১০. পুপ্ফৱগ্গো

১. নদীসুত্তৱণ্ণনা

৯৩. পব্বতেয্যাতি পব্বততো আগতা. ততো এৱ ওহাৰিনী. তেনস্সা চণ্ডসোততং দস্সেতি. দূৰং গচ্ছতীতি দূৰঙ্গমা. তেনস্সা মহোঘতং দস্সেতি.

সোতেতি ৱট্টসোতে. চতূহি গাহেহীতি ‘‘ৰূপং অত্ততো সমনুপস্সতী’’তিআদিনযপ্পৱত্তেহি চতূহি গাহেহি. পলুজ্জনত্তাতি ছিন্নত্তা. সোকাদিব্যসনপ্পত্তীতি সোকাদিঅনত্থুপ্পত্তি.

নদীসুত্তৱণ্ণনা নিট্ঠিতা.

২. পুপ্ফসুত্তৱণ্ণনা

৯৪. ৱিৱদতীতি ৱিৱাদং কৰোতি. ৱদন্তোতি অযথাসভাৱেন ৱদন্তো. ৱিৱদতি ধম্মতায ৱিৰুদ্ধং কত্ৱা ৱদতি. লোকধম্মোতি লুজ্জনসভাৱধম্মো. কো পন সোতি আহ ‘‘খন্ধপঞ্চক’’ন্তি. তেনাহ ‘‘তং হী’’তিআদি. কথং কৰোমীতি কেন পকাৰেনাহং বালং অজানন্তং কৰোমি. তেনাহ ‘‘ময্হং হী’’তিআদি. তথা চাহ ‘‘অক্খাতো ৱো মযা মগ্গো’’তিআদি (ধ. প. ২৭৫). ‘‘তযো লোকা কথিতা’’তি ৱত্ৱা তং ৱিৱৰিতুং ‘‘নাহং, ভিক্খৱে’’তিআদিমাহ.

পুপ্ফসুত্তৱণ্ণনা নিট্ঠিতা.

৩. ফেণপিণ্ডূপমসুত্তৱণ্ণনা

৯৫. কেনচি কাৰণেন যুজ্ঝিত্ৱা গহেতুং ন সক্কাতি অযুজ্ঝা নাম. নিৱত্তনট্ঠানেতি উদকপ্পৱাহস্স নিৱত্তিতট্ঠানে.

অনুসোতাগমনেতি অনুসোতং আগমনহেতু, ‘‘অনুসোতাগমনেনা’’তি ৱা পাঠো. অনুপুব্বেন পৱড্ঢিত্ৱাতি তত্থ তত্থ উট্ঠিতানং খুদ্দকমহন্তানং ফেণপিণ্ডানং সংসগ্গেন পকাৰতো ৱুদ্ধিং পত্ৱা. আৱহেয্যাতি আনেত্ৱা ৱহেয্য. কাৰণেন উপপৰিক্খেয্যাতি ঞাণেন ৱীমংসেয্য. ‘‘সাৰো নাম কিং ভৱেয্যা’’তি ৱত্ৱা সব্বসো তদভাৱং দস্সেন্তো ‘‘ৱিলীযিত্ৱা ৱিদ্ধংসেয্যেৱা’’তি আহ. তেন ৰূপম্পি নিস্সাৰতায ভিজ্জতেৱাতি দস্সেতি. যথা হি অনিচ্চতায অসাৰতাসিদ্ধি, এৱং অসাৰতাযপি অনিচ্চতাসিদ্ধীতি অনিচ্চতায এৱ নিচ্চসাৰং থিৰভাৱসাৰং ধুৱসাৰং সামীনিৱাসীকাৰকভূতস্স অত্তনো ৱসে পৱত্তনম্পেত্থ নত্থীতি আহ ‘‘ৰূপম্পি…পে… নিস্সাৰমেৱা’’তি. সোতি ফেণপিণ্ডো. গহিতোপি উপাযেন তমত্থং ন সাধেতি অনৰহত্তা. অনেকসন্ধিঘটিতো তথা তথা ঘটিতো হুত্ৱা.

ব্যামমত্তম্পি এতৰহি মনুস্সানং ৱসেন. অৱস্সমেৱ ভিজ্জতি তৰঙ্গব্ভাহতং হুত্ৱা.

তস্মিং তস্মিং উদকবিন্দুম্হি পতিতে. উদকতলন্তি উদকপিট্ঠিং. অঞ্ঞতো পতন্তং উদকবিন্দুং. উদকজল্লন্তি সন্তানকং হুত্ৱা ঠিতং উদকমলং. তঞ্হি সংকড্ঢিত্ৱা ততো উদকং পুটং কৰোতি, তস্মিং পুটে পুব্বুড়সমঞ্ঞা. ৱত্থুন্তি চক্খাদিৱত্থুং. আৰম্মণন্তি ৰূপাদিআৰম্মণং. কিলেসজল্লন্তি পুৰিমসিদ্ধং, পটিলব্ভমানং ৱা কিলেসমলং. ফস্সসঙ্ঘট্টনন্তি ফস্সসমোধানং. পুব্বুড়সদিসা মুহুত্তৰমণীযতায. যস্মা ঘম্মকালে সূৰিযাতপসন্তাপাভিনিব্বত্তৰস্মিজালনিপাতে তাদিসে ভূমিপদেসে ইতো চিতো সমুগ্গতৱাতৱেগসমুদ্ধটৱিৰুড়্হসঙ্খাতেসু পৰিব্ভমন্তেসু অণুপৰমাণুতজ্জাৰিপ্পকাৰেসু ভূতসঙ্ঘাতেসু মৰীচিসমঞ্ঞা, তস্মা সব্বসো সাৰৱিৰহিতাতি ৱুত্তং ‘‘সঞ্ঞাপি অসাৰকট্ঠেন মৰীচিসদিসা’’তি. যস্মা চ পস্সন্তানং যেভুয্যেন উদকাকাৰেন খাযতি, তস্মা ‘‘গহেত্ৱা পিৱিতুং ৱা’’তিআদি ৱুত্তং. নীলাদিঅনুভৱনত্থাযাতি নীলাদিআৰম্মণস্স অনুভৱনত্থায. ফন্দতীতি ফন্দনাকাৰপ্পত্তা ৱিয হোতি অপ্পহীনতণ্হস্স পুগ্গলস্স. ৱিপ্পলম্ভেতি অপ্পহীনৱিপল্লাসং পুগ্গলং. তেনাহ ‘‘ইদং নীলক’’ন্তিআদি. সঞ্ঞাৱিপল্লাসতো হি চিত্তৱিপল্লাসো, ততো দিট্ঠিৱিপল্লাসোতি. ৱিপ্পলম্ভনেনাতি ৱিপ্পকাৰৱসেনেৱ আৰম্মণস্স লম্ভনেন. ৱিপ্পকাৰৱসেন হি এতং লম্ভনং, যদিদং অনুদকমেৱ উদকং কত্ৱা দস্সনং অনগৰমেৱ নগৰং কত্ৱা গন্ধব্বনাটকাদিদস্সনং.

কুক্কুকং ৱুচ্চতি কদলিক্খন্ধস্স সব্বপত্তৱট্টীনং অব্ভন্তৰে দণ্ডকন্তি আহ ‘‘অকুক্কুকজাতন্তি অন্তো অসঞ্জাতঘনদণ্ডক’’ন্তি. ন তথা হোতীতি যদত্থায উপনীতং, তদত্থায ন হোতি. নানালক্খণোতি নানাসভাৱো. সঙ্খাৰক্খন্ধোৱাতি একো সঙ্খাৰক্খন্ধোত্ৱেৱ ৱুচ্চতি.

অস্সাতি পুৰিসস্স. অপগতপটলপিড়কন্তি অপগতপটলদোসঞ্চেৱ অপগতপিড়কদোসঞ্চ. অসাৰভাৱদস্সনসমত্থন্তি অসাৰস্স অসাৰভাৱদস্সনসমত্থং. ইত্তৰাতি পৰিত্তকালা, ন চিৰট্ঠিতিকা. তেনাহ ‘‘লহুপচ্চুপট্ঠানা’’তি. অঞ্ঞদেৱ চ আগমনকালে চিত্তন্তি ইদঞ্চ ওড়াৰিকৱসেনেৱ ৱুত্তং. তথা হি একচ্ছৰক্খণে অনেককোটিসতসহস্সসঙ্খানি চিত্তানি উপ্পজ্জিত্ৱা নিৰুজ্ঝন্তি. মাযায দস্সিতং ৰূপং মাযাতি ৱুত্তং. যংকিঞ্চিদেৱ কপালিট্ঠকপাসাণৱালিকাদিং. ৱঞ্চেতীতি অসুৱণ্ণমেৱ সুৱণ্ণন্তি, অমুত্তমেৱ মুত্তাতিআদিনা ৱঞ্চেতি. ননু চ সঞ্ঞাপি মৰীচি ৱিয ৱিপ্পলম্ভেতি ৱঞ্চেতি, ইদম্পি ৱিঞ্ঞাণং মাযা ৱিয ৱঞ্চেতীতি কো ইমেসং ৱিসেসোতি? ৱচনত্থো নেসং সাধাৰণো. তথাপি সঞ্ঞা অনুদকংযেৱ উদকং কত্ৱা গাহাপেন্তী, অপুৰিসঞ্ঞেৱ পুৰিসং কত্ৱা গাহাপেন্তী ৱিপ্পলম্ভনৱসেন অপ্পৱিসযা, ৱিঞ্ঞাণং পন যং কিঞ্চি অতংসভাৱং তং কত্ৱা দস্সেন্তী মাযা ৱিয মহাৱিসযা. তেনাহ ‘‘যংকিঞ্চিদেৱা’’তিআদি. এৱম্পীতি অতিৱিয লহুপৰিৱত্তিভাৱেনপি মাযাসদিসন্তি.

দেসিতাতি এৱং দেসিতা ফেণপিণ্ডাদিউপমাহি.

ভূৰি ৱুচ্চতি পথৱী, সণ্হট্ঠেন ৱিপুলট্ঠেন চ ভূৰিসদিসপঞ্ঞতায ভূৰিপঞ্ঞো. তেনাহ ‘‘সণ্হপঞ্ঞেন চেৱা’’তিআদি. কিমিগণাদীনন্তি আদি-সদ্দেন অনেকগিজ্ঝাদিকে সঙ্গণ্হাতি. পৱেণীতি ধম্মপবন্ধো. বাললাপিনী ‘‘অহং মমা’’তিআদিনা. সেসধাতুযো গহেত্ৱাৱ ভিজ্জতি একুপ্পাদেকনিৰোধত্তা, ৱত্থুৰূপনিস্সযপচ্চযত্তা ‘‘অয’’ন্তি ন ৱিসুং গহিতং. ৱধভাৱতোতি ৱধস্স মৰণস্স অত্থিভাৱতো. সৰণন্তি পটিসৰণং.

ফেণপিণ্ডূপমসুত্তৱণ্ণনা নিট্ঠিতা.

৪-৬. গোমযপিণ্ডসুত্তাদিৱণ্ণনা

৯৬-৯৮. সস্সতং সব্বকালং যাৱ কপ্পৱুট্ঠানা হোন্তীতি সস্সতিযো, সিনেৰুআদযো. তাহি সমং সমকালং. অনেনাতি ভগৱতা. নযিদন্তি এত্থ য-কাৰো পদসন্ধিকৰো, ইদন্তি নিপাতপদং. তং পন যেন যেন সম্বন্ধীযতি, তং তিলিঙ্গোৱ হোতীতি ‘‘অযং মগ্গব্ৰহ্মচৰিযৱাসো’’তি ৱুত্তং. ‘‘ন পঞ্ঞাযেয্যা’’তি ৱত্ৱা তমত্থং ৱিৱৰিতুং ‘‘মগ্গো হী’’তিআদি ৱুত্তং. ৱিৱট্টেন্তোতি ৱিনিৱট্টেন্তো অপ্পৱত্তিং কৰোন্তো.

ৰাজধানীতি ৰঞ্ঞো নিৱাসনগৰং. সুত্তমযন্তি চিত্তৱণ্ণৱট্টিকামযং.

গোমযপিণ্ডসুত্তাদিৱণ্ণনা নিট্ঠিতা.

৭. গদ্দুলবদ্ধসুত্তৱণ্ণনা

৯৯. যং মহাসমুদ্দোতি এত্থ যন্তি সমযস্স পচ্চামসনং. ভুম্মত্থে চেতং পচ্চত্তৱচনন্তি আহ ‘‘যস্মিং সমযে’’তি. সো চ সমযো অযন্তি দস্সেন্তো ‘‘পঞ্চমে সূৰিযে উট্ঠিতে’’তি আহ. পৰিচ্ছেদং ন ৱদামি পৰিচ্ছেদকাৰিকায অগ্গমগ্গৱিজ্জায অনধিগতত্তা. সুনখো ৱিয ৱট্টনিস্সিতো বালো অসৱসভাৱতো. গদ্দুলো ৱিয দিট্ঠিবন্ধো. সক্কাযো তস্স অসৱসভাৱতো. পুথুজ্জনস্স সক্কাযানুপৰিৱত্তনন্তি ‘‘সন্তানে সত্তৱোহাৰো’’তি তং ততো অঞ্ঞং কত্ৱা ভেদেন নিদ্দেসো.

গদ্দুলবদ্ধসুত্তৱণ্ণনা নিট্ঠিতা.

৮. দুতিযগদ্দুলবদ্ধসুত্তৱণ্ণনা

১০০. দিট্ঠিগদ্দুলনিস্সিতাযাতি সহজাতাদিপচ্চযৱসেন দিট্ঠিগদ্দুলনিস্সিতায নিস্সাযেৱ পৱত্ততি ততো অত্তানং ৱিৱেচেতুং অসক্কুণেয্যত্তা. চিত্তসংকিলেসেনেৱাতি দসৱিধকিলেসৱত্থুৱসেন চিত্তস্স সংকিলিট্ঠভাৱেন. অৰিযমগ্গাধিগমনেন চিত্তস্স ৱোদানত্তা ৱোদাযন্তি ৱিসুজ্ঝন্তি.

ৱিচৰণচিত্তন্তি গহেত্ৱা ৱিচৰণৱসেন ৱিচৰণচিত্তং. সঙ্খানামাতি এৱংনামকা. ব্ৰাহ্মণপাসণ্ডিকাতি জাতিযা ব্ৰাহ্মণা, ছন্নৱুতিযা পাসণ্ডেসু তং সঙ্খাসঞ্ঞিতং পাসণ্ডং পগ্গয্হ ৱিচৰণকা. পটকোট্ঠকন্তি দুস্সাপণকং. দস্সেন্তাতি যথাগতিকম্মৱিপাকচিত্ততং দস্সেন্তা. তং চিত্তন্তি তং পটকোট্ঠকচিত্তং গহেত্ৱা ৱিচৰন্তি. চিন্তেত্ৱা কতত্তাতি ‘‘ইমস্স ৰূপস্স এৱং হত্থপাদা, এৱং মুখং লিখিতব্বং, এৱং আকাৰৱত্থগ্গহণানি, এৱং কিৰিযাৱিসেসা, এৱং কিৰিযাৱিভাগং, সত্তৱিসেসানং ৱিভাগং কাতব্ব’’ন্তি তস্স উব্বত্তনখিপনপৱত্তনাদিপযোজনঞ্চাতি সব্বমেতং তথা চিন্তেত্ৱা কতত্তা চিত্তেন মনসা চিন্তিতং নাম. উপাযপৰিযেসনচিত্তন্তি ‘‘হত্থপাদা এৱং লিখিতব্বা’’তিআদিনা যথাৱুত্তউপাযস্স চেৱ পুব্বে পৱত্তস্স ভূমিপৰিকম্মৱণ্ণধাতুসম্মাযোজনুপাযস্স চ ৱসেন পৱত্তং চিত্তং. ততোপি চিত্ততৰন্তি ততো চিত্তকম্মতোপি চিত্ততৰং চিত্তকাৰেন চিন্তিতপ্পকাৰানং সব্বেসংযেৱ চিত্তকম্মে অনিপ্ফজ্জনতো. কম্মচিত্তেনাতি কম্মৱিঞ্ঞাণেন. কম্মচিত্তেনাতি ৱা কম্মস্স চিত্তভাৱেন. সো কম্মস্স ৱিচিত্তভাৱো তণ্হাৱসেন জাযতীতি ৱেদিতব্বো. স্ৱাযমত্থো অট্ঠসালিনীটীকাযং ৱিভাৱিতো. এৱং চিত্তাতি এৱং চিত্তৰূপৱিসেসা. যোনিং উপনেতীতি তং তং অণ্ডজাদিভেদং যোনিৱিসেসং পাপেতি ৱণ্ণৱিসেসো ৱিয ফলিকমণিকং. ন হি ৱিসেসা হিতৱিচিত্তসামত্থিযকম্মং যোনিং উপনেতি, তস্স তস্স ৱিপাকুপ্পত্তিযা পচ্চযো হোতি. যোনিমূলকো তেসং চিত্তভাৱোতি যং যং যোনিং কম্মং সত্তে উপনেতি, তংতংযোনিমূলকো তেসং সত্তানং চিত্তৱিচিত্তভাৱো. তেনাহ ‘‘যোনিউপগতা’’তিআদি. সদিসচিত্তাৱ সদিসচিত্তভাৱা এৱ. ইতীতিআদি ৱুত্তস্সেৱ অত্থস্স উপ্পটিপাটিযা নিগমনং.

তিৰচ্ছানগতচিত্তভাৱতো চিত্তস্সেৱ সৱিসেসং চিত্তভাৱকৰণং দস্সেতুং ‘‘অপিচা’’তিআদি ৱুত্তং. তত্থ চিত্তং নামেতং চিত্ততৰমেৱ ৱেদিতব্বন্তি সম্বন্ধো. সহজাতধম্মচিত্ততাযাতি ৰাগাদিসদ্ধাদিধম্মৱিচিত্তভাৱেন. ভূমিচিত্ততাযাতি অধিট্ঠানচিত্ততায. কম্মনানত্তং মূলং কাৰণং এতেসন্তি কম্মনানত্তমূলকা, তেসং. লিঙ্গনানত্তং ইত্থিলিঙ্গাদিনানত্তৱসেন চেৱ তংতংসণ্ঠাননানত্তৱসেন চ ৱেদিতব্বং. সঞ্ঞানানত্তং ইত্থিপুৰিসদেৱমনুস্সাদিসঞ্ঞানানত্তৱসেন. ৱোহাৰনানত্তং তিস্সোতিআদিৱোহাৰনানত্তৱসেন. চিত্তানং ৱিচিত্তানং. তংতংৱোহাৰনানত্তম্পি চিত্তেনেৱ পঞ্ঞপীযতি. ৰঙ্গজাতৰূপসমুট্ঠাপনাদিনা ৱত্থং ৰঞ্জযতীতি ৰজকো, ৱণ্ণকাৰো. পুথুজ্জনস্স অত্তভাৱসঞ্ঞিতৰূপসমুট্ঠাপনতা নিযতা একন্তিকাতি পুথুজ্জনগ্গহণং. ‘‘অভিৰূপং ৰূপং সমুট্ঠাপেতী’’তি আনেত্ৱা সম্বন্ধো.

দুতিযগদ্দুলবদ্ধসুত্তৱণ্ণনা নিট্ঠিতা.

৯. ৱাসিজটসুত্তৱণ্ণনা

১০১. অত্থস্সাতি হিতস্স. অসাধিকা ‘‘ভাৱনানুযোগং অননুযুত্তস্সা’’তি অননুযুত্তস্স ৱুত্তত্তা. ইতৰাতি সুক্কপক্খউপমা. সাধিকা ভাৱনাযোগস্স অনুযুত্তত্তা. তঞ্হি তস্স সাধিকা ৱেদিতব্বা. সম্ভাৱনত্থেতি পৰমত্থসম্ভাৱনে. এৱঞ্হি কণ্হপক্খেপি অপিসদ্দগ্গহণং সমত্থিতং হোতি. সম্ভাৱনত্থেতি ৱা পৰিকপ্পনত্থেতি অত্থো. সঙ্খাতব্বে অত্থে অনিযমতো ৱুচ্চমানে সঙ্খাতো অনিযমত্থো ৱাসদ্দো ৱত্তব্বোতি ‘‘অট্ঠ ৱা’’তিআদি ৱুত্তং. ঊনাধিকানীতি ঊনানিপি অধিকানিপি কিঞ্চাপি হোন্তি, একংসো পন গহেতব্বোতি ‘‘অট্ঠ ৱা দস ৱা দ্ৱাদস ৱা’’তি ৱুত্তং. এৱং ৱচনং সন্ধায ‘‘ৱচনসিলিট্ঠতাযা’’তিআদি ৱুত্তং. পাদনখসিখাহি অকোপনৱসেন সম্মা অধিসযিতানি. উতুন্তি উণ্হউতুং কাযুস্মাৱসেন. তেনাহ ‘‘উস্মীকতানী’’তি. ভাৱিতানীতি কুক্কুটৱাসনায ৱাসিতানি. সম্মাঅধিসযনাদিতিৱিধকিৰিযাকৰণেন ইমং অপ্পমাদং কত্ৱা. সোত্থিনা অভিনিব্ভিজ্জিতুন্তি অনন্তৰাযেন ততো নিক্খমিতুং. ইদানি তমত্থং ৱিৱৰন্তো ‘‘তে হী’’তিআদিমাহ. সযম্পীতি অণ্ডানি. পৰিণামন্তি পৰিপক্কং বহিনিক্খমনযোগ্গতং.

তন্তি ওপম্মসম্পটিপাদনং. এৱন্তি ইদানি ৱুচ্চমানাকাৰেন. অত্থেনাতি উপমেয্যত্থেন. সংসন্দিত্ৱা সম্মা যোজেত্ৱা. সম্পযুত্তধম্মৱসেন ঞাণস্স তিক্খাদিভাৱো ৱেদিতব্বো. ঞাণস্স হি সভাৱতো সতিনেপক্কতো চ তিক্খভাৱো, সমাধিৱসেন সূৰভাৱো, সদ্ধাৱসেন ৱিপ্পসন্নভাৱো, ৱীৰিযৱসেন পৰিণামভাৱো. পৰিণামকালোতি বলৱৱিপস্সনাকালো. ৱড্ঢিতকালোতি ৱুট্ঠানগামিনিৱিপস্সনাকালো. অনুলোমট্ঠানস্স হি ৱিপস্সনা গহিতগব্ভা নাম তদা মগ্গগব্ভস্স গহিতত্তা. তজ্জাতিকন্তি তস্স ৱিপস্সনানুযোগস্স অনুৰূপং. সত্থাপি গাথায অৱিজ্জণ্ডকোসং পহৰতি ভিন্দাপেতি.

ওলম্বকসঙ্খাতন্তি ওলম্বকসুত্তসঙ্খাতং. পলন্তি তস্স সুত্তস্স নামং. ধাৰেত্ৱাতি দাৰূনং হেয্যাদিজাননত্থং উপনেত্ৱা. দাৰূনং গণ্ডং হৰতীতি পলগণ্ডোতি এতেন পলেন গণ্ডহাৰো ‘‘পলগণ্ডো’’তি পচ্ছিমপদে উত্তৰপদলোপেন নিদ্দেসোতি দস্সেতি. গহণট্ঠানেতি হত্থেন গহেতব্বট্ঠানে. সম্মদেৱ খেপীযন্তি এতেন কাযদুচ্চৰিতাদীনীতি সঙ্খেপো, তেন. ৱিপস্সনং অনুযুঞ্জন্তস্স পুগ্গলস্সেৱ দিৱসে দিৱসে আসৱানং পৰিক্খযো ইধ ‘‘ৱিপস্সনাযানিসংসো’’তি অধিপ্পেতো. হেমন্তিকেন কৰণভূতেন. ভুম্মত্থে ৱা এতং কৰণৱচনং, হেমন্তিকেতি অত্থো. পটিপ্পস্সম্ভন্তীতি পটিপ্পস্সদ্ধফলানি হোন্তি. তেনাহ ‘‘পূতিকানি ভৱন্তী’’তি.

মহাসমুদ্দো ৱিয সাসনং সভাৱগম্ভীৰভাৱতো. নাৱা ৱিয যোগাৱচৰো মহোঘুত্তৰণতো. পৰিযাদানং ৱিযাতি পৰিতো অপৰিপূৰণং ৱিয. খজ্জমানানন্তি সঙ্খাদন্তেন ৱিয উদকেন খেপিযমানানং বন্ধনানং. তনুভাৱোতি পৰিযুট্ঠানুপ্পত্তিযা অসমত্থতায দুব্বলভাৱো. ৱিপস্সনাঞাণপীতিপামোজ্জেহীতি ৱিপস্সনাঞাণসমুট্ঠিতেহি পীতিপামোজ্জেহি. ওক্খাযমানে পক্খাযমানেতি ৱিৱিধপটিপত্তিযা উক্খাযমানে পটিসঙ্খানুপস্সনায পক্খাযমানে. দুব্বলতা দীপিতা ‘‘অপ্পকসিৰেনেৱ সংযোজনানি পটিপ্পস্সম্ভন্তি, পূতিকানি ভৱন্তী’’তি ৱুত্তত্তা.

ৱাসিজটসুত্তৱণ্ণনা নিট্ঠিতা.

১০. অনিচ্চসঞ্ঞাসুত্তৱণ্ণনা

১০২. ভাৱেন্তস্সাতি ৱিপস্সনায মগ্গং ভাৱেন্তস্স উপ্পন্নসঞ্ঞা. তেনাহ – ‘‘সব্বং কামৰাগং পৰিযাদিযতী’’তিআদি. সন্তানেত্ৱাতি কসনট্ঠানং সব্বসো ৱিতনেত্ৱা পত্থৰিত্ৱা. কিলেসাতি উপক্কিলেসপ্পভেদা কিলেসা. অনিচ্চসঞ্ঞাঞাণেনাতি অনিচ্চসঞ্ঞাসহগতেন ঞাণেন.

লাযনন্তি লাযনং ৱিয নযনং ৱিয নিচ্ছোটনং ৱিয চ অনিচ্চসঞ্ঞাঞাণং. ইমিনা অত্থেনাতি ইমিনা যথাৱুত্তেন পাড়িযা অত্থেন, উপমা সংসন্দেতব্বাতি এত্থ পব্বজলাযকো ৱিয যোগাৱচৰো. লাযনাদিনা তস্স তত্থ কতকিচ্চতায পৰিতুট্ঠি ৱিয ইমস্স কিলেসে সব্বসো ছিন্দিত্ৱা ফলসমাপত্তিসুখেন কালস্স ৱীতিনামনা.

কূটং গচ্ছন্তীতি পাৰিমন্তেন কূটং গচ্ছন্তি. কূটং পৱিসনভাৱেনাতি কূটচ্ছিদ্দং অগ্গেন পৱিসনৱসেন. সমোসৰিত্ৱাতি ছিদ্দে অনুপৱিসনৱসেন চ আহচ্চ অৱট্ঠানেন চ সমোসৰিত্ৱা ঠিতা. কূটং ৱিয অনিচ্চসঞ্ঞা অনিচ্চানুপস্সনাৱসেন অৱট্ঠানস্স মূলভাৱতো. গোপানসিযো ৱিয চতুভূমককুসলা ধম্মা অনিচ্চসঞ্ঞামূলকত্তা. কূটং অগ্গং সব্বগোপানসীনং তথাঅধিট্ঠানস্স পধানকাৰণত্তা. অনিচ্চসঞ্ঞা অগ্গাতি এত্থাপি এসেৱ নযো. অনিচ্চসঞ্ঞা লোকিযাতি ইদং অনিচ্চসঞ্ঞানুপস্সনং সন্ধায ৱুত্তং. অনিচ্চানুপস্সনামুখেন অধিগতঅৰিযমগ্গে উপ্পন্নসঞ্ঞা অনিচ্চসঞ্ঞাতি ৱত্তব্বতং লভতীতি ‘‘অনিচ্চসঞ্ঞা, ভিক্খৱে, ভাৱিতা বহুলীকতা সব্বং কামৰাগং পৰিযাদিযতী’’তিআদি ৱুত্তং. তথা হি ধম্মসঙ্গহে (ধ. স. ৩৫৭, ৩৬০) ‘‘যস্মিং সমযে লোকুত্তৰং সঞ্ঞং ভাৱেতী’’তিআদিনা সঞ্ঞাপি উদ্ধটা. সব্বাসু উপমাসূতি মূলসন্তানউপমাদীসু পঞ্চসু উপমাসু. পুৰিমাহীতি কস্সকপব্বজলাযনঅম্বপিণ্ডিউপমাহি অনিচ্চসঞ্ঞায কিচ্চং ৱুত্তং মূলসন্তানকপদালনপব্বজলাযনৱণ্টচ্ছেদনপদেসেন অনিচ্চসঞ্ঞায পটিপক্খপচ্ছেদনস্স দস্সিতত্তা. পচ্ছিমাহি বলং দস্সিতং পটিপক্খাতিভাৱস্স জোতিতত্তা.

অনিচ্চসঞ্ঞাসুত্তৱণ্ণনা নিট্ঠিতা.

পুপ্ফৱগ্গৱণ্ণনা নিট্ঠিতা.

মজ্ঝিমপণ্ণাসকো সমত্তো.