৬. মচ্ছমংসৱিনিচ্ছযকথা

৩৮. এৱং কুলসঙ্গহৱিনিচ্ছযং কথেত্ৱা ইদানি মচ্ছমংসৱিনিচ্ছযং কথেতুং ‘‘মচ্ছমংসেসু পনা’’তিআদি ৱুত্তং. তত্থ থলে ঠপিতমত্তে মৰতি, কেৱট্টাদীহি ৱা মাৰিযতীতি মচ্ছো. মচ্ছস্স ইদন্তি মচ্ছং, মসিযতে আমসিযতেতি মংসং, মচ্ছঞ্চ মংসঞ্চ মচ্ছমংসানি, তেসু. মচ্ছমংসেসু পন ৱিনিচ্ছযো এৱং ৱেদিতব্বোতি যোজনা. মচ্ছগ্গহণেনাতি এত্থ নিদ্ধাৰণং ন কাতব্বং. পন-সদ্দো পক্খন্তৰত্থো, দিৱাসেয্যাদীসু ৱিনিচ্ছযতো অপৰো মচ্ছমংসেসু ৱিনিচ্ছযো ৱেদিতব্বোতি অত্থো. গয্হতে অনেনাতি গহণং. কিং তং? সদ্দো, মচ্ছইতি গহণং মচ্ছগ্গহণং, তেন মচ্ছগ্গহণেন, মচ্ছসদ্দেনাতি অত্থো. মংসেসু পন…পে… অকপ্পিযানীতি এত্থ মনুস্সমংসং সমানজাতিমংসতো পটিক্খিত্তং. হত্থিঅস্সানং মংসানি ৰাজঙ্গতো, সুনখঅহীনং জেগুচ্ছভাৱতো, সেসানং ৱাড়মিগত্তা ভিক্খূনং পৰিবন্ধৱিমোচনত্থং পটিক্খিত্তন্তি দট্ঠব্বং.

তিকোটিপৰিসুদ্ধন্তি দিট্ঠসুতপৰিসঙ্কিতসঙ্খাতাহি তীহি কোটীহি তীহি আকাৰেহি তীহি কাৰণেহি পৰিসুদ্ধং, ৱিমুত্তন্তি অত্থো. তত্থ অদিট্ঠঅসুতানি চক্খুৱিঞ্ঞাণসোতৱিঞ্ঞাণানং অনাৰম্মণভাৱতো জানিতব্বানি. অপৰিসঙ্কিতং পন কথং জানিতব্বন্তি আহ ‘‘অপৰিসঙ্কিতং পনা’’তিআদি, তীণি পৰিসঙ্কিতানি ঞত্ৱা তেসং পটিপক্খৱসেন অপৰিসঙ্কিতং জানিতব্বন্তি অত্থো. ইদানি তানি তীণি পৰিসঙ্কিতানি চ এৱং পৰিসঙ্কিতে সতি ভিক্খূহি কত্তব্বৱিধিঞ্চ তেন ৱিধিনা অপৰিসঙ্কিতে সতি কত্তব্বভাৱঞ্চ ৱিত্থাৰতো দস্সেতুং ‘‘কথ’’ন্তিআদিমাহ. তত্থ দিস্ৱা পৰিসঙ্কিতং দিট্ঠপৰিসঙ্কিতং নাম. সুত্ৱা পৰিসঙ্কিতং সুতপৰিসঙ্কিতং নাম. অদিস্ৱা অসুত্ৱা তক্কেন অনুমানেন পৰিসঙ্কিতং তদুভযৱিনিমুত্তপৰিসঙ্কিতং নাম. তং তিৱিধম্পি পৰিসঙ্কিতসামঞ্ঞেন একা কোটি হোতি, ততো ৱিমুত্তং অপৰিসঙ্কিতং নাম. এৱং অদিট্ঠং অসুতং অপৰিসঙ্কিতং মচ্ছমংসং তিকোটিপৰিসুদ্ধং হোতি.

জালং মচ্ছবন্ধনং. ৱাগুৰা মিগবন্ধিনী. কপ্পতীতি যদি তেসং ৱচনেন সঙ্কা নিৱত্ততি, ৱট্টতি, ন তং ৱচনং লেসকপ্পং কাতুং ৱট্টতি. তেনেৱ ৱক্খতি ‘‘যত্থ চ নিব্বেমতিকো হোতি, তং সব্বং কপ্পতী’’তি. পৱত্তমংসন্তি আপণাদীসু পৱত্তং ৱিক্কাযিকং ৱা মতমংসং ৱা. মঙ্গলাদীনন্তি আদি-সদ্দেন আহুনপাহুনাদিকে সঙ্গণ্হাতি. ভিক্খূনংযেৱ অত্থায অকতন্তি এত্থ অট্ঠানপ্পযুত্তো এৱ-সদ্দো, ভিক্খূনং অত্থায অকতমেৱাতি সম্বন্ধিতব্বং, তস্মা ভিক্খূনঞ্চ মঙ্গলাদীনঞ্চাতি মিস্সেত্ৱা কতম্পি ন ৱত্ততীতি ৱেদিতব্বং. কেচি পন ‘‘যথাঠিতৱসেন অৱধাৰণং গহেত্ৱা ৱট্টতী’’তি ৱদন্তি, তং ন সুন্দৰং. যত্থ চ নিব্বেমতিকো হোতীতি ভিক্খূনং অত্থায কতেপি সব্বেন সব্বং পৰিসঙ্কিতাভাৱমাহ.

৩৯. তমেৱত্থং আৱিকাতুং ‘‘সচে পনা’’তিআদি ৱুত্তং. ইতৰেসং ৱট্টতীতি অজানন্তানং ৱট্টতি, জানতোৱেত্থ আপত্তি হোতীতি. তেযেৱাতি যে উদ্দিস্স কতং, তেযেৱ. উদ্দিস্স কতমংসপৰিভোগতো অকপ্পিযমংসপৰিভোগে ৱিসেসং দস্সেতুং ‘‘অকপ্পিযমংসং পনা’’তিআদি ৱুত্তং. পুৰিমস্মিং সচিত্তকাপত্তি, ইতৰস্মিং অচিত্তকা. তেনাহ ‘‘অকপ্পিযমংসং অজানিত্ৱা ভুঞ্জন্তস্সপি আপত্তিযেৱা’’তি. ‘‘পৰিভোগকালে পুচ্ছিত্ৱা পৰিভুঞ্জিস্সামীতি ৱা গহেত্ৱা পুচ্ছিত্ৱাৱ পৰিভুঞ্জিতব্ব’’ন্তি (ৱি. সঙ্গ. অট্ঠ. ৩৯) ৱচনতো অকপ্পিযমংসং অজানিত্ৱা পটিগ্গণ্হন্তস্স পটিগ্গহণে অনাপত্তি সিদ্ধা. অজানিত্ৱা পৰিভুঞ্জন্তস্সেৱ হি আপত্তি ৱুত্তা. ৱত্তন্তি ৱদন্তীতি ইমিনা আপত্তি নত্থীতি দস্সেতি.

ইতি ৱিনযসঙ্গহসংৱণ্ণনাভূতে ৱিনযালঙ্কাৰে

মচ্ছমংসৱিনিচ্ছযকথালঙ্কাৰো নাম

ছট্ঠো পৰিচ্ছেদো.