৬. ঘোসিতসুত্তৱণ্ণনা

১২৯. ৰূপা চ মনাপাতি নীলাদিভেদা ৰূপধম্মা চ মনসা মনুঞ্ঞা পিযৰূপা সংৱিজ্জন্তি, ইদঞ্চ সুখৱেদনীযস্স ফস্সস্স সভাৱদস্সনত্থং. এৱং ‘‘ৰূপা চ মনাপা উপেক্খাৱেদনিযা’’তি এত্থাপি যথাৰহং ৱত্তব্বং. চক্খুৱিঞ্ঞাণ…পে… ফস্সন্তি ৱুত্তং. উপনিস্সযকোটিযা হি চক্খুৱিঞ্ঞাণসম্পযুত্তফস্সো সুখৱেদনীযো, ন সহজাতকোটিযা. তেনাহ – ‘‘একং ফস্সং পটিচ্চ জৱনৱসেন সুখৱেদনা উপ্পজ্জতী’’তি. সেসপদেসূতি ‘‘সংৱিজ্জতি খো, গহপতি, সোতধাতূ’’তি আগতেসু পঞ্চসু কোট্ঠাসেসু.

তেৱীসতি ধাতুযো কথিতা ছন্নং দ্ৱাৰানং ৱসেন ৱিভজ্জগহণেন. ৱত্থুনিস্সিতন্তি হদযৱত্থুনিস্সিতং. পঞ্চদ্ৱাৰে ৱীসতি, মনোদ্ৱাৰে তিস্সো এৱং তেৱীসতি.

ঘোসিতসুত্তৱণ্ণনা নিট্ঠিতা.