২. দুতিযৱগ্গো

১১. অনুসযসুত্তৱণ্ণনা

২০০. দুতিযৱগ্গে অত্তনোতি আযস্মা ৰাহুলো অত্তনো সৱিঞ্ঞাণকং কাযং দস্সেতি. পৰস্সাতি পৰস্স অৱিঞ্ঞাণককাযং দস্সেতি. পৰসন্তানে ৱা অৰূপে ধম্মে অগ্গহেত্ৱা ৰূপকাযমেৱ গণ্হন্তো ৱদতি. অপৰে ‘‘অসঞ্ঞসত্তানং অত্তভাৱং সন্ধায তথা ৱুত্ত’’ন্তি ৱদন্তি. পুৰিমেনাতি ‘‘ইমস্মিং সৱিঞ্ঞাণকে কাযে’’তি ইমিনা পদেন. পচ্ছিমেনাতি ‘‘বহিদ্ধা’’তি ইমিনা পদেন. এতে কিলেসাতি এতে দিট্ঠিতণ্হামানসঞ্ঞিতা কিলেসা. এতেসু ৱত্থূসূতি অজ্ঝত্তবহিদ্ধাৱত্থূসু. সম্ম…পে… পস্সতীতি পুব্বভাগে ৱিপস্সনাঞাণেন সম্মসনৱসেন, মগ্গক্খণে অভিসমযৱসেন সুট্ঠু অত্তপচ্চক্খেন ঞাণেন পস্সতি.

অনুসযসুত্তৱণ্ণনা নিট্ঠিতা.

১২. অপগতসুত্তৱণ্ণনা

২০১. ‘‘অহমেত’’ন্তি অহংকাৰাদীনং অনৱসেসপ্পহানেন অচ্চন্তমেৱ অপগতং.

অপগতসুত্তৱণ্ণনা নিট্ঠিতা.

দুতিযৱগ্গৱণ্ণনা নিট্ঠিতা.

দ্ৱীসূতি পঠমৱগ্গাদীসু. দেসনায অসেক্খভূমিযা দেসিতত্তা অসেক্খভূমি কথিতা. পঠমোতি পঠমৱগ্গো ‘‘সাধু মে, ভন্তে, ভগৱা’’তিআদিনা আযাচন্তস্স, দুতিযো অনাযাচন্তস্স থেৰস্স অজ্ঝাসযৱসেন কথিতো. ৱিমুত্তিপৰিপাচনীযধম্মা নাম ৱিৱট্টসন্নিস্সিতা সদ্ধিন্দ্ৰিযাদযো. তেন পন ৱিপস্সনায কথিতত্তা কথিতা এৱাতি. তংতংদেসনানুসাৰেন হি থেৰো তে ধম্মে পৰিপাকং পাপেসি. তথা হি ভগৱা দুতিযৱগ্গং অনাযাচিতোপি দেসেসি.

সাৰত্থপ্পকাসিনিযা সংযুত্তনিকায-অট্ঠকথায

ৰাহুলসংযুত্তৱণ্ণনায লীনত্থপ্পকাসনা সমত্তা.