৮. লক্খণসংযুত্তং

১. পঠমৱগ্গো

১. অট্ঠিসুত্তৱণ্ণনা

২০২. আযস্মা চ লক্খণোতিআদীসু ‘‘কো নামাযস্মা লক্খণো, কস্মা চ ‘লক্খণো’তি নামং অহোসি, কো চাযস্মা মোগ্গল্লানো, কস্মা চ সিতং পাত্ৱাকাসী’’তি তং সব্বং পকাসেতুং ‘‘য্ৱায’’ন্তিআদি আৰদ্ধং. লক্খণসম্পন্নেনাতি পুৰিসলক্খণসম্পন্নেন.

ঈসং হসিতং ‘‘সিত’’ন্তি ৱুচ্চতীতি আহ ‘‘মন্দহসিত’’ন্তি. অট্ঠিসঙ্খলিকন্তি নযিদং অৱিঞ্ঞাণকং অট্ঠিসঙ্খলিকমত্তং, অথ খো একো পেতোতি আহ ‘‘পেতলোকে নিব্বত্ত’’ন্তি. এতে অত্তভাৱাতি পেতত্তভাৱা. ন আপাথং আগচ্ছন্তীতি দেৱত্তভাৱা ৱিয ন আপাথং আগচ্ছন্তি পকতিযা. তেসং পন ৰুচিযা আপাথং আগচ্ছেয্যুং মনুস্সানং. দুক্খাভিভূতানং অনাথভাৱদস্সনপদট্ঠানা কৰুণাতি আহ ‘‘কাৰুঞ্ঞে কত্তব্বে’’তি. অত্তনো চ সম্পত্তিং বুদ্ধঞাণস্স চ সম্পত্তিন্তি পচ্চেকং সম্পত্তিসদ্দো যোজেতব্বো. তদুভযং ৱিভাৱেতুং ‘‘তং হী’’তিআদি ৱুত্তং. তত্থ অত্তনো সম্পত্তিং অনুস্সৰিত্ৱা সিতং পাত্ৱাকাসীতি পদং আনেত্ৱা সম্বন্ধিতব্বং. ধম্মধাতূতি সব্বঞ্ঞুতঞ্ঞাণং সন্ধায ৱদতি. ধম্মধাতূতি ৱা ধম্মানং সভাৱো.

ইতৰোতি লক্খণত্থেৰো. উপপত্তীতি জাতি. উপপত্তিসীসেন হি তথাৰূপং অত্তভাৱং ৱদতি. লোহতুণ্ডকেহীতি লোহমযেহেৱ তুণ্ডকেহি. চৰন্তীতি আকাসেন গচ্ছন্তি. অচ্ছৰিযং ৱতাতি গৰহচ্ছৰিযং নামেতং. চক্খুভূতাতি সম্পত্তদিব্বচক্খুকা, লোকস্স চক্খুভূতাতি এৱং ৱা এত্থ অত্থো দট্ঠব্বো.

যত্ৰাতি হেতুঅত্থে নিপাতোতি আহ ‘‘যত্ৰাতি কাৰণৱচন’’ন্তি. অঞ্ঞত্ৰ হি ‘‘যত্ৰ হি নামা’’তি অত্থো ৱুচ্চতি. অপ্পমাণে সত্তনিকাযে তে চ খো ৱিভাগেন কামভৱাদিভেদে ভৱে, নিৰযাদিভেদা গতিযো, নানত্তকাযনানত্তসঞ্ঞিআদিৱিঞ্ঞাণট্ঠিতিযো, তথাৰূপে সত্তাৱাসে চ সব্বঞ্ঞুতঞ্ঞাণঞ্চ মে উপনেতুং পচ্চক্খং কৰোন্তেন.

গোঘাতকোতি গুন্নং অভিণ্হং হননকো. তেনাহ ‘‘ৱধিত্ৱা ৱধিত্ৱা’’তি. তস্সাতি গুন্নং ৱধককম্মস্স. অপৰাপৰিযকম্মস্সাতি অপৰাপৰিযৱেদনীযকম্মস্স. বলৱতা গোঘাতককম্মেন ৱিপাকে দীযমানে অলদ্ধোকাসং অপৰাপৰিযৱেদনীযং তস্মিং ৱিপক্কৱিপাকে ইদানি লদ্ধোকাসং ‘‘অৱসেসকম্ম’’ন্তি ৱুত্তং. পটিসন্ধীতি পাপকম্মজনিতা পটিসন্ধি. কম্মসভাগতাযাতি কম্মসদিসভাৱেন. আৰম্মণসভাগতাযাতি আৰম্মণস্স সভাগভাৱেন সদিসভাৱেন. যাদিসে হি আৰম্মণে পুব্বে তং কম্মং তস্স চ ৱিপাকো পৱত্তো, তাদিসেযেৱ আৰম্মণে ইদং কম্মং ইমস্স ৱিপাকো চ পৱত্তোতি কত্ৱা ৱুত্তং ‘‘তস্সেৱ কম্মস্স ৱিপাকাৱসেসেনা’’তি. ভৱতি হি তংসদিসেপি তব্বোহাৰো যথা ‘‘সো এৱ তিত্তিৰো, তানিযেৱ ওসধানী’’তি. নিমিত্তং অহোসীতি পুব্বে কতূপচিতস্স পেতূপপত্তিনিব্বত্তনৱসেন কতোকাসস্স তস্স কম্মস্স নিমিত্তভূতং ইদানি তথা উপট্ঠহন্তং তস্স ৱিপাকস্স নিমিত্তং আৰম্মণং অহোসি. সোতি গোঘাতকো. অট্ঠিসঙ্খলিকপেতো জাতো কম্মসৰিক্খকৱিপাকতাৱসেন.

অট্ঠিসুত্তৱণ্ণনা নিট্ঠিতা.

২. পেসিসুত্তৱণ্ণনা

২০৩. গোমংসপেসিযো কত্ৱাতি গাৱিং ৱধিত্ৱা ৱধিত্ৱা গোমংসং ফালেত্ৱা পেসিযো কত্ৱা. সুক্খাপেত্ৱাতি কালন্তৰং ঠপনত্থং সুক্খাপেত্ৱা. সুক্খাপিযমানানং মংসপেসীনঞ্হি ৱল্লূৰসমঞ্ঞা.

পেসিসুত্তৱণ্ণনা নিট্ঠিতা.

৩. পিণ্ডসুত্তৱণ্ণনা

২০৪. নিপ্পক্খচম্মেতি ৱিগতপক্খচম্মে.

৪. নিচ্ছৱিসুত্তৱণ্ণনা

২০৫. উৰব্ভে হনতীতি ওৰব্ভিকো. এড়কেতি অজে.

৫. অসিলোমসুত্তৱণ্ণনা

২০৬. নিৱাপপুট্ঠেতি অত্তনা দিন্ননিৱাপেন পোসিতে. অসিনা ৱধিত্ৱা ৱধিত্ৱা ৱিক্কিণন্তো.

৬. সত্তিসুত্তৱণ্ণনা

২০৭. একং মিগন্তি একং দীপকমিগং.

৭. উসুলোমসুত্তৱণ্ণনা

২০৮. কাৰণাহীতি যাতনাহি. ঞত্ৱাতি কম্মট্ঠানং ঞত্ৱা.

৮. সূচিলোমসুত্তৱণ্ণনা

২০৯. সুণোতি পূৰেতীতি সূতো, অস্সদমকাদিকো.

৯. দুতিযসূচিলোমসুত্তৱণ্ণনা

২১০. পেসুঞ্ঞূপসংহাৰৱসেন ইতো সুতং অমুত্ৰ, অমুত্ৰ ৱা সুতং ইধ সূচেতীতি সূচকো. অনযব্যসনং পাপেসি মনুস্সেতি সম্বন্ধো.

১০. কুম্ভণ্ডসুত্তৱণ্ণনা

২১১. ৱিনিচ্ছযামচ্চোতি ৰঞ্ঞা অড্ডকৰণে ঠপিতো ৱিনিচ্ছযমহামত্তো. সো হি গামজনকাযং কূটেতি ৱঞ্চেতীতি গামকূটকোতি ৱুচ্চতি. কেচি ‘‘তাদিসো এৱ গামজেট্ঠকো গামকূটকো’’তি ৱদন্তি. সমেন ভৱিতব্বং, ‘‘ধম্মট্ঠো’’তি ৱত্তব্বতো. ৰহস্সঙ্গে নিসীদনৱসেন ৱিসমা নিসজ্জাৱ অহোসি.

কুম্ভণ্ডসুত্তৱণ্ণনা নিট্ঠিতা.

পঠমৱগ্গৱণ্ণনা নিট্ঠিতা.

২. দুতিযৱগ্গো

১. সসীসকসুত্তৱণ্ণনা

২১২. ফুসন্তোতি থেয্যায ফুসন্তো.

৩. নিচ্ছৱিত্থিসুত্তৱণ্ণনা

২১৪. মাতুগামো সস্সামিকো অত্তনো ফস্সে অনিস্সৰো. ৱট্টিত্ৱাতি ভস্সিত্ৱা অপৰং গন্ত্ৱা.

৪. মঙ্গুলিত্থিসুত্তৱণ্ণনা

২১৫. মঙ্গনৱসেন উলতীতি মঙ্গুলি, ৱিৰূপবীভচ্ছভাৱেন পৱত্ততীতি অত্থো. তেনাহ ‘‘ৱিৰূপং দুদ্দসিকং বীভচ্ছ’’ন্তি.

৫. ওকিলিনীসুত্তৱণ্ণনা

২১৬. উদ্ধং উদ্ধং অগ্গিনা পক্কসৰীৰতায উপ্পক্কং. হেট্ঠতো পগ্ঘৰণৱসেন কিলিন্নসৰীৰতায ওকিলিনী. ইতো চিতো চ অঙ্গাৰসম্পৰিকিণ্ণতায ওকিৰিনী. তেনাহ ‘‘সা কিৰা’’তিআদি. অঙ্গাৰচিতকেতি অঙ্গাৰসঞ্চযে. সৰীৰতো পগ্ঘৰন্তি অসুচিদুগ্গন্ধজেগুচ্ছানি সেদগতানি. তস্স কিৰ ৰঞ্ঞোতি তস্স কালিঙ্গস্স ৰঞ্ঞো. নাটকিনীতি নচ্চে অধিকতা ইত্থী. সেদন্তি সেদনং, তাপনন্তি অত্থো.

ওকিলিনীসুত্তৱণ্ণনা নিট্ঠিতা.

৬. অসীসকসুত্তৱণ্ণনা

২১৭. অসীসকং কবন্ধং হুত্ৱা নিব্বত্তি কম্মাযূহনকালে তথা নিমিত্তগ্গহণপৰিচযতো.

৭-১১. পাপভিক্খুসুত্তাদিৱণ্ণনা

২১৮-২২২. লামকভিক্খূতি হীনাচাৰতায লামকো, ভিক্খুৱেসতায, ভিক্খাহাৰেন জীৱনতো চ ভিক্খু. চিত্তকেড়িন্তি চিত্তৰুচিযং তং তং কীড়ন্তো. অযমেৱাতি ভিক্খুৱত্থুস্মিং ৱুত্তনযো এৱ.

পাপভিক্খুসুত্তাদিৱণ্ণনা নিট্ঠিতা.

সাৰত্থপ্পকাসিনিযা সংযুত্তনিকায-অট্ঠকথায

লক্খণসংযুত্তৱণ্ণনায লীনত্থপ্পকাসনা সমত্তা.