৯. চীৱৰৱিপ্পৱাসৱিনিচ্ছযকথা

৫১. এৱং অধিট্ঠানৱিকপ্পনৱিনিচ্ছযকথং দস্সেত্ৱা ইদানি চীৱৰেন ৱিনাৱাসৱিনিচ্ছযকৰণং দস্সেতুং ‘‘চীৱৰেনৱিনাৱাসো’’ত্যাদিমাহ. তত্থ চীযতীতি চীৱৰং, চযং সঞ্চযং কৰীযতীতি অত্থো, অৰিযদ্ধজো ৱত্থৱিসেসো. ইধ পন তিচীৱৰাধিট্ঠানেন অধিট্ঠহিত্ৱা ধাৰিতং চীৱৰত্তযমেৱ. ৱিনাতি ৱজ্জনত্থে নিপাতো. ৱসনং ৱাসো, ৱিনা ৱাসো ৱিনাৱাসো, চীৱৰেন ৱিনাৱাসো চীৱৰৱিনাৱাসো, ‘‘চীৱৰৱিপ্পৱাসো’’তি ৱত্তব্বে ৱত্তিচ্ছাৱসেন, গাথাপাদপূৰণত্থায ৱা অলুত্তসমাসং কত্ৱা এৱং ৱুত্তন্তি দট্ঠব্বং. তথা চ ৱক্খতি ‘‘তিচীৱৰাধিট্ঠানেন…পে… ৱিপ্পৱাসো’’তি, ‘‘ইমং সঙ্ঘাটিং অধিট্ঠামি, ইমং উত্তৰাসঙ্গং অধিট্ঠামি, ইমং অন্তৰৱাসকং অধিট্ঠামী’’তি এৱং নামেন অধিট্ঠিতানং তিণ্ণং চীৱৰানং একেকেন ৱিপ্পৱাসোতি অত্থো, একেনপি ৱিনা ৱসিতুং ন ৱট্টতি, ৱসন্তস্স ভিক্খুনো সহ অৰুণুগ্গমনা চীৱৰং নিস্সগ্গিযং হোতি, পাচিত্তিযঞ্চ আপজ্জতীতি সম্বন্ধো. ৱসিতব্বন্তি এত্থ ৱসনকিৰিযা চতুইৰিযাপথসাধাৰণা, তস্মা কাযলগ্গং ৱা হোতু অলগ্গং ৱা, অড্ঢতেয্যৰতনস্স পদেসস্স অন্তো কত্ৱা তিট্ঠন্তোপি চৰন্তোপি নিসিন্নোপি নিপন্নোপি হত্থপাসে কত্ৱা ৱসন্তো নাম হোতি.

এৱং সামঞ্ঞতো অৱিপ্পৱাসলক্খণং দস্সেত্ৱা ইদানি গামাদিপন্নৰসোকাসৱসেন ৱিসেসতো দস্সেতুমাহ ‘‘গামি’’চ্চাদি. তত্থ গামনিৱেসনানি পাকটানেৱ. উদোসিতো নাম যানাদীনং ভণ্ডানং সালা. অট্টো নাম পটিৰাজাদিপটিবাহনত্থং ইট্ঠকাহি কতো বহলভিত্তিকো চতুপঞ্চভূমিকো পতিস্সযৱিসেসো. মাড়ো নাম এককূটসঙ্গহিতো চতুৰস্সপাসাদো. পাসাদো নাম দীঘপাসাদো. হম্মিযং নাম মুণ্ডচ্ছদনপাসাদো, মুণ্ডচ্ছদনপাসাদোতি চ চন্দিকঙ্গণযুত্তো পাসাদোতি ৱুচ্চতি. সত্থো নাম জঙ্ঘসত্থো ৱা সকটসত্থো ৱা. খেত্তং নাম পুব্বণ্ণাপৰণ্ণানং ৱিৰুহনট্ঠানং. ধঞ্ঞকৰণং নাম খলমণ্ডলং. আৰামো নাম পুপ্ফাৰামো ফলাৰামো. ৱিহাৰাদযো পাকটা এৱ. তত্থ নিৱেসনাদীনি গামতো বহি সন্নিৱিট্ঠানি গহিতানীতি ৱেদিতব্বং. অন্তোগামে ঠিতানঞ্হি গামগ্গহণেন গহিতত্তা গামপৰিহাৰোযেৱাতি. গামগ্গহণেন চ নিগমনগৰানিপি গহিতানেৱ হোন্তি.

পৰিখায ৱা পৰিক্খিত্তোতি ইমিনা সমন্তা নদীতড়াকাদিউদকেন পৰিক্খিত্তোপি পৰিক্খিত্তোযেৱাতি দস্সেতি. তং পমাণং অতিক্কমিত্ৱাতি ঘৰস্স উপৰি আকাসে অড্ঢতেয্যৰতনপ্পমাণং অতিক্কমিত্ৱা. সভাযে ৱা ৱত্থব্বন্তি ইমিনা সভাসদ্দস্স পৰিযাযো সভাযসদ্দো নপুংসকলিঙ্গো অত্থীতি দস্সেতি. সভাসদ্দো হি ইত্থিলিঙ্গো, সভাযসদ্দো নপুংসকলিঙ্গোতি. দ্ৱাৰমূলে ৱাতি নগৰস্স দ্ৱাৰমূলে ৱা. তেসন্তি সভাযনগৰদ্ৱাৰমূলানং. তস্সা ৱীথিযা সভাযদ্ৱাৰানং গহণেনেৱ তত্থ সব্বানিপি গেহানি, সা চ অন্তৰৱীথি গহিতাযেৱ হোতি. এত্থ চ দ্ৱাৰৱীথিঘৰেসু ৱসন্তেন গামপ্পৱেসনসহসেয্যাদিদোসং পৰিহৰিত্ৱা সুপ্পটিচ্ছন্নতাদিযুত্তেনেৱ ভৱিতব্বং. সভা পন যদি সব্বেসং ৱসনত্থায পপাসদিসা কতা, অন্তৰাৰামে ৱিয যথাসুখং ৱসিতুং ৱট্টতীতি ৱেদিতব্বং. অতিহৰিত্ৱা ঘৰে নিক্খিপতীতি ৱীথিং মুঞ্চিত্ৱা ঠিতে অঞ্ঞস্মিং ঘৰে নিক্খিপতি. তেনাহ ‘‘ৱীথিহত্থপাসো ন ৰক্খতী’’তি. পুৰতো ৱা পচ্ছতো ৱা হত্থপাসেতি ঘৰস্স হত্থপাসং সন্ধায ৱদতি.

এৱং গামৱসেন ৱিপ্পৱাসাৱিপ্পৱাসং দস্সেত্ৱা ইদানি নিৱেসনৱসেন দস্সেন্তো ‘‘সচে এককুলস্স সন্তকং নিৱেসনং হোতী’’তিআদিমাহ. তত্থ ওৱৰকো নাম গব্ভস্স অব্ভন্তৰে অঞ্ঞো গব্ভোতি ৱদন্তি, গব্ভস্স ৱা পৰিযাযৱচনমেতং. ইদানি উদোসিতাদিৱসেন দস্সেন্তো ‘‘উদোসিতি’’চ্চাদিমাহ. তত্থ ৱুত্তনযেনেৱাতি ‘‘এককুলস্স সন্তকো উদোসিতো হোতি পৰিক্খিত্তো চা’’তিআদিনা নিৱেসনে ৱুত্তনযেন. এৱ-সদ্দো ৱিসেসনিৱত্তি অত্থো. তেন ৱিসেসো নত্থীতি দস্সেতি.

ইদানি যেসু ৱিসেসো অত্থি, তে দস্সেন্তো ‘‘সচে এককুলস্স নাৱা’’তিআদিমাহ. তত্থ পৰিযাদিযিত্ৱাতি ৱিনিৱিজ্ঝিত্ৱা, অজ্ঝোত্থৰিত্ৱা ৱা. ৱুত্তমেৱত্থং ৱিভাৱেতি ‘‘অন্তোপৱিট্ঠেনা’’তিআদিনা. তত্থ অন্তোপৱিট্ঠেনাতি গামস্স, নদিযা ৱা অন্তোপৱিট্ঠেন. ‘‘সত্থেনা’’তি পাঠসেসো. নদীপৰিহাৰো লব্ভতীতি এত্থ ‘‘ৱিসুং নদীপৰিহাৰস্স অৱুত্তত্তা গামাদীহি অঞ্ঞত্থ ৱিয চীৱৰহত্থপাসোযেৱ নদীপৰিহাৰো’’তি তীসুপি গণ্ঠিপদেসু ৱুত্তং. অঞ্ঞে পন ‘‘ইমিনা অট্ঠকথাৱচনেন নদীপৰিহাৰোপি ৱিসুং সিদ্ধোতি নদীহত্থপাসো ন ৱিজহিতব্বো’’তি ৱদন্তি. যথা পন অজ্ঝোকাসে সত্তব্ভন্তৰৱসেন অৰঞ্ঞপৰিহাৰো লব্ভতি, এৱং নদিযং উদকুক্খেপৱসেন নদীপৰিহাৰো লব্ভতীতি কত্ৱা অট্ঠকথাযং নদীপৰিহাৰো ৱিসুং অৱুত্তো সিযা সত্তব্ভন্তৰউদকুক্খেপসীমানং অৰঞ্ঞনদীসু অবদ্ধসীমাৱসেন লব্ভমানত্তা. এৱঞ্চ সতি সমুদ্দজাতস্সৰেসুপি পৰিহাৰো অৱুত্তসিদ্ধো হোতি নদিযা সমানলক্খণত্তা, নদীহত্থপাসো ন ৱিজহিতব্বোতি পন অত্থে সতি নদিযা অতিৱিত্থাৰত্তা বহুসাধাৰণত্তা চ অন্তোনদিযং চীৱৰং ঠপেত্ৱা নদীহত্থপাসে ঠিতেন চীৱৰস্স পৱত্তিং জানিতুং ন সক্কা ভৱেয্য. এস নযো সমুদ্দজাতস্সৰেসুপি. অন্তোউদকুক্খেপে ৱা তস্স হত্থপাসে ৱা ঠিতেন পন সক্কাতি অযং অম্হাকং অত্তনোমতি, ৱিচাৰেত্ৱা গহেতব্বং. ৱিহাৰসীমন্তি অৱিপ্পৱাসসীমং সন্ধাযাহ. এত্থ চ ৱিহাৰস্স নানাকুলসন্তকভাৱেপি অৱিপ্পৱাসসীমাপৰিচ্ছেদব্ভন্তৰে সব্বত্থ চীৱৰঅৱিপ্পৱাসসম্ভৱতো পধানত্তা তত্থ সত্থপৰিহাৰো ন লব্ভতীতি ‘‘ৱিহাৰং গন্ত্ৱা ৱসিতব্ব’’ন্তি ৱুত্তং. সত্থসমীপেতি ইদং যথাৱুত্তঅব্ভন্তৰপৰিচ্ছেদৱসেন ৱুত্তং.

যস্মা ‘‘নানাকুলস্স পৰিক্খিত্তে খেত্তে চীৱৰং নিক্খিপিত্ৱা খেত্তদ্ৱাৰমূলে ৱা তস্স হত্থপাসে ৱা ৱত্থব্ব’’ন্তি ৱুত্তং, তস্মা দ্ৱাৰমূলতো অঞ্ঞত্থ খেত্তেপি ৱসন্তেন চীৱৰং নিক্খিপিত্ৱা হত্থপাসে কত্ৱাযেৱ ৱসিতব্বং.

ৱিহাৰো নাম সপৰিক্খিত্তো ৱা অপৰিক্খিত্তো ৱা সকলো আৱাসোতি ৱদন্তি. যস্মিং ৱিহাৰেতি এত্থ পন একগেহমেৱ ৱুত্তং. ৱিমতিৱিনোদনিযং (ৱি. ৱি. টী. ১.৪৯১-৪৯৪) পন ‘‘ৱিহাৰো নাম উপচাৰসীমা. যস্মিং ৱিহাৰেতি তস্স অন্তোপৰিৱেণাদিং সন্ধায ৱুত্ত’’ন্তি ৱুত্তং. এককুলাদিসন্তকতা চেত্থ কাৰাপকানং ৱসেন ৱেদিতব্বা.

যং মজ্ঝন্হিকে কালে সমন্তা ছাযা ফৰতীতি যদা মহাৱীথিযং উজুকমেৱ গচ্ছন্তং সূৰিযমণ্ডলং মজ্ঝন্হিকং পাপুণাতি, তদা যং ওকাসং ছাযা ফৰতি, তং সন্ধায ৱুত্তং. ৱিমতিৱিনোদনিযং পন ‘‘ছাযায ফুট্ঠোকাসস্সাতি উজুকং অৱিক্খিত্তলেড্ডুপাতব্ভন্তৰং সন্ধায ৱদতী’’তি ৱুত্তং. অগমনপথেতি তদহেৱ গন্ত্ৱা নিৱত্তেতুং অসক্কুণেয্যকে সমুদ্দমজ্ঝে যে দীপকা, তেসূতি যোজনা. ইতৰস্মিন্তি পুৰত্থিমদিসায চীৱৰে.

৫২. নদিং ওতৰতীতি হত্থপাসং মুঞ্চিত্ৱা ওতৰতি. নাপজ্জতীতি পৰিভোগপচ্চযা দুক্কটং নাপজ্জতি. তেনাহ ‘‘সো হী’’তিআদি. অপৰিভোগাৰহত্তাতি ইমিনা নিস্সগ্গিযচীৱৰং অনিস্সজ্জিত্ৱা পৰিভুঞ্জন্তস্স দুক্কটং অচিত্তকন্তি সিদ্ধং. একং পাৰুপিত্ৱা একং অংসকূটে ঠপেত্ৱা গন্তব্বন্তি ইদং বহূনং সঞ্চৰণট্ঠানে এৱং অকত্ৱা গমনং ন সাৰুপ্পন্তি কত্ৱা ৱুত্তং, ন আপত্তিঅঙ্গত্তা. বহিগামে ঠপেত্ৱাপি অপাৰুপিতব্বতায ৱুত্তং ‘‘ৱিনযকম্মং কাতব্ব’’ন্তি. অথ ৱা ৱিহাৰে সভাগং ভিক্খুং ন পস্সতি, এৱং সতি আসনসালং গন্ত্ৱা ৱিনযকম্মং কাতব্বন্তি যোজনা. আসনসালং গচ্ছন্তেন কিং তীহি চীৱৰেহি গন্তব্বন্তি আহ ‘‘সন্তৰুত্তৰেনা’’তি নট্ঠচীৱৰস্স সন্তৰুত্তৰসাদিযনতো. সঙ্ঘাটি পন কিং কাতব্বাতি আহ ‘‘সঙ্ঘাটিং বহিগামে ঠপেত্ৱা’’তি. উত্তৰাসঙ্গে চ বহিগামে ঠপিতসঙ্ঘাটিযঞ্চ পঠমং ৱিনযকম্মং কত্ৱা পচ্ছা উত্তৰাসঙ্গং নিৱাসেত্ৱা অন্তৰৱাসকে কাতব্বং. এত্থ চ বহিগামে ঠপিতস্সপি ৱিনযকম্মৱচনতো পৰম্মুখাপি ঠিতং নিস্সজ্জিতুং, নিস্সট্ঠং দাতুঞ্চ ৱট্টতীতি ৱেদিতব্বং.

দহৰানং গমনে সউস্সাহত্তা ‘‘নিস্সযো পন ন পটিপ্পস্সম্ভতী’’তি ৱুত্তং. মুহুত্তং…পে… পটিপ্পস্সম্ভতীতি সউস্সাহত্তে গমনস্স উপচ্ছিন্নত্তা ৱুত্তং, তেসং পন পুৰাৰুণা উট্ঠহিত্ৱা সউস্সাহেন গচ্ছন্তানং অৰুণে অন্তৰা উট্ঠিতেপি ন পটিপ্পস্সম্ভতি ‘‘যাৱ অৰুণুগ্গমনা সযন্তী’’তি ৱুত্তত্তা. তেনেৱ ‘‘গামং পৱিসিত্ৱা…পে… ন পটিপ্পস্সম্ভতী’’তি ৱুত্তং. অঞ্ঞমঞ্ঞস্স ৱচনং অগ্গহেত্ৱাতিআদিম্হি সউস্সাহত্তা গমনক্খণে পটিপ্পস্সদ্ধি ন ৱুত্তা. ধেনুভযেনাতি তৰুণৱচ্ছগাৱীনং আধাৱিত্ৱা সিঙ্গেন পহৰণভযেন. নিস্সযো চ পটিপ্পস্সম্ভতীতি এত্থ ধেনুভযাদীহি ঠিতানং যাৱ ভযৱূপসমা ঠাতব্বতো ‘‘অন্তোঅৰুণেযেৱ গমিস্সামী’’তি নিযমেতুং অসক্কুণেয্যত্তা ৱুত্তং. যত্থ পন এৱং নিযমেতুং সক্কা, তত্থ অন্তৰা অৰুণে উগ্গতেপি নিস্সযো ন পটিপ্পস্সম্ভতি ভেসজ্জত্থায গামং পৱিট্ঠদহৰানং ৱিয.

অন্তোসীমাযং গামন্তি অৱিপ্পৱাসসীমাসম্মুতিতো পচ্ছা পতিট্ঠাপিতগামং সন্ধায ৱদতি গামঞ্চ গামূপচাৰঞ্চ ঠপেত্ৱা সম্মন্নিতব্বতো. পৱিট্ঠানন্তি আচৰিযন্তেৱাসিকানং ৱিসুং ৱিসুং গতানং অৱিপ্পৱাসসীমত্তা নেৱ চীৱৰানি নিস্সগ্গিযানি হোন্তি, সউস্সাহতায ন নিস্সযো পটিপ্পস্সম্ভতি. অন্তৰামগ্গেতি ধম্মং সুত্ৱা আগচ্ছন্তানং অন্তৰামগ্গে.

ইতি ৱিনযসঙ্গহসংৱণ্ণনাভূতে ৱিনযালঙ্কাৰে

চীৱৰৱিপ্পৱাসৱিনিচ্ছযকথালঙ্কাৰো নাম

নৱমো পৰিচ্ছেদো.