৪. দুট্ঠুল্লসিক্খাপদৱণ্ণনা

৩৯৯. চতুত্থে আপত্তিং আপজ্জতিযেৱাতি ধুৰনিক্খেপপক্খে ৱুত্তং. ৱত্থুপুগ্গলোতি আপন্নপুগ্গলো. ছাদেতুকামতায হি সতি এৱ অৱস্সং অঞ্ঞস্স আৰোচনং ৱুত্তং, ৱত্থুপুগ্গলস্স চ আৰোচনা নাম ন হোতীতি পটিচ্ছাদনমেৱাতি অধিপ্পাযো. কোটি ছিন্না হোতীতি ছাদেস্সামীতি ধুৰনিক্খেপে সতিপি পুগ্গলপৰম্পৰায গচ্ছন্তী আপত্তিকোটি ছিজ্জতি.

৪০০. ‘‘অনুপসম্পন্নস্স সুক্কৱিস্সট্ঠি চ কাযসংসগ্গো চাতি অযং দুট্ঠুল্লঅজ্ঝাচাৰো নামা’’তি ইদং দুট্ঠুল্লাৰোচনসিক্খাপদট্ঠকথাযং ‘‘অনুপসম্পন্নস্স…পে… আদিতো পঞ্চ সিক্খাপদানি দুট্ঠুল্লো নাম অজ্ঝাচাৰো, সেসানি অদুট্ঠুল্লো. সুক্কৱিস্সট্ঠিকাযসংসগ্গদুট্ঠুল্লঅত্তকামা পনস্স অজ্ঝাচাৰো নামা’’তি (পাচি. অট্ঠ. ৮২) ইমিনা ৱচনেন ৱিৰুজ্ঝতীতি ৱীমংসিতব্বং. পুগ্গলপেমেন ছাদযতো চেত্থ ‘‘অঞ্ঞে গৰহিস্সন্তী’’তি ভযৱসেন ছাদনক্খণে পটিঘোৱ উপ্পজ্জতীতি ‘‘দুক্খৱেদন’’ন্তি ৱুত্তন্তি দট্ঠব্বং. উপসম্পন্নস্স দুট্ঠুল্লাপত্তিজাননং, পটিচ্ছাদেতুকামতায ধুৰনিক্খেপোতি দ্ৱে অঙ্গানি.

দুট্ঠুল্লসিক্খাপদৱণ্ণনা নিট্ঠিতা.