৯. কোণ্ডঞ্ঞসুত্তৱণ্ণনা

২১৭. এৱংগহিতনামোতি ‘‘অঞ্ঞাসি ৱত, ভো, কোণ্ডঞ্ঞো’’তি সত্থু ৱচনং নিস্সায ভিক্খূহি অঞ্ঞেহি কোণ্ডঞ্ঞনামকেহি ৱিসেসনত্থং এৱংগহিতনামো. দ্ৱাদসন্নং সংৱচ্ছৰানং ৱসেন চিৰস্সং. ছদ্দন্তভৱনেতি ছদ্দন্তনাগৰাজভৱনট্ঠানে. পঞ্ঞৱা মহাসাৱকো ৰত্তঞ্ঞুতায. ‘‘দসসহস্সচক্কৱাড়ে দেৱমনুস্সানন্তি দসসহস্সচক্কৱাড়ে দেৱানং, ইমস্মিং চক্কৱাড়ে দেৱমনুস্সানঞ্চাতি এৱং দসসহস্সচক্কৱাড়ে দেৱমনুস্সান’’ন্তি ৱদন্তি. অগ্গন্তিআদিতো. তত্থাতি মন্দাকিনিতীৰে.

ৱস্সগ্গেনাতি ৱস্সপটিপাটিযা. তন্তি অঞ্ঞাসিকোণ্ডঞ্ঞত্থেৰং. মহাব্ৰহ্মানং ৱিয লোকিযমনুস্সা হৰাযন্তি. পামোক্খভূতো আযস্মা থেৰো অন্তৰন্তৰা তত্থ তত্থ জনপদে ৱসিত্ৱা তদনুক্কমেন মন্দাকিনিতীৰং উপগতো, তস্মা ৱুত্তং – ‘‘ইচ্ছামহং, ভন্তে, জনপদে ৱসিতু’’ন্তি.

আনুভাৱসম্পন্না দিব্বাযুকা তে হত্থিনাগাতি ৱুত্তং ‘‘পুব্বে পচ্চেকবুদ্ধানং পাৰিচৰিযায কতপৰিচযা’’তি. থেৰস্স সঞ্চৰণট্ঠানে আৱৰণসাখা হৰিত্ৱা অপনেত্ৱা. মুখোদকঞ্চেৱ দন্তকট্ঠঞ্চ ঠপেতীতি সড়লদেৱদাৰুকট্ঠাদীনি অঞ্ঞমঞ্ঞং ঘংসিত্ৱা অগ্গিং নিব্বত্তেত্ৱা জালেত্ৱা তত্থ পাসাণখণ্ডানি তাপেত্ৱা তানি দণ্ডকেহি ৱট্টেত্ৱা তড়াকাসু উদকসোণ্ডীসু খিপিত্ৱা উদকস্স তত্তভাৱং ঞত্ৱা নাগলতাদন্তকট্ঠং উপনেন্তো মুখোদকঞ্চ ঠপেতি. ৱত্তং কৰোতীতি অন্তোকুটিযা বহি চ পমুখেপি অঙ্গণেপি সাখাভঙ্গেহি সম্মজ্জন্তো ৱক্খমাননযেন আহাৰং উপনেন্তো ৱত্তং কৰোতি.

পতিট্ঠপ্পমাণেতি কটিপ্পমাণে, অযমেৱ ৱা পাঠো তাৱ মহন্তমেৱাতি যাৱ মহন্তং সেতপদুমৱনং, তাৱ মহন্তমেৱ. এসেৱ নযো ৰত্তকুমুদৱনাদীসু. খাদন্তা মনুস্সা. পক্কপযোঘনিকা ৱিযাতি সুপক্কপযোঘনং ৱিয. ঘনভাৱেন পন পক্খিত্তখুদ্দমধু ৱিয হোতি. তেনাহ ‘‘এতং পোক্খৰমধু নামা’’তি. মুড়ালন্তি সেতপদুমানং মূলং. ভিসন্তি তেসংযেৱ কন্দং. একস্মিং পব্বেতি একেকস্মিং পব্বন্তৰে. পাদঘটকন্তি দোণস্স চতুভাগো সণ্ঠানতো খুদ্দকো, তস্মা পাদঘটকপ্পমাণন্তি তুম্বমত্তং. সোণ্ডিআৱাটেতি খুদ্দকসোণ্ডিযো চেৱ খুদ্দকআৱাটে চ.

এতং ভোজনন্তি যথাৱুত্তং নিৰুদকপাযসভোজনং. কেচি সঞ্জানন্তি যে থেৰা ৱুড্ঢতৰা. কেচি ন সঞ্জানন্তি যে নৱা অচিৰপব্বজিতা.

বুদ্ধানুবুদ্ধোতি বুদ্ধস্স অনুবুদ্ধো. বাড়্হৱীৰিযোতি চতুন্নং সম্মপ্পধানানং ৱসেন চিৰনিচিতৱীৰিযো. তিণ্ণং ৱিৱেকানন্তি কাযচিত্তউপধিৱিৱেকানং লাভীতি যোজনা. চতস্সো ৱদতি ৱঙ্গীসত্থেৰো সযংপটিভানং, ন সেসাভিঞ্ঞানং অভাৱতোতি আহ ‘‘ইতৰা’’তিআদি. পৰিসা সন্নিসীদি নিস্সদ্দভাৱেন তুণ্হী অহোসীতি অত্থো. অনুজানাপেসীতি পঠমং অত্তনা ঞাতং উপট্ঠিতং অত্তনো পৰিনিব্বানকালং অনু পচ্ছা সত্থাৰং জানাপেসীতি এৱং এত্থ অত্থো দট্ঠব্বো.

তন্তি আসাড়্হিপুণ্ণমায ইসিপতনে যং দস্সনং, যং ৱা দুক্কৰচৰিযাযং তুম্হাকং উপট্ঠানং আদিতো দস্সনং, তং, ভন্তে, পঠমদস্সনং. ওনতৱিনতাতি হেট্ঠা উপৰি চ ওনতা ৱিনতা. কম্পেত্ৱাতি থোকং চালেত্ৱা দস্সনত্থং একনিন্নাদো তেসং হত্থিনাগানঞ্চেৱ নাগযক্খকুম্ভণ্ডানং দেৱতানঞ্চ সদ্দেন. ব্ৰহ্মানো দেৱানং অদংসূতি সম্বন্ধো.

সজ্ঝাযমকংসু পসাদনীযেসু পসাদৱসেন সন্নিপতিতপৰিসায পসাদজননত্থং ভগৱতি নিক্খমিত্ৱাতি ভগৱতি গন্ধকুটিতো নিক্খমিত্ৱা. ধৰতিযেৱাতি অদুট্ঠতং পত্ৱা তিট্ঠতেৱ.

কোণ্ডঞ্ঞসুত্তৱণ্ণনা নিট্ঠিতা.