৬. উপযৱগ্গো

১. উপযসুত্তৱণ্ণনা

৫৩. উপেতীতি উপযো. কথমুপেতি? তণ্হামানাদিৱসেনাতি আহ ‘‘তণ্হামানদিট্ঠিৱসেনা’’তি. কথমিদং লব্ভতীতি? ‘‘অৱিমুত্তো’’তি ৱচনতো. তণ্হাদিট্ঠিৱসেন হি বদ্ধো, কিং উপেতীতি আহ ‘‘পঞ্চক্খন্ধে’’তি তব্বিনিমুত্তস্স তথা উপেতস্স অভাৱতো. কো পনুপেতীতি? তংসমঙ্গীপুগ্গলো. তণ্হাদিট্ঠিৱসেন উপগমস্স ৱুত্তত্তা ৱিঞ্ঞাণন্তি অকুসলকম্মৱিঞ্ঞাণমেৱাতি ৱদন্তি. জৱাপেত্ৱাতি গহিতজৱং কত্ৱা. যথা পটিসন্ধিং আকড্ঢিতুং সমত্থং, এৱং কত্ৱা. তেনাহ ‘‘পটিসন্ধী’’তিআদি. অগ্গহণে কাৰণং ৱুত্তমেৱ ‘‘ওকং পহায অনিকেতসাৰী’’তি গাথায ৱিস্সজ্জনে. কম্মনিমিত্তাদিৱসেন পটিসন্ধিযা পচ্চযভূতং আৰম্মণং পটিসন্ধিজনকস্স কম্মস্স ৱসেন ৱোচ্ছিজ্জতি. পতিট্ঠা ন হোতি সৰাগকালে ৱিয অনুপট্ঠানতো. অপ্পতিট্ঠিতং ৱিঞ্ঞাণং ৱুত্তপ্পকাৰেন. অনভিসঙ্খৰিত্ৱাতি অনুপ্পাদেত্ৱা পচ্চযঘাতেন.

উপযসুত্তৱণ্ণনা নিট্ঠিতা.

২. বীজসুত্তৱণ্ণনা

৫৪. বীজজাতানীতি জাত-সদ্দো পদপূৰণমত্তন্তি আহ ‘‘বীজানী’’তি. ৱচন্তি সেতৱচং. অজ্জুকন্তি তচ্ছকং. ফণিজ্জকং তুলসি. অভিন্নানীতি একদেসেনপি অখণ্ডিতানি. বীজত্থাযাতি বীজকিচ্চায. ন উপকপ্পতীতি পচ্চযো ন হোতীতি দস্সেতি. ন পাপিতানীতি পূতিতং ন উপগতানি. তণ্ডুলসাৰস্স আদানতো সাৰাদানি. আৰম্মণগ্গহণৱসেন ৱিঞ্ঞাণং তিট্ঠতি এত্থাতি ৱিঞ্ঞাণট্ঠিতিযো. আৰম্মণৱসেনাতি আৰম্মণভাৱৱসেন. সিনেহনট্ঠেনাতি তণ্হাযনৱসেন সিনিদ্ধতাপাদনেন, যতো ‘‘নন্দূপসেচন’’ন্তি ৱুত্তং. তথা হি ৱিৰোপিতং তং কম্মৱিঞ্ঞাণং পটিসন্ধিঅঙ্কুৰুপ্পাদনসমত্থং হোতি. সপ্পচ্চযন্তি অৱিজ্জাঅযোনিসোনমনসিকাৰাদিপচ্চযেহি সপ্পচ্চযং. ৱিৰুহতি ৱিপাকসন্তানুপ্পাদনসমত্থো হুত্ৱা.

বীজসুত্তৱণ্ণনা নিট্ঠিতা.

৩. উদানসুত্তৱণ্ণনা

৫৫. উদানং উদাহৰীতি অত্তমনৱাচং নিচ্ছাৰেসি. এস ৱুত্তপ্পকাৰো উদাহাৰো. ভুসো নিস্সযো উপনিস্সযো, দানমেৱ উপনিস্সযো দানূপনিস্সযো. এস নযো সেসেসুপি. তত্থ দানূপনিস্সযো অন্নাদিৱত্থূসু বলৱাতি বলৱভাৱেন হোতি, তস্মা উপনিস্সযবহুলো কামৰাগপ্পহানেনেৱ কতপৰিচযত্তা ৱিপস্সনমনুযুঞ্জন্তো ন চিৰস্সেৱ অনাগামিফলং পাপুণাতি, তথা সুৱিসুদ্ধসীলূপনিস্সযো কামদোসজিগুচ্ছনেন. যদি এৱং কস্মা ইমে দ্ৱে উপনিস্সযা দুব্বলাতি ৱুত্তা? ৱিজ্জূপমঞ্ঞাণস্সেৱ পচ্চযভাৱতো. সোপি ভাৱনূপনিস্সযসহাযলাভেনেৱ, ন কেৱলং. ভাৱনা পন পটিৱেধস্স ৱিসেসহেতুভাৱতো বলৱা উপনিস্সযো. তথা হি সা ৱজিৰূপমঞাণস্স ৱিসেসপচ্চযো. তেনাহ ‘‘ভাৱনূপনিস্সযো অৰহত্তং পাপেতী’’তি.

সোতি মিলকত্থেৰো. ৱিহাৰন্তি ৱসনট্ঠানং. ৱিহাৰপচ্চন্তে হি পণ্ণসালায থেৰো ৱিহৰতি. উপট্ঠাতি একলক্খণেন. কূটগোণো ৱিয গমনৱীথিং. তত্থাতি অল্লকট্ঠৰাসিম্হি. উদকমণিকানন্তি উদকথেৱানং.

অত্তনিযেৱ উপনেসি উদানকথায ৱুত্তধম্মানং পৰিপুণ্ণানং অত্তনি সংৱিজ্জমানত্তা. তেনাহ ‘‘উট্ঠানৱতা’’তিআদি. অযঞ্হি মিলকত্থেৰো সিক্খায গাৰৱো সপ্পতিস্সো ৱত্তপটিৱত্তং পূৰেন্তো ৱিসুদ্ধসীলো হুত্ৱা ঠিতো, তস্মা ‘‘দুব্বলূপনিস্সযে’’তি ৱুত্তং. তেনাহ ভগৱা উদানেন্তো ‘‘নো চস্সং…পে… সঞ্ঞোজনানী’’তি.

সচে অহং ন ভৱেয্যন্তি যদি অহং নাম কোচি ন ভৱেয্যং তাদিসস্স অহংসদ্দৱচনীযস্স কস্সচি অত্থস্স অভাৱতো. ততো এৱ মম পৰিক্খাৰোপি ন ভৱেয্যতস্স চ পভঙ্গুভাৱেন অনৱট্ঠিতভাৱতো. এৱং অত্তুদ্দেসিকভাৱেন পদদ্ৱযস্স অত্থং ৱত্ৱা ইদানি কম্মফলৱসেন ৱত্তুং ‘‘সচে ৱা পনা’’তিআদি ৱুত্তং. অতীতপচ্চুপ্পন্নৱসেন সুঞ্ঞতং দস্সেত্ৱা ইদানি পচ্চুপ্পন্নানাগতৱসেন তং দস্সেন্তো ‘‘ইদানি পনা’’তিআদি ৱুত্তং. এৱং অধিমুচ্চন্তোতি এদিসং অধিমুত্তিং পৱত্তেন্তো. ৱিভৱিস্সতীতি ৱিনস্সিস্সতি. ৱিভৱো হি ৱিনাসো. তেনাহ ‘‘ভিজ্জিস্সতী’’তি. ৱিভৱদস্সনং ৱিভৱোতি উত্তৰপদলোপেন ৱুত্তন্তি আহ ‘‘ৱিভৱদস্সনেনা’’তি. ৱিভৱদস্সনং নাম অচ্চন্তায ৱিনাসস্স দস্সনং. তন্তি অৰিযমগ্গং. সামঞ্ঞজোতনা হেসা ৱিসেসনিট্ঠা হোতীতি ততিযমগ্গৱসেন অত্থো ৱেদিতব্বো.

উপৰি মগ্গফলন্তি অগ্গমগ্গফলং. নত্থি এতিস্সা জাতিযা অন্তৰন্তি অনন্তৰা, অনন্তৰা ৱিপস্সনা মগ্গস্স. গোত্ৰভূ পন অনুলোমৱীথিপৰিযাপন্নত্তা ৱিপস্সনাগতিকং ৱা সিযা, নিব্বানাৰম্মণত্তা মগ্গগতিকং ৱাতি ন তেন মগ্গো অন্তৰিকো নাম হোতি. তেনাহ ‘‘ৱিপস্সনা মগ্গস্স আসন্নানন্তৰং নামা’’তি. ফলং পন নিব্বানাৰম্মণত্তা কিলেসানং পজহনৱসেন পৱত্তনতো লোকুত্তৰভাৱতো চ কম্মমগ্গগতিকমেৱ, কুসলৱিপাকভাৱেন পন নেসং অত্থো পভেদোতি ৱিপস্সনায ফলস্স সিযা অনন্তৰতাতি ৱুত্তং ‘‘ফলস্স দূৰানন্তৰং নামা’’তি. ‘‘আসৱানং খযো’’তি পন অগ্গমগ্গে ৱুচ্চমানে ৱিপস্সনানং আসন্নতায ৱত্তব্বমেৱ নত্থি. অতসিতাযেতি ন তসিতব্বে তাসং অনাপজ্জিতব্বে. তাসোতি তাসহেতু ‘‘তসতি এতস্মা’’তি কত্ৱা. সোতি অস্সুতৱা পুথুজ্জনো. তিলক্খণাহতন্তি অনিচ্চতাদিলক্খণত্তযলক্খিতং. মনম্হি নট্ঠোতি ঈসকং নট্ঠোম্হি, ততো পৰম্পি তত্থেৱ ঠত্ৱা কিঞ্চি অপূৰিতত্তা এৱ মুত্তোতি অধিপ্পাযো. ‘‘ন তাসো নাম হোতী’’তি ৱত্ৱা তস্স অতাসভাৱং দস্সেতুং ‘‘ন হী’’তিআদি ৱুত্তং. কল্যাণপুথুজ্জনো হি ভযতুপট্ঠানঞাণেন ‘‘সভযা সঙ্খাৰা’’তি ৱিপস্সন্তো ন উত্তসতি.

উদানসুত্তৱণ্ণনা নিট্ঠিতা.

৪. উপাদানপৰিপৱত্তসুত্তৱণ্ণনা

৫৬. চতুন্নং পৰিৱট্টনৱসেনাতি পচ্চেকক্খন্ধেসু চতুন্নং অৰিযসচ্চানং পৰিৱট্টনৱসেন. ৰূপং অব্ভঞ্ঞাসিন্তি সকলভূতুপাদাৰূপং কুচ্ছিতভাৱতো তত্থ চ তুচ্ছৱিপল্লাসতায ‘‘দুক্খসচ্চ’’ন্তি অভিৱিসিট্ঠেন ঞাণেন অঞ্ঞাসিং পটিৱিজ্ঝিং. আহাৰৱসেন ৰূপকাযস্স হানিৱুদ্ধাদীনং পাকটভাৱতো ৱিসেসপচ্চযতো চ তস্স ‘‘আহাৰসমুদযা’’তি ৱুত্তং. দুক্খসমুদযকথা নাম ৱট্টকথাতি ‘‘সচ্ছন্দৰাগো’’তি ৱিসেসেত্ৱা ৱুত্তং. ছন্দৰাগগ্গহণেন চ উপাদানকম্মাৱিজ্জাপি গহিতা এৱ. পটিপন্না হোন্তীতি অত্থো. ৱত্তমানকালপ্পযোগো হেস যথা ‘‘কুসলং চিত্তং উপ্পন্নং হোতী’’তি. পতিট্ঠহন্তীতি পতিট্ঠং লভন্তি. কেৱলিনোতি ইধ ৱিমুত্তিগুণেন পাৰিপূৰীতি আহ ‘‘সকলিনো কতসব্বকিচ্চা’’তি. যেন তেতি যেন অৱসিট্ঠেন তে অসেক্খে পঞ্ঞাপেন্তা পঞ্ঞাপেয্যুং, তং নেসং ৱট্টং সেক্খানং ৱিয নত্থি পঞ্ঞাপনায. ৱট্টন্তি কাৰণং ৱট্টনট্ঠেন ফলস্স পৱত্তনট্ঠেন. অসেক্খভূমিৱাৰোতি অসেক্খভূমিপ্পৱত্তি.

উপাদানপৰিপৱত্তসুত্তৱণ্ণনা নিট্ঠিতা.

৫. সত্তট্ঠানসুত্তৱণ্ণনা

৫৭. সত্তসু ওকাসেসূতি ৰূপপজাননাদীসু সত্তসু ওকাসেসু. ৱুসিতৱাসোতি ৱুসিতঅৰিযৱাসো. এত্থাতি ইমস্মিং উদ্দেসে. সেসং নাম ইধ ৱুত্তাৱসেসং. ৱুত্তনযেনাতি হেট্ঠা ৱুত্তনযেন ৱেদিতব্বং. উস্সদনন্দিযন্তি উস্সন্নগুণৱতো তোসনং সম্মোদাপনং. গুণকিত্তনেন পলোভনীযং সেক্খকল্যাণপুথুজ্জনানং পসাদুপ্পাদনেন. ইদানি ৱুত্তমেৱ অত্থং পাকটং কাতুং ‘‘যথা হী’’তিআদি ৱুত্তং.

এত্তাৱতাতি পঞ্চন্নং খন্ধানং ৱসেন সত্তসু ঠানেসু কোসল্লদীপনেন এত্তকেন দেসনাক্কমেন. তন্তি আৰম্মণং. ধাতুআদিমত্তমেৱাতি ধাতাযতনপটিচ্চসমুপ্পাদমত্তমেৱ. ইমেসু ধম্মেসূতি ইমেসু জাতাদীসু. কম্মং কত্ৱাতি সম্মসনকম্মং নিট্ঠপেত্ৱাতি অত্থো. এৱমেত্থ পঞ্চন্নং খন্ধানং ৱসেন সত্তট্ঠানকোসল্লপৱত্তিযা পভেদেন ৱিভজিত্ৱা ‘‘তিৱিধূপপৰিক্খী’’তি দস্সেতি ধম্মৰাজা.

সত্তট্ঠানসুত্তৱণ্ণনা নিট্ঠিতা.

৬. সম্মাসম্বুদ্ধসুত্তৱণ্ণনা

৫৮. অধিকং সৱিসেসং পযসতি পযুঞ্জতি এতেনাতি অধিপ্পযাসো, ৱিসিট্ঠপযোগো. তেনাহ ‘‘অধিকপযোগো’’তি. ইমঞ্হি মগ্গন্তি অট্ঠঙ্গিকং অৰিযমগ্গমাহ. ইধাতি ইমস্মিং সুত্তে. অৱত্তমানট্ঠেনাতি বুদ্ধুপ্পাদতো পুব্বে ন ৱত্তমানভাৱেন. মগ্গং জানাতীতি সমুদাগমতো পট্ঠায সপুব্বভাগং সসম্ভাৰৱিসযং সফলং সউদ্ৰযং অৰিযং মগ্গং জানাতি অৱবুজ্ঝতীতি মগ্গঞ্ঞূ. ৱিদিতন্তি অঞ্ঞেসম্পি ঞাতং পটিলদ্ধং হত্থতলে আমলকং ৱিয পাকটং অকাসি, তথা কত্ৱা দেসেসি. অমগ্গে পৰিৱজ্জনেন মগ্গে পটিপত্তীতি তস্স মগ্গকুসলতা ৱিয অমগ্গকুসলতাপি ইচ্ছিতব্বাতি আহ ‘‘মগ্গে চ অমগ্গে চ কোৱিদো’’তি. অহং পঠমং গতোতি অহং পঠমমগ্গেন সমন্নাগতো.

সম্মাসম্বুদ্ধসুত্তৱণ্ণনা নিট্ঠিতা.

৭. অনত্তলক্খণসুত্তৱণ্ণনা

৫৯. পুৰাণুপট্ঠাকেতি পুব্বে পধানপদহনকালে উপট্ঠাকভূতে. ‘‘অৱসৱত্তনট্ঠেন অস্সামিকট্ঠেন সুঞ্ঞতট্ঠেন অত্তপটিক্খেপট্ঠেনা’’তি এৱং পুব্বে ৱুত্তেহি. এত্তকেন ঠানেনাতি ‘‘ৰূপং, ভিক্খৱে, অনত্তা’’তি আৰভিত্ৱা যাৱ ‘‘এৱং মে ৱিঞ্ঞাণং মা অহোসী’’তি এত্তকেন সুত্তপদেসেন. অকথিতস্সেৱ কথনং উত্তৰং, ন কথিতস্সাতি ৱুত্তং ‘‘তানি দস্সেত্ৱা’’তি. সমোধানেত্ৱাতি সম্পিণ্ডিত্ৱা. ৱিত্থাৰকথাতি ৱিত্থাৰতো অট্ঠকথা. অনত্তলক্খণমেৱাতি তব্বহুলতায তপ্পধানতায চ ৱুত্তং. অনিচ্চতাদীনম্পি হি তত্থ তংদীপনত্থমেৱ ৱুত্তত্তা তদেৱ জেট্ঠং পধানং তথা ৱেনেয্যজ্ঝাসযতো.

অনত্তলক্খণসুত্তৱণ্ণনা নিট্ঠিতা.

৮. মহালিসুত্তৱণ্ণনা

৬০. একন্তদুক্খন্তিআদীনি পদানি ৱুত্তনযানেৱ, তস্মা তত্থ ৱুত্তনযেনেৱ অত্থো ৱেদিতব্বো. এত্থ চ যথা সৰাগো হেতু পচ্চযো সংকিলেসায, এৱং সৱিপস্সনো মগ্গো হেতু পচ্চযো চ ৱিসুদ্ধিযাতি দট্ঠব্বং.

মহালিসুত্তৱণ্ণনা নিট্ঠিতা.

৯. আদিত্তসুত্তৱণ্ণনা

৬১. একাদসহীতি ৰাগাদীহি উপাযাসপৰিযোসানেহি একাদসহি সন্তাপনট্ঠেন অগ্গীহি. দ্ৱীসূতি অট্ঠমনৱমেসু. দুক্খলক্খণমেৱাতি তব্বহুলতায তপ্পধানতায চ ৱুত্তং.

আদিত্তসুত্তৱণ্ণনা নিট্ঠিতা.

১০. নিৰুত্তিপথসুত্তৱণ্ণনা

৬২. নিৰুত্তিযোৱ নিৰুত্তিপথাতি পথ-সদ্দেন পদৱড্ঢনমাহ যথা ‘‘বীজানিযেৱ বীজজাতানী’’তি. নিৰুত্তিৱসেনাতি নিব্বচনৱসেন. পথা চ অত্থানুৰূপভাৱতো. তীণিপীতি নিৰুত্তিঅধিৱচনপঞ্ঞত্তিপথপদানি. তথা হি ‘‘ফুসতীতি ফস্সো’’তিআদিনা নীহৰিত্ৱা ৱচনং নিৰুত্তি, ‘‘সিৰীৱড্ঢকো ধনৱড্ঢকো’’তিআদিনা ৱচনমত্তমেৱ অধিকাৰং কত্ৱা পৱত্তং অধিৱচনং, ‘‘তক্কো ৱিতক্কো’’তিআদিনা তংতংপকাৰেন ঞাপনতো পঞ্ঞত্তি. অথ ৱা তংতংঅত্থপ্পকাসনেন নিচ্ছিতং, নিযতং ৱা ৱচনং নিৰুত্তি. অধি-সদ্দো উপৰিভাগে, উপৰি ৱচনং অধিৱচনং. কস্স উপৰি? পকাসেতব্বস্স অত্থস্সাতি পাকটোযমত্থো. অধীনং ৱচনং অধিৱচনং. কেন অধীনং? অত্থেন. অত্থস্স পঞ্ঞাপনত্থেন পঞ্ঞত্তীতি এৱং নিৰুত্তিআদিপদানং সব্বৱচনেসু পৱত্তি ৱেদিতব্বা. অঞ্ঞথা ‘‘ফুসতীতি ফস্সো’’তিআদিপ্পকাৰেন নিদ্ধাৰণৱচনানংযেৱ নিৰুত্তিতা, সিৰিৱড্ঢকধনৱড্ঢকপকাৰানমেৱ অভিলাপনং অধিৱচনতা. ‘‘তক্কো ৱিতক্কো’’তি এৱংপকাৰানমেৱ একমেৱ অত্থং তেন তেন পকাৰেন ঞাপেন্তানং ৱচনানং পঞ্ঞত্তিতা চ আপজ্জেয্য. অসংকিণ্ণাতি ন সংকিণ্ণা. তেনাহ ‘‘অৱিজহিতা…পে… অছড্ডিতা’’তি. ন সংকীযন্তীতি ন সংকিৰীযন্তি, ন সংকীযিস্সন্তি ন সংকিৰীযিস্সন্তীতি অত্থো. অপ্পটিকুট্ঠাতি ন পটিক্খিত্তা. যস্মা ভঙ্গং অতিক্কন্তং উপ্পাদাদি অতিক্কন্তমেৱ হোতি, তস্মা ৱুত্তং ‘‘ভঙ্গমেৱা’’তি. যস্মা দেসন্তৰং সঙ্কন্তোপি অতিক্কন্তন্তি ৱুচ্চতি, তস্মা তদাভাৱং দস্সেতুং ‘‘দেসন্তৰং অসঙ্কমিত্ৱা’’তি ৱুত্তং. যত্থ যত্থ হি সঙ্খাৰা উপ্পজ্জন্তি, তত্থ তত্থেৱ ভিজ্জন্তি নিৰুজ্ঝন্তি ৱিপৰিণমন্তি ৱিনাসং আপজ্জন্তি. তেনাহ ‘‘ৱিপৰিণতন্তি…পে… নট্ঠ’’ন্তি. অপাকটীভূতং অজাতত্তা এৱ.

ৱসভণগোত্ততায ৱস্সভঞ্ঞা. মূলদিট্ঠিগতিকাতি মূলভূতা দিট্ঠিগতিকা, ইমস্মিং কপ্পে সব্বপঠমং তাদিসদিট্ঠিসমুপ্পাদকা. পুনপ্পুনং আৱজ্জেন্তস্সাতি অহেতুৱাদপটিসংযুত্তগন্থং উগ্গহেত্ৱা পৰিযাপুণিত্ৱা তদত্থং ৱীমংসন্তস্স ‘‘নত্থি হেতু, নত্থি পচ্চযো সত্তানং সংকিলেসাযা’’তিআদিনযপ্পৱত্তায লদ্ধিযা আৰম্মণে মিচ্ছাসতি সন্তিট্ঠতি, ‘‘নত্থি হেতূ’’তিআদিৱসেন অনুস্সৱূপলদ্ধে অত্থে তদাকাৰপৰিৱিতক্কনেহি সৱিগ্গহে ৱিয সৰূপতো চিত্তস্স পচ্চুপট্ঠিতে চিৰকালপৰিচযেন ‘‘এৱমেত’’ন্তি নিজ্ঝানক্খমভাৱূপগমনেন নিজ্ঝানক্খন্তিযা তথাগহিতে পুনপ্পুনং তথেৱ আসেৱন্তস্স বহুলীকৰোন্তস্স মিচ্ছাৱিতক্কেন সমাদিযমানা মিচ্ছাৱাযামূপত্থম্ভিতা অতংসভাৱং ‘‘তংসভাৱ’’ন্তি গণ্হন্তী মিচ্ছাসতীতি লদ্ধনামা তংলদ্ধিসহগতা তণ্হা সন্তিট্ঠতি. যথাসকং ৱিতক্কাদিপচ্চযলাভেন তস্মিং আৰম্মণে অধিট্ঠিততায অনেকগ্গতং পহায চিত্তং একগ্গতং অপ্পিতং ৱিয হোতি মিচ্ছাসমাধিনা. সোপি হি পচ্চযৱিসেসেহি লদ্ধভাৱনাবলো ঈদিসে ঠানে সমাধানপতিৰূপকিচ্চকৰো হোতিযেৱ ৱালৱিজ্ঝনাদীসু ৱিযাতি দট্ঠব্বং. তথা হি অনেকক্খত্তুং তেনাকাৰেন পুব্বভাগিযেসু জৱনৱাৰেসু পৱত্তেসু সব্বপচ্ছিমে জৱনৱাৰে সত্ত জৱনানি জৱন্তি. তত্থ পঠমে সতেকিচ্ছো হোতি, তথা দুতিযাদীসু. সত্তমে পন জৱনে সম্পত্তে অতেকিচ্ছো হোতি. তেনাহ ‘‘অস্সাদেন্তস্সা’’তিআদি. ইমেসুপীতি দ্ৱীসুপি ঠানেসু.

পচ্চুপ্পন্নং ৱাতি এত্থ ইতি-সদ্দো আদিঅত্থো. তেন ‘‘যদেতং অনাগতং নাম, নযিদং অনাগত’’ন্তিআদিকং সঙ্গণ্হাতি. তেপীতি তে ৱস্সভঞ্ঞাপি ন মঞ্ঞিংসু লোকসমঞ্ঞায অনতিক্কমনীযতো. তেনাহ ‘‘অতীতং পনা’’তিআদি. খন্ধানং উপৰি নিৰুড়্হা পণ্ণত্তি.

নিৰুত্তিপথসুত্তৱণ্ণনা নিট্ঠিতা.

উপযৱগ্গৱণ্ণনা নিট্ঠিতা.