১০. গন্ধব্বকাযসংযুত্তৱণ্ণনা

৪৩৮-৫৪৯. মূলগন্ধাদিভেদং গন্ধং অৱন্তি অপযুঞ্জন্তীতি গন্ধব্বা, তেসং কাযো সমূহো গন্ধব্বকাযো, গন্ধব্বদেৱনিকাযো. চাতুমহাৰাজিকেসু একিযাৱ তে দট্ঠব্বা, তপ্পৰিযাপন্নতায তত্থ ৱা নিযুত্তাতি গন্ধব্বকাযিকা. তেসং তেসং ৰুক্খগচ্ছলতানং মূলং পটিচ্চ পৱত্তো গন্ধো মূলগন্ধো, তস্মিং মূলগন্ধে. অধিৱত্থাতি মূলগন্ধং অধিট্ঠায, অভিভুয্য ৱা ৱসন্তা. এস নযো সেসেসুপি. তং নিস্সাযাতি তং মূলগন্ধং ৰুক্খং পচ্চযং কত্ৱা নিব্বত্তা. ন কেৱলং তত্থ গন্ধো এৱ, মূলমেৱ ৱা তেসং পচ্চযোতি দস্সেন্তো ‘‘সো হী’’তিআদিমাহ. উপকপ্পতীতি নিৱাসট্ঠানভাৱেন ৱিনিযুঞ্জতি. গন্ধগন্ধেতি গন্ধানং গন্ধসমুদাযে. মূলাদিগন্ধানং গন্ধেতি মূলাদিগতঅৱযৱগন্ধানং গন্ধে, তিমূলাদিগতসমুদাযভূতেতি অত্থো. পুব্বে হি ‘‘মূলগন্ধে’’তিআদিনা ৰুক্খানং অৱযৱগন্ধো গহিতো, ইধ পন সব্বসো গহিতত্তা সমুদাযগন্ধো ৱেদিতব্বো. তেনাহ ‘‘যস্স হি ৰুক্খস্সা’’তিআদি. সোতি সো সব্বো মূলাদিগতো গন্ধো গন্ধসমুদাযো ইধ গন্ধগন্ধো নাম. তস্স গন্ধস্স গন্ধেতি তস্স সমুদাযগন্ধস্স তথাভূতে গন্ধে. সৰিক্খং সদিসং পটিদানং এতিস্সাতি সৰিক্খদানং, পত্থনা. যথাধিপ্পেতফলানি সৰিক্খদানত্তাৱ অধিপ্পেতফলং দেন্তু, অসৰিক্খদানং কথন্তি? তম্পি দেতিযেৱ পুঞ্ঞস্স সব্বকামদদত্তাতি আহ ‘‘অসৰিক্খদানম্পী’’তিআদি.

গন্ধব্বকাযসংযুত্তৱণ্ণনা নিট্ঠিতা.