৮. গিলানৱগ্গো

১-৫. পঠমগিলানসুত্তাদিৱণ্ণনা

৭৪-৭৮. অপ্পঞ্ঞাতোতি নামগোত্ততো চেৱ সীলাদিগুণেহি চ অপ্পঞ্ঞাতো অৱিস্সুতো. থেৰমজ্ঝিমভাৱং অপ্পত্ততায নৱো.

পঠমগিলানসুত্তাদিৱণ্ণনা নিট্ঠিতা.

৭. দুতিযঅৱিজ্জাপহানসুত্তৱণ্ণনা

৮০. অনিচ্চাদিৱসেন অভিনিৱিসনং অভিনিৱেসো, সো এৱ ধম্মসভাৱং অতিক্কমিত্ৱা পৰতো আমসনতো পৰামাসো, সো এৱ গাহো. তেন অভিনিৱেসপৰামাসগ্গাহেন গণ্হিতুং ন যুত্তা অনিচ্চাদিসভাৱত্তা. সঙ্খাৰা এৱ পৱত্তিযা কাৰণভাৱতো সঙ্খাৰনিমিত্তানি. যো সঙ্খাৰেসু অপৰিঞ্ঞাতাভিনিৱেসেন পস্সিতব্বো অত্তাকাৰো, সো ন হোতীতি অঞ্ঞো অনত্তাকাৰো, ততো অঞ্ঞতো পস্সতি. পৰিঞ্ঞাতাভিনিৱেসোতি তীৰণপৰিঞ্ঞায পৰিচ্ছিজ্জ ঞাতমিচ্ছাভিনিৱেসো. পৰিঞ্ঞাতাভিনিৱেসোতি ৱা পৰিঞ্ঞাতৱিপস্সনাভিনিৱেসো. ৱিপস্সনাতি অৰূপসত্তকৱসেন ৱিপস্সনায পৰিজানিতব্বা.

দুতিযঅৱিজ্জাপহানসুত্তৱণ্ণনা নিট্ঠিতা.

৮. সম্বহুলভিক্খুসুত্তৱণ্ণনা

৮১. কেৱলন্তি ইতৰলক্খণেহি অৱোমিস্সং.

১০. ফগ্গুনপঞ্হাসুত্তৱণ্ণনা

৮৩. তণ্হায পহীনায দিট্ঠিমানাপি পহীনা এৱাতি ‘‘তণ্হাপপঞ্চস্স ছিন্নত্তা ছিন্নপপঞ্চে’’তি ৱুত্তং. দুতিযপদেপি এসেৱ নযো. ইধ সত্তৱোহাৰো চক্খাদীসু ৱিজ্জমানেসু এৱ হোতি, তস্মা পৰিনিব্বুতানঞ্চ ৱোহাৰো চক্খাদীসু সন্নিস্সযেনেৱ, নাঞ্ঞথাতি অতিক্কন্তবুদ্ধেহি পৰিহৰিতানি চক্খুসোতাদীনি পুচ্ছামীতি পুচ্ছতি ‘‘অত্থি নু খো ভন্তে’’তিআদিনা. চক্খুসোতাদিৱট্টং ৱট্টে পৱত্তেয্য.

ফগ্গুনপঞ্হাসুত্তৱণ্ণনা নিট্ঠিতা.

গিলানৱগ্গৱণ্ণনা নিট্ঠিতা.