১৩. ঝানসংযুত্তং

১. সমাধিমূলকসমাপত্তিসুত্তৱণ্ণনা

৬৬২. সমাধিকুসলোতি সমাধিস্মিং কুসলো. তযিদং সমাধিকোসল্লত্তং সহ ঝানঙ্গযোগেন চতুব্বিধো ঝানসমাধি, তস্মা তং তং ৱিভাগং জানন্তস্স সিদ্ধং হোতীতি আহ – ‘‘পঠমং ঝান’’ন্তিআদি. তত্থ ৱিতক্কৱিচাৰপীতিসুখেকগ্গতাৱসেন পঠমং পঞ্চঙ্গিকং, পীতিসুখেকগ্গতাৱসেন দুতিযং তিৱঙ্গিকং, সুখেকগ্গতাৱসেন ততিযং দুৱঙ্গিকং, উপেক্খেকগ্গতাৱসেন চতুত্থং দুৱঙ্গিকমেৱাতি এৱং তস্মিং তস্মিং ঝানে তংতংঅঙ্গানং ৱৱত্থানে কুসলো. সমাপত্তিকুসলোতি সমাপজ্জনে কুসলো. হাসেত্ৱাতি তোসেত্ৱা. কল্লং কত্ৱাতি সমাধানস্স পটিপক্খধম্মানং দূৰীকৰণেন সহকাৰীকাৰণঞ্চ সমাধানেন সমাপজ্জনে চিত্তং সমত্থং কত্ৱা. সেসপদানীতি সেসা তযো কোট্ঠাসা. ততিযাদীসু নযেসু অকুসলোপি ঝানত্থায পটিপন্নত্তা ‘‘ঝাযীতেৱা’’তি ৱুত্তো.

সমাধিমূলকসমাপত্তিসুত্তৱণ্ণনা নিট্ঠিতা.

২-৫৫. সমাধিমূলকঠিতিসুত্তাদিৱণ্ণনা

৬৬৩-৭১৬. দুতিযাদিসুত্তেসু ঠিতিকুসলোতি এত্থ অন্তোগধহেতুঅত্থো ঠিতি-সদ্দো, তস্মিঞ্চ পন কুসলোতি অত্থোতি আহ – ‘‘ঝানং ঠপেতুং অকুসলো’’তি. সত্তট্ঠঅচ্ছৰামত্তন্তি সত্তট্ঠঅচ্ছৰামত্তং খণং ঝানং ঠপেতুং ন সক্কোতি অধিট্ঠানৱসীভাৱস্স অনিপ্ফাদিতত্তা. যথাপৰিচ্ছেদেন কালেন ৱুট্ঠাতুং ন সক্কোতি ৱুট্ঠানৱসীভাৱস্স অনিপ্ফাদিতত্তা. কল্লং জাতং অস্সাতি কল্লিতং, তস্মিং কল্লিতে কল্লিতভাৱেন কসিণাৰম্মণেসু ‘‘ইদং নাম অসুকস্সা’’তি ৱিসযৱসেন সমাপজ্জিতুং অসক্কোন্তো ন সমাধিস্মিং আৰম্মণকুসলো. ন সমাধিস্মিং গোচৰকুসলোতি সমাধিস্মিং নিপ্ফাদিতব্বে তস্স গোচৰে কম্মট্ঠানসঞ্ঞিতে পৱত্তিট্ঠানে ভিক্খাচাৰগোচৰে চ সতিসম্পজঞ্ঞৱিৰহিতো অকুসলো. কেচি পন ‘‘কম্মট্ঠানগোচৰো পঠমজ্ঝানাদিকং, ‘এৱং সমাপজ্জিতব্বং, এৱং বহুলীকাতব্ব’ন্তি অজানন্তো তত্থ অকুসলো নামা’’তি ৱদন্তি. কম্মট্ঠানং অভিনীহৰিতুন্তি কম্মট্ঠানং ৱিসেসভাগিযতায অভিনীহৰিতুং অকুসলো. সক্কচ্চকাৰীতি চিত্তীকাৰী. সাতচ্চকাৰীতি নিযতকাৰী. সমাধিস্স উপকাৰকধম্মাতি অপ্পনাকোসল্লা. সমাপত্তিআদীহীতি আদি-সদ্দেন সক্কচ্চকাৰিপদাদীনংযেৱ সঙ্গহো দট্ঠব্বো চতুক্কানং ৱুত্তত্তা. তেনাহ ‘‘যোজেত্ৱা চতুক্কা ৱুত্তা’’তি. লোকিযজ্ঝানৱসেনেৱ কথিতং ‘‘সমাধিকুসলো’’তিআদিনা নযেন দেসনায পৱত্তত্তা. ন হি লোকুত্তৰধম্মেসু অকোসল্লং নাম লব্ভতি. যদি অকোসল্লং, ন কুসলসদ্দেন ৱিসেসিতব্বতা সিযাতি.

সমাধিমূলকঠিতিসুত্তাদিৱণ্ণনা নিট্ঠিতা.

ঝানসংযুত্তৱণ্ণনা নিট্ঠিতা.

নিট্ঠিতা চ সাৰত্থপ্পকাসিনিযা

সংযুত্তনিকায-অট্ঠকথায খন্ধৱগ্গৱণ্ণনা.