৮. আদিত্তপৰিযাযসুত্তৱণ্ণনা

২৩৫. কিলেসানং অনু অনু ব্যঞ্জনতো পৰিব্যত্তিযা উপ্পত্তিপচ্চযভাৱতো অনুব্যঞ্জনং, হত্থপাদাদিঅৱযৱাতি আহ – ‘‘হত্থা সোভনা’’তিআদি. নিমিত্তগ্গাহোতি কিলেসুপ্পত্তিযা নিমিত্তভূতো গাহো. সংসন্দেত্ৱা গহণন্তি অৱযৱে সমোধানেত্ৱা ‘‘ইত্থিপুৰিসো’’তিআদিনা একজ্ঝং গহণং. ৱিভত্তিগহণন্তি ৱিভাগেন অনৱসেসগ্গহণং. কুম্ভীলসদিসোতি কুম্ভীলগাহসদিসো. তেনাহ – ‘‘সব্বমেৱ গণ্হাতী’’তি হত্থপাদাদীসু তং তং কোট্ঠাসং ৱিভজিত্ৱা গহণং ৰত্তপাসদিসো জলূকগাহসদিসো. একজৱনৱাৰেপি লব্ভন্তীতি ইদং চক্খুদ্ৱাৰানুসাৰেন উপ্পন্নমনোদ্ৱাৰিকজৱনং সন্ধায ৱুত্তং.

নিমিত্তস্সাদেন গন্থিতন্তি যথাৱুত্তে নিমিত্তে অস্সাদগাহেন গন্থিতং সম্বদ্ধং. ভৱঙ্গেনেৱাতি মূলভৱঙ্গেনেৱ. কিলেসভযং দস্সেন্তোতি তথা কিলেসুপ্পত্তিযা সতি অকুসলচিত্তেন অন্তৰিতং চে মৰণচিত্তং ভৱেয্য, একন্ততো নিৰযে ৱা তিৰচ্ছানযোনিযা ৱা উপ্পত্তি সিযাতি কিলেসানং ভাযিতব্বং দস্সেন্তো. ‘‘সমযৱসেন ৱা এৱং ৱুত্ত’’ন্তি ৱত্ৱা তমত্থং ৱিৱৰন্তো ‘‘চক্খুদ্ৱাৰস্মিঞ্হী’’তিআদিমাহ. ৰত্তচিত্তং ৱাতি ৰাগৱসেন ৰত্তচিত্তং ৱা. দুট্ঠচিত্তেন কথং আৰম্মণৰসানুভৱনন্তি? দোমনস্সৱেদনুপ্পত্তি এৱ তস্স আৰম্মণৰসানুভৱনং দট্ঠব্বং. ইমস্স সমযস্সাতি মৰণসমযস্স.

উভিন্নং নাসচ্ছিদ্দানং মজ্ঝে ঠিত-অট্ঠিতুদনং সহ খুৰট্ঠেন ছিন্দনং. দণ্ডকৱাসীতি দীঘদণ্ডকা মহাৱাসি. নিপজ্জিত্ৱা নিদ্দোক্কমনন্তি ইমিনা পচলাযিকনিদ্দং পটিক্খিপতি. তত্থ হি কদাচি অন্তৰা মিচ্ছাৱিতক্কানং সল্লকানং অৱসৰো সিযা, নত্থেৱ নিপজ্জিত্ৱা মহানিদ্দং ওক্কন্তকালে. ৱিতক্কানন্তি মিচ্ছাৱিতক্কানং.

আদিত্তপৰিযাযসুত্তৱণ্ণনা নিট্ঠিতা.