৩. পেসলসুত্তৱণ্ণনা

২১১. এতেসন্তি এতেসং মহল্লকানং. ন পাড়ি আগচ্ছতি অপ্পগুণভাৱতো. ন চ পাড়ি উপট্ঠাতি, একায পাড়িযা সতি পাড়িগতিযা তথা তথা উপট্ঠানম্পি নেসং নত্থীতি ৱদতি. ন অট্ঠকথাতি এত্থাপি এসেৱ নযো. সিথিলধনিতাদিতংতংব্যঞ্জনবুদ্ধিং অহাপেত্ৱা উচ্চাৰণং পদব্যঞ্জনমধুৰতা. অতিক্কমিত্ৱা মঞ্ঞতি অঞ্ঞে ভিক্খূ. হীড়নৱসেন অভিভৱিত্ৱা পটিভানসুতেন অত্তানং পসংসতি সম্ভাৱেতি. মানস্স পৱত্তিতায সহজাতনিস্সযাদিপচ্চযধম্মা তংসহভুধম্মা. মানৱসেন ৱিপ্পটিসাৰী অহুৱা. মা অহোসীতি যোজনা. ৱণ্ণভণনন্তি পৰেহি কিৰিযমানং গুণাভিত্থৱং. অখিলোতি পঞ্চচেতোখিলৰহিতো. নিস্সেসং নৱৱিধন্তি নৱৱিধম্পি মানং কস্সচি একদেসস্সপি অসেসতো. ৱিজ্জাযাতি অগ্গমগ্গৱিজ্জায. অচ্চন্তমেৱ সমিততায ৱূপসমিততায সমিতাৱী.

পেসলসুত্তৱণ্ণনা নিট্ঠিতা.