১৬. সহসেয্যৱিনিচ্ছযকথা

৭৯. দুৱিধং সহসেয্যকন্তি ‘‘যো পন ভিক্খু অনুপসম্পন্নেন উত্তৰিদিৰত্ততিৰত্তং সহসেয্যং কপ্পেয্য, পাচিত্তিযং (পাচি. ৪৯). যো পন ভিক্খু মাতুগামেন সহসেয্যং কপ্পেয্য, পাচিত্তিয’’ন্তি (পাচি. ৫৬) এৱং ৱুত্তং সহসেয্যসিক্খাপদদ্ৱযং সন্ধায ৱুত্তং. তত্ৰাযং ৱিনিচ্ছযো (পাচি. অট্ঠ. ৫০-৫১) – অনুপসম্পন্নেন সদ্ধিং তিণ্ণং ৰত্তীনং উপৰি চতুত্থদিৱসে অত্থঙ্গতে সূৰিযে সব্বচ্ছন্নসব্বপৰিচ্ছন্নে যেভুয্যচ্ছন্নযেভুয্যপৰিচ্ছন্নে ৱা সেনাসনে পুব্বাপৰিযেন ৱা একক্খণে ৱা নিপজ্জন্তস্স পাচিত্তিযং. তত্থ ছদনং অনাহচ্চ দিযড্ঢহত্থুব্বেধেন পাকাৰাদিনা যেন কেনচি পৰিচ্ছন্নম্পি সব্বপৰিচ্ছন্নমিচ্চেৱ ৱেদিতব্বং. যং সেনাসনং উপৰি পঞ্চহি ছদনেহি অঞ্ঞেন ৱা কেনচি সব্বমেৱ পৰিচ্ছন্নং, ইদং সব্বচ্ছন্নং নাম সেনাসনং. অট্ঠকথাসু পন পাকটৱোহাৰং গহেত্ৱা ৱাচুগ্গতৱসেন ‘‘সব্বচ্ছন্নং নাম পঞ্চহি ছদনেহি ছন্ন’’ন্তি ৱুত্তং. কিঞ্চাপি ৱুত্তং, অথ খো দুস্সকুটিযং সযন্তস্সপি ন সক্কা অনাপত্তি কাতুং, তস্মা যং কিঞ্চি পটিচ্ছাদনসমত্থং ইধ ছদনঞ্চ পৰিচ্ছন্নঞ্চ ৱেদিতব্বং. পঞ্চৱিধচ্ছদনেযেৱ হি গয্হমানে পদৰচ্ছন্নেপি সহসেয্যা ন ভৱেয্য, তস্মা যং সেনাসনং ভূমিতো পট্ঠায যাৱছদনং আহচ্চ পাকাৰেন ৱা অঞ্ঞেন ৱা কেনচি অন্তমসো ৱত্থেনপি পৰিক্খিত্তং, ইদং সব্বপৰিচ্ছন্নং নাম সেনাসনং. ছদনং অনাহচ্চ সব্বন্তিমেন পৰিযাযেন দিযড্ঢহত্থুব্বেধেন পাকাৰাদিনা পৰিক্খিত্তম্পি সব্বপৰিচ্ছন্নমেৱ. যস্স পন উপৰি বহুতৰং ঠানং ছন্নং, অপ্পং অচ্ছন্নং, সমন্ততো ৱা বহুতৰং পৰিক্খিত্তং, অপ্পং অপৰিক্খিত্তং, ইদং যেভুয্যেনছন্নং যেভুয্যেনপৰিচ্ছন্নং নাম.

ইমিনা লক্খণেন সমন্নাগতো সচেপি সত্তভূমিকো পাসাদো একূপচাৰো হোতি, সতগব্ভং ৱা চতুসালং, একং সেনাসনমিচ্চেৱ সঙ্খং গচ্ছতি. এৱৰূপে সেনাসনে অনুপসম্পন্নেন সদ্ধিং চতুত্থদিৱসে অত্থঙ্গতে সূৰিযে নিপজ্জন্তস্স পাচিত্তিযং ৱুত্তং. সচে পন সম্বহুলা সামণেৰা, একো ভিক্খু, সামণেৰগণনায পাচিত্তিযা. তে চে উট্ঠাযুট্ঠায নিপজ্জন্তি, তেসং পযোগে পযোগে ভিক্খুস্স আপত্তি, ভিক্খুস্স উট্ঠাযুট্ঠায নিপজ্জনে পন ভিক্খুস্সেৱ পযোগেন ভিক্খুস্স আপত্তি. সচে সম্বহুলা ভিক্খূ, একো সামণেৰো, একোপি সব্বেসং আপত্তিং কৰোতি. তস্স উট্ঠাযুট্ঠায নিপজ্জনেনপি ভিক্খূনং আপত্তিযেৱ. উভযেসং সম্বহুলভাৱেপি এসেৱ নযো.

৮০. অপিচেত্থ একাৱাসাদিকম্পি চতুক্কং ৱেদিতব্বং. যো হি একস্মিং আৱাসে একেনেৱ অনুপসম্পন্নেন সদ্ধিং তিৰত্তং সহসেয্যং কপ্পেতি, তস্স চতুত্থদিৱসতো পট্ঠায দেৱসিকা আপত্তি. যোপি একস্মিংযেৱ আৱাসে নানাঅনুপসম্পন্নেহি সদ্ধিং তিৰত্তং সহসেয্যং কপ্পেতি, তস্সপি. যোপি নানাআৱাসেসু একেনেৱ অনুপসম্পন্নেন সদ্ধিং তিৰত্তং সহসেয্যং কপ্পেতি, তস্সপি. যোপি নানাআৱাসেসু নানাঅনুপসম্পন্নেহি সদ্ধিং যোজনসতম্পি গন্ত্ৱা সহসেয্যং কপ্পেতি, তস্সপি চতুত্থদিৱসতো পট্ঠায দেৱসিকা আপত্তি.

অযঞ্চ সহসেয্যাপত্তি নাম ‘‘ভিক্খুং ঠপেত্ৱা অৱসেসো অনুপসম্পন্নো নামা’’তি ৱচনতো অন্তমসো পাৰাজিকৱত্থুভূতেন তিৰচ্ছানগতেনপি সদ্ধিং হোতি, তস্মা সচেপি গোধাবিড়ালমঙ্গুসাদীসু কোচি পৱিসিত্ৱা ভিক্খুনো ৱসনসেনাসনে একূপচাৰট্ঠানে সযতি, সহসেয্যাৱ হোতি. যদি পন থম্ভানং উপৰি কতপাসাদস্স উপৰিমতলেন সদ্ধিং অসম্বদ্ধভিত্তিকস্স ভিত্তিযা উপৰিঠিতসুসিৰতুলাসীসস্স সুসিৰেন পৱিসিত্ৱা তুলায অব্ভন্তৰে সযিত্ৱা তেনেৱ সুসিৰেন নিক্খমিত্ৱা গচ্ছতি, হেট্ঠাপাসাদে সযিতভিক্খুস্স অনাপত্তি. সচে ছদনে ছিদ্দং হোতি, তেন পৱিসিত্ৱা অন্তোছদনে ৱসিত্ৱা তেনেৱ পক্কমতি, নানূপচাৰে উপৰিমতলে ছদনব্ভন্তৰে সযিতস্স আপত্তি, হেট্ঠিমতলে সযিতস্স অনাপত্তি. সচে অন্তোপাসাদেনেৱ আৰোহিত্ৱা সব্বতলানি পৰিভুঞ্জন্তি, একূপচাৰানি হোন্তি, তেসু যত্থ কত্থচি সযিতস্স আপত্তি, সভাসঙ্খেপেন কতে অড্ঢকুট্টকে সেনাসনে সযিতস্স তুলাৱাড়সঘাটাদীসু কপোতাদযো সযন্তি, আপত্তিযেৱ. পৰিক্খেপস্স বহিগতে নিব্বকোসব্ভন্তৰে সযন্তি, অনাপত্তি. পৰিমণ্ডলং ৱা চতুৰস্সং ৱা একচ্ছদনায গব্ভমালায সতগব্ভং চেপি সেনাসনং হোতি, তত্ৰ চে একেন সাধাৰণদ্ৱাৰেন পৱিসিত্ৱা ৱিসুং পাকাৰেন অপৰিচ্ছিন্নগব্ভূপচাৰে সব্বগব্ভেপি পৱিসন্তি, একগব্ভেপি অনুপসম্পন্নে নিপন্নে সব্বগব্ভেসু নিপন্নানং আপত্তি. সচে সপমুখা গব্ভা হোন্তি, পমুখঞ্চ উপৰি অচ্ছন্নং, পমুখে সযিতো গব্ভে সযিতানং আপত্তিং ন কৰোতি. সচে পন গব্ভচ্ছদনেনেৱ সদ্ধিং সম্বন্ধছদনং, তত্ৰ সযিতো সব্বেসং আপত্তিং কৰোতি. কস্মা? সব্বচ্ছন্নত্তা চ সব্বপৰিচ্ছন্নত্তা চ. গব্ভপৰিক্খেপোযেৱ হিস্স পৰিক্খেপো.

৮১. যেপি একসালদ্ৱিসালতিসালচতুসালসন্নিৱেসা মহাপাসাদা একস্মিং ওকাসে পাদে ধোৱিত্ৱা পৱিট্ঠেন সক্কা হোন্তি সব্বত্থ অনুপৰিগন্তুং, তেসুপি সহসেয্যাপত্তিযা ন মুচ্চতি. সচে তস্মিং তস্মিং ঠানে উপচাৰং পৰিচ্ছিন্দিত্ৱা কতা হোন্তি, একূপচাৰট্ঠানেযেৱ আপত্তি. দ্ৱীহি দ্ৱাৰেহি যুত্তস্স সুধাছদনমণ্ডপস্স মজ্ঝে পাকাৰং কৰোন্তি, একেন দ্ৱাৰেন পৱিসিত্ৱা একস্মিং পৰিচ্ছেদে অনুপসম্পন্নো সযতি, একস্মিং ভিক্খু, অনাপত্তি. পাকাৰে গোধাদীনং পৱিসনমত্তং ছিদ্দং হোতি, একস্মিঞ্চ পৰিচ্ছেদে গোধা সযন্তি, অনাপত্তিযেৱ. ন হি ছিদ্দেন গেহং একূপচাৰং নাম হোতি. সচে পাকাৰমজ্ঝে ছিন্দিত্ৱা দ্ৱাৰং যোজেন্তি, একূপচাৰতায আপত্তি. তং দ্ৱাৰং কৱাটেন পিদহিত্ৱা সযন্তি, আপত্তিযেৱ. ন হি দ্ৱাৰপিদহনেন গেহং নানূপচাৰং নাম হোতি, দ্ৱাৰং ৱা অদ্ৱাৰং. কৱাটঞ্হি সংৱৰণৱিৱৰণেহি যথাসুখং ৱড়ঞ্জনত্থায কতং, ন ৱড়ঞ্জুপচ্ছেদনত্থায. সচে তং দ্ৱাৰং পুন ইট্ঠকাহি পিদহন্তি, অদ্ৱাৰং হোতি, পুৰিমে নানূপচাৰভাৱেযেৱ তিট্ঠতি. দীঘপমুখং চেতিযঘৰং হোতি, একং কৱাটং অন্তো, একং বহি, দ্ৱিন্নং কৱাটানং অন্তৰে অনুপসম্পন্নো অন্তোচেতিযঘৰে সযন্তস্স আপত্তিং কৰোতি একূপচাৰত্তা.

অযঞ্হেত্থ সঙ্খেপো – সেনাসনং খুদ্দকং ৱা হোতু মহন্তং ৱা, অঞ্ঞেন সদ্ধিং সম্বন্ধং ৱা অসম্বন্ধং ৱা, দীঘং ৱা ৱট্টং ৱা চতুৰস্সং ৱা, একভূমিকং ৱা অনেকভূমিকং ৱা, যং যং একূপচাৰং, সব্বত্থ সহসেয্যাপত্তি হোতীতি. এত্থ চ যেন কেনচি পটিচ্ছদনেন সব্বচ্ছন্নে সব্বপৰিচ্ছন্নে পাচিত্তিযং, যেভুয্যেনছন্নে যেভুয্যেনপৰিচ্ছন্নে পাচিত্তিযং, সব্বচ্ছন্নে যেভুয্যেনপৰিচ্ছন্নে পাচিত্তিযং, সব্বচ্ছন্নে উপড্ঢপৰিচ্ছন্নে পাচিত্তিযং, যেভুয্যেনছন্নে উপড্ঢপৰিচ্ছন্নে পাচিত্তিযং, সব্বপৰিচ্ছন্নে যেভুয্যেনছন্নে পাচিত্তিযং, সব্বপৰিচ্ছন্নে উপড্ঢচ্ছন্নে পাচিত্তিযং, যেভুয্যেনপৰিচ্ছন্নে উপড্ঢচ্ছন্নে পাচিত্তিযন্তি অট্ঠ পাচিত্তিযানি. উপড্ঢচ্ছন্নে উপড্ঢপৰিচ্ছন্নে দুক্কটং, সব্বচ্ছন্নে চূড়কপৰিচ্ছন্নে দুক্কটং, যেভুয্যেনছন্নে চূড়কপৰিচ্ছন্নে দুক্কটং, সব্বপৰিচ্ছন্নে চূড়কচ্ছন্নে দুক্কটং, যেভুয্যেনপৰিচ্ছন্নে চূড়কচ্ছন্নে দুক্কটন্তি পঞ্চ দুক্কটানি ৱেদিতব্বানি. সব্বচ্ছন্নে সব্বঅপৰিচ্ছন্নে, সব্বপৰিচ্ছন্নে সব্বঅচ্ছন্নে, যেভুয্যেনঅচ্ছন্নে যেভুয্যেনঅপৰিচ্ছন্নে, উপড্ঢচ্ছন্নে চূড়কপৰিচ্ছন্নে, উপড্ঢপৰিচ্ছন্নে চূড়কচ্ছন্নে চূড়কপৰিচ্ছন্নে চ অনাপত্তি. মাতুগামেন সহ নিপজ্জন্তস্সপি অযমেৱ ৱিনিচ্ছযো. অযঞ্হেত্থ ৱিসেসো – অনুপসম্পন্নেন সদ্ধিং নিপজ্জন্তস্স চতুত্থদিৱসে আপত্তি, মাতুগামেন সদ্ধিং পঠমদিৱসেতি. যক্খিপেতীহি পন দিস্সমানকৰূপাহি তিৰচ্ছানগতিত্থিযা চ মেথুনধম্মৱত্থুভূতায এৱ দুক্কটং, সেসাহি অনাপত্তি.

ইতি পাড়িমুত্তকৱিনযৱিনিচ্ছযসঙ্গহে

সহসেয্যৱিনিচ্ছযকথা সমত্তা.