৮. নাগসংযুত্তং

১. সুদ্ধিকসুত্তৱণ্ণনা

৩৪২. অণ্ডজাতি অণ্ডে জাতা. ৱত্থিকোসেতি ৱত্থিকোসসঞ্ঞিতে জৰাযুপুটে জাতা. সংসেদেতি সংসিন্নে কিলিন্নট্ঠানে উপ্পন্না. উপপতিত্ৱা ৱিযাতি কুতোচিপি অৱপতিত্ৱা ৱিয নিব্বত্তা. পুগ্গলানন্তি তথা ৱিনেতব্বপুগ্গলানং.

সুদ্ধিকসুত্তৱণ্ণনা নিট্ঠিতা.

২-৫০. পণীততৰসুত্তাদিৱণ্ণনা

৩৪৩-৩৯১. ৱিস্সট্ঠকাযাতি ‘‘যে চম্মেন ৱা ৰুধিৰেন ৱা অট্ঠিনা ৱা অত্থিকা, তে সব্বং গণ্হন্তূ’’তি তত্থ নিৰপেক্খচিত্ততায অধিট্ঠিতসীলতায পৰিচ্চত্তসৰীৰা. দুৱিধকাৰিনোতি ‘‘কালেন কুসলং, কালেন অকুসল’’ন্তি এৱং কুসলাকুসলকাৰিনো. সহ ব্যযতি পৱত্ততীতি সহব্যো, সহচাৰো. তস্স ভাৱো সহব্যতা, তং সহব্যতং. অদনীযতো অন্নং. খাদনীযতো খজ্জং. পাতব্বতো পানং. নিৱসনীযতো ৱত্থং. নিৱসিতব্বং নিৱাসনং. পৰিৱৰিতব্বং পাৱুৰণং. যান্তি তেনাতি যানং, উপাহনাদিযানানি. আদিসদ্দেন ৱয্হসিৱিকাদীনং সঙ্গহো. ছত্তম্পি পৰিস্সযাতপদুক্খপৰিৰক্খণেন মগ্গগমনসাধনন্তি কত্ৱা ‘‘ছত্তুপাহন’’ন্তিআদি ৱুত্তং. তেন ৱুত্তং ‘‘যং কিঞ্চি গমনপচ্চয’’ন্তি. পত্থনং কত্ৱা…পে… তত্থ নিব্বত্তন্তি চম্পেয্যনাগৰাজা ৱিযাতি দট্ঠব্বং.

পণীততৰসুত্তাদিৱণ্ণনা নিট্ঠিতা.

নাগসংযুত্তৱণ্ণনা নিট্ঠিতা.