১০. অব্যাকতসংযুত্তং

১. খেমাসুত্তৱণ্ণনা

৪১০. বিম্বিসাৰস্স উপাসিকাতি বিম্বিসাৰস্স ওৰোধভূতা উপাসিকা. পণ্ডিচ্চং সিক্খিতভাৱেন. ৱেয্যত্তিযং ৱিসাৰদভাৱেন. ৱিসাৰদা নাম তিহেতুকপটিসন্ধিসিদ্ধসাভাৱিকপঞ্ঞা, তায সমন্নাগতা.

অচ্ছিদ্দকগণনায কুসলোতি নৱন্তগণনায কুসলো. অঙ্গুলিমুদ্দায গণনায কুসলোতি অঙ্গুলিকায এৱ গণনায কুসলো সেয্যথাপি পাদসিকা. পিণ্ডগণনাযাতি সঙ্কলনপটুপ্পন্নকাৰিনো পিণ্ডৱসেন গণনা. তথাগতোতি খীণাসৱো, তথাগতং সন্ধায পুচ্ছতীতি খীণাসৱোতি চস্স অৰহত্তফলৱসিভাৱিতখন্ধে উপাদায অযং পঞ্ঞত্তি হোতি. তেসু খন্ধেসু সতি খীণাসৱা সত্তসঙ্খাতা হোন্তীতি ৱোহাৰেন পঞ্ঞপেতুং সক্কা ভৱেয্য, অসন্তেসু ন সক্কা, তস্মা পৰং মৰণাতি ৱুত্তত্তা তেসং অভাৱা ‘‘অব্যাকতমেত’’ন্তি ৱুত্তং. যদি এৱং তেসং অভাৱতো ‘‘ন হোতি তথাগতো পৰং মৰণা’’তি পুট্ঠায ‘‘আমা’’তি পটিজানিতব্বা সিযা, তং পন সত্তসঙ্খাতস্স পুচ্ছিতত্তা ন পটিঞ্ঞাতন্তি দট্ঠব্বং. যেন ৰূপেনাতি সত্ততথাগতে ৱুত্তৰূপং সব্বঞ্ঞুতথাগতে পটিক্খিপিতুং ‘‘তং ৰূপ’’ন্তিআদি ৱুত্তং. যং উপাদাযাতি যং খন্ধপঞ্চকং উপাদায. তদভাৱেনাতি তস্স খন্ধপঞ্চকস্স অভাৱেন. তস্সা পঞ্ঞত্তিযাতি সত্তপঞ্ঞত্তিযা অভাৱং. নিৰুদ্ধং ন নিদস্সেতি.

খেমায থেৰিযা ৱুত্তং পঠমং সুত্তং ভগৱতো সেট্ঠত্থদীপনতো অগ্গপদাৱচৰংৱ হোতীতি ৱুত্তং ‘‘অগ্গপদস্মি’’ন্তি.

খেমাসুত্তৱণ্ণনা নিট্ঠিতা.

২. অনুৰাধসুত্তৱণ্ণনা

৪১১. ইধ সড়াযতনৱগ্গে সঙ্গাযনৱসেন সঙ্গীতিকাৰেহি ৱুত্তং.

৩-৮. পঠমসাৰিপুত্তকোট্ঠিকসুত্তাদিৱণ্ণনা

৪১২-৪১৭. ৰূপমত্তন্তি এত্থ মত্ত-সদ্দো ৱিসেসনিৱত্তিঅত্থো. কো পন সো ৱিসেসোতি? যো বাহিৰপৰিকপ্পিতো ইধ তথাগতোতি ৱুচ্চমানো অত্তা. অনুপলব্ভিযসভাৱোতি অনুপলব্ভিযত্তা.

পঠমসাৰিপুত্তকোট্ঠিকসুত্তাদিৱণ্ণনা নিট্ঠিতা.

৯. কুতূহলসালাসুত্তৱণ্ণনা

৪১৮. নানাৱিধন্তি তংতংদিট্ঠিৱাদপটিসংযুত্তং অঞ্ঞম্পি ৱা নানাৱিধং তিৰচ্ছানকথং. বহূনং কুতূহলুপ্পত্তিট্ঠানতোতি যোজনা. যাৱ আভস্সৰব্ৰহ্মলোকা গচ্ছতীতি অগ্গিনা কপ্পৱুট্ঠানকালে গচ্ছতি, তং সন্ধায ৱুত্তং. ইমঞ্চ কাযন্তি ইমং ৰূপকাযং. চুতিচিত্তেন নিক্খিপতীতি চুতিচিত্তেন ভিজ্জমানেন নিক্খিপতি. চুতিচিত্তস্স হি ওৰং সত্তৰসমস্স চিত্তস্স উপ্পাদক্খণে উপ্পন্নং কম্মজৰূপং চুতিচিত্তেন সদ্ধিং নিৰুজ্ঝতি, ততো পৰং কম্মজৰূপং ন উপ্পজ্জতি. যদি উপ্পজ্জেয্য, মৰণং ন সিযা, চুতিচিত্তং ৰূপং ন সমুট্ঠাপেতি, আহাৰজস্স চ অসম্ভৱো এৱ, উতুজং পন ৱত্ততেৱ. যস্মা পটিসন্ধিক্খণে সত্তো অঞ্ঞতৰণায উপপজ্জতি নাম, চুতিক্খণে পটিসন্ধিচিত্তং অলদ্ধং অঞ্ঞতৰণায, তস্মা ৱুত্তং ‘‘চুতিক্খণে…পে… হোতী’’তি.

কুতূহলসালাসুত্তৱণ্ণনা নিট্ঠিতা.

১০. আনন্দসুত্তৱণ্ণনা

৪১৯. তেসং লদ্ধিযাতি তেসং সস্সতৱাদানং লদ্ধিযা সদ্ধিং এতং ‘‘অত্থত্তা’’তি ৱচনং একং অভৱিস্স. ততো এৱ অনুলোমং তং নাভৱিস্স ঞাণস্সাতি অসাৰং এতন্তি অধিপ্পাযো. অপি নু মেতস্সাতি মে এতস্স অনত্তাতি ৱিপস্সনাঞাণস্স অনুলোমং অপি নু অভৱিস্স, ৱিলোমকমেৱ তস্স সিযাতি অত্থো.

আনন্দসুত্তৱণ্ণনা নিট্ঠিতা.

১১. সভিযকচ্চানসুত্তৱণ্ণনা

৪২০. যস্সপ’স্সাতি পাঠস্স অযং পিণ্ডত্থো ‘‘আৱুসো’’তিআদি. তত্থাযং সম্বন্ধো – আৱুসো, যস্সপি পুগ্গলস্স তীণি ৱস্সানি ৱুট্ঠো, এত্তকেন কালেন ‘‘হেতুম্হি সতি ৰূপীতিআদিপঞ্ঞাপনা হোতি, অসতি ন হোতী’’তি এত্তকং ব্যাকৰণং ভৱেয্য, তস্স পুগ্গলস্স এত্তকমেৱ বহু, কো পন ৱাদো অতিক্কন্তে! ইতো অতিক্কন্তে ধম্মদেসনানযে ৱাদোযেৱ ৱত্তব্বমেৱ নত্থীতি থেৰস্স পঞ্হব্যাকৰণং সুত্ৱা পৰিব্বাজকো পীতিসোমনস্সং পৱেদেসি.

সভিযকচ্চানসুত্তৱণ্ণনা নিট্ঠিতা.

অব্যাকতসংযুত্তৱণ্ণনা নিট্ঠিতা.