পটিজগ্গিতুং সক্কোতি, সো পব্বাজেতব্বো. অন্ধোতি জচ্চন্ধো ৱুচ্চতি. মূগোতি যস্স ৱচীভেদো ন পৱত্ততি, যস্সপি পৱত্ততি, সৰণগমনং পন পৰিপুণ্ণং ভাসিতুং ন সক্কোতি, তাদিসং মম্মনম্পি পব্বাজেতুং ন ৱট্টতি. যো পন সৰণগমনমত্তং পৰিপুণ্ণং ভাসিতুং সক্কোতি, তং পব্বাজেতুং ৱট্টতি. বধিৰোতি যো সব্বেন সব্বং ন সুণাতি. যো পন মহাসদ্দং সুণাতি, তং পব্বাজেতুং ৱট্টতি. অন্ধমূগাদযো উভযদোসৱসেন ৱুত্তা. যেসঞ্চ পব্বজ্জা পটিক্খিত্তা, উপসম্পদাপি তেসং পটিক্খিত্তাৱ. সচে পন নে সঙ্ঘো উপসম্পাদেতি, সব্বেপি সূপসম্পন্না, কাৰকসঙ্ঘো পন আচৰিযুপজ্ঝাযা চ আপত্তিতো ন মুচ্চন্তি.

১৩৫. পণ্ডকো উভতোব্যঞ্জনকো থেয্যসংৱাসকো তিত্থিযপক্কন্তকো তিৰচ্ছানগতো মাতুঘাতকো পিতুঘাতকো অৰহন্তঘাতকো লোহিতুপ্পাদকো সঙ্ঘভেদকো ভিক্খুনীদূসকোতি ইমে পন একাদস পুগ্গলা ‘‘পণ্ডকো, ভিক্খৱে, অনুপসম্পন্নো ন উপসম্পাদেতব্বো, উপসম্পন্নো নাসেতব্বো’’তি (মহাৱ. ১০৯) আদিৱচনতো অভব্বা, নেৱ নেসং পব্বজ্জা, ন উপসম্পদা চ ৰুহতি, তস্মা ন পব্বাজেতব্বা ন উপসম্পাদেতব্বা, জানিত্ৱা পব্বাজেন্তো উপসম্পাদেন্তো চ দুক্কটং আপজ্জতি. অজানিত্ৱাপি পব্বাজিতা উপসম্পাদিতা চ জানিত্ৱা লিঙ্গনাসনায নাসেতব্বা.

তত্থ পণ্ডকোতি আসিত্তপণ্ডকো উসূযপণ্ডকো ওপক্কমিকপণ্ডকো পক্খপণ্ডকো নপুংসকপণ্ডকোতি পঞ্চ পণ্ডকা. তেসু যস্স পৰেসং অঙ্গজাতং মুখেন গহেত্ৱা অসুচিনা আসিত্তস্স পৰিড়াহো ৱূপসম্মতি, অযং আসিত্তপণ্ডকো. যস্স পৰেসং অজ্ঝাচাৰং পস্সতো উসূযায উপ্পন্নায পৰিড়াহো ৱূপসম্মতি, অযং উসূযপণ্ডকো. যস্স উপক্কমেন বীজানি অপনীতানি, অযং ওপক্কমিকপণ্ডকো. একচ্চো পন অকুসলৱিপাকানুভাৱেন কাড়পক্খে পণ্ডকো হোতি, জুণ্হপক্খে পনস্স পৰিড়াহো ৱূপসম্মতি, অযং পক্খপণ্ডকো. যো পন পটিসন্ধিযংযেৱ অভাৱকো উপ্পন্নো, অযং ন পুংসকপণ্ডকো. তেসু আসিত্তপণ্ডকস্স চ উসূযপণ্ডকস্স চ পব্বজ্জা ন ৱাৰিতা, ইতৰেসং তিণ্ণং ৱাৰিতা. ‘‘তেসুপি পক্খপণ্ডকস্স যস্মিং পক্খে পণ্ডকো হোতি, তস্মিংযেৱস্স পক্খে পব্বজ্জা ৱাৰিতা’’তি কুৰুন্দিযং ৱুত্তং.

১৩৬. উভতোব্যঞ্জনকোতি (মহাৱ. অট্ঠ. ১১৬) ইত্থিনিমিত্তুপ্পাদনকম্মতো চ পুৰিসনিমিত্তুপ্পাদনকম্মতো চ উভতোব্যঞ্জনমস্স অত্থীতি উভতোব্যঞ্জনকো. সো দুৱিধো হোতি ইত্থিউভতোব্যঞ্জনকো পুৰিসউভতোব্যঞ্জনকোতি. তত্থ ইত্থিউভতোব্যঞ্জনকস্স ইত্থিনিমিত্তং পাকটং হোতি, পুৰিসনিমিত্তং পটিচ্ছন্নং. পুৰিসউভতোব্যঞ্জনকস্স পুৰিসনিমিত্তং পাকটং, ইত্থিনিমিত্তং পটিচ্ছন্নং. ইত্থিউভতোব্যঞ্জনকস্স ইত্থীসু পুৰিসত্তং কৰোন্তস্স ইত্থিনিমিত্তং পটিচ্ছন্নং হোতি, পুৰিসনিমিত্তং পাকটং. পুৰিসউভতোব্যঞ্জনকস্স পুৰিসানং ইত্থিভাৱং উপগচ্ছন্তস্স পুৰিসনিমিত্তং পটিচ্ছন্নং হোতি, ইত্থিনিমিত্তং পাকটং হোতি. ইত্থিউভতোব্যঞ্জনকো সযঞ্চ গব্ভং গণ্হাতি, পৰঞ্চ গণ্হাপেতি, পুৰিসউভতোব্যঞ্জনকো পন সযং ন গণ্হাতি, পৰং পন গণ্হাপেতীতি ইদমেতেসং নানাকৰণং. ইমস্স পন দুৱিধস্সপি উভতোব্যঞ্জনকস্স নেৱ পব্বজ্জা অত্থি, ন উপসম্পদা.

১৩৭. থেয্যসংৱাসকোতি তযো থেয্যসংৱাসকা লিঙ্গত্থেনকো সংৱাসত্থেনকো উভযত্থেনকোতি. তত্থ যো সযং পব্বজিত্ৱা ৱিহাৰং গন্ত্ৱা ন ভিক্খুৱস্সানি গণেতি, ন যথাৱুড্ঢং ৱন্দনং সাদিযতি, ন আসনেন পটিবাহতি, ন উপোসথপৱাৰণাদীসু সন্দিস্সতি, অযং লিঙ্গমত্তস্সেৱ থেনিতত্তা লিঙ্গত্থেনকো নাম. যো পন ভিক্খূহি পব্বাজিতো সামণেৰো সমানো ৱিদেসং গন্ত্ৱা ‘‘অহং দসৱস্সো ৱা ৱীসতিৱস্সো ৱা’’তি মুসা ৱত্ৱা ভিক্খুৱস্সানি গণেতি, যথাৱুড্ঢং ৱন্দনং সাদিযতি, আসনেন পটিবাহতি, উপোসথপৱআৰণাদীসু সন্দিস্সতি, অযং সংৱাসমত্তস্সেৱ থেনিতত্তা সংৱাসত্থেনকো নাম. ভিক্খুৱস্সগণনাদিকো হি সব্বোপি কিৰিযভেদো ইমস্মিং অত্থে ‘‘সংৱাসো’’তি ৱেদিতব্বো. সিক্খং পচ্চক্খায ‘‘ন মং কোচি জানাতী’’তি পুন এৱং পটিপজ্জন্তেপি এসেৱ নযো. যো পন সযং পব্বজিত্ৱা ৱিহাৰং গন্ত্ৱা ভিক্খুৱস্সানি গণেতি, যথাৱুড্ঢং ৱন্দনং সাদিযতি, আসনেন পটিবাহতি, উপোসথপৱাৰণাদীসু সন্দিস্সতি, অযং লিঙ্গস্স চেৱ সংৱাসস্স চ থেনিতত্তা উভযত্থেনকো নাম. অযং তিৱিধোপি থেয্যসংৱাসকো অনুপসম্পন্নো ন উপসম্পাদেতব্বো, উপসম্পন্নো নাসেতব্বো, পুন পব্বজ্জং যাচন্তোপি ন পব্বাজেতব্বো.

১৩৮. এত্থ চ অসম্মোহত্থং ইদং পকিণ্ণকং ৱেদিতব্বং –

‘‘ৰাজদুব্ভিক্খকন্তাৰ, ৰোগৱেৰিভযেন ৱা;

চীৱৰাহৰণত্থং ৱা, লিঙ্গং আদিযতীধ যো.

‘‘সংৱাসং নাধিৱাসেতি, যাৱ সো সুদ্ধমানসো;

থেয্যসংৱাসকো নাম, তাৱ এস ন ৱুচ্চতী’’তি. (মহাৱ. অট্ঠ. ১১০);

তত্ৰাযং ৱিত্থাৰনযো – ইধেকচ্চস্স ৰাজা কুদ্ধো হোতি, সো ‘‘এৱং মে সোত্থি ভৱিস্সতী’’তি সযমেৱ লিঙ্গং গহেত্ৱা পলাযতি. তং দিস্ৱা ৰঞ্ঞো আৰোচেন্তি, ৰাজা ‘‘সচে পব্বজিতো, ন তং লব্ভা কিঞ্চি কাতু’’ন্তি তস্মিং কোধং পটিৱিনেতি. সো ‘‘ৱূপসন্তং মে ৰাজভয’’ন্তি সঙ্ঘমজ্ঝং অনোসৰিত্ৱাৱ গিহিলিঙ্গং গহেত্ৱা আগতো পব্বাজেতব্বো. অথাপি ‘‘সাসনং নিস্সায মযা জীৱিতং লদ্ধং, হন্দ দানি অহং পব্বজামী’’তি উপ্পন্নসংৱেগো তেনেৱ লিঙ্গেন আগন্ত্ৱা আগন্তুকৱত্তং ন সাদিযতি, ভিক্খূহি পুট্ঠো ৱা অপুট্ঠো ৱা যথাভূতমত্তানং আৱিকত্ৱা পব্বজ্জং যাচতি, লিঙ্গং অপনেত্ৱা পব্বাজেতব্বো. সচে পন সো ৱত্তং সাদিযতি, পব্বজিতালযং দস্সেতি, সব্বং পুব্বে ৱুত্তং ৱস্সগণনাদিভেদং ৱিধিং পটিপজ্জতি, অযং ন পব্বাজেতব্বো.

ইধ পনেকচ্চো দুব্ভিক্খে জীৱিতুং অসক্কোন্তো সযমেৱ লিঙ্গং গহেত্ৱা সব্বপাসণ্ডিযভত্তানি ভুঞ্জন্তো দুব্ভিক্খে ৱীতিৱত্তে সঙ্ঘমজ্ঝং অনোসৰিত্ৱাৱ গিহিলিঙ্গং গহেত্ৱা আগতোতি সব্বং পুৰিমসদিসমেৱ.

অপৰো মহাকন্তাৰং নিত্থৰিতুকামো হোতি, সত্থৱাহো চ পব্বজিতে গহেত্ৱা গচ্ছতি. সো ‘‘এৱং মং সত্থৱাহো গহেত্ৱা গমিস্সতী’’তি সযমেৱ লিঙ্গং গহেত্ৱা সত্থৱাহেন সদ্ধিং কন্তাৰং নিত্থৰিত্ৱা খেমন্তং পত্ৱা সঙ্ঘমজ্ঝং অনোসৰিত্ৱাৱ গিহিলিঙ্গং গহেত্ৱা আগতোতি সব্বং পুৰিমসদিসমেৱ.

অপৰো ৰোগভযে উপ্পন্নে জীৱিতুং অসক্কোন্তো সযমেৱ লিঙ্গং গহেত্ৱা সব্বপাসণ্ডিযভত্তানি ভুঞ্জন্তো ৰোগভযে ৱূপসন্তে সঙ্ঘমজ্ঝং অনোসৰিত্ৱাৱ গিহিলিঙ্গং গহেত্ৱা আগতোতি সব্বং পুৰিমসদিসমেৱ.

অপৰস্স একো ৱেৰিকো কুদ্ধো হোতি, ঘাতেতুকামো নং ৱিচৰতি. সো ‘‘এৱং মে সোত্থি ভৱিস্সতী’’তি সযমেৱ লিঙ্গং গহেত্ৱা পলাযতি. ৱেৰিকো ‘‘কুহিং সো’’তি পৰিযেসন্তো ‘‘পব্বজিত্ৱা পলাতো’’তি সুত্ৱা ‘‘সচে পব্বজিতো, ন তং লব্ভা কিঞ্চি কাতু’’ন্তি তস্মিং কোধং পটিৱিনেতি. সো ‘‘ৱূপসন্তং মে ৱেৰিভয’’ন্তি সঙ্ঘমজ্ঝং অনোসৰিত্ৱাৱ গিহিলিঙ্গং গহেত্ৱা আগতোতি সব্বং পুৰিমসদিসমেৱ.

অপৰো ঞাতিকুলং গন্ত্ৱা সিক্খং পচ্চক্খায গিহী হুত্ৱা ‘‘ইমানি চীৱৰানি ইধ নস্সিস্সন্তি, সচেপি ইমানি গহেত্ৱা ৱিহাৰং গমিস্সামি, অন্তৰামগ্গে মং ‘চোৰো’তি গহেস্সন্তি, যংনূনাহং কাযপৰিহাৰিযানি কত্ৱা গচ্ছেয্য’’ন্তি চীৱৰাহৰণত্থং নিৱাসেত্ৱা চ পাৰুপিত্ৱা চ ৱিহাৰং গচ্ছতি. তং দূৰতোৱ আগচ্ছন্তং দিস্ৱা সামণেৰা চ দহৰা চ অব্ভুগ্গচ্ছন্তি, ৱত্তং দস্সেন্তি. সো ন সাদিযতি, যথাভূতমত্তানং আৱিকৰোতি. সচে ভিক্খূ ‘‘ন দানি মযং তং মুঞ্চিস্সামা’’তি বলক্কাৰেন পব্বাজেতুকামা হোন্তি, কাসাযানি অপনেত্ৱা পুন পব্বাজেতব্বো. সচে পন ‘‘নযিমে মং হীনাযাৱত্তভাৱং জানন্তী’’তি তংযেৱ ভিক্খুভাৱং পটিজানিত্ৱা সব্বং পুব্বে ৱুত্তং ৱস্সগণনাদিভেদং ৱিধিং পটিপজ্জতি, অযং ন পব্বাজেতব্বো.

অপৰো মহাসামণেৰো ঞাতিকুলং গন্ত্ৱা উপ্পব্বজিত্ৱা কম্মন্তানুট্ঠানেন উব্বাড়্হো পুন ‘‘দানি অহং সামণেৰো ভৱিস্সামি, থেৰোপি মে উপ্পব্বজিতভাৱং ন জানাতী’’তি তদেৱ পত্তচীৱৰং আদায ৱিহাৰং গচ্ছতি, তমত্থং ভিক্খূনং ন আৰোচেতি, সামণেৰভাৱং পটিজানাতি, অযং থেয্যসংৱাসকোযেৱ, পব্বজ্জং ন লভতি. সচেপিস্স লিঙ্গগ্গহণকালে এৱং হোতি ‘‘নাহং কস্সচি আৰোচেস্সামী’’তি, ৱিহাৰঞ্চ গতো আৰোচেতি, গহণেনেৱ থেয্যসংৱাসকো. অথাপিস্স গহণকালে ‘‘আচিক্খিস্সামী’’তি চিত্তং উপ্পন্নং হোতি, ৱিহাৰঞ্চ গন্ত্ৱা ‘‘কুহিং ত্ৱং, আৱুসো, গতো’’তি ৱুত্তো ‘‘ন দানি মং ইমে জানন্তী’’তি ৱঞ্চেত্ৱা নাচিক্খতি, ‘‘নাচিক্খিস্সামী’’তি সহ ধুৰনিক্খেপেন অযম্পি থেয্যসংৱাসকোৱ. সচে পনস্স গহণকালেপি ‘‘আচিক্খিস্সামী’’তি হোতি, ৱিহাৰং গন্ত্ৱাপি আচিক্খতি, অযং পুন পব্বজ্জং লভতি.

অপৰো দহৰসামণেৰো মহন্তো ৱা পন অব্যত্তো. সো পুৰিমনযেনেৱ উপ্পব্বজিত্ৱা ঘৰে ৱচ্ছকগোৰক্খণাদীনি কম্মানি কাতুং ন ইচ্ছতি. তমেনং ঞাতকা তানিযেৱ কাসাযানি অচ্ছাদেত্ৱা থালকং ৱা পত্তং ৱা হত্থে দত্ৱা ‘‘গচ্ছ, সমণোৱ হোহী’’তি ঘৰা নীহৰন্তি. সো ৱিহাৰং গচ্ছতি, নেৱ নং ভিক্খূ জানন্তি ‘‘অযং উপ্পব্বজিত্ৱা পুন সযমেৱ পব্বজিতো’’তি, নাপি সযং জানাতি ‘‘যো এৱং পব্বজতি, সো থেয্যসংৱাসকো নাম হোতী’’তি. সচে পন তং পৰিপুণ্ণৱস্সং উপসম্পাদেন্তি, সূপসম্পন্নো. সচে পন অনুপসম্পন্নকালেযেৱ ৱিনযৱিনিচ্ছযে ৱত্তমানে সুণাতি ‘‘যো এৱং পব্বজতি, সো থেয্যসংৱাসকো নাম হোতী’’তি, তেন ‘‘মযা এৱং কত’’ন্তি ভিক্খূনং আচিক্খিতব্বং. এৱং পুন পব্বজ্জং লভতি. সচে পন ‘‘দানি ন মং কোচি জানাতী’’তি নাৰোচেতি, ধুৰং নিক্খিত্তমত্তেযেৱ থেয্যসংৱাসকো.

ভিক্খু সিক্খং পচ্চক্খায লিঙ্গং অনপনেত্ৱা দুস্সীলকম্মং কত্ৱা ৱা অকত্ৱা ৱা পুন সব্বং পুব্বে ৱুত্তং ৱস্সগণনাদিভেদং ৱিধিং পটিপজ্জতি, থেয্যসংৱাসকো হোতি. সিক্খং অপ্পচ্চক্খায সলিঙ্গে ঠিতো মেথুনং পটিসেৱিত্ৱা ৱস্সগণনাদিভেদং ৱিধিং আপজ্জন্তো থেয্যসংৱাসকো ন হোতি, পব্বজ্জামত্তং লভতি. অন্ধকট্ঠকথাযং পন ‘‘এসো থেয্যসংৱাসকো’’তি ৱুত্তং, তং ন গহেতব্বং.

একো ভিক্খু কাসাযে সউস্সাহোৱ ওদাতং নিৱাসেত্ৱা মেথুনং পটিসেৱিত্ৱা পুন কাসাযানি নিৱাসেত্ৱা ৱস্সগণনাদিভেদং ৱিধিং আপজ্জতি, অযম্পি থেয্যসংৱাসকো ন হোতি, পব্বজ্জামত্তং লভতি. সচে পন কাসাযে ধুৰং নিক্খিপিত্ৱা ওদাতং নিৱাসেত্ৱা মেথুনং পটিসেৱিত্ৱা পুন কাসাযানি নিৱাসেত্ৱা ৱস্সগণনাদিভেদং ৱিধিং আপজ্জতি, থেয্যসংৱাসকো হোতি. সামণেৰো সলিঙ্গে ঠিতো মেথুনাদিঅস্সমণকৰণধম্মং আপজ্জিত্ৱাপিথেয্যসংৱাসকো ন হোতি. সচেপি কাসাযে সউস্সাহোৱ কাসাযানি অপনেত্ৱা মেথুনং পটিসেৱিত্ৱা পুন কাসাযানি নিৱাসেতি, নেৱ থেয্যসংৱাসকো হোতি. সচে পন কাসাযে ধুৰং নিক্খিপিত্ৱা নগ্গো ৱা ওদাতৱত্থো ৱা মেথুনসেৱনাদীহি অস্সমণো হুত্ৱা কাসাযং নিৱাসেতি, থেয্যসংৱাসকো হোতি.

সচে গিহিভাৱং পত্থযমানো কাসাযং ওৱট্টিকং কত্ৱা অঞ্ঞেন ৱা আকাৰেন গিহিনিৱাসনেন নিৱাসেতি ‘‘সোভতি নু খো মে গিহিলিঙ্গং, ন সোভতী’’তি ৱীমংসনত্থং, ৰক্খতি তাৱ. ‘‘সোভতী’’তি সম্পটিচ্ছিত্ৱা পন পুন লিঙ্গং সাদিযন্তো থেয্যসংৱাসকো হোতি. ওদাতং নিৱাসেত্ৱা ৱীমংসনসম্পটিচ্ছনেসুপি এসেৱ নযো. সচে পন নিৱত্থকাসাৱস্স উপৰি ওদাতং নিৱাসেত্ৱা ৱীমংসতি ৱা সম্পটিচ্ছতি ৱা, ৰক্খতিযেৱ. ভিক্খুনিযাপি এসেৱ নযো. সাপি গিহিভাৱং পত্থযমানা সচে কাসাযং গিহিনিৱাসনং নিৱাসেতি ‘‘সোভতি নু খো মে গিহিলিঙ্গং, ন সোভতী’’তি ৱীমংসনত্থং, ৰক্খতিযেৱ. সচে ‘‘সোভতী’’তি সম্পটিচ্ছতি, ন ৰক্খতি. ওদাতং নিৱাসেত্ৱা ৱীমংসনসম্পটিচ্ছনেসুপি এসেৱ নযো. নিৱত্থকাসাযস্স পন উপৰি ওদাতং নিৱাসেত্ৱা ৱীমংসতু ৱা সম্পটিচ্ছতু ৱা, ৰক্খতিযেৱ.

সচে কোচি ৱুড্ঢপব্বজিতো ৱস্সানি অগণেত্ৱা পাড়িযম্পি অট্ঠত্ৱা একপস্সেন গন্ত্ৱা মহাপেড়াদীসু কটচ্ছুনা উক্খিত্তে ভত্তপিণ্ডে পত্তং উপনামেত্ৱা সেনো ৱিয মংসপেসিং গহেত্ৱা গচ্ছতি, থেয্যসংৱাসকো ন হোতি, ভিক্খুৱস্সানি পন গণেত্ৱা গণ্হন্তো থেয্যসংৱাসকো হোতি. সযং সামণেৰোৱ সামণেৰপটিপাটিযা কূটৱস্সানি গণেত্ৱা গণ্হন্তো থেয্যসংৱাসকো ন হোতি. ভিক্খু ভিক্খুপটিপাটিযা কূটৱস্সানি গণেত্ৱা গণ্হন্তো ভণ্ডগ্ঘেন কাৰেতব্বো.

১৩৯. তিত্থিযপক্কন্তকোতি তিত্থিযেসু পক্কন্তো পৱিট্ঠোতি তিত্থিযপক্কন্তকো, সোপি ন পব্বাজেতব্বো. তত্ৰাযং ৱিনিচ্ছযো – উপসম্পন্নো ভিক্খু ‘‘তিত্থিযো ভৱিস্সামী’’তি সলিঙ্গেনেৱ তেসং উপস্সযং গচ্ছতি, পদৱাৰে পদৱাৰে দুক্কটং, তেসং লিঙ্গে আদিন্নমত্তে তিত্থিযপক্কন্তকো হোতি. যোপি সযমেৱ ‘‘তিত্থিযো ভৱিস্স’’ন্তি কুসচীৰাদীনি নিৱাসেতি, তিত্থিযপক্কন্তকো হোতিযেৱ. যো পন নগ্গো নহাযন্তো অত্তানং ওলোকেত্ৱা ‘‘সোভতি মে আজীৱকভাৱো, আজীৱকো ভৱিস্স’’ন্তি কাসাযানি অনাদায নগ্গো আজীৱকানং উপস্সযং গচ্ছতি, পদৱাৰে পদৱাৰে দুক্কটং. সচে পনস্স অন্তৰামগ্গে হিৰোত্তপ্পং উপ্পজ্জতি, দুক্কটানি দেসেত্ৱা মুচ্চতি. তেসং উপস্সযং গন্ত্ৱাপি তেহি ৱা ওৱদিতো অত্তনা ৱা ‘‘ইমেসং পব্বজ্জা অতিদুক্খা’’তি দিস্ৱা নিৱত্তন্তোপি মুচ্চতিযেৱ. সচে পন ‘‘কিং তুম্হাকং পব্বজ্জায উক্কট্ঠ’’ন্তি পুচ্ছিত্ৱা ‘‘কেসমস্সুলুঞ্চনাদীনী’’তি ৱুত্তো এককেসম্পি লুঞ্চাপেতি, উক্কুটিকপ্পধানাদীনি ৱা ৱত্তানি আদিযতি, মোৰপিঞ্ছাদীনি ৱা নিৱাসেতি, তেসং লিঙ্গং গণ্হাতি, ‘‘অযং পব্বজ্জা সেট্ঠা’’তি সেট্ঠভাৱং ৱা উপগচ্ছতি, ন মুচ্চতি, তিত্থিযপক্কন্তকো হোতি. সচে পন ‘‘সোভতি নু খো মে তিত্থিযপব্বজ্জা, ননু খো সোভতী’’তি ৱীমংসনত্থং কুসচীৰাদীনি ৱা নিৱাসেতি, জটং ৱা বন্ধতি, খাৰিকাজং ৱা আদিযতি, যাৱ ন সম্পটিচ্ছতি লদ্ধিং, তাৱ ৰক্খতি, সম্পটিচ্ছিতমত্তে তিত্থিযপক্কন্তকো হোতি. অচ্ছিন্নচীৱৰো পন কুসচীৰাদীনি নিৱাসেন্তো ৰাজভযাদীহি ৱা তিত্থিযলিঙ্গং গণ্হন্তো লদ্ধিযা অভাৱেন নেৱ তিত্থিযপক্কন্তকো হোতি. ‘‘অযঞ্চ তিত্থিযপক্কন্তকো নাম উপসম্পন্নভিক্খুনা কথিতো, তস্মা সামণেৰো সলিঙ্গেন তিত্থিযাযতনং গতোপি পুন পব্বজ্জঞ্চ উপসম্পদঞ্চ লভতী’’তি কুৰুন্দিযং ৱুত্তং. পুৰিমো পন থেয্যসংৱাসকো অনুপসম্পন্নেন কথিতো, তস্মা উপসম্পন্নো কূটৱস্সং গণেন্তোপি অস্সমণো ন হোতি. লিঙ্গে সউস্সাহো পাৰাজিকং আপজ্জিত্ৱা ভিক্খুৱস্সাদীনি গণ্হন্তোপি থেয্যসংৱাসকো ন হোতি.

১৪০. তিৰচ্ছানগতোতি নাগো ৱা হোতু সুপণ্ণমাণৱকাদীনং ৱা অঞ্ঞতৰো অন্তমসো সক্কং দেৱৰাজানং উপাদায যো কোচি অমনুস্সজাতিযো, সব্বোৱ ইমস্মিং অত্থে ‘‘তিৰচ্ছানগতো’’তি ৱেদিতব্বো. সো চ নেৱ উপসম্পাদেতব্বো ন পব্বাজেতব্বো, উপসম্পন্নোপি নাসেতব্বো.

১৪১. মাতুঘাতকাদীসু পন যেন মনুস্সিত্থিভূতা জনিকা মাতা সযম্পি মনুস্সজাতিকেনেৱ সভা সঞ্চিচ্চ জীৱিতা ৱোৰোপিতা, অযং আনন্তৰিযেন মাতুঘাতককম্মেন মাতুঘাতকো. এতস্স পব্বজ্জা চ উপসম্পদা চ পটিক্খিত্তা. যেন পন মনুস্সিত্থিভূতাপি অজনিকা পোসাৱনিকা মাতা ৱা চূড়মাতা ৱা জনিকাপি ৱা ন মনুস্সিত্থিভূতা মাতা ঘাতিতা, তস্স পব্বজ্জা ন ৱাৰিতা, ন চ আনন্তৰিকো হোতি. যেন সযং তিৰচ্ছানভূতেন মনুস্সিত্থিভূতা মাতা ঘাতিতা, সোপি আনন্তৰিকো ন হোতি, তিৰচ্ছানগতত্তা পনস্স পব্বজ্জা পটিক্খিত্তা. পিতুঘাতকেপি এসেৱ নযো. সচেপি হি ৱেসিযা পুত্তো হোতি, ‘‘অযং মে পিতা’’তি ন জানাতি, যস্স সম্ভৱেন নিব্বত্তো, সো চে অনেন ঘাতিতো, পিতুঘাতকোত্ৱেৱ সঙ্খ্যং গচ্ছতি, আনন্তৰিযঞ্চ ফুসতি.

অৰহন্তঘাতকোপি মনুস্সঅৰহন্তৱসেনেৱ ৱেদিতব্বো. মনুস্সজাতিযঞ্হি অন্তমসো অপব্বজিতম্পি খীণাসৱং দাৰকং ৱা দাৰিকং ৱা সঞ্চিচ্চ জীৱিতা ৱোৰোপেন্তো অৰহন্তঘাতকোৱ হোতি, আনন্তৰিযঞ্চ ফুসতি, পব্বজ্জা চস্স ৱাৰিতা. অমনুস্সজাতিকং পন অৰহন্তং মনুস্সজাতিকং ৱা অৱসেসং অৰিযপুগ্গলং ঘাতেত্ৱা আনন্তৰিকো ন হোতি, পব্বজ্জাপিস্স ন ৱাৰিতা, কম্মং পন বলৱং হোতি. তিৰচ্ছানো মনুস্সঅৰহন্তম্পি ঘাতেত্ৱা আনন্তৰিকো ন হোতি, কম্মং পন ভাৰিযন্তি অযমেত্থ ৱিনিচ্ছযো.

যো পন দেৱদত্তো ৱিয দুট্ঠচিত্তেন ৱধকচিত্তেন তথাগতস্স জীৱমানকসৰীৰে খুদ্দকমক্খিকায পিৱনমত্তম্পি লোহিতং উপ্পাদেতি, অযং লোহিতুপ্পাদকো নাম. এতস্স পব্বজ্জা চ উপসম্পদা চ ৱাৰিতা. যো পন ৰোগৱূপসমত্থং জীৱকো ৱিয সত্থেন ফালেত্ৱা পূতিমংসলোহিতং হৰিত্ৱা ফাসুকং কৰোতি, বহুং সো পুঞ্ঞং পসৱতীতি.

যো দেৱদত্তো ৱিয সাসনং উদ্ধম্মং উব্বিনযং কত্ৱা চতুন্নং কম্মানং অঞ্ঞতৰৱসেন সঙ্ঘং ভিন্দতি, অযং সঙ্ঘভেদকো নাম. এতস্স পব্বজ্জা চ উপসম্পদা চ ৱাৰিতা.

যো পন পকতত্তং ভিক্খুনিং তিণ্ণং মগ্গানং অঞ্ঞতৰস্মিং দূসেতি, অযং ভিক্খুনীদূসকো নাম. এতস্স পব্বজ্জা চ উপসম্পদা চ ৱাৰিতা. যো পন কাযসংসগ্গেন সীলৱিনাসং পাপেতি, তস্স পব্বজ্জা চ উপসম্পদা চ ন ৱাৰিতা. বলক্কাৰেন ওদাতৱত্থৱসনং কত্ৱা অনিচ্ছমানংযেৱ দূসেন্তোপি ভিক্খুনীদূসকোযেৱ, বলক্কাৰেন পন ওদাতৱত্থৱসনং কত্ৱা ইচ্ছমানং দূসেন্তো ভিক্খুনীদূসকো ন হোতি. কস্মা? যস্মা গিহিভাৱে সম্পটিচ্ছি তমত্তেযেৱ সা অভিক্খুনী হোতি. সকিংসীলৱিপন্নং পচ্ছা দূসেন্তো সিক্খমানসামণেৰীসু চ ৱিপ্পটিপজ্জন্তো নেৱ ভিক্খুনীদূসকো হোতি, পব্বজ্জম্পি উপসম্পদম্পি লভতি. ইতি ইমে একাদস অভব্বপুগ্গলা ৱেদিতব্বা.

১৪২. ঊনৱীসতিৱস্সস্স পন উপসম্পদাযেৱ পটিক্খিত্তা, ন পব্বজ্জা, তস্মা পটিসন্ধিগ্গহণতো পট্ঠায পৰিপুণ্ণৱীসতিৱস্সো উপসম্পাদেতব্বো. গব্ভৱীসোপি হি পৰিপুণ্ণৱীসতিৱস্সোত্ৱেৱ সঙ্খ্যং গচ্ছতি. যথাহ ভগৱা –

‘‘যং, ভিক্খৱে, মাতুকুচ্ছিস্মিং পঠমং চিত্তং উপ্পন্নং, পঠমং ৱিঞ্ঞাণং পাতুভূতং, তদুপাদায সাৱস্স জাতি. অনুজানামি, ভিক্খৱে, গব্ভৱীসং উপসম্পাদেতু’’ন্তি (মহাৱ. ১২৪).

তত্থ (পাচি. অট্ঠ. ৪০৪) যো দ্ৱাদস মাসে মাতুকুচ্ছিস্মিং ৱসিত্ৱা মহাপৱাৰণায জাতো, সো ততো পট্ঠায যাৱ একূনৱীসতিমে ৱস্সে মহাপৱাৰণা, তং অতিক্কমিত্ৱা পাটিপদে উপসম্পাদেতব্বো. এতেনুপাযেন হাযনৱড্ঢনং ৱেদিতব্বং. পোৰাণকত্থেৰা পন একূনৱীসতিৱস্সং সামণেৰং নিক্খমনীযপুণ্ণমাসিং অতিক্কম্ম পাটিপদদিৱসে উপসম্পাদেন্তি. কস্মা? একস্মিং ৱস্সে ছ চাতুদ্দসিকউপোসথা হোন্তি, ইতি ৱীসতিযা ৱস্সেসু চত্তাৰো মাসা পৰিহাযন্তি, ৰাজানো ততিযে ততিযে গস্সে ৱস্সং উক্কড্ঢন্তি, ইতি অট্ঠাৰসৱস্সেসু ছ মাসা ৱড্ঢন্তি, ততো উপোসথৱসেন পৰিহীনে চত্তাৰো মাসে অপনেত্ৱা দ্ৱে মাসা অৱসেসা হোন্তি, তে দ্ৱে মাসে গহেত্ৱা ৱীসতি ৱস্সানি পৰিপুণ্ণানি হোন্তীতি নিক্কঙ্খা হুত্ৱা নিক্খমনীযপুণ্ণমাসিং অতিক্কম্ম পাটিপদে উপসম্পাদেন্তি.

এত্থ পন যো পৱাৰেত্ৱা ৱীসতিৱস্সো ভৱিস্সতি, তং সন্ধায ‘‘একূনৱীসতিৱস্স’’ন্তি ৱুত্তং. তস্মা যো মাতুকুচ্ছিস্মিং দ্ৱাদস মাসে ৱসি, সো একৱীসতিৱস্সো হোতি. যো সত্ত মাসে ৱসি, সো সত্তমাসাধিকৱীসতিৱস্সো. ছমাসজাতো পন ন জীৱতি, ঊনৱীসতিৱস্সং পন ‘‘পৰিপুণ্ণৱীসতিৱস্সো’’তি সঞ্ঞায উপসম্পাদেন্তস্স অনাপত্তি, পুগ্গলো পন অনুপসম্পন্নোৱ হোতি. সচে পন সো দসৱস্সচ্চযেন অঞ্ঞং উপসম্পাদেতি, তঞ্চে মুঞ্চিত্ৱা গণো পূৰতি, সূপসম্পন্নো. সোপি চ যাৱ ন জানাতি, তাৱস্স নেৱ সগ্গন্তৰাযো ন মোক্খন্তৰাযো, ঞত্ৱা পন পুন উপসম্পজ্জিতব্বং.

১৪৩. ইতি ইমেহি পব্বজ্জাদোসেহি ৱিৰহিতোপি ‘‘ন, ভিক্খৱে, অননুঞ্ঞাতো মাতাপিতূহি পুত্তো পব্বাজেতব্বো’’তি (মহাৱ. ১০৫) ৱচনতো মাতাপিতূহি অননুঞ্ঞাতো ন পব্বাজেতব্বো. তত্থ (মহাৱ. অট্ঠ. ১০৫) মাতাপিতূহীতি জনকে সন্ধায ৱুত্তং. সচে দ্ৱেপি অত্থি, দ্ৱেপি আপুচ্ছিতব্বা. সচে পিতা মতো হোতি মাতা ৱা, যো জীৱতি, সো আপুচ্ছি তব্বো, পব্বজিতাপি আপুচ্ছিতব্বাৱ. আপুচ্ছন্তেন সযং ৱা গন্ত্ৱা আপুচ্ছিতব্বং, অঞ্ঞো ৱা পেসেতব্বো. সো এৱ ৱা পেসেতব্বো ‘‘গচ্ছ মাতাপিতৰো আপুচ্ছিত্ৱা এহী’’তি. সচে ‘‘অনুঞ্ঞাতোম্হী’’তি ৱদতি, সদ্দহন্তেন পব্বাজেতব্বো. পিতা সযং পব্বজিতো পুত্তম্পি পব্বাজেতুকামো হোতি, মাতৰং আপুচ্ছিত্ৱা পব্বাজেতু. মাতা ৱা ধীতৰং পব্বাজেতুকামা পিতৰং আপুচ্ছিত্ৱাৱ পব্বাজেতু. পিতা পুত্তদাৰেন অনত্থিকো পলাযি, মাতা ‘‘ইমং পব্বজেথা’’তি পুত্তং ভিক্খূনং দেতি, ‘‘পিতাস্স কুহি’’ন্তি ৱুত্তে ‘‘চিত্তকেড়িং কীড়িতুং পলাতো’’তি ৱদতি, তং পব্বাজেতুং ৱট্টতি. মাতা কেনচি পুৰিসেন সদ্ধিং পলাতা হোতি, পিতা পন ‘‘পব্বাজেথা’’তি ৱদতি, এত্থাপি এসেৱ নযো. পিতা ৱিপ্পৱুত্থো হোতি, মাতা পুত্তং ‘‘পব্বাজেথা’’তি অনুজানাতি, ‘‘পিতাস্স কুহি’’ন্তি ৱুত্তে ‘‘কিং তুম্হাকং পিতৰা, অহং জানিস্সামী’’তি ৱদতি, পব্বাজেতুং ৱট্টতীতি কুৰুন্দিযং ৱুত্তং.

মাতাপিতৰো মতা, দাৰকো চূড়মাতাদীনং সন্তিকে সংৱদ্ধো, তস্মিং পব্বাজিযমানে ঞাতকা কলহং ৱা কৰোন্তি খিয্যন্তি ৱা, তস্মা ৱিৱাদুপচ্ছেদনত্থং আপুচ্ছিত্ৱা পব্বাজেতব্বো, অনাপুচ্ছিত্ৱা পব্বাজেন্তস্স পন আপত্তি নত্থি. দহৰকালে গহেত্ৱা পোসকা মাতাপিতৰো নাম হোন্তি, তেসুপি এসেৱ নযো. পুত্তো অত্তানং নিস্সায জীৱতি, ন মাতাপিতৰো. সচেপি ৰাজা হোতি, আপুচ্ছিত্ৱাৱ পব্বাজেতব্বো. মাতাপিতূহি অনুঞ্ঞাতো পব্বজিত্ৱা পুন ৱিব্ভমতি, সচেপি সতক্খত্তুং পব্বজিত্ৱা ৱিব্ভমতি, আগতাগতকালে পুনপ্পুনং আপুচ্ছিত্ৱাৱ পব্বাজেতব্বো. সচেপি এৱং ৱদন্তি ‘‘অযং ৱিব্ভমিত্ৱা গেহং আগতো, অম্হাকং কম্মং ন কৰোতি, পব্বজিত্ৱা তুম্হাকং ৱত্তং ন পূৰেতি, নত্থি ইমস্স আপুচ্ছনকিচ্চং, আগতাগতং নং পব্বাজেয্যাথা’’তি, এৱং নিস্সট্ঠং পুন অনাপুচ্ছাপি পব্বাজেতুং ৱট্টতি.

যোপি দহৰকালেযেৱ ‘‘অযং তুম্হাকং দিন্নো, যদা ইচ্ছথ, তদা পব্বাজেয্যাথা’’তি এৱং দিন্নো হোতি, সোপি আগতাগতো পুন অনাপুচ্ছিত্ৱাৱ পব্বাজেতব্বো. যং পন দহৰকালেযেৱ ‘‘ইমং, ভন্তে, পব্বাজেয্যাথা’’তি অনুজানিত্ৱা পচ্ছা ৱুড্ঢিপ্পত্তকালে নানুজানন্তি, অযং ন অনাপুচ্ছা পব্বাজেতব্বো. একো মাতাপিতূহি সদ্ধিং ভণ্ডিত্ৱা ‘‘পব্বাজেথ ম’’ন্তি আগচ্ছতি, ‘‘আপুচ্ছিত্ৱা এহী’’তি চ ৱুত্তো ‘‘নাহং গচ্ছামি, সচে মং ন পব্বাজেথ, ৱিহাৰং ৱা ঝাপেমি, সত্থেন ৱা তুম্হে পহৰামি, তুম্হাকং ঞাতকানং ৱা উপট্ঠাকানং ৱা আৰামচ্ছেদনাদীহি অনত্থং উপ্পাদেমি, ৰুক্খা ৱা পতিত্ৱা মৰামি, চোৰমজ্ঝং ৱা পৱিসামি, দেসন্তৰং ৱা গচ্ছামী’’তি ৱদতি, তং তস্সেৱ ৰক্খণত্থায পব্বাজেতুং ৱট্টতি. সচে পনস্স মাতাপিতৰো আগন্ত্ৱা ‘‘কস্মা অম্হাকং পুত্তং পব্বাজযিত্থা’’তি ৱদন্তি, তেসং তমত্থং আৰোচেত্ৱা ‘‘ৰক্খণত্থায নং পব্বাজযিম্হ, পঞ্ঞাযথ তুম্হে পুত্তেনা’’তি ৱত্তব্বা. ‘‘ৰুক্খা পতিস্সামী’’তি অভিৰুহিত্ৱা পন হত্থপাদে মুঞ্চন্তং পব্বাজেতুং ৱট্টতিযেৱ.

একো ৱিদেসং গন্ত্ৱা পব্বজ্জং যাচতি, আপুচ্ছিত্ৱা চে গতো, পব্বাজেতব্বো. নো চে, দহৰভিক্খুং পেসেত্ৱা আপুচ্ছাপেত্ৱা পব্বাজেতব্বো. অতিদূৰঞ্চে হোতি, পব্বাজেত্ৱাপি ভিক্খূহি সদ্ধিং পেসেত্ৱা দস্সেতুং ৱট্টতি. কুৰুন্দিযং পন ৱুত্তং ‘‘সচে দূৰং হোতি, মগ্গো চ মহাকন্তাৰো, ‘গন্ত্ৱা আপুচ্ছিস্সামী’তি পব্বাজেতুং ৱট্টতী’’তি. সচে পন মাতাপিতূনং বহূ পুত্তা হোন্তি, এৱঞ্চ ৱদন্তি ‘‘ভন্তে, এতেসং দাৰকানং যং ইচ্ছথ, তং পব্বাজেয্যাথা’’তি, দাৰকে ৱীমংসিত্ৱা যং ইচ্ছতি, সো পব্বাজেতব্বো. সচেপি সকলেন কুলেন ৱা গামেন ৱা অনুঞ্ঞাতো হোতি ‘‘ভন্তে, ইমস্মিং কুলে ৱা গামে ৱা যং ইচ্ছথ, তং পব্বাজেয্যাথা’’তি, যং ইচ্ছতি, সো পব্বাজেতব্বোতি.

১৪৪. এৱং (মহাৱ. অট্ঠ. ৩৪) পব্বজ্জাদোসৱিৰহিতং মাতাপিতূহি অনুঞ্ঞাতং পব্বাজেন্তেনপি চ সচে অচ্ছিন্নকেসো হোতি, একসীমাযঞ্চ অঞ্ঞেপি ভিক্খূ অত্থি, কেসচ্ছেদনত্থায ভণ্ডুকম্মং আপুচ্ছিতব্বং. তত্ৰাযং আপুচ্ছনৱিধি (মহাৱ. অট্ঠ. ৯৮) – সীমাপৰিযাপন্নে ভিক্খূ সন্নিপাতেত্ৱা পব্বজ্জাপেক্খং তত্থ নেত্ৱা ‘‘সঙ্ঘং, ভন্তে, ইমস্স দাৰকস্স ভণ্ডুকম্মং আপুচ্ছামী’’তি তিক্খত্তুং ৱা দ্ৱিক্খত্তুং ৱা সকিং ৱা ৱত্তব্বং. এত্থ চ ‘‘ইমস্স দাৰকস্স ভণ্ডুকম্মং আপুচ্ছামী’’তিপি ‘‘ইমস্স সমণকৰণং আপুচ্ছামী’’তিপি ‘‘অযং সমণো হোতুকামো’’তিপি ‘‘অযং পব্বজিতুকামো’’তিপি ৱত্তুং ৱট্টতিযেৱ. সচে সভাগট্ঠানং হোতি, দস ৱা ৱীসতি ৱা তিংসং ৱা ভিক্খূ ৱসন্তীতি পৰিচ্ছেদো পঞ্ঞাযতি, তেসং ঠিতোকাসং ৱা নিসিন্নোকাসং ৱা গন্ত্ৱাপি পুৰিমনযেনেৱ আপুচ্ছিতব্বং. পব্বজ্জাপেক্খং ৱিনাৱ দহৰভিক্খূ ৱা সামণেৰে ৱা পেসেত্ৱাপি ‘‘একো, ভন্তে, পব্বজ্জাপেক্খো অত্থি, তস্স ভণ্ডুকম্মং আপুচ্ছামা’’তিআদিনা নযেন আপুচ্ছাপেতুং ৱট্টতি. সচে কেচি ভিক্খূ সেনাসনং ৱা গুম্বাদীনি ৱা পৱিসিত্ৱা নিদ্দাযন্তি ৱা সমণধম্মং ৱা কৰোন্তি, আপুচ্ছকা চ পৰিযেসন্তাপি অদিস্ৱা ‘‘সব্বে আপুচ্ছিতা অম্হেহী’’তি সঞ্ঞিনো হোন্তি, পব্বজ্জা নাম লহুককম্মং, তস্মা পব্বজিতো সুপব্বজিতো, পব্বাজেন্তস্সপি অনাপত্তি.

সচে পন ৱিহাৰো মহা হোতি অনেকভিক্খুসহস্সাৱাসো, সব্বে ভিক্খূ সন্নিপাতাপেতুম্পি দুক্কৰং, পগেৱ পটিপাটিযা আপুচ্ছিতুং, খণ্ডসীমায ৱা ঠত্ৱা নদীসমুদ্দাদীনি ৱা গন্ত্ৱা পব্বাজেতব্বো. যো পন নৱমুণ্ডো ৱা হোতি ৱিব্ভন্তকো ৱা নিগণ্ঠাদীসু অঞ্ঞতৰো ৱা দ্ৱঙ্গুলকেসো ৱা ঊনদ্ৱঙ্গুলকেসো ৱা, তস্স কেসচ্ছেদনকিচ্চং নত্থি, তস্মা ভণ্ডুকম্মং অনাপুচ্ছিত্ৱাপি তাদিসং পব্বাজেতুং ৱট্টতি. দ্ৱঙ্গুলাতিৰিত্তকেসো পন যো হোতি অন্তমসো একসিখামত্তধৰোপি, সো ভণ্ডুকম্মং আপুচ্ছিত্ৱাৱ পব্বাজেতব্বো.

১৪৫. এৱং আপুচ্ছিত্ৱা পব্বাজেন্তেন চ পৰিপুণ্ণপত্তচীৱৰোৱ পব্বাজেতব্বো. সচে তস্স নত্থি, যাচিতকেনপি পত্তচীৱৰেন পব্বাজেতুং ৱট্টতি, সভাগট্ঠানে ৱিস্সাসেন গহেত্ৱাপি পব্বাজেতুং ৱট্টতি. সচে (মহাৱ. অট্ঠ. ১১৮) পন অপক্কং পত্তং চীৱৰূপগানি চ ৱত্থানি গহেত্ৱা আগতো হোতি, যাৱ পত্তো পচ্চতি, চীৱৰানি চ কৰীযন্তি, তাৱ ৱিহাৰে ৱসন্তস্স অনামট্ঠপিণ্ডপাতং দাতুং ৱট্টতি, থালকেসু ভুঞ্জিতুং ৱট্টতি. পুৰেভত্তং সামণেৰভাগসমকো আমিসভাগো দাতুং ৱট্টতি, সেনাসনগ্গাহো পন সলাকভত্তউদ্দেসভত্তনিমন্তনাদীনি চ ন ৱট্টন্তি. পচ্ছাভত্তম্পি সামণেৰভাগসমো তেলতণ্ডুলমধুফাণিতাদিভেসজ্জভাগো ৱট্টতি. সচে গিলানো হোতি, ভেসজ্জমস্স কাতুং ৱট্টতি, সামণেৰস্স ৱিয সব্বং পটিজগ্গনকম্মং. উপসম্পদাপেক্খং পন যাচিতকেন পত্তচীৱৰেন উপসম্পাদেতুং ন ৱট্টতি. ‘‘ন, ভিক্খৱে, যাচিতকেন পত্তচীৱৰেন উপসম্পাদেতব্বো, যো উপসম্পাদেয্য, আপত্তি দুক্কটস্সা’’তি (মহাৱ. ১১৮) ৱুত্তং. তস্মা সো পৰিপুণ্ণপত্তচীৱৰোযেৱ উপসম্পাদেতব্বো. সচে তস্স নত্থি, আচৰিযুপজ্ঝাযা চস্স দাতুকামা হোন্তি, অঞ্ঞে ৱা ভিক্খূ নিৰপেক্খেহি নিস্সজ্জিত্ৱা অধিট্ঠানুপগং পত্তচীৱৰং দাতব্বং. যাচিতকেন পন পত্তেন ৱা চীৱৰেন ৱা উপসম্পাদেন্তস্সেৱ আপত্তি হোতি, কম্মং পন ন কুপ্পতি.

১৪৬. পৰিপুণ্ণপত্তচীৱৰং (মহাৱ. অট্ঠ. ৩৪) পব্বাজেন্তেনপি সচে ওকাসো হোতি, সযং পব্বাজেতব্বো. সচে উদ্দেসপৰিপুচ্ছাদীহি ব্যাৱটো হোতি, ওকাসং ন লভতি, একো দহৰভিক্খু ৱত্তব্বো ‘‘এতং পব্বাজেহী’’তি. অৱুত্তোপি চে দহৰভিক্খু উপজ্ঝাযং উদ্দিস্স পব্বাজেতি, ৱট্টতি. সচে দহৰভিক্খু নত্থি, সামণেৰোপি ৱত্তব্বো ‘‘এতং খণ্ডসীমং নেত্ৱা পব্বাজেত্ৱা কাসাযানি অচ্ছাদেত্ৱা এহী’’তি. সৰণানি পন সযং দাতব্বানি. এৱং ভিক্খুনাৱ পব্বাজিতো হোতি. পুৰিসঞ্হি ভিক্খুতো অঞ্ঞো পব্বাজেতুং ন লভতি, মাতুগামং ভিক্খুনীতো অঞ্ঞো, সামণেৰো পন সামণেৰী ৱা আণত্তিযা কাসাযানি দাতুং লভন্তি, কেসোৰোপনং যেন কেনচি কতং সুকতং.

সচে পন ভব্বৰূপো হোতি সহেতুকো ঞাতো যসস্সী কুলপুত্তো, ওকাসং কত্ৱাপি সযমেৱ পব্বাজেতব্বো, ‘‘মত্তিকামুট্ঠিং গহেত্ৱা নহাযিত্ৱা আগচ্ছাহী’’তি চ ন পন ৱিস্সজ্জেতব্বো. পব্বজিতুকামানঞ্হি পঠমং বলৱউস্সাহো হোতি, পচ্ছা পন কাসাযানি চ কেসহৰণসত্থকঞ্চ দিস্ৱা উত্ৰসন্তি, এত্তোযেৱ পলাযন্তি, তস্মা সযমেৱ নহানতিত্থং নেত্ৱা সচে নাতিদহৰো, ‘‘নহাহী’’তি ৱত্তব্বো, কেসা পনস্স সযমেৱ মত্তিকং গহেত্ৱা ধোৱিতব্বা. দহৰকুমাৰকো পন সযং উদকং ওতৰিত্ৱা গোমযমত্তিকাহি ঘংসিত্ৱা নহাপেতব্বো. সচেপিস্স কচ্ছু ৱা পিড়কা ৱা হোন্তি, যথা মাতা পুত্তং ন জিগুচ্ছতি, এৱমেৱং অজিগুচ্ছন্তেন সাধুকং হত্থপাদতো চ সীসতো চ পট্ঠায ঘংসিত্ৱা ঘংসিত্ৱা নহাপেতব্বো. কস্মা? এত্তকেন হি উপকাৰেন কুলপুত্তা আচৰিযুপজ্ঝাযেসু চ সাসনে চ বলৱসিনেহা তিব্বগাৰৱা অনিৱত্তিধম্মা হোন্তি, উপ্পন্নং অনভিৰতিং ৱিনোদেত্ৱা থেৰভাৱং পাপুণন্তি, কতঞ্ঞুকতৱেদিনো হোন্তি.

এৱং নহাপনকালে পন কেসমস্সুং ওৰোপনকালে ৱা ‘‘ত্ৱং ঞাতো যসস্সী, ইদানি মযং তং নিস্সায পচ্চযেহি ন কিলমিস্সামা’’তি ন ৱত্তব্বো, অঞ্ঞাপি অনিয্যানিককথা ন ৱত্তব্বা, অথ খ্ৱস্স ‘‘আৱুসো, সুট্ঠু উপধাৰেহি, সতিং উপট্ঠাপেহী’’তি ৱত্ৱা তচপঞ্চককম্মট্ঠানং আচিক্খিতব্বং. আচিক্খন্তেন চ ৱণ্ণসণ্ঠানগন্ধাসযোকাসৱসেন অসুচিজেগুচ্ছপটিক্কূলভাৱং নিজ্জীৱনিস্সত্তভাৱং ৱা পাকটং কৰোন্তেন আচিক্খিতব্বং. সচে হি সো পুব্বে মদ্দিতসঙ্খাৰো হোতি ভাৱিতভাৱনো কণ্টকৱেধাপেক্খো ৱিয পৰিপক্কগণ্ডো সূৰিযুগ্গমনাপেক্খং ৱিয চ পৰিণতপদুমং, অথস্স আৰদ্ধমত্তে কম্মট্ঠানং মনসিকাৰে ইন্দাসনি ৱিয পব্বতে কিলেসপব্বতে চুণ্ণযমানংযেৱ ঞাণং পৱত্ততি, খুৰগ্গেযেৱ অৰহত্তং পাপুণাতি. যে হি কেচি খুৰগ্গে অৰহত্তং পত্তা, সব্বে তে এৱৰূপং সৱনং লভিত্ৱা কল্যাণমিত্তেন আচৰিযেন দিন্ননযং নিস্সায, নো অনিস্সায. তস্মাস্স আদিতোৱ এৱৰূপী কথা কথেতব্বাতি.

কেসেসু পন ওৰোপিতেসু হলিদ্দিচুণ্ণেন ৱা গন্ধচুণ্ণেন ৱা সীসঞ্চ সৰীৰঞ্চ উব্বট্টেত্ৱা গিহিগন্ধং অপনেত্ৱা কাসাযানি তিক্খত্তুং ৱা দ্ৱিক্খত্তুং ৱা সকিং ৱা পটিগ্গাহাপেতব্বো. অথাপিস্স হত্থে অদত্ৱা আচৰিযো ৱা উপজ্ঝাযো ৱা সযমেৱ অচ্ছাদেতি, ৱট্টতি. সচে অঞ্ঞং দহৰং ৱা সামণেৰং ৱা উপাসকং ৱা আণাপেতি ‘‘আৱুসো, এতানি কাসাযানি গহেত্ৱা এতং অচ্ছাদেহী’’তি, তঞ্ঞেৱ ৱা আণাপেতি ‘‘এতানি গহেত্ৱা অচ্ছাদেহী’’তি, সব্বং তং ৱট্টতি, সব্বং তেন ভিক্খুনাৱ দিন্নং হোতি. যং পন নিৱাসনং ৱা পাৰুপনং ৱা অনাণত্তিযা নিৱাসেতি ৱা পাৰুপতি ৱা, তং অপনেত্ৱা পুন দাতব্বং. ভিক্খুনা হি সহত্থেন ৱা আণত্তিযা ৱা দিন্নমেৱ কাসাযং ৱট্টতি, অদিন্নং ন ৱট্টতি. সচেপি তস্সেৱ সন্তকং হোতি, কো পন ৱাদো উপজ্ঝাযমূলকে.

১৪৭. এৱং পন দিন্নানি কাসাযানি অচ্ছাদাপেত্ৱা একংসং উত্তৰাসঙ্গং কাৰাপেত্ৱা যে তত্থ সন্নিপতিতা ভিক্খূ, তেসং পাদে ৱন্দাপেত্ৱা অথ সৰণগহণত্থং উক্কুটিকং নিসীদাপেত্ৱা অঞ্জলিং পগ্গণ্হাপেত্ৱা ‘‘এৱং ৱদেহী’’তি ৱত্তব্বো, ‘‘যমহং ৱদামি, তং ৱদেহী’’তি ৱত্তব্বো. অথস্স উপজ্ঝাযেন ৱা আচৰিযেন ৱা ‘‘বুদ্ধং সৰণং গচ্ছামী’’তিআদিনা নযেন সৰণানি দাতব্বানি যথাৱুত্তপটিপাটিযাৱ, ন উপ্পটিপাটিযা. সচে হি একপদম্পি একক্খৰম্পি উপ্পটিপাটিযা দেতি, বুদ্ধং সৰণংযেৱ ৱা তিক্খত্তুং দত্ৱা পুন ইতৰেসু একেকং তিক্খত্তুং দেতি, অদিন্নানি হোন্তি সৰণানি.

ইমঞ্চ পন সৰণগমনুপসম্পদং পটিক্খিপিত্ৱা অনুঞ্ঞাতউপসম্পদা একতোসুদ্ধিযা ৱট্টতি, সামণেৰপব্বজ্জা পন উভতোসুদ্ধিযাৱ ৱট্টতি, নো একতোসুদ্ধিযা. তস্মা উপসম্পদায সচে আচৰিযো ঞত্তিদোসঞ্চেৱ কম্মৱাচাদোসঞ্চ ৱজ্জেত্ৱা কম্মং কৰোতি, সুকতং হোতি. পব্বজ্জায পন ইমানি তীণি সৰণানি বু-কাৰ ধ-কাৰাদীনং ব্যঞ্জনানং ঠানকৰণসম্পদং অহাপেন্তেন আচৰিযেনপি অন্তেৱাসিকেনপি ৱত্তব্বানি. সচে আচৰিযো ৱত্তুং সক্কোতি, অন্তেৱাসিকো ন সক্কোতি, অন্তেৱাসিকো ৱা সক্কোতি, আচৰিযো ন সক্কোতি, উভোপি ৱা ন সক্কোন্তি, ন ৱট্টতি. সচে পন উভোপি সক্কোন্তি, ৱট্টতি. ইমানি চ পন দদমানেন ‘‘বুদ্ধং সৰণং গচ্ছামী’’তি এৱং একসম্বন্ধানি অনুনাসিকন্তানি ৱা কত্ৱা দাতব্বানি, ‘‘বুদ্ধম সৰণম গচ্ছামী’’তি এৱং ৱিচ্ছিন্দিত্ৱা মকাৰন্তানি ৱা কত্ৱা দাতব্বানি. অন্ধকট্ঠকথাযং ‘‘নামং সাৱেত্ৱা ‘অহং, ভন্তে, বুদ্ধৰক্খিতো যাৱজীৱং বুদ্ধং সৰণং গচ্ছামী’’তি ৱুত্তং, তং একট্ঠকথাযম্পি নত্থি, পাড়িযম্পি ন ৱুত্তং, তেসং ৰুচিমত্তমেৱ, তস্মা ন গহেতব্বং. ন হি তথা অৱদন্তস্স সৰণং কুপ্পতি. এত্তাৱতা চ সামণেৰভূমিযং পতিট্ঠিতো হোতি.

১৪৮. সচে পনেস গতিমা হোতি পণ্ডিতজাতিকো, অথস্স তস্মিংযেৱ ঠানে সিক্খাপদানি উদ্দিসিতব্বানি. কথং? যথা ভগৱতা উদ্দিট্ঠানি. ৱুত্তঞ্হেতং –

‘‘অনুজানামি, ভিক্খৱে, সামণেৰানং দস সিক্খাপদানি, তেসু চ সামণেৰেহি সিক্খিতুং. পাণাতিপাতা ৱেৰমণি, অদিন্নাদানা ৱেৰমণি, অব্ৰহ্মচৰিযা ৱেৰমণি, মুসাৱাদা ৱেৰমণি, সুৰামেৰযমজ্জপমাদট্ঠানা ৱেৰমণি, ৱিকালভোজনা ৱেৰমণি, নচ্চগীতৱাদিত ৱিসূকদস্সনা ৱেৰমণি, মালাগন্ধ ৱিলেপন ধাৰণ মণ্ডন ৱিভূসনট্ঠানা ৱেৰমণি, উচ্চাসযনমহাসযনা ৱেৰমণি, জাতৰূপৰজতপটিগ্গহণা ৱেৰমণী’’তি (মহাৱ. ১০৬).

অন্ধকট্ঠকথাযং পন ‘‘অহং, ভন্তে, ইত্থন্নামো যাৱজীৱং পাণাতিপাতা ৱেৰমণিসিক্খাপদং সমাদিযামী’’তি এৱং সৰণদানং ৱিয সিক্খাপদদানম্পি ৱুত্তং, তং নেৱ পাড়িযং, ন অট্ঠকথাসু অত্থি, তস্মা যথাপাড়িযাৱ উদ্দিসিতব্বানি. পব্বজ্জা হি সৰণগমনেহেৱ সিদ্ধা, সিক্খাপদানি পন কেৱলং সিক্খাপদপূৰণত্থং জানিতব্বানি, তস্মা পাড়িযা আগতনযেনেৱ উগ্গহেতুং অসক্কোন্তস্স যায কাযচি ভাসায অত্থৱসেনপি আচিক্খিতুং ৱট্টতি. যাৱ পন অত্তনা সিক্খিতব্বসিক্খাপদানি ন জানাতি, সঙ্ঘাটিপত্তচীৱৰধাৰণট্ঠাননিসজ্জাদীসু পানভোজনাদিৱিধিম্হি চ ন কুসলো হোতি, তাৱ ভোজনসালং ৱা সলাকভাজনট্ঠানং ৱা অঞ্ঞং ৱা তথাৰূপট্ঠানং ন পেসেতব্বো, সন্তিকাৱচৰোযেৱ কাতব্বো, বালদাৰকো ৱিয পটিপজ্জিতব্বো, সব্বমস্স কপ্পিযাকপ্পিযং আচিক্খিতব্বং, নিৱাসনপাৰুপনাদীসু অভিসমাচাৰিকেসু ৱিনেতব্বো. তেনপি –

‘‘অনুজানামি, ভিক্খৱে, দসহঙ্গেহি সমন্নাগতং সামণেৰং নাসেতুং. পাণাতিপাতী হোতি, অদিন্নাদাযী হোতি, অব্ৰহ্মচাৰী হোতি, মুসাৱাদী হোতি, মজ্জপাযী হোতি, বুদ্ধস্স অৱণ্ণং ভাসতি, ধম্মস্স অৱণ্ণং ভাসতি, সঙ্ঘস্স অৱণ্ণং ভাসতি, মিচ্ছাদিট্ঠিকো হোতি, ভিক্খুনীদূসকো হোতী’’তি (মহাৱ. ১০৮) –

এৱং ৱুত্তানি দস নাসনঙ্গানি আৰকা পৰিৱজ্জেত্ৱা আভিসমাচাৰিকং পৰিপূৰেন্তেন দসৱিধে সীলে সাধুকং সিক্খিতব্বং.

১৪৯. যো পন (মহাৱ. অট্ঠ. ১০৮) পাণাতিপাতাদীসু দসসু নাসনঙ্গেসু একম্পি কম্মং কৰোতি, সো লিঙ্গনাসনায নাসেতব্বো. তীসু হি নাসনাসু লিঙ্গনাসনাযেৱ ইধাধিপ্পেতা. যথা চ ভিক্খূনং পাণাতিপাতাদীসু তা তা আপত্তিযো হোন্তি, ন তথা সামণেৰানং. সামণেৰো হি কুন্থ কিপিল্লিকম্পি মাৰেত্ৱা মঙ্গুলণ্ডকম্পি ভিন্দিত্ৱা নাসেতব্বতংযেৱ পাপুণাতি, তাৱদেৱস্স সৰণগমনানি চ উপজ্ঝাযগ্গহণঞ্চ সেনাসনগ্গাহো চ পটিপ্পস্সম্ভন্তি, সঙ্ঘলাভং ন লভতি, লিঙ্গমত্তমেৱ একং অৱসিট্ঠং হোতি. সো সচে আকিণ্ণদোসোৱ হোতি, আযতিং সংৱৰে ন তিট্ঠতি, নিক্কড্ঢিতব্বো. অথ সহসা ৱিৰজ্ঝিত্ৱা ‘‘দুট্ঠু মযা কত’’ন্তি পুন সংৱৰে ঠাতুকামো হোতি, লিঙ্গনাসনকিচ্চং নত্থি, যথানিৱত্থপাৰুতস্সেৱ সৰণানি দাতব্বানি, উপজ্ঝাযো দাতব্বো. সিক্খাপদানি পন সৰণগমনেনেৱ ইজ্ঝন্তি. সামণেৰানঞ্হি সৰণগমনং ভিক্খূনং উপসম্পদকম্মৱাচাসদিসং, তস্মা ভিক্খূনং ৱিয চতুপাৰিসুদ্ধিসীলং ইমিনাপি দস সীলানি সমাদিন্নানেৱ হোন্তি, এৱং সন্তেপি দড়্হীকৰণত্থং আযতিং সংৱৰে পতিট্ঠাপনত্থং পুন দাতব্বানি. সচে পুৰিমিকায পুন সৰণানি গহিতানি, পচ্ছিমিকায ৱস্সাৱাসিকং লচ্ছতি. সচে পচ্ছিমিকায গহিতানি, সঙ্ঘেন অপলোকেত্ৱা লাভো দাতব্বো. অদিন্নাদানে তিণসলাকমত্তেনপি ৱত্থুনা, অব্ৰহ্মচৰিযে তীসু মগ্গেসু যত্থ কত্থচি ৱিপ্পটিপত্তিযা, মুসাৱাদে হসাধিপ্পাযতাযপি মুসা ভণিতে অস্সমণো হোতি, নাসেতব্বতং আপজ্জতি, মজ্জপানে পন ভিক্খুনো অজানিত্ৱাপি বীজতো পট্ঠায মজ্জং পিৱন্তস্স পাচিত্তিযং. সামণেৰো জানিত্ৱা পিৱন্তোৱ সীলভেদং আপজ্জতি, ন অজানিত্ৱা. যানি পনস্স ইতৰানি পঞ্চ সিক্খাপদানি, এতেসু ভিন্নেসু ন নাসেতব্বো, দণ্ডকম্মং কাতব্বং. সিক্খাপদে পন পুন দিন্নেপি অদিন্নেপি ৱট্টতি, দণ্ডকম্মেন পন পীড়েত্ৱা আযতিং সংৱৰে ঠপনত্থায দাতব্বমেৱ.

অৱণ্ণভাসনে পন ‘‘অৰহং সম্মাসম্বুদ্ধো’’তিআদীনং পটিপক্খৱসেন বুদ্ধস্স ৱা ‘‘স্ৱাক্খাতো’’তিআদীনং পটিপক্খৱসেন ধম্মস্স ৱা ‘‘সুপ্পটিপন্নো’’তিআদীনং পটিপক্খৱসেন সঙ্ঘস্স ৱা অৱণ্ণং ভাসন্তো ৰতনত্তযং নিন্দন্তো গৰহন্তো আচৰিযুপজ্ঝাযাদীহি ‘‘মা এৱং অৱচা’’তি অৱণ্ণভাসনে আদীনৱং দস্সেত্ৱা নিৱাৰেতব্বো. ‘‘সচে যাৱততিযং ৱুচ্চমানো ন ওৰমতি, কণ্টকনাসনায নাসেতব্বো’’তি কুৰুন্দিযং ৱুত্তং. মহাঅট্ঠকথাযং পন ‘‘সচে এৱং ৱুচ্চমানো তং লদ্ধিং নিস্সজ্জতি, দণ্ডকম্মং কাৰেত্ৱা অচ্চযং দেসাপেতব্বো. সচে ন নিস্সজ্জতি, তথেৱ আদায পগ্গয্হ তিট্ঠতি, লিঙ্গনাসনায নাসেতব্বো’’তি ৱুত্তং, তং যুত্তং. অযমেৱ হি নাসনা ইধাধিপ্পেতাতি. মিচ্ছাদিট্ঠিকেপি এসেৱ নযো. সস্সতুচ্ছেদানঞ্হি অঞ্ঞতৰদিট্ঠিকো সচে আচৰিযাদীহি ওৱদিযমানো নিস্সজ্জতি, দণ্ডকম্মং কাৰেত্ৱা অচ্চযং দেসাপেতব্বো, অপটিনিস্সজ্জন্তোৱ নাসেতব্বো. ভিক্খুনীদূসকো চেত্থ কামং অব্ৰহ্মচাৰিগ্গহণেন গহিতোৱ, অব্ৰহ্মচাৰিং পন আযতিং সংৱৰে ঠাতুকামং সৰণানি দত্ৱা উপসম্পাদেতুং ৱট্টতি. ভিক্খুনীদূসকো আযতিং সংৱৰে ঠাতুকামোপি পব্বজ্জম্পি ন লভতি, পগেৱ উপসম্পদন্তি এতমত্থং দস্সেতুং ‘‘ভিক্খুনীদূসকো’’তি ইদং ৱিসুং দসমং অঙ্গং ৱুত্তন্তি ৱেদিতব্বং.

১৫০. ‘‘অনুজানামি, ভিক্খৱে, পঞ্চহঙ্গেহি সমন্নাগতস্স সামণেৰস্স দণ্ডকম্মং কাতুং. ভিক্খূনং অলাভায পৰিসক্কতি, ভিক্খূনং অনত্থায পৰিসক্কতি, ভিক্খূনং অৱাসায পৰিসক্কতি, ভিক্খূ অক্কোসতি, পৰিভাসতি, ভিক্খূ ভিক্খূহি ভেদেতী’’তি (মহাৱ. ১০৭) ‘‘ৱচনতো পন ইমানি পঞ্চ অঙ্গানি, সিক্খাপদেসু চ পচ্ছিমানি ৱিকালভোজনাদীনি পঞ্চাতি দস দণ্ডকম্মৱত্থূনি. কিংপনেত্থ দণ্ডকম্মং কত্তব্ব’’ন্তি? ‘‘অনুজানামি, ভিক্খৱে, যত্থ ৱা ৱসতি, যত্থ ৱা পটিক্কমতি, তত্থ আৱৰণং কাতু’’ন্তি (মহাৱ. ১০৭) ৱচনতো যত্থ (মহাৱ. অট্ঠ. ১০৭) ৱসতি ৱা পৱিসতি ৱা, তত্থ আৱৰণং কাতব্বং ‘‘মা ইধ পৱিসা’’তি. উভযেনপি অত্তনো পৰিৱেণঞ্চ ৱস্সগ্গেন পত্তসেনাসনঞ্চ ৱুত্তং. তস্মা ন সব্বো সঙ্ঘাৰামো আৱৰণং কাতব্বো, কৰোন্তো চ দুক্কটং আপজ্জতি ‘‘ন, ভিক্খৱে, সব্বো সঙ্ঘাৰামো আৱৰণং কাতব্বো, যো কৰেয্য, আপত্তি দুক্কটস্সা’’তি ৱুত্তত্তা. ন চ মুখদ্ৱাৰিকো আহাৰো আৱৰণং কাতব্বো, কৰোন্তো চ দুক্কটং আপজ্জতি ‘‘ন, ভিক্খৱে, মুখদ্ৱাৰিকো আহাৰো আৱৰণং কাতব্বো, যো কৰেয্য, আপত্তি দুক্কটস্সা’’তি ৱুত্তত্তা. তস্মা ‘‘অজ্জ মা খাদ মা ভুঞ্জা’’তি ৱদতোপি ‘‘আহাৰম্পি নিৱাৰেস্সামী’’তি পত্তচীৱৰং অন্তো নিক্খিপতোপি সব্বপযোগেসু দুক্কটং. অনাচাৰস্স পন দুব্বচসামণেৰস্স দণ্ডকম্মং কত্ৱা যাগুং ৱা ভত্তং ৱা পত্তচীৱৰং ৱা দস্সেত্ৱা ‘‘এত্তকে নাম দণ্ডকম্মে আহটে ইদং লচ্ছসী’’তি ৱত্তুং ৱট্টতি. ভগৱতা হি আৱৰণমেৱ দণ্ডকম্মং ৱুত্তং. ধম্মসঙ্গাহকত্থেৰেহি পন ‘‘অপৰাধানুৰূপং উদকদাৰুৱালিকাদীনং আহৰাপনম্পি কাতব্ব’’ন্তি ৱুত্তং, তস্মা তম্পি কাতব্বং, তঞ্চ খো ‘‘ওৰমিস্সতি ৱিৰমিস্সতী’’তি অনুকম্পায, ন ‘‘নস্সিস্সতি ৱিব্ভমিস্সতী’’তিআদিনযপ্পৱত্তেন পাপজ্ঝাসযেন. ‘‘দণ্ডকম্মং কৰোমী’’তি চ উণ্হপাসাণে ৱা নিপজ্জাপেতুং পাসাণিট্ঠকাদীনি ৱা সীসে নিক্খিপাপেতুং উদকং ৱা পৱেসেতুং ন ৱট্টতি.

উপজ্ঝাযং অনাপুচ্ছাপি দণ্ডকম্মং ন কাৰেতব্বং ‘‘ন, ভিক্খৱে, উপজ্ঝাযং অনাপুচ্ছা আৱৰণং কাতব্বং, যো কৰেয্য, আপত্তি দুক্কটস্সা’’তি (মহাৱ. ১০৮) ৱচনতো. এত্থ পন ‘‘তুম্হাকং সামণেৰস্স অযং নাম অপৰাধো, দণ্ডকম্মমস্স কৰোথা’’তি তিক্খত্তুং ৱুত্তে সচে সো উপজ্ঝাযো দণ্ডকম্মং ন কৰোতি, সযং কাতুং ৱট্টতি. সচেপি আদিতো উপজ্ঝাযো ৱদতি ‘‘ময্হং সামণেৰানং দোসে সতি তুম্হে দণ্ডকম্মং কৰোথা’’তি, কাতুং ৱট্টতিযেৱ. যথা চ সামণেৰানং, এৱং সদ্ধিৱিহাৰিকন্তেৱাসিকানম্পি দণ্ডকম্মং কাতুং ৱট্টতি, অঞ্ঞেসং পন পৰিসা ন অপলাড়েতব্বা, অপলাড়েন্তো দুক্কটং আপজ্জতি ‘‘ন, ভিক্খৱে, অঞ্ঞস্স পৰিসা অপলাড়েতব্বা, যো অপলাড়েয্য, আপত্তি দুক্কটস্সা’’তি (মহাৱ. ১০৮) ৱচনতো. তস্মা ‘‘তুম্হাকং পত্তং দেম, চীৱৰং দেমা’’তি অত্তনো উপট্ঠানকৰণত্থং সঙ্গণ্হিত্ৱা সামণেৰা ৱা হোন্তু উপসম্পন্না ৱা, অন্তমসো দুস্সীলভিক্খুস্সপি পৰস্স পৰিসভূতে ভিন্দিত্ৱা গণ্হিতুং ন ৱট্টতি, আদীনৱং পন ৱত্তুং ৱট্টতি ‘‘তযা নহাযিতুং আগতেন গূথমক্খনং ৱিয কতং দুস্সীলং নিস্সায ৱিহৰন্তেনা’’তি. সচে সো সযমেৱ জানিত্ৱা উপজ্ঝং ৱা নিস্সযং ৱা যাচতি, দাতুং ৱট্টতি.

ইতি পাড়িমুত্তকৱিনযৱিনিচ্ছযসঙ্গহে

পব্বজ্জাৱিনিচ্ছযকথা সমত্তা.