১. পঠমসমুদ্দসুত্তৱণ্ণনা

২২৮. যদি ‘‘দুপ্পূৰণট্ঠেন সমুদ্দনট্ঠেনা’’তি ইমিনা অত্থদ্ৱযেন সাগৰো ‘‘সমুদ্দো’’তি ৱুচ্চতি, চক্খুস্সেৱেতং নিপ্পৰিযাযতো যুজ্জতীতি দস্সেতুং ‘‘যদী’’তিআদি ৱুত্তং. তত্থ দুপ্পূৰণট্ঠেনাতি পূৰেতুং অসক্কুণেয্যভাৱেন. সমুদ্দনট্ঠেনাতি সব্বসো উপৰূপৰিপক্খিত্তগমনেন. মহাগঙ্গাদিমহানদীনং মহতা উদকোঘেন অনুসংৱচ্ছৰং অনুপক্খন্দমানোপি হি সমুদ্দো পাৰিপূৰিং ন গচ্ছতি, যঞ্চ ভূমিপদেসং ওত্থৰতি, তং সমুদ্দভাৱং নেতি, অভাৱং ৱা পাপুণাতি অপযাতে সমুদ্দোদকে, তং ৱা অনুদকভাৱপত্তিযা অতথমেৱ হোতি. কামঞ্চেস দুপ্পূৰণট্ঠো সমুদ্দনট্ঠো সাগৰে লব্ভতি, তথাপি তং দ্ৱযং চক্খুস্মিংযেৱ ৱিসেসতো লব্ভতীতি দস্সেন্তো ‘‘তস্স হী’’তিআদিমাহ. সমোসৰন্তন্তি সব্বসো নীলাদিভাগেহি ওসৰন্তং, আপাথং আগচ্ছন্তন্তি অত্থো. কাতুং ন সক্কোতি দুপ্পূৰণীযত্তা. সদোসগমনেন গচ্ছতি সত্তসন্তানস্স দুস্সনতো. দুস্সনট্ঠতা চস্স চক্খুদ্ৱাৰিকতণ্হাৱসেন ৱেদিতব্বা. যথা সমুদ্দে অপৰাপৰং পৰিৱত্তমানো ঊমিযা ৱেগো সমুদ্দস্সাতি ৱুচ্চতি, এৱং চক্খুসমুদ্দস্স পুৰতো অপৰাপৰং পৰিৱত্তমানং নীলাদিভেদং ৰূপাৰম্মণং চক্খুস্সাতি ৱত্তব্বতং অৰহতি অনঞ্ঞসাধাৰণত্তাতি ৱুত্তং ‘‘ৰূপমযো ৱেগো’’তি. অসমপেক্খিতেতি সম্মাদস্সনে ৰূপে মনাপভাৱং অমনাপভাৱঞ্চ গহেত্ৱা, ‘‘ইদং নাম মযা দিট্ঠ’’ন্তি অনুপধাৰেন্তস্স কেৱলং সমূহঘনৱসেন গণ্হন্তস্স গহণং অসমপেক্খনং. সহতীতি অধিভৱতি, তংনিমিত্তং কঞ্চি ৱিকাৰং নাপজ্জতি.

ঊমীতি ৱীচিযো. আৱট্টো আৱট্টনৱসেন পৱত্তং উদকং. গাহৰক্খসমকৰাদযো গাহৰক্খসো. যথা সমুদ্দে ঊমিযো উপৰূপৰি ৱত্তমানা অত্তনি পতিতপুগ্গলং অজ্ঝোত্থৰিত্ৱা অনযব্যসনং আপাদেন্তি, তথা আৱট্টগাহৰক্খসা. এৱমেতে ৰাগাদযো কিলেসা সযং উপ্পন্নকসত্তে অজ্ঝোত্থৰিত্ৱা অনযব্যসনং আপাদেন্তি, কিলেসুপ্পত্তিনিমিত্ততায সত্তানং অনযব্যসনাপত্তিহেতুভূতস্স ঊমিভযস্স আৰম্মণৱসেন চক্খুসমুদ্দো ‘‘সঊমিসাৱট্টো সগাহো সৰক্খসো’’তি ৱুত্তো.

ঊমিভযন্তি এত্থ ভাযতি এতস্মাতি ভযং, ঊমীৱ ভযং ঊমিভযং. কুজ্ঝনট্ঠেন কোধো. স্ৱেৱ চিত্তস্স চ অভিমদ্দনৱসেনুপ্পাদনত্থেন দড়্হং আযাসনট্ঠেন উপাযাসো. এত্থ চ অনেকৱাৰং পৱত্তিত্ৱা সত্তে অজ্ঝোত্থৰিত্ৱা সীসং উক্খিপিতুং অদত্ৱা অনযব্যসননিপ্ফাদনেন কোধূপাযাসস্স ঊমিসদিসতা দট্ঠব্বা. তথা কামগুণা কিলেসাভিভূতে সত্তে মানে ৱিয ৰূপাদিৱিসযসঙ্খাতে অত্তনি সংসাৰেত্ৱা যথা ততো বহিভূতে নেক্খম্মে চিত্তম্পি ন উপ্পজ্জতি, এৱং আৱট্টেত্ৱা ব্যসনাপাদনেন আৱট্টসদিসতা দট্ঠব্বা. যদা পন গাহৰক্খসো আৰক্খৰহিতং অত্তনো গোচৰভূমিগতং পুৰিসং অভিভুয্য গহেত্ৱা অগোচৰে ঠিতম্পি গোচৰং নেত্ৱা ভেৰৱৰূপদস্সনাদিনা অত্তনো উপক্কমং কাতুং অসমত্থং কত্ৱা অন্ৱাৱিসিত্ৱা ৱণ্ণবলভোগআযুসুখেহি ৱিযোজেত্ৱা মহন্তং অনযব্যসনং আপাদেতি, এৱং মাতুগামোপি যোনিসোমনসিকাৰৰহিতং অৱীৰপুৰিসং অত্তনো ৰূপাদীহি পলোভনৱসেন অভিভুয্য গহেত্ৱা ৱা ৱীৰজাতিযম্পি ইত্থিকুত্তভূতেহি অত্তনো হাৱভাৱৱিলাসেহি ইত্থিমাযায অন্ৱাৱিসিত্ৱা ৱা অৱসং অত্তনো উপকাৰধম্মে সীলাদযো সম্পাদেতুং অসমত্থং কৰোন্তো গুণৱণ্ণাদীহি ৱিযোজেত্ৱা মহন্তং অনযব্যসনং আপাদেতি, এৱং মাতুগামস্স গাহৰক্খসসদিসতা দট্ঠব্বা. ঊমিভযন্তি লক্খণৱচনং. যথা হি ঊমি ভাযিতব্বট্ঠেন ভযং, এৱং আৱট্টগাহৰক্খসাপীতি ঊমিআদিভযেন সভযন্তি অত্থো ৱেদিতব্বো. অন্তং অৱসানং গতো, এৱং পাৰং নিব্বানং গতোতি ৱুচ্চতি.

পঠমসমুদ্দসুত্তৱণ্ণনা নিট্ঠিতা.