৭. সাৰিপুত্তসংযুত্তং

১-৯. ৱিৱেকজসুত্তাদিৱণ্ণনা

৩৩২-৩৪০. ন এৱং হোতীতি এত্থ ‘‘অহং সমাপজ্জামী’’তি ৱা, ‘‘অহং সমাপন্নো’’তি ৱা মা হোতু তদা তাদিসাভোগাভাৱতো. ‘‘অহং ৱুট্ঠিতো’’তি পন কস্মা ন হোতীতি? সব্বথাপি ন হোত্ৱেৱ অহঙ্কাৰস্স সব্বসো পহীনত্তা.

ৱিৱেকজসুত্তাদিৱণ্ণনা নিট্ঠিতা.

১০. সূচিমুখীসুত্তৱণ্ণনা

৩৪১. তস্মিং ৱচনে পটিক্খিত্তেতি – ‘‘অধোমুখো ভুঞ্জসী’’তি পৰিব্বাজিকায ৱুত্তৱচনে – ‘‘ন খ্ৱাহং ভগিনী’’তি পটিক্খিত্তে. ৱাদন্তি দোসং. উব্ভমুখোতি উপৰিমুখো. পুৰত্থিমাদিকা চতস্সো দিসা. দক্খিণপুৰত্থিমাদিকা চতস্সো ৱিদিসা.

আৰামআৰামৱত্থুআদীসু ভূমিপৰিকম্মবীজাভিসঙ্খৰণাদিপটিসংযুত্তা ৱিজ্জা ৱত্থুৱিজ্জা, তস্সা পন মিচ্ছাজীৱভাৱং দস্সেতুং ‘‘তেস’’ন্তিআদি ৱুত্তং. তেসং তেসং অত্তনো পচ্চযদাযকানং. তত্থ তত্থ গমনন্তি তেসং সাসনহৰণৱসেন তং তং গামন্তৰদেসন্তৰং. এৱমাৰোচেসীতি অত্তুক্কংসনপৰৱম্ভনৰহিতং কণ্ণসুখং পেমনীযং হদযঙ্গমং থেৰস্স ধম্মকথং সুত্ৱা পসন্নমানসা এৱং ‘‘ধম্মিকং সমণা সক্যপুত্তিযা’’তিআদিনা সাসনস্স গুণসংকিত্তনৱাচং কুলানং আৰোচেসি.

সূচিমুখীসুত্তৱণ্ণনা নিট্ঠিতা.

সাৰিপুত্তসংযুত্তৱণ্ণনা নিট্ঠিতা.