২১. পৱাৰণাৱিনিচ্ছযকথা

১১৬. এৱং পটিগ্গহণৱিনিচ্ছযং কথেত্ৱা ইদানি পৱাৰণাৱিনিচ্ছযং কথেতুং ‘‘পটিক্খেপপৱাৰণা’’তিআদিমাহ. তত্থ পটিক্খিপনং পটিক্খেপো, অসম্পটিচ্ছনন্তি অত্থো. পৱাৰিযতে পৱাৰণা, পটিসেধনন্ত্যত্থো. পটিক্খেপসঙ্খাতা পৱাৰণা পটিক্খেপপৱাৰণা. অথ ৱা পটিক্খেপৱসেন পৱাৰণা পটিক্খেপপৱাৰণা. পঞ্চন্নং ভোজনানং অঞ্ঞতৰং ভুঞ্জন্তস্স অঞ্ঞস্মিং ভোজনে অভিহটে পটিক্খেপসঙ্খাতা পৱাৰণাতি সম্বন্ধো.

১১৭. যং অস্নাতীতি যং ভুঞ্জতি. অম্বিলপাযাসাদীসূতি আদি-সদ্দেন খীৰপাযাসাদিং সঙ্গণ্হাতি. তত্থ অম্বিলপাযাসগ্গহণেন তক্কাদিঅম্বিলসংযুত্তা ঘনযাগু ৱুত্তা. খীৰপাযাসগ্গহণেন খীৰসংযুত্তা যাগু সঙ্গয্হতি. পৱাৰণং জনেতীতি অনতিৰিত্তভোজনাপত্তিনিবন্ধনং পটিক্খেপং সাধেতি. কতোপি পটিক্খেপো অনতিৰিত্তভোজনাপত্তিনিবন্ধনো ন হোতি, অকতট্ঠানেযেৱ তিট্ঠতীতি আহ ‘‘পৱাৰণং ন জনেতী’’তি.

‘‘যাগু-সদ্দস্স পৱাৰণজনকযাগুযাপি সাধাৰণত্তা ‘যাগুং গণ্হথা’তি ৱুত্তেপি পৱাৰণা হোতীতি পৱাৰণং জনেতিযেৱাতি ৱুত্ত’’ন্তি তীসুপি গণ্ঠিপদেসু ৱুত্তং. তং পৰতো তত্থেৱ ‘‘ভত্তমিস্সকং যাগুং আহৰিত্ৱা’’তি এত্থ ৱুত্তকাৰণেন ন সমেতি. ৱুত্তঞ্হি তত্থ – হেট্ঠা অযাগুকে নিমন্তনে উদককঞ্জিকখীৰাদীহি সদ্ধিং মদ্দিতং ভত্তমেৱ সন্ধায ‘‘যাগুং গণ্হথা’’তি ৱুত্তত্তা পৱাৰণা হোতি. ‘‘ভত্তমিস্সকং যাগুং আহৰিত্ৱা’’তি এত্থ পন ৱিসুং যাগুযা ৱিজ্জমানত্তা পৱাৰণা ন হোতীতি. তস্মা তত্থ ৱুত্তনযেনেৱ খীৰাদীহি সদ্ধিং মদ্দিতং ভত্তমেৱ সন্ধায ‘‘যাগুং গণ্হথা’’তি ৱুত্তত্তা যাগুযাৱ তত্থ অভাৱতো পৱাৰণা হোতীতি এৱমেত্থ কাৰণং ৱত্তব্বং. এৱঞ্হি সতি পৰতো ‘‘যেনাপুচ্ছিতো, তস্স অত্থিতাযা’’তি অট্ঠকথায ৱুত্তকাৰণেনপি সংসন্দতি, অঞ্ঞথা গণ্ঠিপদেসুযেৱ পুব্বাপৰৱিৰোধো আপজ্জতি, অট্ঠকথায চ ন সমেতীতি. সচে…পে… পঞ্ঞাযতীতি ইমিনা ৱুত্তপ্পমাণস্স মচ্ছমংসখণ্ডস্স নহাৰুনো ৱা সব্ভাৱমত্তং দস্সেতি. তাহীতি পুথুকাহি.

সালিৱীহিযৱেহি কতসত্তূতি যেভুয্যনযেন ৱুত্তং, সত্ত ধঞ্ঞানি পন ভজ্জিত্ৱা কতোপি সত্তুযেৱ. তেনেৱাহ ‘‘কঙ্গুৱৰক…পে… সত্তুসঙ্গহমেৱ গচ্ছতী’’তি. সত্তুমোদকোতি সত্তুযো পিণ্ডেত্ৱা কতো অপক্কো সত্তুগুড়ো. ৱিমতিৱিনোদনিযং (ৱি. ৱি. টী. পাচিত্তিয ২.২৩৮-২৩৯) পন ‘‘সত্তুমোদকোতি সত্তুং তেমেত্ৱা কতো অপক্কো, সত্তুং পন পিসিত্ৱা পিট্ঠং কত্ৱা তেমেত্ৱা পূৱং কত্ৱা পচন্তি, তং ন পৱাৰেতী’’তি ৱুত্তং.

পঞ্চন্নং ভোজনানং অঞ্ঞতৰৱসেন ৱিপ্পকতভোজনভাৱস্স উপচ্ছিন্নত্তা ‘‘মুখে সাসপমত্তম্পি…পে… ন পৱাৰেতী’’তি ৱুত্তং. ‘‘অকপ্পিযমংসং পটিক্খিপতি, ন পৱাৰেতী’’তি ৱচনতো সচে সঙ্ঘিকং লাভং অত্তনো অপাপুণন্তং জানিত্ৱা ৱা অজানিত্ৱা ৱা পটিক্খিপতি, ন পৱাৰেতি পটিক্খিপিতব্বস্সেৱ পটিক্খিত্তত্তা, অলজ্জিসন্তকং পটিক্খিপন্তোপি ন পৱাৰেতি. অৱত্থুতাযাতি অনতিৰিত্তাপত্তিসাধিকায পৱাৰণায অৱত্থুভাৱতো. এতেন পটিক্খিপিতব্বস্সেৱ পটিক্খিত্তভাৱং দীপেতি. যঞ্হি পটিক্খিপিতব্বং হোতি, তস্স পটিক্খেপো আপত্তিযা অঙ্গং ন হোতীতি তং পৱাৰণায অৱত্থূতি ৱুচ্চতি.

১১৮. আসন্নতৰং অঙ্গন্তি হত্থপাসতো বহি ঠত্ৱা ওনমিত্ৱা দেন্তস্স সীসং আসন্নতৰং হোতি, তস্স ওৰিমন্তেন পৰিচ্ছিন্দিতব্বং.

উপনামেতীতি ইমিনা কাযাভিহাৰং দস্সেতি. অপনামেত্ৱাতি অভিমুখং হৰিত্ৱা. ইদং ভত্তং গণ্হাতি ৱদতীতি কিঞ্চি অপনামেত্ৱা ৱদতি. কেৱলং ৱাচাভিহাৰস্স অনধিপ্পেতত্তা গণ্হথাতি গহেতুং আৰদ্ধং. হত্থপাসতো বহি ঠিতস্স সতিপি দাতুকামতাভিহাৰে পটিক্খিপন্তস্স দূৰভাৱেনেৱ পৱাৰণায অভাৱতো থেৰস্সপি দূৰভাৱমত্তং গহেত্ৱা পৱাৰণায অভাৱং দস্সেন্তো ‘‘থেৰস্স দূৰভাৱতো’’তিআদিমাহ, ন পন থেৰস্স অভিহাৰসম্ভৱতো. সচেপি গহেত্ৱা গতো হত্থপাসে ঠিতো হোতি, কিঞ্চি পন অৱত্ৱা আধাৰট্ঠানে ঠিতত্তা অভিহাৰো নাম ন হোতীতি ‘‘দূতস্স চ অনভিহৰণতো’’তি ৱুত্তং. ‘‘গহেত্ৱা আগতেন ‘ভত্তং গণ্হথা’তি ৱুত্তে অভিহাৰো নাম হোতীতি ‘সচে পন গহেত্ৱা আগতো ভিক্খু…পে… পৱাৰণা হোতী’তি ৱুত্ত’’ন্তি তীসুপি গণ্ঠিপদেসু ৱুত্তং. কেচি পন ‘‘পত্তং কিঞ্চিপি উপনামেত্ৱা ‘ইমং ভত্তং গণ্হথা’তি ৱুত্তন্তি গহেতব্ব’’ন্তি ৱদন্তি, তং যুত্তং ৱিয দিস্সতি ৱাচাভিহাৰস্স ইধ অনধিপ্পেতত্তা.

পৰিৱেসনাযাতি ভত্তগ্গে. অভিহটাৱ হোতীতি পৰিৱেসকেনেৱ অভিহটা হোতি. ততো দাতুকামতায গণ্হন্তং পটিক্খিপন্তস্স পৱাৰণা হোতীতি এত্থ অগ্গণ্হন্তম্পি পটিক্খিপতো পৱাৰণা হোতিযেৱ. কস্মা? দাতুকামতায অভিহটত্তা, ‘‘তস্মা সা অভিহটাৱ হোতী’’তি হি ৱুত্তং. তেনেৱ তীসুপি গণ্ঠিপদেসু ‘‘দাতুকামাভিহাৰে সতি কেৱলং ‘দস্সামী’তি গহণমেৱ অভিহাৰো ন হোতি, ‘দস্সামী’তি গণ্হন্তেপি অগণ্হন্তেপি দাতুকামতাভিহাৰোৱ অভিহাৰো হোতি, তস্মা গহণসমযে ৱা অগ্গহণসমযে ৱা তং পটিক্খিপতো পৱাৰণা হোতী’’তি ৱুত্তং. ইদানি তস্স অসতি দাতুকামতাভিহাৰে গহণসমযেপি পটিক্খিপতো পৱাৰণা ন হোতীতি দস্সেতুং ‘‘সচে পনা’’তিআদি ৱুত্তং. কটচ্ছুনা অনুক্খিত্তম্পি পুব্বে এৱ অভিহটত্তা পৱাৰণা হোতীতি ‘‘অভিহটাৱ হোতী’’তি ৱুত্তং. উদ্ধটমত্তেতি ভাজনতো ৱিযোজিতমত্তে. দ্ৱিন্নং সমভাৰেপীতি পৰিৱেসকস্স চ অঞ্ঞস্স চ ভত্তপচ্ছিভাৰগ্গহণে সম্ভূতেপীতি অত্থো.

১১৯. ৰসং গণ্হথাতি এত্থ কেৱলং মংসৰসস্স অপৱাৰণাজনকস্স নামেন ৱুত্তত্তা পটিক্খিপতো পৱাৰণা ন হোতি. মচ্ছৰসন্তিআদীসু মচ্ছো চ ৰসঞ্চাতি অত্থসম্ভৱতো, ৱত্থুনোপি তাদিসত্তা পৱাৰণা হোতি. ‘‘ইদং গণ্হথা’’তিপি অৱত্ৱা তুণ্হীভূতেন অভিহটং পটিক্খিপতোপি হোতি এৱ.

কৰম্বকোতি মিস্সকাধিৱচনমেতং. যঞ্হি বহূহি মিস্সেত্ৱা কৰোন্তি, সো ‘‘কৰম্বকো’’তি ৱুচ্চতি, সো সচেপি মংসেন মিস্সেত্ৱা কতো হোতি, ‘‘কৰম্বকং গণ্হথা’’তি অপৱাৰণাৰহস্স নামেন ৱুত্তত্তা পটিক্খিপতো পৱাৰণা ন হোতি. ‘‘মংসকৰম্বকং গণ্হথা’’তি ৱুত্তে পন ‘‘মংসমিস্সকং গণ্হথা’’তি ৱুত্তং হোতি, তস্মা পৱাৰণাৱ হোতি.

১২০. ‘‘উদ্দিস্সকত’’ন্তি মঞ্ঞমানোতি এত্থ ‘‘ৱত্থুনো কপ্পিযত্তা অকপ্পিযসঞ্ঞায পটিক্খেপতোপি অচিত্তকত্তা ইমস্স সিক্খাপদস্স পৱাৰণা হোতী’’তি ৱদন্তি. ‘‘হেট্ঠা অযাগুকে নিমন্তনে উদককঞ্জিকখীৰাদীহি সদ্ধিং মদ্দিতং ভত্তমেৱ সন্ধায ‘যাগুং গণ্হথা’তি ৱুত্তত্তা পৱাৰণা হোতি, ‘ভত্তমিস্সকং যাগুং আহৰিত্ৱা’তি এত্থ পন ৱিসুং যাগুযা ৱিজ্জমানত্তা পৱাৰণা ন হোতী’’তি ৱদন্তি. অযমেত্থ অধিপ্পাযোতি ‘‘যেনাপুচ্ছিতো’’তিআদিনা ৱুত্তমেৱত্থং সন্ধায ৱদতি. কাৰণং পনেত্থ দুদ্দসন্তি এত্থ একে তাৱ ৱদন্তি ‘‘যস্মা যাগুমিস্সকং নাম ভত্তমেৱ ন হোতি, খীৰাদিকম্পি হোতিযেৱ, তস্মা কৰম্বকে ৱিয পৱাৰণায ন ভৱিতব্বং, এৱঞ্চ সতি ‘যাগু বহুতৰা ৱা হোতি সমসমা ৱা, ন পৱাৰেতি, যাগু মন্দা, ভত্তং বহুতৰং, পৱাৰেতী’তি এত্থ কাৰণং দুদ্দস’’ন্তি. কেচি পন ৱদন্তি ‘‘যাগুমিস্সকং নাম ভত্তং, তস্মা তং পটিক্খিপতো পৱাৰণায এৱ ভৱিতব্বং, এৱঞ্চ সতি ‘ইধ পৱাৰণা হোতি, ন হোতী’তি এত্থ কাৰণং দুদ্দস’’ন্তি.

যথা চেত্থ কাৰণং দুদ্দসং, এৱং পৰতো ‘‘মিস্সকং গণ্হথা’’তি এত্থাপি কাৰণং দুদ্দসমেৱাতি ৱেদিতব্বং. ন হি পৱাৰণপ্পহোনকস্স অপ্পবহুভাৱো পৱাৰণায ভাৱাভাৱনিমিত্তং, কিঞ্চৰহি পৱাৰণাজনকস্স নাম গহণমেৱেত্থ পমাণং, তস্মা ‘‘ইদঞ্চ কৰম্বকেন ন সমানেতব্ব’’ন্তিআদিনা যম্পি কাৰণং ৱুত্তং, তম্পি পুব্বে ৱুত্তেন সংসন্দিযমানং ন সমেতি. যদি হি মিস্সকন্তি ভত্তমিস্সকেযেৱ ৰুড়্হং সিযা, এৱং সতি যথা ‘‘ভত্তমিস্সকং গণ্হথা’’তি ৱুত্তে ভত্তং বহুতৰং ৱা সমং ৱা অপ্পতৰং ৱা হোতি, পৱাৰেতিযেৱ, এৱং ‘‘মিস্সকং গণ্হথা’’তি ৱুত্তেপি অপ্পতৰেপি ভত্তে পৱাৰণায ভৱিতব্বং ‘‘মিস্সক’’ন্তি ভত্তমিস্সকেযেৱ ৰুড়্হত্তা. তথা হি ‘‘মিস্সকন্তি ভত্তমিস্সকেযেৱ ৰুড়্হৱোহাৰত্তা ইদং পন ভত্তমিস্সকমেৱাতি ৱুত্ত’’ন্তি তীসুপি গণ্ঠিপদেসু ৱুত্তং. অথ মিস্সকন্তি ভত্তমিস্সকে ৰুড়্হং ন হোতি, মিস্সকভত্তং পন সন্ধায ‘‘মিস্সকং গণ্হথা’’তি ৱুত্তন্তি. এৱম্পি যথা অযাগুকে নিমন্তনে খীৰাদীহি সম্মদ্দিতং ভত্তমেৱ সন্ধায ‘‘যাগুং গণ্হথা’’তি ৱুত্তে পৱাৰণা হোতি, এৱমিধাপি মিস্সকভত্তমেৱ সন্ধায ‘‘মিস্সকং গণ্হথা’’তি ৱুত্তে ভত্তং অপ্পং ৱা হোতু, বহু ৱা, পৱাৰণা এৱ সিযা, তস্মা মিস্সকন্তি ভত্তমিস্সকে ৰুড়্হং ৱা হোতু, মিস্সকং সন্ধায ভাসিতং ৱা, উভযথাপি পুব্বেনাপৰং ন সমেতীতি কিমেত্থ কাৰণচিন্তায. ঈদিসেসু পন ঠানেসু অট্ঠকথাপমাণেনেৱ গন্তব্বন্তি অযং অম্হাকং খন্তি.

ৱিমতিৱিনোদনিযং (ৱি. ৱি. টী. পাচিত্তিয ২.২৩৮-২৩৯) পন ‘‘উদ্দিস্সকতন্তি মঞ্ঞমানোতি এত্থ ৱত্থুনো কপ্পিযত্তা ‘পৱাৰিতোৱ হোতী’তি ৱুত্তং. তঞ্চে উদ্দিস্সকতমেৱ হোতি, পটিক্খেপো নত্থি. অযমেত্থাধিপ্পাযোতি ‘যেনাপুচ্ছিতো’তিআদিনা ৱুত্তমেৱত্থং সন্ধায ৱদতি. কাৰণং পনেত্থ দুদ্দসন্তি ভত্তস্স বহুতৰভাৱে পৱাৰণায সম্ভৱকাৰণং দুদ্দসং, অঞ্ঞথা কৰম্বকেপি মচ্ছাদিবহুভাৱে পৱাৰণা ভৱেয্যাতি অধিপ্পাযো. যথা চেত্থ কাৰণং দুদ্দসং, এৱং পৰতো ‘মিস্সকং গণ্হথা’তি এত্থাপি কাৰণং দুদ্দসমেৱাতি দট্ঠব্বং. যঞ্চ ‘ইদং পন ভত্তমিস্সকমেৱা’তিআদি কাৰণং ৱুত্তং, তম্পি ‘অপ্পতৰং ন পৱাৰেতী’তি ৱচনেন ন সমেতী’’তি এত্তকমেৱ ৱুত্তং.

‘‘ৱিসুং কত্ৱা দেতীতি ভত্তস্স উপৰি ঠিতং ৰসাদিং ৱিসুং গহেত্ৱা দেতী’’তি তীসুপি গণ্ঠিপদেসু ৱুত্তং. কেহিচি পন ‘‘যথা ভত্তসিত্থং ন পততি, তথা গাড়্হং হত্থেন পীড়েত্ৱা পৰিস্সাৱেত্ৱা দেতী’’তি ৱুত্তং. তত্থাপি কাৰণং ন দিস্সতি. যথা হি ভত্তমিস্সকং যাগুং আহৰিত্ৱা ‘‘যাগুং গণ্হথা’’তি ৱত্ৱা যাগুমিস্সকং ভত্তম্পি দেন্তং পটিক্খিপতো পৱাৰণা ন হোতি, এৱমিধাপি বহুখীৰৰসাদীসু ভত্তেসু ‘‘খীৰং গণ্হথা’’তিআদীনি ৱত্ৱা দিন্নানি খীৰাদীনি ৱা দেতু খীৰাদিমিস্সকং ভত্তং ৱা, উভযথাপি পৱাৰণায ন ভৱিতব্বং, তস্মা ‘‘ৱিসুং কত্ৱা দেতী’’তি তেনাকাৰেন দেন্তং সন্ধায ৱুত্তং, ন পন ভত্তমিস্সকং কত্ৱা দীযমানং পটিক্খিপতো পৱাৰণা হোতীতি দস্সনত্থন্তি গহেতব্বং. যদি পন ভত্তমিস্সকং কত্ৱা দীযমানে পৱাৰণা হোতীতি অধিপ্পাযেন অট্ঠকথাযং ‘‘ৱিসুং কত্ৱা দেতী’’তি ৱুত্তং, এৱং সতি অট্ঠকথাযেৱেত্থ পমাণন্তি গহেতব্বং, ন পন কাৰণন্তৰং গৱেসিতব্বং. ৱিমতিৱিনোদনিযং (ৱি. ৱি. টী. পাচিত্তিয ২.২৩৮-২৩৯) পন ‘‘ৱিসুং কত্ৱা দেতীতি ‘ৰসং গণ্হথা’তিআদিনা ৱাচায ৱিসুং কত্ৱা দেতীতি অত্থো গহেতব্বো, ন পন কাযেন ৰসাদিং ৱিযোজেত্ৱাতি তথা অৱিযোজিতেপি পটিক্খিপতো পৱাৰণায অসম্ভৱতো অপৱাৰণাপহোনকস্স নামেন ৱুত্তত্তা ভত্তমিস্সকযাগুং আহৰিত্ৱা ‘যাগুং গণ্হথা’তি ৱুত্তট্ঠানাদীসু ৱিয, অঞ্ঞথা এত্থ যথা পুব্বাপৰং ন ৱিৰুজ্ঝতি, তথা অধিপ্পাযো গহেতব্বো’’তি ৱুত্তং.

নাৱা ৱা সেতু ৱাতিআদিম্হি নাৱাদিঅভিৰুহনাদিক্খণে কিঞ্চি ঠত্ৱাপি অভিৰুহনাদিকাতব্বত্তেপি গমনতপ্পৰতায ঠানং নাম ন হোতি, জনসম্মদ্দেন পন অনোকাসাদিভাৱেন ঠাতুং ন ৱট্টতি. অচালেত্ৱাতি ৱুত্তট্ঠানতো অঞ্ঞস্মিং পীঠপ্পদেসে ৱা উদ্ধং ৱা অপেল্লেত্ৱা, তস্মিং এৱ পন ঠানে পৰিৱত্তেতুং লভতি. তেনাহ ‘‘যেন পস্সেনা’’তিআদি. সচে উক্কুটিকং নিসিন্নো পাদে অমুঞ্চিত্ৱাপি ভূমিযং নিসীদতি, ইৰিযাপথং ৱিকোপেন্তো নাম হোতীতি উক্কুটিকাসনং অৱিকোপেত্ৱা সুখেন নিসীদিতুং ‘‘তস্স পন হেট্ঠা…পে… নিসীদনকং দাতব্ব’’ন্তি ৱুত্তং. ‘‘আসনং অচালেত্ৱাতি পীঠে ফুট্ঠোকাসতো আনিসদমংসং অমোচেত্ৱা অনুট্ঠহিত্ৱাতি ৱুত্তং হোতি. অদিন্নাদানে ৱিয ঠানাচাৱনং ন গহেতব্ব’’ন্তি তীসুপি গণ্ঠিপদেসু ৱুত্তং.

১২১. অকপ্পিযকতন্তি এত্থ অকপ্পিযকতস্সেৱ অনতিৰিত্তভাৱতো কপ্পিযং অকাৰাপেত্ৱা তস্মিং পত্তে পক্খিত্তং মূলফলাদিযেৱ অতিৰিত্তং ন হোতি, অকপ্পিযভোজনং ৱা কুলদূসনাদিনা উপ্পন্নং. সেসং পন পত্তপৰিযাপন্নং অতিৰিত্তমেৱ হোতি, পৰিভুঞ্জিতুং ৱট্টতি, তং পন মূলফলাদিং পৰিভুঞ্জিতুকামেন ততো নীহৰিত্ৱা কপ্পিযং কাৰাপেত্ৱা অঞ্ঞস্মিং ভাজনে ঠপেত্ৱা অতিৰিত্তং কাৰাপেত্ৱা পৰিভুঞ্জিতব্বং.

১২২. সো পুন কাতুং ন লভতীতি তস্মিংযেৱ ভাজনে কৰিযমানং পঠমং কতেন সদ্ধিং কতং হোতীতি পুন সোযেৱ কাতুং ন লভতি, অঞ্ঞো লভতি. অঞ্ঞস্মিং পন ভাজনে তেন ৱা অঞ্ঞেন ৱা কাতুং ৱট্টতি. তেনাহ ‘‘যেন অকতং, তেন কাতব্বং, যঞ্চ অকতং, তং কাতব্ব’’ন্তি. তেনাপীতি এত্থ পি-সদ্দো ন কেৱলং অঞ্ঞেনেৱাতি ইমমত্থং দীপেতি. এৱং কতন্তি অঞ্ঞস্মিং ভাজনে কতং.

পেসেত্ৱাতি অনুপসম্পন্নস্স হত্থে পেসেত্ৱা. ইমস্স ৱিনযকম্মভাৱতো ‘‘অনুপসম্পন্নস্স হত্থে ঠিতং ন কাতব্ব’’ন্তি ৱুত্তং.

সচে পন আমিসসংসট্ঠানীতি এত্থ সচে মুখগতেনাপি অনতিৰিত্তেন আমিসেন সংসট্ঠানি হোন্তি, পাচিত্তিযমেৱাতি ৱেদিতব্বং, তস্মা পৱাৰিতেন ভোজনং অতিৰিত্তং কাৰাপেত্ৱা ভুঞ্জন্তেনপি যথা অকতেন মিস্সং ন হোতি, এৱং মুখঞ্চ হত্থঞ্চ সুদ্ধং কত্ৱা ভুঞ্জিতব্বং. কিঞ্চাপি অপৱাৰিতস্স পুৰেভত্তং যামকালিকাদীনি আহাৰত্থায পৰিভুঞ্জতোপি অনাপত্তি, পৱাৰিতস্স পন পৱাৰণমূলকং দুক্কটং হোতিযেৱাতি ‘‘যামকালিকং…পে… অজ্ঝোহাৰে অজ্ঝোহাৰে আপত্তি দুক্কটস্সা’’তি পাড়িযং (পাচি. ২৪০) ৱুত্তং.

ইতি ৱিনযসঙ্গহসংৱণ্ণনাভূতে ৱিনযালঙ্কাৰে

পটিক্খেপপৱাৰণাৱিনিচ্ছযকথালঙ্কাৰো নাম

একৱীসতিমো পৰিচ্ছেদো.