৭. বোধিপক্খিযৱগ্গৱণ্ণনা

৫৩১-৬৫০. সত্তানং ফলানং হেতুভূতানি ‘‘ইমেসং খো, ভিক্খৱে, পঞ্চন্নং ইন্দ্ৰিযানং ভাৱিতত্তা’’তিআদিনা ৱুত্তানি, পঞ্চিন্দ্ৰিযানিযেৱ ফলূপচাৰেন ‘‘সত্ত ফলানী’’তি ৱুত্তানি. তানি চ পুব্বভাগানি ‘‘ইমেসং, ভিক্খৱে, পঞ্চন্নং ইন্দ্ৰিযানং ভাৱিতত্তা…পে… সত্তানিসংসা পাটিকঙ্খা’’তি ৱচনতো. তেসন্তি সত্তানং ফলানং. ‘‘দ্ৱিন্নং ফলানং অঞ্ঞতৰং ফল’’ন্তি এৱং অতীতসুত্তে ৱুত্তানি হেট্ঠা দ্ৱে ফলানি নামাতি ৱদন্তি. যেহি পন ইন্দ্ৰিযেহি অঞ্ঞত্ৰ পন অন্তৰাপৰিনিব্বাযিং সেসানি ফলানি হোন্তি, তানি চত্তাৰি সপুব্বভাগানি লোকুত্তৰানীতি ৱুত্তং সিযা.

ইন্দ্ৰিযসংযুত্তৱণ্ণনা নিট্ঠিতা.