১১. অন্তৱগ্গো

১. অন্তসুত্তৱণ্ণনা

১০৩. অঞ্ঞমঞ্ঞং অসংসট্ঠভাৱেন এতি গচ্ছতীতি অন্তো, ভাগোতি আহ ‘‘অন্তাতি কোট্ঠাসা’’তি. ‘‘সক্কাযনিৰোধন্তো’’তি নিৰোধপচ্চযস্স গহিতত্তা ৱুত্তং ‘‘চতুসচ্চৱসেন পঞ্চক্খন্ধে যোজেত্ৱা’’তি. অন্তোতি…পে… অজ্ঝাসযৱসেন ৱুত্তং যথানুলোমদেসনত্তা সুত্তন্তদেসনায.

অন্তসুত্তৱণ্ণনা নিট্ঠিতা.

২-৩. দুক্খসুত্তাদিৱণ্ণনা

১০৪-১০৫. দুতিযম্পীতি অপি-সদ্দো সম্পিণ্ডনত্থো. তেন ন কেৱলং পঠমসুত্তমেৱ, অথ খো দুতিযম্পীতি.

ততিযম্পি তথেৱাতি ইমিনা ‘‘পঞ্চক্খন্ধে চতুসচ্চৱসেন যোজেত্ৱা’’তি ইদং উপসংহৰতি.

দুক্খসুত্তাদিৱণ্ণনা নিট্ঠিতা.

৪. পৰিঞ্ঞেয্যসুত্তৱণ্ণনা

১০৬. পৰিঞ্ঞেয্যেতি এত্থ তিস্সো পৰিঞ্ঞা ঞাতপৰিঞ্ঞা, তীৰণপৰিঞ্ঞা, পহানপৰিঞ্ঞাতি. তাসু ঞাতপৰিঞ্ঞা যাৱদেৱ তীৰণপৰিঞ্ঞত্থা. তীৰণপৰিঞ্ঞা চ যাৱদেৱ পহানপৰিঞ্ঞত্থাতি. তত্থ উক্কট্ঠায পৰিঞ্ঞায কিচ্চদস্সনৱসেন অত্থং দস্সেন্তো ‘‘পৰিঞ্ঞেয্যেতি পৰিজানিতব্বে সমতিক্কমিতব্বে’’তি, পহাতব্বেতি অত্থো. তেনাহ ভগৱা – ‘‘কতমা চ, ভিক্খৱে, পৰিঞ্ঞা? ৰাগক্খযো, দোসক্খযো, মোহক্খযো’’তি, তস্মা সমতিক্কমন্তি, সমতিক্কন্তং পহানস্স উপাযং. সমতিক্কমিত্ৱা ঠিতন্তি পজহিত্ৱা ঠিতন্তি অযমেত্থ অত্থো.

পৰিঞ্ঞেয্যসুত্তৱণ্ণনা নিট্ঠিতা.

৫-১০. সমণসুত্তাদিৱণ্ণনা

১০৭-১১২. চত্তাৰি সচ্চানি কথিতানি অস্সাদাদীনং সমুদযাদীনঞ্চ দেসিতত্তা.

কিলেসপ্পহানং কথিতং ৰাগপ্পহানস্স জোতিতত্তা.

সমণসুত্তাদিৱণ্ণনা নিট্ঠিতা.

অন্তৱগ্গৱণ্ণনা নিট্ঠিতা.