১৯. কপ্পিযভূমিৱিনিচ্ছযকথা

১০১. এৱং চতুকালিকৱিনিচ্ছযং কথেত্ৱা ইদানি কপ্পিযকুটিৱিনিচ্ছযং কথেতুং ‘‘কপ্পিযা চতুভূমিযো’’তিআদিমাহ. তত্থ কপ্পন্তীতি কপ্পিযা, কপ্প সামত্থিযেতি ধাতু. ভৱন্তি এতাসু অন্তোৱুত্থঅন্তোপক্কানীতি ভূমিযো, চতস্সো ভূমিযো চতুভূমিযো, চতস্সো কপ্পিযকুটিযোতি অত্থো. কতমা তাতি আহ ‘‘উস্সাৱনন্তিকা…পে… ৱেদিতব্বা’’তি. কথং ৱিঞ্ঞাযতিচ্চাহ ‘‘অনুজানামি…পে… ৱচনতো’’তি. ইদং ভেসজ্জক্খন্ধকপাড়িং (মহাৱ. ২৯৫) সন্ধাযাহ. তত্থ উদ্ধং সাৱনা উস্সাৱনা, উস্সাৱনা অন্তো যস্সা কপ্পিযভূমিযাতি উস্সাৱনন্তিকা. গাৱো নিসীদন্তি এত্থাতি গোনিসাদিকা, গো-সদ্দূপপদ নি-পুব্বসদ ৱিসৰণগত্যাৱসানেসূতি ধাতু. গহপতীহি দিন্নাতি গহপতি, উত্তৰপদলোপততিযাতপ্পুৰিসোযং. কম্মৱাচায সম্মন্নিতব্বাতি সম্মুতীতি এৱমিমাসং ৱিগ্গহো কাতব্বো. তত্থাতি কপ্পিযকুটিৱিনিচ্ছযে. তং পন অৱত্ৱাপীতি অন্ধকট্ঠকথাযং ৱুত্তনযং অৱত্ৱাপি. পি-সদ্দেন তথাৱচনম্পি অনুজানাতি. অট্ঠকথাসু ৱুত্তনযেন ৱুত্তেতি সেসঅট্ঠকথাসু ৱুত্তনযেন ‘‘কপ্পিযকুটিং কৰোমা’’তি ৱা ‘‘কপ্পিযকুটী’’তি ৱা ৱুত্তে. সাধাৰণলক্খণন্তি সব্বঅট্ঠকথানং সাধাৰণং উস্সাৱনন্তিককুটিকৰণলক্খণং. চযন্তি অধিট্ঠানং উচ্চৱত্থুং. যতো পট্ঠাযাতি যতো ইট্ঠকতো সিলতো মত্তিকাপিণ্ডতো ৱা পট্ঠায. পঠমিট্ঠকাদীনং হেট্ঠা ন ৱট্টন্তীতি পঠমিট্ঠকাদীনং হেট্ঠাভূমিযং পতিট্ঠাপিযমানা ইট্ঠকাদযো ভূমিগতিকত্তা ‘‘কপ্পিযকুটিং কৰোমা’’তি ৱত্ৱা পতিট্ঠাপেতুং ন ৱট্টন্তি. যদি এৱং ভূমিযং নিখণিত্ৱা ঠপিযমানা থম্ভা কস্মা তথা ৱত্ৱা পতিট্ঠাপেতুং ৱট্টন্তীতি আহ ‘‘থম্ভা পন…পে… ৱট্টন্তী’’তি.

সঙ্ঘসন্তকমেৱাতি ৱাসত্থায কতং সঙ্ঘিকসেনাসনং সন্ধায ৱদতি. ভিক্খুসন্তকন্তি ৱাসত্থায এৱ কতং ভিক্খুস্স পুগ্গলিকসেনাসনং.

১০২. মুখসন্নিধীতি ইমিনা অন্তোৱুত্থদুক্কটমেৱ দীপেতি.

ৱিমতিৱিনোদনিযং (ৱি. ৱি. টী. মহাৱগ্গ ২.২৯৫) পন এৱং ৱুত্তং – তং পন অৱত্ৱাপীতি পি-সদ্দেন তথাৱচনম্পি অনুজানাতি. অট্ঠকথাসূতি অন্ধকট্ঠকথাৱিৰহিতাসু সেসট্ঠকথাসু. সাধাৰণলক্খণন্তি অন্ধকট্ঠকথায সহ সব্বট্ঠকথানং সমানং. চযন্তি অধিট্ঠানং উচ্চৱত্থুং. যতো পট্ঠাযাতি যতো ইট্ঠকাদিতো পট্ঠায চযং আদিং কত্ৱা ভিত্তিং উট্ঠাপেতুকামাতি অত্থো. ‘‘থম্ভা পন উপৰি উগ্গচ্ছন্তি, তস্মা ৱট্টন্তী’’তি এতেন ইট্ঠকপাসাণা হেট্ঠা পতিট্ঠাপিযমানাপি যদি চযতো, ভূমিতো ৱা একঙ্গুলমত্তম্পি উগ্গতা তিট্ঠন্তি, ৱট্টন্তীতি সিদ্ধং হোতি.

আৰামোতি উপচাৰসীমাপৰিচ্ছিন্নো সকলো ৱিহাৰো. সেনাসনানীতি ৱিহাৰস্স অন্তো তিণকুটিআদিকানি সঙ্ঘস্স নিৱাসগেহানি. ৱিহাৰগোনিসাদিকা নামাতি সেনাসনগোনিসাদিকা নাম. সেনাসনানি হি সযং পৰিক্খিত্তানিপি আৰামপৰিক্খেপাভাৱেন ‘‘গোনিসাদিকা’’তি ৱুত্তা. ‘‘উপড্ঢপৰিক্খিত্তোপী’’তি ইমিনা ততো ঊনপৰিক্খিত্তো যেভুয্যেন অপৰিক্খিত্তো নাম, তস্মা অপৰিক্খিত্তসঙ্খমেৱ গচ্ছতীতি দস্সেতি. এত্থাতি উপড্ঢাদিপৰিক্খিত্তে. কপ্পিযকুটি লদ্ধুং ৱট্টতীতি গোনিসাদিকায অভাৱেন সেসকপ্পিযকুটীসু তীসু যা কাচি কপ্পিযকুটি কাতব্বাতি অত্থো.

তেসং গেহানীতি এত্থ ভিক্খূনং ৱাসত্থায কতম্পি যাৱ ন দেন্তি, তাৱ তেসং সন্তকংযেৱ ভৱিস্সতীতি দট্ঠব্বং. ৱিহাৰং ঠপেত্ৱাতি উপসম্পন্নানং ৱাসত্থায কতং গেহং ঠপেত্ৱাতি অত্থো. গেহন্তি নিৱাসগেহং. তদঞ্ঞং পন উপোসথাগাৰাদি সব্বং অনিৱাসগেহং চতুকপ্পিযভূমিৱিমুত্তা পঞ্চমী কপ্পিযভূমি. সঙ্ঘসন্তকেপি হি এতাদিসে গেহে সুট্ঠু পৰিক্খিত্তাৰামট্ঠেপি অব্ভোকাসে ৱিয অন্তোৱুত্থাদিদোসো নত্থি. যেন কেনচি ছন্নে পৰিচ্ছন্নে চ সহসেয্যপ্পহোনকে ভিক্খুস্স, সঙ্ঘস্স ৱা নিৱাসগেহে অন্তোৱুত্থাদিদোসো, ন অঞ্ঞত্থ. তেনাহ ‘‘যং পনা’’তিআদি. তত্থ ‘‘সঙ্ঘিকং ৱা পুগ্গলিকং ৱা’’তি ইদং কিঞ্চাপি ভিক্খুভিক্খুনীনং সামঞ্ঞতো ৱুত্তং ভিক্খূনং পন সঙ্ঘিকং পুগ্গলিকঞ্চ ভিক্খুনীনং, তাসং সঙ্ঘিকং পুগ্গলিকঞ্চ ভিক্খূনং গিহিসন্তকট্ঠানে তিট্ঠতীতি ৱেদিতব্বং.

মুখসন্নিধীতি অন্তোসন্নিহিতদোসো হি মুখপ্পৱেসননিমিত্তং আপত্তিং কৰোতি, নাঞ্ঞথা, তস্মা ‘‘মুখসন্নিধী’’তি (ৱি. ৱি. টী. মহাৱগ্গ ২.২৯৫) ৱুত্তোতি.

তত্থ তত্থ খণ্ডা হোন্তীতি উপড্ঢতো অধিকং খণ্ডা হোন্তি. সব্বস্মিং ছদনে ৱিনট্ঠেতি তিণপণ্ণাদিৱস্সপৰিত্তাযকে ছদনে ৱিনট্ঠে. গোপানসীনং পন উপৰি ৱল্লীহি বদ্ধদণ্ডেসু ঠিতেসুপি জহিতৱত্থুকা হোন্তি এৱ. পক্খপাসকমণ্ডলন্তি একস্মিং পস্সে তিণ্ণং গোপানসীনং উপৰি ঠিততিণপণ্ণাদিছদনং ৱুচ্চতি.

১০৩. ‘‘অনুপসম্পন্নস্স দত্ৱা তস্সা’’তিআদিনা অকপ্পিযকুটিযং ৱুত্থম্পি অনুপসম্পন্নস্স দিন্নে কপ্পিযং হোতি, সাপেক্খদানঞ্চেত্থ ৱট্টতি, পটিগ্গহণং ৱিয ন হোতীতি দস্সেতি. অন্তোপক্কসামংপক্কেসু পন ‘‘ন, ভিক্খৱে, অন্তোৱুত্থং অন্তোপক্কং সামংপক্কং পৰিভুঞ্জিতব্বং, যো পৰিভুঞ্জেয্য, আপত্তি দুক্কটস্স. অন্তো চে, ভিক্খৱে, ৱুত্থং অন্তোপক্কং সামংপক্কং, তঞ্চে পৰিভুঞ্জেয্য, আপত্তি তিণ্ণং দুক্কটানং. অন্তো চে, ভিক্খৱে, ৱুত্থং অন্তোপক্কং অঞ্ঞেহি পক্কং, তঞ্চে পৰিভুঞ্জেয্য, আপত্তি দ্ৱিন্নং দুক্কটানং. অন্তো চে, ভিক্খৱে, ৱুত্থং বহিপক্কং সামংপক্কং, তঞ্চে পৰিভুঞ্জেয্য, আপত্তি দ্ৱিন্নং দুক্কটানং. বহি চে, ভিক্খৱে, ৱুত্থং অন্তোপক্কং সামংপক্কং, তঞ্চে পৰিভুঞ্জেয্য, আপত্তি দ্ৱিন্নং দুক্কটানং. অন্তো চে, ভিক্খৱে, ৱুত্থং বহিপক্কং অঞ্ঞেহি পক্কং, তঞ্চে পৰিভুঞ্জেয্য, আপত্তি দুক্কটস্স. বহি চে, ভিক্খৱে, ৱুত্থং অন্তোপক্কং অঞ্ঞেহি পক্কং, তঞ্চে পৰিভুঞ্জেয্য, আপত্তি দুক্কটস্স. বহি চে, ভিক্খৱে, ৱুত্থং বহিপক্কং সামংপক্কং, তঞ্চে পৰিভুঞ্জেয্য, আপত্তি দুক্কটস্স. বহি চে, ভিক্খৱে, ৱুত্থং বহিপক্কং অঞ্ঞেহি পক্কং, তঞ্চে পৰিভুঞ্জেয্য, অনাপত্তী’’তি (মহাৱ. ২৭৪) ৱচনতো একং তিৰাপত্তিকং, তীণি দুৰাপত্তিকানি, তীণি একাপত্তিকানি, একং অনাপত্তিকন্তি অট্ঠ হোন্তি. তত্থ অন্তোৱুত্থন্তি অকপ্পিযকুটিযং ৱুত্থং. অন্তোপক্কেপি এসেৱ নযো. সামংপক্কন্তি যং কিঞ্চি আমিসং ভিক্খুস্স পচিতুং ন ৱট্টতি. তত্থ যং ৱত্তব্বং, তং অট্ঠকথাযং ৱুত্তমেৱ.

ইতি ৱিনযসঙ্গহসংৱণ্ণনাভূতে ৱিনযালঙ্কাৰে

কপ্পিযভূমিৱিনিচ্ছযকথালঙ্কাৰো নাম

একূনৱীসতিমো পৰিচ্ছেদো.