৭. সত্তমনিস্সগ্গিযপাচিত্তিযসিক্খাপদৱণ্ণনা

৭৬৪. সত্তমে ‘‘সযং যাচিতকেনা’’তি কিঞ্চাপি অৱিসেসেন ৱুত্তং. তথাপি অঞ্ঞদত্থিকেন অত্তুদ্দেসিকেন সঞ্ঞাচিকেনাতি অত্থো ৱেদিতব্বো. অযমত্থো ‘‘ভিক্খুনিযো তেন চ পৰিক্খাৰেন সযম্পি যাচিত্ৱা ভেসজ্জং চেতাপেত্ৱা পৰিভুঞ্জিংসূ’’তি ইমিস্সা পাড়িযা অত্থেন সংসন্দিত্ৱা ৱেদিতব্বো. তস্সাযমত্থো – তেন পৰিক্খাৰেন ভেসজ্জং চেতাপেত্ৱা চ-সদ্দেন সঞ্ঞাচিকেন চ ভেসজ্জং চেতাপেত্ৱাতি ইমমত্থং দীপেন্তো ‘‘সযম্পি যাচিত্ৱা ভেসজ্জং চেতাপেত্ৱা’’তি আহ. অঞ্ঞথা ‘‘তেন পৰিক্খাৰেন ভেসজ্জং চেতাপেত্ৱা সযম্পি যাচিত্ৱা পৰিভুঞ্জিংসূ’’তি ইমিনা অনুক্কমেন পাড়ি ৱত্তব্বা সিযা.

পদভাজনে পন ‘‘সংযাচিকেনাতি সযং যাচিত্ৱা’’তি তস্সেৱ পদস্স অধিপ্পাযমত্তং ৱুত্তং. সা হি পদভাজনধম্মতা. ‘‘সঙ্ঘিকং লাভং পৰিণত’’ন্তিআদিপদানং ভাজনে পন সা পাকটা. অঞ্ঞথা সংযাচিকপদেন কো অঞ্ঞো অতিৰেকত্থো সঙ্গহিতো সিযা, সো ন দিস্সতীতি তদেৱ পদং নিপ্পযোজনং, ইদঞ্চ সিক্খাপদং পুৰিমেন নিন্নানাকৰণং সিযা. অত্তনো হি সন্তকং যথাকামং কৰণীযন্তি. এত্থ চ সঙ্ঘস্স যাচনায ৱসেন একতো হুত্ৱা যাচনায লদ্ধং সংযাচিকন্তি ৱেদিতব্বং. অঞ্ঞথা ইতো পৰেন সংযাচিক-সদ্দেন ইদং নিব্বিসেসং আপজ্জতীতি ‘‘পুগ্গলিকেন সংযাচিকেনা’’তি ইদঞ্চ সিক্খাপদং ৱিসুং ন ৱত্তব্বং সিযা ইধেৱ তেন আপজ্জিতব্বাপত্তিযা সঙ্গহিতত্তা, ন চ সঙ্গহিতা আপত্তিদ্ৱযভাৱতো. মিস্সেত্ৱা চেতাপিতত্তা হি একমেৱ আপত্তীতি চে? ন, সংযাচিকপদস্স নিপ্পযোজনভাৱপ্পসঙ্গতো, এৱং সঙ্ঘিকমহাজনিকপুগ্গলিকানি মিস্সিত্ৱা চেতাপনে একাপত্তিভাৱপ্পসঙ্গতো চ.

সত্তমনিস্সগ্গিযপাচিত্তিযসিক্খাপদৱণ্ণনা নিট্ঠিতা.