১০. থেৰনামকসুত্তৱণ্ণনা

২৪৪. অতীতে খন্ধপঞ্চকেতি অতীতে অত্তভাৱে. ছন্দৰাগপ্পহানেনাতি ছন্দৰাগস্স অচ্চন্তমেৱ জহনেন. পহীনং নাম হোতি অনপেক্খপৰিচ্চাগতো. পটিনিস্সট্ঠং নাম হোতি সব্বসো ছড্ডিতত্তা. তযো ভৱেতি ইমিনা উপাদিণ্ণকধম্মানংযেৱ গহণং. সব্বা খন্ধাযতনধাতুযো চাতি ইমিনা উপাদিণ্ণানম্পি অনুপাদিণ্ণানম্পি দ্ৱিধা পৱত্তলোকিযধম্মানং গহণং অৱিসেসেত্ৱা ৱুত্তত্তা. ৱিদিতং পাকটং কত্ৱা ঠিতং পৰিঞ্ঞাভিসমযৱসেন. তেস্ৱেৱাতি তেভূমকধম্মেসু এৱ. অনুপলিত্তং অমথিতং অসংকিলিট্ঠং তণ্হাদিট্ঠিসংকিলেসাভাৱতো. তদেৱ সব্বন্তি হেট্ঠা তীসুপি পদেসু ইধ সব্বগ্গহণেন গহিতং তেভূমকৱট্টং. জহিত্ৱাতি পহানাভিসমযৱসেন. তণ্হা খীযতি এত্থাতি তণ্হক্খযসঙ্খাতে নিব্বানে ৱিমুত্তং. তমহন্তি তং উত্তমপুগ্গলং একৱিহাৰিং ব্ৰূমি তণ্হাদুতিযস্স অভাৱতো. এত্থ চ পৰিঞ্ঞাপহানাভিসমযকথনেন ইতৰম্পি অভিসমযং অত্থতো কথিতমেৱাতি দট্ঠব্বং.

থেৰনামকসুত্তৱণ্ণনা নিট্ঠিতা.