৫. কুলসঙ্গহৱিনিচ্ছযকথা

২৭. এৱং ৱিঞ্ঞত্তিৱিনিচ্ছযং কথেত্ৱা ইদানি কুলসঙ্গহৱিনিচ্ছযং কথেতুং ‘‘কুলসঙ্গহো’’তিআদিমাহ. তত্থ সঙ্গণ্হনং সঙ্গহো, কুলানং সঙ্গহো কুলসঙ্গহো, পচ্চযদাযকাদীনং গিহীনং অনুগ্গহকৰণং. অনুগ্গহত্থো হেত্থ সঙ্গহ-সদ্দো যথা ‘‘পুত্তদাৰস্স সঙ্গহো’’তি (খু. পা. ৫.৬; সু. নি. ২৬৫).

২৮. তত্থ কোট্টনন্তি সযং ছিন্দনং. কোট্টাপনন্তি ‘‘ইমং ছিন্দা’’তি অঞ্ঞেসং ছেদাপনং. আড়িযা বন্ধনন্তি যথা গচ্ছমূলে উদকং সন্তিট্ঠতি, তথা সমন্ততো বন্ধনং. উদকস্সাতি অকপ্পিযউদকস্স ‘‘কপ্পিযউদকসিঞ্চন’’ন্তি ৱিসুং ৱক্খমানত্তা, তঞ্চ আৰামাদিঅত্থং ৰোপনে অকপ্পিযৱোহাৰেসুপি কপ্পিযৱোহাৰেসুপি কপ্পিযউদকসিঞ্চনাদি ৱট্টতীতি ৱক্খমানত্তা ইধাপি ৱিভাগং কত্ৱা কপ্পিযউদকসিঞ্চনাদি ৱিসুং দস্সিতং. এত্থ চ কতমং অকপ্পিযউদকং, কতমং পন কপ্পিযউদকন্তি? সপ্পাণকং অকপ্পিযউদকং, অপ্পাণকং কপ্পিযউদকন্তি. কথং ৱিঞ্ঞাযতীতি চে, ‘‘যো পন ভিক্খু জানং সপ্পাণকং উদকং তিণং ৱা মত্তিকং ৱা সিঞ্চেয্য ৱা সিঞ্চাপেয্য ৱা পাচিত্তিয’’ন্তি ৱচনতো. যথা কোট্টনখণনাদিকাযিককিৰিযাপি অকপ্পিযৱোহাৰে সঙ্গহিতা, এৱং মাতিকাউজুকৰণাদিকপ্পিযৱোহাৰেপীতি আহ ‘‘সুক্খমাতিকায উজুকৰণ’’ন্তি. হত্থপাদমুখধোৱননহআনোদকসিঞ্চনন্তি ইমিনাপি পকাৰন্তৰেন কপ্পিযউদকসিঞ্চনমেৱ দস্সেতি. অকপ্পিযৱোহাৰে কোট্টনখণনাদিৱসেন সযং কৰণস্সপি কথং সঙ্গহোতি? অকপ্পিযন্তি ৱোহৰিযতীতি অকপ্পিযৱোহাৰোতি অকপ্পিযভূতং কৰণকাৰাপনাদি সব্বমেৱ সঙ্গহিতং, ন পন অকপ্পিযৱচনমত্তন্তি দট্ঠব্বং. কপ্পিযৱোহাৰেপি এসেৱ নযো. সুক্খমাতিকায উজুকৰণন্তি ইমিনা পুৰাণপণ্ণাদীনং হৰণম্পি সঙ্গহিতন্তি দট্ঠব্বং. কুদালাদীনি ভূমিযং ঠপেত্ৱা ঠানতো হত্থেন গহেত্ৱা ঠানমেৱ পাকটতৰন্তি ‘‘ওভাসো’’তি ৱুত্তং.

২৯. মহাপচ্চৰিৱাদং পতিট্ঠাপেতুকামো পচ্ছা ৱদতি. ৱনত্থাযাতি ইদং কেচি ‘‘ৱতত্থাযা’’তি পঠন্তি, তেসং ৱতিঅত্থাযাতি অত্থো. ৱজিৰবুদ্ধিটীকাযম্পি তথেৱ ৱুত্তং, ‘‘আৰামৰোপা ৱনৰোপা, যে নৰা সেতুকাৰকা’’তি (সং. নি. ১.৪৭) ৱচনতো পন তং ৱিচাৰেতব্বং. অকপ্পিযৱোহাৰেপি একচ্চং ৱট্টতীতি দস্সেতুং ‘‘ন কেৱলঞ্চ সেস’’ন্তিআদিমাহ. যং কিঞ্চি মাতিকন্তি সুক্খমাতিকং ৱা অসুক্খমাতিকং ৱা. কপ্পিযউদকং সিঞ্চিতুন্তি ইমিনা ‘‘কপ্পিযউদকং সিঞ্চথা’’তি ৱত্তুম্পি ৱট্টতীতি দস্সেতি. সযং ৰোপেতুম্পি ৱট্টতীতি ইমিনা ‘‘ৰোপেহী’’তি ৱত্তুম্পি ৱট্টতীতিপি সিদ্ধং.

৩০. পাচিত্তিযঞ্চেৱ দুক্কটঞ্চাতি পথৱীখণনপচ্চযা পাচিত্তিযং, কুলসঙ্গহপচ্চযা দুক্কটং. অকপ্পিযৱোহাৰেনাতি ‘‘ইদং খণ, ইদং ৰোপেহী’’তি অকপ্পিযৱোহাৰেন. দুক্কটমেৱাতি কুলসঙ্গহপচ্চযা দুক্কটং. উভযত্ৰাতি কপ্পিযাকপ্পিযপথৱিযং.

সব্বত্থাতি কুলসঙ্গহপৰিভোগআৰামাদিঅত্থায ৰোপিতে. দুক্কটম্পীতি ন কেৱলং পাচিত্তিযমেৱ. কপ্পিযেনাতি কপ্পিযউদকেন. তেসংযেৱ দ্ৱিন্নন্তি কুলসঙ্গহপৰিভোগানং. দুক্কটন্তি কুলসঙ্গহত্থায সযং সিঞ্চনে, কপ্পিযৱোহাৰেন ৱা অকপ্পিযৱোহাৰেন ৱা সিঞ্চাপনে দুক্কটং, পৰিভোগত্থায সযং সিঞ্চনে, অকপ্পিযৱোহাৰেন সিঞ্চাপনে চ দুক্কটং. পযোগবহুলতাযাতি সযং কৰণে, কাযপযোগস্স কাৰাপনে ৱচীপযোগস্স বহুত্তেন. আপত্তিবহুলতা ৱেদিতব্বাতি এত্থ সযং সিঞ্চনে ধাৰাপচ্ছেদগণনায আপত্তিগণনা ৱেদিতব্বা. সিঞ্চাপনে পন পুনপ্পুনং আণাপেন্তস্স ৱাচায ৱাচায আপত্তি, সকিং আণত্তস্স বহুসিঞ্চনে একাৱ.

ওচিননে দুক্কটপাচিত্তিযানীতি কুলসঙ্গহপচ্চযা দুক্কটং, ভূতগামপাতব্যতায পাচিত্তিযং. অঞ্ঞত্থাতি ৱত্থুপূজাদিঅত্থায ওচিননে. সকিং আণত্তোতি অকপ্পিযৱোহাৰেন আণত্তো. পাচিত্তিযমেৱাতি অকপ্পিযৱোহাৰেন আণত্তত্তা ভূতগামসিক্খাপদেন (পাচি. ৯০-৯১) পাচিত্তিযং. কপ্পিযৱচনেন পন ৱত্থুপূজাদিঅত্থায ওচিনাপেন্তস্স অনাপত্তিযেৱ.

৩১. গন্থনেন নিব্বত্তং দামং গন্থিমং. এস নযো সেসেসুপি. ন ৱট্টতীতি কুলসঙ্গহত্থায, ৱত্থুপূজাদিঅত্থায ৱা ৱুত্তনযেন কৰোন্তস্স কাৰাপেন্তস্স চ দুক্কটন্তি অত্থো. ৱট্টতীতি ৱত্থুপূজাদিঅত্থায ৱট্টতি, কুলসঙ্গহত্থায পন কপ্পিযৱোহাৰেন কাৰাপেন্তস্সপি দুক্কটমেৱ. পুৰিমনযেনেৱাতি ‘‘ভিক্খুস্স ৱা’’তিআদিনা ৱুত্তনযেন. ধম্মাসনৱিতানে বদ্ধকণ্টকেসু পুপ্ফানি ৱিনিৱিজ্ঝিত্ৱা ঠপেন্তীতি সম্বন্ধো. উপৰূপৰি ৱিজ্ঝিত্ৱা ছত্তসদিসং কত্ৱা আৱুণনতো ‘‘ছত্তাধিছত্তং ৱিযা’’তি ৱুত্তং. ‘‘কদলিক্খন্ধম্হী’’তিআদিনা ৱুত্তং সব্বমেৱ সন্ধায ‘‘তং অতিওড়াৰিকমেৱা’’তি ৱুত্তং, সব্বত্থ কৰণে, অকপ্পিযৱোহাৰেন কাৰাপনে চ দুক্কটমেৱাতি অত্থো. পুপ্ফৱিজ্ঝনত্থং কণ্টকম্পি বন্ধিতুং ন ৱট্টতীতি ইমস্স উপলক্খণত্তা পুপ্ফদামোলম্বকাদিঅত্থায ৰজ্জুবন্ধনাদিপি ন ৱট্টতীতি কেচি ৱদন্তি. অঞ্ঞে পন ‘‘পুপ্ফৱিজ্ঝনত্থং কণ্টকন্তি ৱিসেসিতত্তা তদত্থং কণ্টকমেৱ বন্ধিতুং ন ৱট্টতি, তঞ্চ অট্ঠকথাপমাণেনা’’তি ৱদন্তি, ৱীমংসিত্ৱা গহেতব্বং. পুপ্ফপটিচ্ছকং নাম দন্তাদীহি কতং পুপ্ফাধানং. এতম্পি নাগদন্তকম্পি সছিদ্দমেৱ গহেতব্বং. অসোকপিণ্ডিযাতি অসোকসাখানং, পুপ্ফানং ৱা সমূহে. সাৰত্থদীপনিযং (সাৰত্থ. টী. ২.৪৩১) পন ‘‘অসোকপিণ্ডিযাতি অসোকপুপ্ফমঞ্জৰিকাযা’’তি ৱুত্তং. ধম্মৰজ্জু নাম চেতিযং ৱা বোধিং ৱা পুপ্ফপ্পৱেসনত্থং আৱিজ্ঝিত্ৱা বন্ধৰজ্জু. ৱিমতিৱিনোদনিযং (ৱি. ৱি. টী. ১.৪৩১) পন ‘‘ধম্মৰজ্জু নাম চেতিযাদীনি পৰিক্খিপিত্ৱা তেসঞ্চ ৰজ্জুযা চ অন্তৰা পুপ্ফপ্পৱেসনত্থায বন্ধৰজ্জু. সিথিলৱট্টিতায ৱা ৱট্টিযা অব্ভন্তৰে পুপ্ফপ্পৱেসনত্থায এৱং বন্ধাতিপি ৱদন্তী’’তি ৱুত্তং.

মত্থকদামন্তি ধম্মাসনাদিমত্থকে পলম্বকদামং. তেসংযেৱাতি উপ্পলাদীনং এৱ. ৱাকেন ৱাতি পুপ্ফনাড়ং ফালেত্ৱা পুপ্ফেন একাবদ্ধট্ঠিতৱাকেন দণ্ডেন চ একাবদ্ধেনেৱ. এতেন পুপ্ফং বীজগামসঙ্গহং ন গচ্ছতি পঞ্চসু বীজেসু অপৱিট্ঠত্তা পণ্ণং ৱিয, তস্মা কপ্পিযং অকাৰাপেত্ৱাপি ৱিকোপনে দোসো নত্থি. যঞ্চ ছিন্নস্সপি মকুড়স্স ৱিকসনং, তম্পি অতিতৰুণস্স অভাৱা ৱুড্ঢিলক্খণং ন হোতি, পৰিণতস্স পন মকুড়স্স পত্তানং সিনেহে পৰিযাদানং গতে ৱিসুংভাৱো এৱ ৱিকাসো, তেনেৱ ছিন্নমকুড়ৱিকাসো অছিন্নমকুড়ৱিকাসতো পৰিহীনো, মিলাতনিযুত্তো ৱা দিস্সতি. যঞ্চ মিলাতস্স উদকসঞ্ঞোগে অমিলানতাপজ্জনং, তম্পি তম্বুলপণ্ণাদীসু সমানং ৱুড্ঢিলক্খণং ন হোতি. পাড়িঅট্ঠকথাসু চ ন কত্থচি পুপ্ফানং কপ্পিযকৰণং আগতং, তস্মা পুপ্ফং সব্বথা অবীজমেৱাতি ৱিঞ্ঞাযতি, ৱীমংসিত্ৱা গহেতব্বং.

‘‘পসিব্বকে ৱিযা’’তি ৱুত্তত্তা পুপ্ফং পসিব্বকে ৱা পসিব্বকসদিসং বন্ধে যত্থ কত্থচি চীৱৰে ৱা পক্খিপিতুং ৱট্টতীতি সিদ্ধং. সাৰত্থদীপনিযং (সাৰত্থ. টী. ২.৪৩১) পন ‘‘খন্ধে ঠপিতকাসাৱস্সাতি খন্ধে ঠপিতসঙ্ঘাটিং সন্ধায ৱুত্তং. তঞ্হি তথাবন্ধিতুং সক্কা ভৱেয্য. ইমিনা চ অঞ্ঞম্পি তাদিসং কাসাৱং ৱা ৱত্থং ৱা ৱুত্তনযেন বন্ধিত্ৱা তত্থ পুপ্ফানি পক্খিপিতুং ৱট্টতীতি সিদ্ধং. অংসভণ্ডিকপসিব্বকে পক্খিত্তসদিসত্তা ৱেঠিমং নাম ন জাতং, তস্মা সিথিলবন্ধস্স অন্তৰন্তৰা পক্খিপিতুম্পি ৱট্টতীতি ৱদন্তী’’তি ৱুত্তং. হেট্ঠা দণ্ডকং পন বন্ধিতুং ন ৱট্টতীতি ৰজ্জুআদীহি বন্ধনং সন্ধায ৱুত্তং, পুপ্ফস্সেৱ পন অচ্ছিন্নদণ্ডকেহি বন্ধিতুং ৱট্টতি এৱ.

পুপ্ফপটে চ দট্ঠব্বন্তি পুপ্ফপটং কৰোন্তস্স দীঘতো পুপ্ফদামস্স হৰণপচ্চাহৰণৱসেন পূৰণং সন্ধায ৱুত্তং, তিৰিযতো হৰণং পন ৱাযিমং নাম হোতি, ন পুৰিমং. ‘‘পুৰিমট্ঠানং অতিক্কামেতী’’তি সামঞ্ঞতো ৱুত্তত্তা পুৰিমং পুপ্ফকোটিং ফুসাপেত্ৱা ৱা অফুসাপেত্ৱা ৱা পৰিক্খিপনৱসেন অতিক্কামেন্তস্স আপত্তিযেৱ. বন্ধিতুং ৱট্টতীতি পুপ্ফৰহিতায সুত্তৱাককোটিযা বন্ধিতুং ৱট্টতি. একৱাৰং হৰিত্ৱা পৰিক্খিপিত্ৱাতি ইদং পুব্বে ৱুত্তচেতিযাদিপৰিক্খেপং পুপ্ফপটকৰণঞ্চ সন্ধায ৱুত্তং, তস্মা চেতিযং ৱা বোধিং ৱা পৰিক্খিপন্তেন একৱাৰং পৰিক্খিপিত্ৱা পুৰিমট্ঠানং সম্পত্তে অঞ্ঞস্স দাতব্বং, তেনপি একৱাৰং পৰিক্খিপিত্ৱা তথেৱ কাতব্বং. পুপ্ফপটং কৰোন্তেন চ হৰিত্ৱা অঞ্ঞস্স দাতব্বং, তেনপি তথেৱ কাতব্বং. সচেপি দ্ৱেযেৱ ভিক্খূ উভোসু পস্সেসু ঠত্ৱা পৰিযাযেন হৰন্তি, ৱট্টতিযেৱাতি ৱদন্তি.

পৰেহি পূৰিতন্তি দীঘতো পসাৰিতং. ৱাযিতুন্তি তিৰিযতো হৰিতুং, তং পন একৱাৰম্পি ন লভতি. পুপ্ফানি ঠপেন্তেনাতি অগন্থিতানি পাকতিকপুপ্ফানি অঞ্ঞমঞ্ঞং ফুসাপেত্ৱাপি ঠপেন্তেন. পুপ্ফদামং পন পূজনত্থায ভূমিযং ঠপেন্তেন ফুসাপেত্ৱা ৱা অফুসাপেত্ৱা ৱা দিগুণং কত্ৱা ঠপেতুং ন ৱট্টতীতি ৱদন্তি.

৩২. ঘটিকদামওলম্বকোতি হেট্ঠাভাগে ঘটিকাকাৰযুত্তো, দাৰুঘটিকাকাৰো ৱা ওলম্বকো. সাৰত্থদীপনিযং (সাৰত্থ. টী. ২.৪৩১) পন ‘‘ঘটিকদামওলম্বকোতি অন্তে ঘটিকাকাৰযুত্তো যমকদামওলম্বকো’’তি ৱুত্তং. ৱজিৰবুদ্ধিটীকাযং (ৱজিৰ. টী. পাৰাজিক ৪৩১) পন ‘‘ঘটিকদামওলম্বকোতি যমকদামওলম্বকোতি লিখিত’’ন্তি ৱুত্তং, একেকং পন দামং নিক্খন্তসুত্তকোটিযাৱ বন্ধিত্ৱা ওলম্বিতুং ৱট্টতি, পুপ্ফদামদ্ৱযং সঙ্ঘটিতুকামেনপি নিক্খন্তসুত্তকোটিযাৱ সুত্তকোটিং সঙ্ঘটিতুং ৱট্টতি. অড্ঢচন্দাকাৰেন মালাগুণপৰিক্খেপোতি অড্ঢচন্দাকাৰেন মালাগুণস্স পুনপ্পুনং হৰণপচ্চাহৰণৱসেন পূৰেত্ৱা পৰিক্খিপনং, তেনেৱ তং পুৰিমে পৱিট্ঠং, তস্মা এতম্পি অড্ঢচন্দাকাৰং পুনপ্পুনং হৰণপচ্চাহৰণৱসেন পূৰেতুং ন ৱট্টতি. একৱাৰং পন অড্ঢচন্দাকাৰকৰণে মালাগুণং হৰিতুং ৱট্টতীতি ৱদন্তি. পুপ্ফদামকৰণন্তি এত্থ সুত্তকোটিযং গহেত্ৱাপি একতো কাতুং ন ৱট্টতীতি ৱদন্তি. সুত্তমযং গেণ্ডুকং নাম, গেণ্ডুকখৰপত্তদামানং পটিক্খিত্তত্তা চেলাদীহি কতদামম্পি ন ৱট্টতি অকপ্পিযানুলোমত্তাতি ৱদন্তি. পৰসন্তকং দেতি, দুক্কটমেৱাতি ৱিস্সাসগ্গাহেন পৰসন্তকং গহেত্ৱা দেন্তং সন্ধায ৱুত্তং. থুল্লচ্চযন্তি এত্থ ভণ্ডদেয্যম্পি হোতি.

৩৩. তঞ্চ খো ৱত্থুপূজনত্থাযাতি মাতাপিতূনম্পি পুপ্ফং দেন্তেন ৱত্থুপূজনত্থাযেৱ দাতব্বন্তি দস্সেতি. ‘‘মণ্ডনত্থায পন সিৱলিঙ্গাদিপূজনত্থাযা’’তি এত্তকমেৱ ৱুত্তত্তা ‘‘ইমং ৱিক্কিণিত্ৱা জীৱিস্সন্তী’’তি মাতাপিতূনং ৱট্টতি, সেসঞাতকানং তাৱকালিকমেৱ দাতুং ৱট্টতি. কস্সচিপীতি ঞাতকস্স ৱা অঞ্ঞাতকস্স ৱা কস্সচিপি. ঞাতিসামণেৰেহেৱাতি তেসং গিহিপৰিকম্মমোচনত্থং ৱুত্তং. ইতৰেতি অঞ্ঞাতকা. তেহিপি সামণেৰেহি আচৰিযুপজ্ঝাযানং ৱত্তসীসেন হৰিতব্বং. সম্পত্তানং সামণেৰানং উপড্ঢভাগং দাতুং ৱট্টতীতি সঙ্ঘিকস্স লাভস্স উপচাৰসীমট্ঠসামণেৰানম্পি সন্তকত্তা তেসম্পি উপড্ঢভাগো লব্ভতেৱাতি কত্ৱা ৱুত্তং. চূড়কন্তি উপড্ঢভাগতোপি উপড্ঢং. চতুত্থভাগস্সেতং অধিৱচনং. সামণেৰা…পে… ঠপেন্তীতি ইদং অৰক্খিতঅগোপিতং সন্ধায ৱুত্তং. সাৰত্থদীপনিযং পন ‘‘ৱস্সগ্গেন অভাজনীযং সন্ধায ৱুত্ত’’ন্তি ৱুত্তং. তত্থ তত্থাতি মগ্গে ৱা চেতিযঙ্গণে ৱা.

৩৪. সামণেৰেহি দাপেতুং ন লভন্তীতি ইদং সামণেৰেহি গিহিকম্মং কাৰিতং ৱিয হোতীতি ৱুত্তং, ন পন পুপ্ফদানং হোতীতি সামণেৰানম্পি ন ৱট্টনতো. ৱুত্তঞ্চ ‘‘সযমেৱা’’তিআদি. ন হি তং পুপ্ফদানং নাম সিযা. যদি হি তথা আগতানং তেসং দানং পুপ্ফদানং নাম ভৱেয্য, সামণেৰেহিপি দাতুং ন লব্ভেয্য. সযমেৱাতি সামণেৰা সযমেৱ. যাগুভত্তাদীনি আদাযাতি ইদং ভিক্খূনং অত্থায যাগুভত্তাদিসম্পাদনং সন্ধায ৱুত্তত্তা ‘‘ন ৱট্টতী’’তি অৱিসেসেন ৱুত্তং. অৱিসেসেন ৱুত্তন্তি ইমিনা সব্বেসম্পি ন ৱট্টতীতি দস্সেতি.

৩৫. ৱুত্তনযেনেৱাতি ‘‘মাতাপিতূনং তাৱ হৰিত্ৱাপি হৰাপেত্ৱাপি পক্কোসিত্ৱাপি পক্কোসাপেত্ৱাপি দাতুং ৱট্টতি, সেসঞাতকানং পক্কোসাপেত্ৱাৱ. মাতাপিতূনঞ্চ হৰাপেন্তেন ঞাতিসামণেৰেহেৱ হৰাপেতব্বং. ইতৰে পন যদি সযমেৱ ইচ্ছন্তি, ৱট্টতী’’তি ইমং পুপ্ফদানে ৱুত্তনযং ফলদানেপি অতিদিসতি, তস্মা ফলম্পি মাতাপিতূনং হৰণহৰাপনাদিনা দাতুং ৱট্টতি, সেসঞাতীনং পক্কোসাপেত্ৱাৱ. ইদানি ‘‘যো হৰিত্ৱা ৱা হৰাপেত্ৱা ৱা…পে… ইস্সৰৱতায দদতো থুল্লচ্চয’’ন্তি (পাৰা. অট্ঠ. ২.৪৩৬-৪৩৭) ইমং পুপ্ফদানে ৱুত্তনযং ফলদানে সঙ্খিপিত্ৱা দস্সেন্তো ‘‘কুলসঙ্গহত্থায পনা’’তিআদিমাহ. খীণপৰিব্বযানন্তি আগন্তুকে সন্ধায ৱুত্তং. ফলপৰিচ্ছেদেনাতি ‘‘এত্তকানি ফলানি দাতব্বানী’’তি এৱং ফলপৰিচ্ছেদেন ৱা. ৰুক্খপৰিচ্ছেদেন ৱাতি ‘‘ইমেহি ৰুক্খেহি দাতব্বানী’’তি এৱং ৰুক্খপৰিচ্ছেদেন ৱা. পৰিচ্ছিন্নেসুপি পন ৰুক্খেসু ‘‘ইধ ফলানি সুন্দৰানি, ইতো গণ্হথা’’তি ৱদন্তেন কুলসঙ্গহো কতো নাম হোতীতি আহ ‘‘এৱং পন ন ৱত্তব্ব’’ন্তি. ৰুক্খচ্ছল্লীতি ৰুক্খত্তচো, সা ‘‘ভাজনীযভণ্ড’’ন্তি ৱুত্তা. ৱুত্তনযেনাতি পুপ্ফফলাদীসু ৱুত্তনযেন কুলসঙ্গহো হোতীতি দস্সেতি.

৩৬. তেসং তেসং গিহীনং গামন্তৰদেসন্তৰাদীসু সাসনপটিসাসনহৰণং জঙ্ঘপেসনিযং. তেনাহ ‘‘গিহীনং দূতেয্যং সাসনহৰণকম্ম’’ন্তি. দূতস্স কম্মং দূতেয্যং. পঠমং সাসনং অগ্গহেত্ৱাপি…পে… পদে পদে দুক্কটন্তি ইদং ‘‘তস্স সাসনং আৰোচেস্সামী’’তি ইমিনা অধিপ্পাযেন গমনং সন্ধায ৱুত্তং. তস্স পন সাসনং পটিক্খিপিত্ৱা সযমেৱ কাৰুঞ্ঞে ঠিতো গন্ত্ৱা অত্তনো পতিৰূপং সাসনং আৰোচেতি, অনাপত্তি. গিহীনঞ্চ কপ্পিযসাসনং হৰিতুং ৱট্টতীতি সম্বন্ধো. ইমেহি পন অট্ঠহি কুলদূসককম্মেহীতি পুপ্ফদানং ফলদানং চুণ্ণদানং মত্তিকদানং দন্তকট্ঠদানং ৱেড়ুদানং পণ্ণদানং জঙ্ঘপেসনিকন্তি ইমেহি যথাৱুত্তেহি. পব্বাজনীযকম্মকতোতি কুলদূসনপচ্চযা কতপব্বাজনীযকম্মো.

৩৭. সেক্খভূমিযং ৱাতি ইমিনা ঝানভূমিম্পি সঙ্গণ্হাতি. তিণ্ণং ৱিৱেকানন্তি কাযচিত্তউপধিৱিৱেকভূতানং তিণ্ণং ৱিৱেকানং. পিণ্ডায চৰণস্স ভোজনপৰিযোসানত্তা ৱুত্তং ‘‘যাৱ ভোজনপৰিযোসান’’ন্তি. ভুত্ৱা আগচ্ছন্তস্সপি পুন ৱুত্তনযেনেৱ পণিধায চীৱৰসণ্ঠাপনাদীনি কৰোন্তস্স দুক্কটমেৱাতি দট্ঠব্বং.

ইতি ৱিনযসঙ্গহসংৱণ্ণনাভূতে ৱিনযালঙ্কাৰে

কুলসঙ্গহৱিনিচ্ছযকথালঙ্কাৰো নাম

পঞ্চমো পৰিচ্ছেদো.