১১. ৱলাহকসংযুত্তৱণ্ণনা

৫৫০-৬০৬. লোকং ৱালেন্তা সংৱৰন্তা ছাদেন্তা অহন্তি পৰিযেসন্তীতি ৱলাহা, দেৱপুত্তা. তেসং সমূহো ৱলাহকদেৱকাযোতি আহ ‘‘ৱলাহককাযিকা’’তিআদি. সীতকৰণৱলাহকাতি সীতহৰণৱলাহকা. সেসপদেসূতি উণ্হৱলাহকাদিপদেসু. এসেৱ নযোতি ‘‘উণ্হকৰণৱলাহকা’’তিআদিনা অত্থো ৱেদিতব্বো. চিত্তট্ঠপনন্তি ‘‘সীতং হোতূ’’তি এৱং চিত্তস্স উপ্পাদনং. ৱস্সানেতি ৱস্সকালে. উতুসমুট্ঠানমেৱাতি পাকতিকসীতমেৱাতি অত্থো. উণ্হেপীতি উণ্হকালে. অব্ভমণ্ডপোতি মণ্ডপসদিসঅব্ভপটলৱিতানমাহ. অব্ভং উপ্পজ্জতীতি তহং তহং পটলং উট্ঠহতি. অব্ভেযেৱাতি অব্ভকালে এৱ, ৱস্সানেতি অত্থো. অতিঅব্ভন্তি সতপটলসহস্সপটলং হুত্ৱা অব্ভুট্ঠানং. চিত্তৱেসাখমাসেসূতি ৱসন্তকালং সন্ধাযাহ. তদা হি ৱিদ্ধো ৱিগতৱলাহকো দেৱো ভৱিতুং যুত্তো. উত্তৰদক্খিণাদীতি আদি-সদ্দেন পচ্ছিমৱাতাদিং সঙ্গণ্হাতি. পকতিৱাতোতি পকতিযা সভাৱেন ৱাযনকৱাতো. তং উতুসমুট্ঠানমেৱাতি আহাৰূপজীৱীনং সত্তানং সাধাৰণকম্মূপনিস্সযউতুসমুট্ঠানমেৱ. এস নযো উতুসমুট্ঠানসীতুণ্হৱাতেসুপি. তম্পি হি আহাৰূপজীৱীনং সত্তানং সাধাৰণকম্মূপনিস্সযমেৱাতি.

গীতন্তি মেঘগীতং. সচ্চকিৰিযাযাতি তাদিসানং পুৰিসৱিসেসানং সচ্চাধিট্ঠানেন. ইদ্ধিবলেনাতি ইদ্ধিমন্তানং ইদ্ধিআনুভাৱেন. ৱিনাসমেঘেনাতি কপ্পৱিনাসকমেঘেন. অঞ্ঞেনপি কণ্হপাপিকসত্তানং পাপকম্মপচ্চযা উপ্পন্নৱিনাসমেঘেন ৱুট্ঠেন সো সো দেসো ৱিনস্সতেৱ.

ৱলাহকসংযুত্তৱণ্ণনা নিট্ঠিতা.