১২. ৱঙ্গীসসুত্তৱণ্ণনা

২২০. সো কিৰ ৱিচৰতীতি সম্বন্ধো. ‘‘যথাযং দীপো জম্বুদীপোতি জম্বুনা পঞ্ঞাতো, এৱাহম্পি তেন জম্বুনা পঞ্ঞাযিস্স’’ন্তি জম্বুসাখং পৰিহৰিত্ৱা. ৱাদং কত্ৱাতি ‘‘ইমস্মিং ৱাদে সচে তে পৰাজযো হোতি, ত্ৱং মে দাসো হোহি. সচে মে পৰাজযো, অহং তে ভৰিযা’’তি এৱং কতিকং কত্ৱা. ৱাদে জযপৰাজযানুভাৱেনাতি তথাপৱত্তিতে ৱাদে পৰিব্বাজকস্স জযানুভাৱেন চেৱ অত্তনো পৰাজযেন চ. ৱযং আগম্মাতি সিপ্পুগ্গহণৱযং আগম্ম. ৱিজ্জন্তি মন্তং.

নিব্বত্তগতিৱিভাৱনৱসেন ছৱসীসভাৱং দূসেতি ৱিনাসেতীতি ছৱদূসকং সিপ্পং, তথাপৱত্তং মন্তপদং. অত্তনো আনুভাৱেনাতি নিৰযে নিব্বত্তসত্তস্স সীসং যত্থ কত্থচি ঠিতং বুদ্ধানুভাৱেন আনেত্ৱা দস্সেত্ৱা. খীণাসৱস্স সীসন্তি পৰমপ্পিচ্ছতায কঞ্চিপি অজানাপেত্ৱা অৰঞ্ঞং পৱিসিত্ৱা পৰিনিব্বুতস্স খীণাসৱস্স ছড্ডিতং সীসকটাহং. দস্সেসীতি অত্তনো আনুভাৱেন আনেত্ৱা দস্সেসি.

‘‘তুম্হে, ভো গোতম, জানাথা’’তি কামং ৱঙ্গীসো নিব্বত্তট্ঠানং সন্ধায পুচ্ছতি, ভগৱা পন অনুপাদিসেসনিব্বানং সন্ধায ‘‘আম, ৱঙ্গীস…পে… গতিং জানামী’’তি আহ. ৱুত্তঞ্হেতং ‘‘নিব্বানং অৰহতো গতী’’তি. ৱঙ্গীসো সযং মন্তবলেন গতিপৰিযাপন্নস্স গতিং জানন্তো ভগৱন্তম্পি ‘‘অযম্পি তথা’’তি মঞ্ঞমানো ‘‘মন্তেন জানাসি, ভো গোতমা’’তি আহ. ভগৱা অত্তনো বুদ্ধঞাণমেৱ মন্তং কত্ৱা দীপেন্তো ‘‘আম, ৱঙ্গীস, একেন মন্তেনেৱ জানামী’’তি আহ. মুধা এৱ দাতব্বন্তি অমূলিকো. অনন্তৰহিতায ভূমিযা সযনং থণ্ডিলসেয্যা. আদি-সদ্দেন সাযততিযং উদকোৰোহণভূমিহৰণাদিং সঙ্গণ্হাতি. সো তং…পে… অৰহত্তং পাপুণীতি ইমিনা ৱঙ্গীসত্থেৰো পব্বজিত্ৱা ন চিৰস্সেৱ সুখায পটিপদায অৰহত্তং পত্তো ৱিয দিস্সতি, ন খো পনেতং এৱং দট্ঠব্বং, আযতিং থেৰো পব্বজিত্ৱা সমথৱিপস্সনাসু কম্মং আৰভিত্ৱাপি দুক্খায পটিপদায তাদিসং কালং ৱীতিনামেত্ৱা অৰহত্তং পাপুণি. তেনাহ –

‘‘নিক্খন্তং ৱত মং সন্তং, অগাৰস্মানগাৰিযং;

ৱিতক্কা উপধাৱন্তি, পগব্ভা কণ্হতো ইমে’’. (সং. নি. ১.২০৯; থেৰগা. ১২১৮);

আযস্মতো ৱঙ্গীসস্স অনভিৰতি উপ্পন্না হোতি, ৰাগো চিত্তং অনুদ্ধংসেতি, ‘‘কামৰাগেন ডয্হামি, চিত্তং মে পৰিডয্হতী’’তিআদি (থেৰগা. ১২৩২).

ৱিমুত্তিসুখন্তি সব্বসো কিলেসৱিমুত্তিযং নিব্বানে চ উপ্পন্নং সম্পতিঅৰহত্তফলসুখং পটিসংৱেদেন্তোতি যথাপৰিচ্ছিন্নং কালং পতি সম্মদেৱ ৱেদেন্তো অনুভৱন্তো. কৱিনা কতং, ততো ৱা আগতং, তস্স ৱা ইদন্তি কাৱেযং, তদেৱেত্থ ‘‘কাৱেয্য’’ন্তি ৱুত্তং. যে নিযামগতদ্দসাতি যে ভিক্খূ অৰিযা বুদ্ধানং সাৱকা ফলট্ঠভাৱেন নিযামগতা চেৱ মগ্গট্ঠভাৱেন নিযামদসা চ. নিযামোতি হি সম্মত্তনিযামো অধিপ্পেতো. সুআগমনন্তি মম ইমস্স সত্থুনো সন্তিকে আগমনং উপগমনং, ইমস্মিঞ্চ ধম্মৱিনযে আগমনং পব্বজনং উপসম্পদা সুন্দৰং আগমনং. তত্থ কাৰণমাহ ‘‘তিস্সো ৱিজ্জা’’তিআদি. অৱুত্তম্পি গাথায অত্থতো গহিতমেৱ থেৰস্স ছড়ভিঞ্ঞভাৱতো.

ৱঙ্গীসসুত্তৱণ্ণনা নিট্ঠিতা.

সাৰত্থপ্পকাসিনিযা সংযুত্তনিকায-অট্ঠকথায

ৱঙ্গীসসংযুত্তৱণ্ণনায লীনত্থপ্পকাসনা সমত্তা.