১২. ধম্মকথিকৱগ্গো

১-২. অৱিজ্জাসুত্তাদিৱণ্ণনা

১১৩-১১৪. যাৱতাতি যস্মা. ইমায…পে… সমন্নাগতোতি ‘‘ইদং দুক্খন্তি যথাভূতং নপ্পজানাতী’’তিআদিনা নযেন ৱুত্তায চতূসু অৰিযসচ্চেসু অঞ্ঞাণসভাৱায অৱিজ্জায সম্মোহেন সমন্নাগতো. এত্তাৱতাতি এত্তকেন কাৰণেন অৱিজ্জাগতো সমঙ্গীভূতেন উপগতো, অৱিজ্জায ৱা উপেতো নাম হোতি.

দুতিযেপীতি ৱিজ্জাসুত্তে. ‘‘ৱিজ্জাৱসেন দেসনা’’তি অযমেৱ ৱিসেসোতি আহ ‘‘এসেৱ নযো’’তি.

অৱিজ্জাসুত্তাদিৱণ্ণনা নিট্ঠিতা.

৩. ধম্মকথিকসুত্তৱণ্ণনা

১১৫. পঠমেন ধম্মকথিকো কথিতো ‘‘ধম্মং দেসেতী’’তি ৱুত্তত্তা. দুতিযেন সেখভূমি কথিতা ‘‘পটিপন্নো হোতী’’তি ৱুত্তত্তা, ততিযেন অসেখভূমি কথিতা ‘‘অনুপাদাৱিমুত্তো হোতী’’তি ৱুত্তত্তা. ধম্মকথিকং পুচ্ছিতেন ভগৱতা. ৱিসেসেত্ৱাতি ধম্মকথিকভাৱতো ৱিসেসেত্ৱা উক্কংসেত্ৱা. দ্ৱে ভূমিযোতি সেক্খাসেক্খভূমিযো.

ধম্মকথিকসুত্তৱণ্ণনা নিট্ঠিতা.

৪. দুতিযধম্মকথিকসুত্তৱণ্ণনা

১১৬. তীণি ৱিস্সজ্জনানীতি যথাপুচ্ছং তীণি ৱিস্সজ্জনানি.

দুতিযধম্মকথিকসুত্তৱণ্ণনা নিট্ঠিতা.

৫-৯. বন্ধনসুত্তাদিৱণ্ণনা

১১৭-১২১. তীৰং ৱুচ্চতি ৱট্টং ওৰিমতীৰন্তি কত্ৱা. তেনাহ ‘‘অথাযং ইতৰা পজা, তীৰমেৱানুধাৱতী’’তি (ধ. প. ৮৫). পাৰং ৱুচ্চতি নিব্বানং সংসাৰস্স পাৰিমন্তি কত্ৱা. বদ্ধোতি অনুসযপ্পহানস্স অকতত্তা কিলেসবন্ধনেন বদ্ধো, সুক্কপক্খেপি দিট্ঠিসমনুপস্সনায ৰূপাদিবন্ধনস্স পটিক্খেপমত্তমেৱ ৱুত্তং, ন ৱিমোক্খন্তি অধিপ্পাযো. ইমস্মিং সুত্তে ৱট্টদুক্খং কথিতন্তি ‘‘তীৰদস্সী পাৰদস্সী, পৰিমুত্তো সো দুক্খস্মাতি ৱদামী’’তি আগতত্তা ৱট্টৱিৱট্টং কথিকন্তি ৱত্তুং সক্কা.

ছট্ঠাদীনি উত্তানত্থানেৱ হেট্ঠা ৱুত্তনযত্তা.

বন্ধনসুত্তাদিৱণ্ণনা নিট্ঠিতা.

১০. সীলৱন্তসুত্তৱণ্ণনা

১২২. আবাধট্ঠেনাতি আদিতো উপ্পত্তিতো পট্ঠায বাধনট্ঠেন ৰুজনট্ঠেন. অন্তোদোসট্ঠেনাতি অব্ভন্তৰে এৱ দুস্সনট্ঠেন কুপ্পনট্ঠেন. খণনট্ঠেনাতি সসনট্ঠেন. দুক্খট্ঠেনাতি দুক্খমত্তা দুক্খভাৱেন. দুক্খঞ্হি লোকে ‘‘অঘ’’ন্তি ৱুচ্চতি অতিৱিয হননতো. ৱিসভাগং …পে… পচ্চযট্ঠেনাতি যথাপৱত্তমানানং ধাতাদীনং ৱিসভাগভূতমহাভূতসমুট্ঠানস্স আবাধস্স পচ্চযভাৱেন. অসকট্ঠেনাতি অনত্তনিযতো. পলুজ্জনট্ঠেনাতি পকাৰতো ভিজ্জনট্ঠেন. সত্তসুঞ্ঞতট্ঠেনাতি সত্তসঙ্খাতঅত্তসুঞ্ঞতট্ঠেন. অত্তাভাৱেনাতি দিট্ঠিগতিকপৰিকপ্পিতস্স অত্তনো অভাৱেন. সুঞ্ঞতো অনত্ততোতি এত্থ ‘‘পৰতো’’তি পদস্স সঙ্গহো কাতব্বো, তস্মা ‘‘দ্ৱীহি অনত্তমনসিকাৰো’’তি ৱত্তব্বং.

সীলৱন্তসুত্তৱণ্ণনা নিট্ঠিতা.

১১. সুতৱন্তসুত্তৱণ্ণনা

১২৩. তথা একাদসমেতি এত্থ তথা-সদ্দেন ‘‘উত্তানমেৱা’’তি ইদং আকড্ঢতি. ইধাতি একাদসমে. কম্মট্ঠানস্স উগ্গহধাৰণপৰিচযমনসিকাৰৱসেন পৱত্তঞাণং কম্মট্ঠানসুতৱসেন নিপ্ফজ্জনতো ‘‘সুত’’ন্তি ৱুত্তং.

সুতৱন্তসুত্তৱণ্ণনা নিট্ঠিতা.

১২-১৩. কপ্পসুত্তাদিৱণ্ণনা

১২৪-১২৫. ৰাহুলোৱাদসদিসানীতি ৰাহুলোৱাদসুত্তে (ম. নি. ২.১১৩ আদযো) আগতসুত্তসদিসানি.

কপ্পসুত্তাদিৱণ্ণনা নিট্ঠিতা.

ধম্মকথিকৱগ্গৱণ্ণনা নিট্ঠিতা.