৮. নাৱাভিৰুহনসিক্খাপদৱণ্ণনা

১৮৯. নদিযা কুতো গামন্তৰন্তি চে? ‘‘যস্সা নদিযা’’তিআদিমাহ. গামন্তৰগণনাযাতি যস্মিং গামতিত্থে আৰুড়্হো, তং ঠপেত্ৱা অঞ্ঞগামগণনায. ‘‘মাতুগামোপি ইধ সঙ্গহং গচ্ছতী’’তি আচৰিযস্স তক্কো, তেনেৱ ‘‘উভযত্থ একতো উপসম্পন্নায দুক্কটং, সিক্খমানায সামণেৰিযা অনাপত্তী’’তি চ ন ৱুত্তং. এসেৱ নযো অঞ্ঞেসুপি এৱৰূপেসু.

১৯১. ‘‘লোকস্সাদমিত্তসন্থৱৱসেন কেড়িপুৰেক্খাৰা সংৱিদহিত্ৱা’’তি ৱুত্তত্তা অকুসলচিত্তং লোকৱজ্জন্তি ৱত্তব্বন্তি? ন ৱত্তব্বং, ‘‘কেড়িপুৰেক্খাৰা’’তি ৱচনং যেভুয্যতায ৱুত্তং. পোৰাণগণ্ঠিপদে চ ‘‘তীণি চিত্তানি তিস্সো ৱেদনা’’তি ৱুত্তং, সংৱিদহনকালে ৱা কেড়িপুৰেক্খাৰো ভিক্খু সংৱিদহতি, আপত্তি ভিক্খুনো গামন্তৰোক্কমনে, অদ্ধযোজনাতিক্কমে ৱা. কুসলচিত্তো ৱা হোতি পচ্চৱেক্খন্তো, চেতিযাদীনি ৱা পস্সন্তো, অব্যাকতচিত্তো ৱা হোতি কিলমথৱসেন নিদ্দাযন্তোতি তিচিত্তানি গহিতানীতি ৱেদিতব্বা.

নাৱাভিৰুহনসিক্খাপদৱণ্ণনা নিট্ঠিতা.