২. বীজসুত্তৱণ্ণনা

৫৪. বীজজাতানীতি জাত-সদ্দো পদপূৰণমত্তন্তি আহ ‘‘বীজানী’’তি. ৱচন্তি সেতৱচং. অজ্জুকন্তি তচ্ছকং. ফণিজ্জকং তুলসি. অভিন্নানীতি একদেসেনপি অখণ্ডিতানি. বীজত্থাযাতি বীজকিচ্চায. ন উপকপ্পতীতি পচ্চযো ন হোতীতি দস্সেতি. ন পাপিতানীতি পূতিতং ন উপগতানি. তণ্ডুলসাৰস্স আদানতো সাৰাদানি. আৰম্মণগ্গহণৱসেন ৱিঞ্ঞাণং তিট্ঠতি এত্থাতি ৱিঞ্ঞাণট্ঠিতিযো. আৰম্মণৱসেনাতি আৰম্মণভাৱৱসেন. সিনেহনট্ঠেনাতি তণ্হাযনৱসেন সিনিদ্ধতাপাদনেন, যতো ‘‘নন্দূপসেচন’’ন্তি ৱুত্তং. তথা হি ৱিৰোপিতং তং কম্মৱিঞ্ঞাণং পটিসন্ধিঅঙ্কুৰুপ্পাদনসমত্থং হোতি. সপ্পচ্চযন্তি অৱিজ্জাঅযোনিসোনমনসিকাৰাদিপচ্চযেহি সপ্পচ্চযং. ৱিৰুহতি ৱিপাকসন্তানুপ্পাদনসমত্থো হুত্ৱা.

বীজসুত্তৱণ্ণনা নিট্ঠিতা.