৮. অৰিট্ঠসিক্খাপদৱণ্ণনা

৪১৭. অট্ঠমে অন্তৰাযন্তি অন্তৰা ৱেমজ্ঝে এতি আগচ্ছতীতি অন্তৰাযো, দিট্ঠধম্মিকাদিঅনত্থো. আনন্তৰিযধম্মাতি অনন্তৰে ভৱে ফলনিব্বত্তনে নিযুত্তা চেতনাদিধম্মাতি অত্থো. ‘‘ন সগ্গস্সা’’তি ইদং ভিক্খুনিদূসনকম্মস্স আনন্তৰিযত্তাভাৱতো ৱুত্তং. অৰিযসাৱিকাসু, পন কল্যাণপুথুজ্জনভূতায চ বলক্কাৰেন দূসেন্তস্স আনন্তৰিযসঅসমেৱ. মোক্খন্তৰাযিকতা পন লোলাযপি পকতত্তভিক্খুনিযা দূসকস্স তস্মিং অত্তভাৱে মগ্গুপ্পত্তিযা অভাৱতো ৱুত্তা.

তস্মিং অত্তভাৱে অনিৱত্তনকা অহেতুকঅকিৰিযনত্থিকদিট্ঠিযোৱ নিযতমিচ্ছাদিট্ঠিধম্মা. পণ্ডকাদীনং গহণং নিদস্সনমত্তং. সব্বাপি দুহেতুকাহেতুকপটিসন্ধিযো ৱিপাকন্তৰাযিকাৱ দুহেতুকানম্পি মগ্গানুপ্পত্তিতো.

অযন্তি অৰিট্ঠো. ৰসেন ৰসন্তি অনৱজ্জেন পচ্চযপৰিভুঞ্জনৰসেন পঞ্চকামগুণপঅভোগৰসং সমানেত্ৱা. উপনেন্তো ৱিযাতি ঘটেন্তো ৱিয, সো এৱ ৱা পাঠো.

অট্ঠিকঙ্কলূপমাতি এত্থ অট্ঠি এৱ নিম্মংসতায কঙ্কলন্তি চ ৱুচ্চতি. পলিভঞ্জনট্ঠেনাতি অৱস্সং পতনট্ঠেন. অধিকুট্টনট্ঠেনাতি অতি ৱিয কুট্টনট্ঠেন. পাড়িযং ‘‘তথাহং ভগৱতা…পে… নালং অন্তৰাযাযা’’তি ইদং ৱত্থুঅনুৰূপতো ৱুত্তং. এৱং পন অগ্গহেত্ৱা অঞ্ঞেনপি আকাৰেন যং কিঞ্চি ভগৱতা ৱুত্তং ৱিপৰীততো গহেত্ৱা পৰেহি ৱুত্তেপি অমুঞ্চিত্ৱা ৱোহৰন্তস্সাপি ৱুত্তনযানুসাৰেন তদনুগুণং সমনুভাসনকম্মৱাচং যোজেত্ৱা আপত্তিযা আৰোপেতুং, আপত্তিযা অদস্সনাদীসু তীসু যং কিঞ্চি অভিৰুচিতং নিমিত্তং কত্ৱা উক্খেপনীযকম্মং কাতুঞ্চ লব্ভতি. সমনুভাসনং অকত্ৱাপি ‘‘মাযস্মা এৱং অৱচা’’তি ভিক্খূহি ৱুত্তমত্তে লদ্ধিযা অপ্পটিনিস্সজ্জনপচ্চযায দুক্কটাপত্তিযাপি উক্খেপনীযকম্মং কাতুম্পি ৱট্টতেৱাতি দট্ঠব্বং. ধম্মকম্মতা, সমনুভাসনায অপ্পটিনিস্সজ্জনন্তি দ্ৱে অঙ্গানি.

অৰিট্ঠসিক্খাপদৱণ্ণনা নিট্ঠিতা.