৭. অৰহন্তৱগ্গো

১. উপাদিযমানসুত্তৱণ্ণনা

৬৩. গণ্হমানোতি ‘‘এতং মমা’’তিআদিনা গণ্হমানো. পাসেনাতি ৰাগপাসেন. তঞ্হি মাৰো মাৰপাসোতি মঞ্ঞতি. তেনাহ ‘‘অন্তলিক্খচৰো পাসো, য্ৱাযং চৰতি মানসো’’তি (সং. নি. ১.১৫১; মহাৱ. ৩৩). মুত্তো নাম হোতি অনুপাদিযতো সব্বসো খন্ধস্স অভাৱতো.

উপাদিযমানসুত্তৱণ্ণনা নিট্ঠিতা.

২-৬. মঞ্ঞমানসুত্তাদিৱণ্ণনা

৬৪-৬৮. ‘‘এতং মমা’’তিআদিনা. মঞ্ঞনা অভিনন্দনা চ. তণ্হাছন্দোতি তণ্হা এৱ ছন্দো. সা হি তণ্হাযনট্ঠেন তণ্হা, ছন্দিকতট্ঠেন ছন্দো. চতুত্থং অনিচ্চলক্খণমুখেন ৱুত্তং, পঞ্চমং দুক্খলক্খণমুখেন, ছট্ঠং অনত্তলক্খণমুখেন. সেসং তীসুপি সদিসমেৱাতি ৱুত্তং ‘‘এসেৱ নযো’’তি.

মঞ্ঞমানসুত্তাদিৱণ্ণনা নিট্ঠিতা.

৭. অনত্তনিযসুত্তৱণ্ণনা

৬৯. অনত্তনিযন্তি ন অত্তনিযং. তেনাহ ‘‘ন অত্তনো সন্তক’’ন্তি.

অনত্তনিযসুত্তৱণ্ণনা নিট্ঠিতা.

৮-১০. ৰজনীযসণ্ঠিতসুত্তাদিৱণ্ণনা

৭০-৭২. ৰজনীযেনাতি ৰজনীযেন ৰাগুপ্পাদকেন. তেনাহ ‘‘ৰাগস্স পচ্চযভাৱেনা’’তি. ৰাহুলসংযুত্তে ৰাহুলত্থেৰস্স পুচ্ছাৱসেন আগতা. ইধ ৰাধত্থেৰস্স সুৰাধত্থেৰস্স চ পুচ্ছাৱসেন, পাড়ি পন সব্বত্থ সদিসা. তেনাহ ‘‘ৱুত্তনযেনেৱ ৱেদিতব্বানী’’তি.

ৰজনীযসণ্ঠিতসুত্তাদিৱণ্ণনা নিট্ঠিতা.

অৰহন্তৱগ্গৱণ্ণনা নিট্ঠিতা.