১৭. মঞ্চপীঠাদিসঙ্ঘিকসেনাসনেসু পটিপজ্জিতব্বৱিনিচ্ছযকথা

৮২. ৱিহাৰে সঙ্ঘিকে সেয্যং, সন্থৰিত্ৱান পক্কমোতি সঙ্ঘিকে ৱিহাৰে সেয্যং সন্থৰিত্ৱান অঞ্ঞত্থ ৱসিতুকামতায ৱিহাৰতো পক্কমনং. তত্ৰাযং ৱিনিচ্ছযো –

‘‘যো পন ভিক্খু সঙ্ঘিকে ৱিহাৰে সেয্যং সন্থৰিত্ৱা ৱা সন্থৰাপেত্ৱা ৱা তং পক্কমন্তো নেৱ উদ্ধৰেয্য ন উদ্ধৰাপেয্য অনাপুচ্ছং ৱা গচ্ছেয্য, পাচিত্তিয’’ন্তি (পাচি. ১১৫) –

ৱচনতো সঙ্ঘিকে ৱিহাৰে সেয্যং সযং সন্থৰিত্ৱা অঞ্ঞেন ৱা সন্থৰাপেত্ৱা উদ্ধৰণাদীনি অকত্ৱা পৰিক্খিত্তস্স আৰামস্স পৰিক্খেপং, অপৰিক্খিত্তস্স উপচাৰং অতিক্কমন্তস্স পাচিত্তিযং.

তত্থ সেয্যা নাম ভিসি চিমিলিকা উত্তৰত্থৰণং ভূমত্থৰণং তট্টিকা চম্মখণ্ডো নিসীদনং পচ্চত্থৰণং তিণসন্থাৰো পণ্ণসন্থাৰোতি দসৱিধা. তত্থ ভিসীতি মঞ্চকভিসি ৱা পীঠকভিসি ৱা. চিমিলিকা নাম সুধাদিপৰিকম্মকতায ভূমিযা ৱণ্ণানুৰক্খণত্থং কতা, তং হেট্ঠা পত্থৰিত্ৱা উপৰি কটসাৰকং পত্থৰন্তি. উত্তৰত্থৰণং নাম মঞ্চপীঠানং উপৰি অত্থৰিতব্বকপচ্চত্থৰণং. ভূমত্থৰণং নাম ভূমিযং অত্থৰিতব্বা কটসাৰকাদিৱিকতি. তট্টিকা নাম তালপণ্ণেহি ৱা ৱাকেহি ৱা কততট্টিকা. চম্মখণ্ডো নাম সীহব্যগ্ঘদীপিতৰচ্ছচম্মাদীসুপি যং কিঞ্চি চম্মং. অট্ঠকথাসু হি সেনাসনপৰিভোগে পটিক্খিত্তচম্মং ন দিস্সতি, তস্মা সীহব্যগ্ঘচম্মাদীনং পৰিহৰণেযেৱ পটিক্খেপো ৱেদিতব্বো. নিসীদনন্তি সদসং ৱেদিতব্বং. পচ্চত্থৰণন্তি পাৱাৰো কোজৱোতি এত্তকমেৱ ৱুত্তং. তিণসন্থাৰোতি যেসং কেসঞ্চি তিণানং সন্থাৰো. এস নযো পণ্ণসন্থাৰেপি. এৱং পন ইমং দসৱিধং সেয্যং সঙ্ঘিকে ৱিহাৰে সন্থৰিত্ৱা ৱা সন্থৰাপেত্ৱা ৱা পক্কমন্তেন আপুচ্ছিত্ৱা পক্কমিতব্বং, আপুচ্ছন্তেন চ ভিক্খুম্হি সতি ভিক্খু আপুচ্ছিতব্বো, তস্মিং অসতি সামণেৰো, তস্মিং অসতি আৰামিকো, তস্মিং অসতি যেন ৱিহাৰো কাৰিতো, সো ৱিহাৰসামিকো, তস্স ৱা কুলে যো কোচি আপুচ্ছিতব্বো, তস্মিম্পি অসতি চতূসু পাসাণেসু মঞ্চং ঠপেত্ৱা মঞ্চে অৱসেসমঞ্চপীঠানি আৰোপেত্ৱা উপৰি ভিসিআদিকং দসৱিধম্পি সেয্যং ৰাসিং কত্ৱা দাৰুভণ্ডং মত্তিকাভণ্ডং পটিসামেত্ৱা দ্ৱাৰৱাতপানানি পিদহিত্ৱা গমিযৱত্তং পূৰেত্ৱা গন্তব্বং.

সচে পন সেনাসনং ওৱস্সতি, ছদনত্থঞ্চ তিণং ৱা ইট্ঠকা ৱা আনীতা হোন্তি, সচে উস্সহতি, ছাদেতব্বং. নো চে সক্কোতি, যো ওকাসো অনোৱস্সকো, তত্থ মঞ্চপীঠাদীনি নিক্খিপিত্ৱা গন্তব্বং. সচে সব্বম্পি ওৱস্সতি, উস্সহন্তেন অন্তোগামে উপাসকানং ঘৰে ঠপেতব্বং. সচে তেপি ‘‘সঙ্ঘিকং নাম, ভন্তে, ভাৰিযং, অগ্গিদাহাদীনং ভাযামা’’তি ন সম্পটিচ্ছন্তি, অব্ভোকাসেপি পাসাণানং উপৰি মঞ্চং ঠপেত্ৱা সেসং পুব্বে ৱুত্তনযেনেৱ নিক্খিপিত্ৱা তিণেহি চ পণ্ণেহি চ পটিচ্ছাদেত্ৱা গন্তুং ৱট্টতি. যঞ্হি তত্থ অঙ্গমত্তম্পি অৱসিস্সতি, তং অঞ্ঞেসং তত্থ আগতভিক্খূনং উপকাৰং ভৱিস্সতীতি. উদ্ধৰিত্ৱা গচ্ছন্তেন পন মঞ্চপীঠকৱাটং সব্বং অপনেত্ৱা সংহৰিত্ৱা চীৱৰৱংসে লগ্গেত্ৱাৱ গন্তব্বং. পচ্ছা আগন্ত্ৱা ৱসনকভিক্খুনাপি পুন মঞ্চপীঠং ঠপযিত্ৱা গচ্ছন্তেন তথেৱ কাতব্বং. অন্তোকুট্টতো সেয্যং বহিকুট্টে পঞ্ঞপেত্ৱা ৱসন্তেন গমনকালে পুন গহিতট্ঠানেযেৱ পটিসামেতব্বং. উপৰিপাসাদতো ওৰোপেত্ৱা হেট্ঠাপাসাদে ৱসন্তস্সপি এসেৱ নযো. ৰত্তিট্ঠানদিৱাট্ঠানেসু মঞ্চপীঠং পঞ্ঞপেত্ৱা বহিগমনকালে পুন গহিতট্ঠানেযেৱ ঠপেতব্বং.

৮৩. সেনাসনেসু পন অযং আপুচ্ছিতব্বানাপুচ্ছিতব্বৱিনিচ্ছযো – যা তাৱ ভূমিযং দীঘসালা ৱা পণ্ণসালা ৱা হোতি, যং ৱা ৰুক্খত্থম্ভেসু কতগেহং উপচিকানং উট্ঠানট্ঠানং হোতি, ততো পক্কমন্তেন তাৱ আপুচ্ছিত্ৱাৱ পক্কমিতব্বং. তস্মিঞ্হি কতিপযানি দিৱসানি অজগ্গিযমানে ৱম্মিকাৱ সন্তিট্ঠন্তি. যং পন পাসাণপিট্ঠিযং ৱা পাসাণত্থম্ভেসু ৱা কতসেনাসনং সিলুচ্চযলেণং ৱা সুধালিত্তসেনাসনং ৱা, যত্থ যত্থ উপচিকাসঙ্কা নত্থি, ততো পক্কমন্তস্স আপুচ্ছিত্ৱাপি অনাপুচ্ছিত্ৱাপি গন্তুং ৱট্টতি, আপুচ্ছনং পন ৱত্তং. সচে তাদিসেপি সেনাসনে একেন পস্সেন উপচিকা আৰোহন্তি, আপুচ্ছিত্ৱাৱ গন্তব্বং. যো পন আগন্তুকো ভিক্খু সঙ্ঘিকসেনাসনং গহেত্ৱাৱ সন্তং ভিক্খুং অনুৱত্তন্তো অত্তনো সেনাসনং অগ্গহেত্ৱা ৱসতি, যাৱ সো ন গণ্হাতি, তাৱ তং সেনাসনং পুৰিমভিক্খুস্সেৱ পলিবোধো. যদা পন সো সেনাসনং গহেত্ৱা অত্তনো ইস্সৰিযেন ৱসতি, ততো পট্ঠায আগন্তুকস্সেৱ পলিবোধো. সচে উভোপি ৱিভজিত্ৱা গণ্হন্তি, উভিন্নম্পি পলিবোধো.

মহাপচ্চৰিযং পন ৱুত্তং – সচে দ্ৱে তযো একতো হুত্ৱা পঞ্ঞপেন্তি, গমনকালে সব্বেহি আপুচ্ছিতব্বং. তেসু চে পঠমং গচ্ছন্তো ‘‘পচ্ছিমো জগ্গিস্সতী’’তি আভোগং কত্ৱা গচ্ছতি, ৱট্টতি, পচ্ছিমস্স আভোগেন মুত্তি নত্থি. বহূ একং পেসেত্ৱা সন্থৰাপেন্তি, গমনকালে সব্বেহি ৱা আপুচ্ছিতব্বং, একং ৱা পেসেত্ৱা আপুচ্ছিতব্বং. অঞ্ঞতো মঞ্চপীঠাদীনি আনেত্ৱা অঞ্ঞত্ৰ ৱসিত্ৱা গমনকালে তত্থেৱ নেতব্বানি. সচে অঞ্ঞতো আনেত্ৱা ৱসমানস্স অঞ্ঞো ৱুড্ঢতৰো আগচ্ছতি, ন পটিবাহিতব্বো, ‘‘মযা, ভন্তে, অঞ্ঞাৱাসতো আনীতং, পাকতিকং কৰেয্যাথা’’তি ৱত্তব্বং. তেন ‘‘এৱং কৰিস্সামী’’তি সম্পটিচ্ছিতে ইতৰস্স গন্তুং ৱট্টতি. এৱং অঞ্ঞত্থ হৰিত্ৱাপি সঙ্ঘিকপৰিভোগেন পৰিভুঞ্জন্তস্স হি নট্ঠং ৱা জিণ্ণং ৱা চোৰেহি ৱা হটং গীৱা নেৱ হোতি, পুগ্গলিকপৰিভোগেন পৰিভুঞ্জন্তস্স পন গীৱা হোতি. অঞ্ঞস্স মঞ্চপীঠং পন সঙ্ঘিকপৰিভোগেন ৱা পুগ্গলিকপৰিভোগেন ৱা পৰিভুঞ্জন্তস্স নট্ঠং গীৱাযেৱ. অন্তোৱিহাৰে সেয্যং সন্থৰিত্ৱা ‘‘অজ্জেৱ আগন্ত্ৱা পটিজগ্গিস্সামী’’তি এৱং সাপেক্খো নদীপাৰং গামন্তৰং ৱা গন্ত্ৱা যত্থস্স গমনচিত্তং উপ্পন্নং, তত্থেৱ ঠিতো কঞ্চি পেসেত্ৱা আপুচ্ছতি, নদীপূৰৰাজচোৰাদীসু ৱা কেনচি পলিবোধো হোতি উপদ্দুতো, ন সক্কোতি পচ্চাগন্তুং, এৱংভূতস্স অনাপত্তি.

ৱিহাৰস্স উপচাৰে পন উপট্ঠানসালায ৱা মণ্ডপে ৱা ৰুক্খমূলে ৱা সেয্যং সন্থৰিত্ৱা ৱা সন্থৰাপেত্ৱা ৱা তং পক্কমন্তো নেৱ উদ্ধৰতি ন উদ্ধৰাপেতি অনাপুচ্ছং ৱা গচ্ছতি, দুক্কটং. ৱুত্তপ্পকাৰঞ্হি দসৱিধং সেয্যং অন্তোগব্ভাদিম্হি গুত্তট্ঠানে পঞ্ঞপেত্ৱা গচ্ছন্তস্স যস্মা সেয্যাপি সেনাসনম্পি উপচিকাহি পলুজ্জতি, ৱম্মিকৰাসিযেৱ হোতি, তস্মা পাচিত্তিযং ৱুত্তং. বহি পন উপট্ঠানসালাদীসু পঞ্ঞপেত্ৱা গচ্ছন্তস্স সেয্যামত্তমেৱ নস্সেয্য ঠানস্স অগুত্ততায, ন সেনাসনং, তস্মা এত্থ দুক্কটং ৱুত্তং. মঞ্চপীঠং পন যস্মা ন সক্কা সহসা উপচিকাহি খাযিতুং, তস্মা তং ৱিহাৰেপি সন্থৰিত্ৱা গচ্ছন্তস্স দুক্কটং. ৱিহাৰস্সূপচাৰে উপট্ঠানসালাযং মণ্ডপে ৰুক্খমূলেপি সন্থৰিত্ৱা পক্কমন্তস্স দুক্কটমেৱ.

৮৪. ‘‘যো পন ভিক্খু সঙ্ঘিকং মঞ্চং ৱা পীঠং ৱা ভিসিং ৱা কোচ্ছং ৱা অজ্ঝোকাসে সন্থৰিত্ৱা ৱা সন্থৰাপেত্ৱা ৱা তং পক্কমন্তো নেৱ উদ্ধৰেয্য ন উদ্ধৰাপেয্য অনাপুচ্ছং ৱা গচ্ছেয্য, পাচিত্তিয’’ন্তি (পাচি. ১০৯) ৱচনতো সঙ্ঘিকানি পন মঞ্চপীঠাদীনি চত্তাৰি অজ্ঝোকাসে সন্থৰিত্ৱা ৱা সন্থৰাপেত্ৱা ৱা উদ্ধৰণাদীনি অকত্ৱা ‘‘অজ্জেৱ আগমিস্সামী’’তি গচ্ছন্তস্সপি থামমজ্ঝিমস্স পুৰিসস্স লেড্ডুপাতাতিক্কমে পাচিত্তিযং. এত্থ কোচ্ছং নাম ৱাকমযং ৱা উসীৰমযং ৱা মুঞ্জমযং ৱা পব্বজমযং ৱা হেট্ঠা চ উপৰি চ ৱিত্থতং মজ্ঝে সংখিত্তং পণৱসণ্ঠানং কত্ৱা বদ্ধং. তং কিৰ মজ্ঝে সীহব্যগ্ঘচম্মপৰিক্খিত্তম্পি কৰোন্তি, অকপ্পিযচম্মং নামেত্থ নত্থি. সেনাসনঞ্হি সোৱণ্ণমযম্পি ৱট্টতি, তস্মা তং মহগ্ঘং হোতি.

‘‘অনুজানামি, ভিক্খৱে, অট্ঠ মাসে অৱস্সিকসঙ্কেতে মণ্ডপে ৱা ৰুক্খমূলে ৱা যত্থ কাকা ৱা কুললা ৱা ন ঊহদন্তি, তত্থ সেনাসনং নিক্খিপিতু’’ন্তি (পাচি. ১১০) ৱচনতো পন ৱস্সিকৱস্সানমাসাতি এৱং অপঞ্ঞাতে চত্তাৰো হেমন্তিকে, চত্তাৰো গিম্হিকেতি অট্ঠ মাসে সাখামণ্ডপে ৱা পদৰমণ্ডপে ৱা ৰুক্খমূলে ৱা নিক্খিপিতুং ৱট্টতি. যস্মিং পন কাকা ৱা কুললা ৱা অঞ্ঞে ৱা সকুন্তা ধুৱনিৱাসেন কুলাৱকে কত্ৱা ৱসন্তি, তস্স ৰুক্খস্স মূলে ন নিক্খিপিতব্বং. ‘‘অট্ঠ মাসে’’তি ৱচনতো যেসু জনপদেসু ৱস্সকালে ন ৱস্সতি, তেসু চত্তাৰো মাসে নিক্খিপিতুং ন ৱট্টতিযেৱ. ‘‘অৱস্সিকসঙ্কেতে’’তি ৱচনতো যত্থ হেমন্তে দেৱো ৱস্সতি, তত্থ হেমন্তেপি অজ্ঝোকাসে নিক্খিপিতুং ন ৱট্টতি. গিম্হে পন সব্বত্থ ৱিগতৱলাহকং ৱিসুদ্ধং নতং হোতি, এৱৰূপে কালে কেনচিদেৱ কৰণীযেন অজ্ঝোকাসে মঞ্চপীঠং নিক্খিপিতুং ৱট্টতি.

৮৫. অব্ভোকাসিকেনপি ৱত্তং জানিতব্বং. তস্স হি সচে পুগ্গলিকমঞ্চকো অত্থি, তত্থেৱ সযিতব্বং. সঙ্ঘিকং গণ্হন্তেন ৱেত্তেন ৱা ৱাকেন ৱা ৱীতমঞ্চকো গহেতব্বো, তস্মিং অসতি পুৰাণমঞ্চকো গহেতব্বো, তস্মিং অসতি নৱৱাযিমো ৱা ওনদ্ধকো ৱা গহেতব্বো. গহেত্ৱা পন ‘‘অহং উক্কট্ঠৰুক্খমূলিকো উক্কট্ঠঅব্ভোকাসিকো’’তি চীৱৰকুটিম্পি অকত্ৱা অসমযে অজ্ঝোকাসে ৱা ৰুক্খমূলে ৱা পঞ্ঞপেত্ৱা নিপজ্জিতুং ন ৱট্টতি. সচে পন চতুগ্গুণেনপি চীৱৰেন কতা কুটি অতেমেন্তং ৰক্খিতুং ন সক্কোতি, সত্তাহৱদ্দলিকাদীনি ভৱন্তি, ভিক্খুনো কাযানুগতিকত্তা ৱট্টতি. অৰঞ্ঞে পণ্ণকুটীসু ৱসন্তানং সীলসম্পদায পসন্নচিত্তা মনুস্সা নৱং মঞ্চপীঠং দেন্তি ‘‘সঙ্ঘিকপৰিভোগেন পৰিভুঞ্জথা’’তি, ৱসিত্ৱা গচ্ছন্তেহি সামন্তৱিহাৰে সভাগভিক্খূনং পেসেত্ৱা গন্তব্বং, সভাগানং অভাৱেন অনোৱস্সকে নিক্খিপিত্ৱা গন্তব্বং, অনোৱস্সকে অসতি ৰুক্খে লগ্গেত্ৱা গন্তব্বং. চেতিযঙ্গণে সম্মজ্জনিং গহেত্ৱা ভোজনসালঙ্গণং ৱা উপোসথাগাৰঙ্গণং ৱা পৰিৱেণদিৱাট্ঠানঅগ্গিসালাদীসু ৱা অঞ্ঞতৰং সম্মজ্জিত্ৱা ধোৱিত্ৱা পুন সম্মজ্জনিমাড়কেযেৱ ঠপেতব্বা. উপোসথাগাৰাদীসু অঞ্ঞতৰস্মিং গহেত্ৱা অৱসেসানি সম্মজ্জন্তস্সপি এসেৱ নযো.

যো পন ভিক্খাচাৰমগ্গং সম্মজ্জন্তো গন্তুকামো হোতি, তেন সম্মজ্জিত্ৱা সচে অন্তৰামগ্গে সালা অত্থি, তত্থ ঠপেতব্বা. সচে নত্থি, ৱলাহকানং অনুট্ঠিতভাৱং সল্লক্খেত্ৱা ‘‘যাৱাহং গামতো নিক্খমামি, তাৱ ন ৱস্সিস্সতী’’তি জানন্তেন যত্থ কত্থচি নিক্খিপিত্ৱা পুন পচ্চাগচ্ছন্তেন পাকতিকট্ঠানে ঠপেতব্বা. ‘‘সচে ৱস্সিস্সতীতি জানন্তো অজ্ঝোকাসে ঠপেতি, দুক্কট’’ন্তি মহাপচ্চৰিযং ৱুত্তং. সচে পন তত্ৰ তত্ৰেৱ সম্মজ্জনত্থায সম্মজ্জনী নিক্খিত্তা হোতি, তং তং ঠানং সম্মজ্জিত্ৱা তত্ৰ তত্ৰেৱ নিক্খিপিতুং ৱট্টতি, আসনসালং সম্মজ্জন্তেন ৱত্তং জানিতব্বং. তত্ৰিদং ৱত্তং – মজ্ঝতো পট্ঠায পাদট্ঠানাভিমুখা ৱালিকা হৰিতব্বা, কচৱৰং হত্থেহি গহেত্ৱা বহি ছড্ডেতব্বং.

৮৬. সচে ৱুত্তপ্পকাৰং চতুব্বিধম্পি সঙ্ঘিকং সেনাসনং অজ্ঝোকাসে ৱা ৰুক্খমূলে ৱা মণ্ডপে ৱা অনুপসম্পন্নেন সন্থৰাপেতি, যেন সন্থৰাপিতং, তস্স পলিবোধো. সচে পন উপসম্পন্নেন সন্থৰাপেতি, যেন সন্থতং, তস্স পলিবোধো. তত্ৰাযং ৱিনিচ্ছযো (পাচি. অট্ঠ. ১১১) – থেৰো ভোজনসালাযং ভত্তকিচ্চং কত্ৱা দহৰং আণাপেতি ‘‘গচ্ছ দিৱাট্ঠানে মঞ্চপীঠং পঞ্ঞপেহী’’তি. সো তথা কত্ৱা নিসিন্নো, থেৰো যথাৰুচি ৱিচৰিত্ৱা তত্থ গন্ত্ৱা থৱিকং ৱা উত্তৰাসঙ্গং ৱা ঠপেতি, ততো পট্ঠায থেৰস্স পলিবোধো. নিসীদিত্ৱা সযং গচ্ছন্তো নেৱ উদ্ধৰতি ন উদ্ধৰাপেতি, লেড্ডুপাতাতিক্কমে পাচিত্তিযং. সচে পন থেৰো তত্থ থৱিকং ৱা উত্তৰাসঙ্গং ৱা অট্ঠপেত্ৱা চঙ্কমন্তোৱ দহৰং ‘‘গচ্ছ ত্ৱ’’ন্তি ভণতি, তেন ‘‘ইদং, ভন্তে, মঞ্চপীঠ’’ন্তি আচিক্খিতব্বং. সচে থেৰো ৱত্তং জানাতি, ‘‘ত্ৱং গচ্ছ, অহং পাকতিকং কৰিস্সামী’’তি ৱত্তব্বং. সচে বালো হোতি অনুগ্গহিতৱত্তো, ‘‘গচ্ছ, মা ইধ তিট্ঠ, নেৱ নিসীদিতুং ন নিপজ্জিতুং দেমী’’তি দহৰং তজ্জেতিযেৱ. দহৰেন ‘‘ভন্তে, সুখং সযথা’’তি কপ্পং লভিত্ৱা ৱন্দিত্ৱা গন্তব্বং. তস্মিং গতে থেৰস্সেৱ পলিবোধো, পুৰিমনযেনেৱ চস্স আপত্তি ৱেদিতব্বা.

অথ পন আণত্তিক্খণেযেৱ দহৰো ‘‘ময্হং ভণ্ডে ভণ্ডধোৱনাদি কিঞ্চি কৰণীযং অত্থী’’তি ৱদতি, থেৰো পন তং ‘‘পঞ্ঞপেত্ৱা গচ্ছাহী’’তি ৱত্ৱা ভোজনসালতো নিক্খমিত্ৱা অঞ্ঞত্থ গচ্ছতি, পাদুদ্ধাৰেন কাৰেতব্বো. সচে তত্থেৱ গন্ত্ৱা নিসীদতি, পুৰিমনযেনেৱ চস্স লেড্ডুপাতাতিক্কমে আপত্তি. সচে পন থেৰো সামণেৰং আণাপেতি, সামণেৰে তত্থ মঞ্চপীঠং পঞ্ঞপেত্ৱা নিসিন্নেপি ভোজনসালতো অঞ্ঞত্থ গচ্ছন্তো পাদুদ্ধাৰেন কাৰেতব্বো. গন্ত্ৱা নিসিন্নো পুন গমনকালে লেড্ডুপাতাতিক্কমে আপত্তিযা কাৰেতব্বো. সচে পন আণাপেন্তো ‘‘মঞ্চপীঠং পঞ্ঞপেত্ৱা তত্থেৱ নিসীদা’’তি আণাপেতি, যত্ৰিচ্ছতি, তত্ৰ গন্ত্ৱা আগন্তুং লভতি. সযং পন পাকতিকং অকত্ৱা গচ্ছন্তস্স লেড্ডুপাতাতিক্কমে পাচিত্তিযং. অন্তৰসন্নিপাতে মঞ্চপীঠাদীনি পঞ্ঞপেত্ৱা নিসিন্নেহি গমনকালে আৰামিকানং ‘‘ইদং পটিসামেথা’’তি ৱত্তব্বং, অৱত্ৱা গচ্ছন্তানং লেড্ডুপাতাতিক্কমে আপত্তি.

৮৭. মহাধম্মস্সৱনং নাম হোতি, তত্থ উপোসথাগাৰতোপি ভোজনসালতোপি আহৰিত্ৱা মঞ্চপীঠানি পঞ্ঞপেন্তি, আৱাসিকানংযেৱ পলিবোধো. সচে আগন্তুকা ‘‘ইদং অম্হাকং উপজ্ঝাযস্স, ইদং আচৰিযস্সা’’তি গণ্হন্তি, ততো পট্ঠায তেসং পলিবোধো. গমনকালে পাকতিকং অকত্ৱা লেড্ডুপাতং অতিক্কমন্তানং আপত্তি. মহাপচ্চৰিযং পন ৱুত্তং ‘‘যাৱ অঞ্ঞে ন নিসীদন্তি, তাৱ যেহি পঞ্ঞত্তং, তেসং ভাৰো, অঞ্ঞেসু আগন্ত্ৱা নিসিন্নেসু নিসিন্নকানং ভাৰো. সচে তে অনুদ্ধৰিত্ৱা ৱা অনুদ্ধৰাপেত্ৱা ৱা গচ্ছন্তি, দুক্কটং. কস্মা? অনাণত্তিযা পঞ্ঞপিতত্তা’’তি. ধম্মাসনে পঞ্ঞত্তে যাৱ উস্সাৰকো ৱা ধম্মকথিকো ৱা নাগচ্ছতি, তাৱ পঞ্ঞাপকানং পলিবোধো. তস্মিং আগন্ত্ৱা নিসিন্নে তস্স পলিবোধো. সকলং অহোৰত্তং ধম্মস্সৱনং হোতি, অঞ্ঞো উস্সাৰকো ৱা ধম্মকথিকো ৱা উট্ঠাতি, অঞ্ঞো নিসীদতি, যো যো আগন্ত্ৱা নিসীদতি, তস্স তস্সেৱ ভাৰো. উট্ঠহন্তেন পন ‘‘ইদমাসনং তুম্হাকং ভাৰো’’তি ৱত্ৱা গন্তব্বং. সচেপি ইতৰস্মিং অনাগতে পঠমং নিসিন্নো উট্ঠায গচ্ছতি, তস্মিঞ্চ অন্তোউপচাৰট্ঠেযেৱ ইতৰো আগন্ত্ৱা নিসীদতি, উট্ঠায গতো আপত্তিযা ন কাৰেতব্বো. সচে পন ইতৰস্মিং অনাগতেযেৱ পঠমং নিসিন্নো উট্ঠাযাসনা লেড্ডুপাতং অতিক্কমতি, আপত্তিযা কাৰেতব্বো. ‘‘সব্বত্থ লেড্ডুপাতাতিক্কমে পঠমপাদে দুক্কটং, দুতিযপাদে পাচিত্তিয’’ন্তি অযং নযো মহাপচ্চৰিযং ৱুত্তোতি.

৮৮. সচে পন ৱুত্তপ্পকাৰসেনাসনতো অঞ্ঞং সঙ্ঘিকং চিমিলিকং ৱা উত্তৰত্থৰণং ৱা ভূমত্থৰণং ৱা তট্টিকং ৱা চম্মখণ্ডং ৱা পাদপুঞ্ছনিং ৱা ফলকপীঠং ৱা অজ্ঝোকাসে সন্থৰিত্ৱা ৱা সন্থৰাপেত্ৱা ৱা তং পক্কমন্তো নেৱ উদ্ধৰতি ন উদ্ধৰাপেতি অনাপুচ্ছং ৱা গচ্ছতি, দুক্কটং. আধাৰকং পত্তপিধানকং পাদকঠলিকং তালৱণ্টং বীজনিপত্তকং যং কিঞ্চি দাৰুভণ্ডং অন্তমসো পানীযউড়ুঙ্কং পানীযসঙ্খং অজ্ঝোকাসে নিক্খিপিত্ৱা গচ্ছন্তস্সপি দুক্কটং. অজ্ঝোকাসে ৰজনং পচিত্ৱা ৰজনভাজনং ৰজনউড়ুঙ্কো ৰজনদোণিকাতি সব্বং অগ্গিসালায পটিসামেতব্বং. সচে অগ্গিসালা নত্থি, অনোৱস্সকে পব্ভাৰে নিক্খিপিতব্বং. তস্মিম্পি অসতি যত্থ ওলোকেন্তা ভিক্খূ পস্সন্তি, তাদিসে ঠানে ঠপেত্ৱা গন্তুং ৱট্টতি. অঞ্ঞপুগ্গলিকে পন মঞ্চপীঠাদিসেনাসনেপি দুক্কটমেৱ. এত্থ পন ‘‘যস্মিং ৱিস্সাসগ্গাহো ন ৰুহতি, তস্স সন্তকে দুক্কটং. যস্মিং পন ৱিস্সাসগ্গাহো ৰুহতি, তস্স সন্তকং অত্তনো পুগ্গলিকমেৱ হোতী’’তি মহাপচ্চৰিযাদীসু ৱুত্তং. অত্তনো পুগ্গলিকে পন অনাপত্তিযেৱ. যো ভিক্খু ৱা সামণেৰো ৱা আৰামিকো ৱা লজ্জী হোতি, অত্তনো পলিবোধং ৱিয মঞ্ঞতি, তথাৰূপং অনাপুচ্ছিত্ৱা গচ্ছন্তস্সপি অনাপত্তি. যো পন আতপে ওতাপেন্তো ‘‘আগন্ত্ৱা উদ্ধৰিস্সামী’’তি গচ্ছতি, তস্সপি অনাপত্তি.

ইতি পাড়িমুত্তকৱিনযৱিনিচ্ছযসঙ্গহে

মঞ্চপীঠাদিসঙ্ঘিকসেনাসনেসু

পটিপজ্জিতব্বৱিনিচ্ছযকথা সমত্তা.