৯. ৱনসংযুত্তং

১. ৱিৱেকসুত্তৱণ্ণনা

২২১. সংৱেজেতুকামাতি অত্থতো সংৱেগং উপ্পাদেতুকামা. তথাভূতা নং কিলেসসঙ্গণিকাদিতো ৱিৱেচেতুকামা নাম হোতীতি ৱুত্তং ‘‘ৱিৱেকং পটিপজ্জাপেতুকামা’’তি. বাহিৰেসূতি গোচৰজ্ঝত্ততো বহিভূতেসু. পুথুত্তাৰম্মণেসূতি ৰূপাদিনানাৰম্মণেসু. চৰতীতি পৱত্ততি. ত্ৱং জনোতি ত্ৱং অত্তনো কিলেসেহি জননতো ৱিসুং জাতো তাদিসে এৱ অঞ্ঞস্মিং জনে ইমং অযোনিসোমনসিকাৰৱসেন পৱত্তমানং ছন্দৰাগং ৱিনযস্সু ৱিনোদেহি. সতং তং সাৰযামসেতি নিয্যানিকসাসনে পব্বজিত্ৱা সত্থু সন্তিকে কম্মট্ঠানং গহেত্ৱা অৰঞ্ঞৱাসেন চ সতিমন্তং পণ্ডিতং তং মযম্পি যথাউপ্পন্নং ৱিতক্কং ৱিনোদনায সাৰযাম, সতং ৱা সপ্পুৰিসানং কিলেসৱিগমনধম্মং পটিপজ্জিত্ৱা ৱসন্তং তং সাৰযাম ৱট্টদুক্খং. পাতালন্তি মোহপাতালং কিলেসৰজো, তদেৱ ‘‘পাতাল’’ন্তি ৱুত্তং. মা অৱহৰীতি হেট্ঠা দুগ্গতিসোতং মা উপনেসি. সিতন্তি সম্বন্ধং. তেনাহ ‘‘সৰীৰলগ্গ’’ন্তি. ৱিৱেকমাপন্নোতি কিলেসৱিৱেকং সমথৱিপস্সনাভাৱনমাপন্নো. উত্তমৱীৰিযন্তি উস্সোড়্হিলক্খণপ্পত্তং ৱীৰিযং, চতুব্বিধং সমপ্পধানৱীৰিযং ৱা সম্পত্তং. পগ্গয্হাতি আৰোপেত্ৱা. পৰমৱিৱেকন্তি পৰমং সমুচ্ছেদৱিৱেকং.

ৱিৱেকসুত্তৱণ্ণনা নিট্ঠিতা.

২. উপট্ঠানসুত্তৱণ্ণনা

২২২. কাযদৰথো হোতিযেৱ নিযমেন, ন চিত্তদৰথো তস্স মগ্গেনেৱ সমুগ্ঘাটিতত্তা.

জৰাতুৰোতি জৰাভিভৱনেন আতুৰোযেৱ. পদদ্ৱযেপি এসেৱ নযো. উপৰিট্ঠতায পৰিতো দীঘপুথুলতায অতিৱিয ৱিজ্ঝতীতি সত্তিসল্লগ্গহণং. এৱং হিস্স তণ্হাসল্লস্স সদিসতা. অৱিজ্জায পন সম্মোহাপাদনেন দুক্খাপাদনেন চ ৱিসসদিসতা. ৰুপ্পতোতি ৱিকাৰং আপাদিযমানস্স পীড়িযমানস্সাতি অত্থোতি আহ ‘‘ঘট্টিযমানস্সা’’তি.

পব্বজিতন্তি সসন্তানতো পব্বজিতং ৱা ৰাগাদিমলতো পব্বজিতং ৱা. তস্মাতি যস্মা থেৰস্সেৱেতং ৱচনং, তস্মা অযং ইদানি ৱুচ্চমানো এত্থ গাথায অত্থো. দেৱতায হীতিআদি ৱুত্তস্সেৱ অত্থস্স পাকটকৰণং. এত্থাতি সেসগাথাসু. অত্থস্স ৱুত্তনযত্তা ‘‘অনুত্তানপদৱণ্ণনা’’তি আহ. ৱিনযাতি হেতুম্হি নিস্সক্কৱচনন্তি তস্স হেতুম্হি কৰণৱচনেন অত্থমাহ ‘‘ৱিনযেনা’’তি. তথা ‘‘সমতিক্কমা’’তি এত্থাপি. পৰমপৰিসুদ্ধং সংকিলেসসমুচ্ছিন্দনতো. আৰদ্ধৱীৰিযন্তি সম্ভাৱিতৱীৰিযং. সম্ভাৱনঞ্চস্স পগ্গণ্হনং পৰিপূৰণঞ্চাতি আহ ‘‘পগ্গহিতৱীৰিযং পৰিপুণ্ণৱীৰিয’’ন্তি.

উপট্ঠানসুত্তৱণ্ণনা নিট্ঠিতা.

৩. কস্সপগোত্তসুত্তৱণ্ণনা

২২৩. ছেতন্তি মিগানং জীৱিতং ছেতং. তেনাহ ‘‘মিগলুদ্দক’’ন্তি. ৰোহিতমিগন্তি লোহিতৱণ্ণং খুদ্দকমিগং, ‘‘মহাৰোহিতমিগ’’ন্তি কেচি. সত্থু সন্তিকে কম্মট্ঠানং গহেত্ৱা তস্স জনপদস্স সুলভভিক্খতায তত্থ গন্ত্ৱা ৱিহৰতীতি ইমমত্থং সন্ধায ‘‘পঠমসুত্তে ৱুত্তনযেনেৱা’’তি ৱুত্তং. অযং পন থেৰো পঞ্চাভিঞ্ঞো ৱিপস্সনাকম্মিকো. ঠত্ৱাতি পদানুবন্ধনৱসেন গমনং উপচ্ছিন্দিত্ৱা থেৰস্স আসন্নট্ঠানে ঠত্ৱা. তস্স ৱচনং সোতুং আৰদ্ধো. অঙ্গুট্ঠকং জালাপেসীতি অধিট্ঠানবলেন দণ্ডদীপিকং ৱিয অত্তনো অঙ্গুট্ঠকং জালাপেসি. অক্খীহিপি পস্সতি অঙ্গুট্ঠকং জালমানং. কণ্ণেহিপি সুণাতি তেন ৱুচ্চমানং ধম্মং একদেসেন. চিত্তং পনস্স ধাৱতীতি সম্বন্ধো. এতস্সপীতি লুদ্দকস্সপি.

অপ্পপঞ্ঞন্তি এত্থ অপ্প-সদ্দো ‘‘অপ্পহৰিতে’’তিআদীসু ৱিয অভাৱত্থোতি আহ ‘‘নিপ্পঞ্ঞ’’ন্তি. কাৰণজাননসমত্থেনাতি ইমিনা কাৰণেন সত্তানং সুখং, ইমিনা দুক্খন্তি এৱং সমাচৰমানেন কাৰণং জানিতুং সমত্থেন কম্মস্সকতঞাণসম্পযুত্তচিত্তেনাতি অত্থো. সুণাতীতি কেৱলং সৱনমত্তৱসেন সুণাতি, ন তদত্থৱসেন. তেনাহ ‘‘অত্থমস্স ন জানাতী’’তি. কাৰণৰূপানীতি সভাৱকাৰণানি. কিং মে ইমিনাতি? ‘‘ইদং পপঞ্চ’’ন্তি পহায. ৱীৰিযং পগ্গয্হাতি চতুব্বিধং সম্মপ্পধানং ৱীৰিযং পগ্গণ্হিত্ৱা.

কস্সপগোত্তসুত্তৱণ্ণনা নিট্ঠিতা.

৪. সম্বহুলসুত্তৱণ্ণনা

২২৪. সম্বহুলাতি সুত্তন্তনযেন সম্বহুলা. সুত্তন্তে সজ্ঝাযিংসূতি সুত্তন্তিকা. ৱিনযং ধাৰেন্তীতি ৱিনযধৰা. যুঞ্জন্তীতি ৱাসধুৰে যোগং কৰোন্তি. ঘটেন্তীতি তত্থ ৱাযামং কৰোন্তি. কৰোন্তানংযেৱ অৰুণো উগ্গচ্ছতীতি সম্বন্ধো.

কোমেতি কিং ইমে? তেনাহ ‘‘কহং ইমে’’তি? ৱজ্জিভূমিং ৱজ্জিৰট্ঠং গতাতি ৱজ্জিভূমিযা. তেনাহ ‘‘ৱজ্জিৰট্ঠাভিমুখা গতা’’তি. নত্থি এতেসং নিকেভং নিবদ্ধনিৱাসট্ঠানন্তি অনিকেতা তেনাহ ‘‘অগেহা’’তি. উতু এৱ সপ্পাযং, উতুৱসেন ৱা কাযচিত্তানং কল্লত্তা সপ্পাযং. এস নযো সেসেসুপি.

সম্বহুলসুত্তৱণ্ণনা নিট্ঠিতা.

৫. আনন্দসুত্তৱণ্ণনা

২২৫. অতিৱেলন্তি অতিবহুকালং. ভিক্খুনা নাম উপগতানং উপনিসিন্নকথামত্তং ৱত্ৱা গন্থধুৰেহি ৱাসধুৰেহি ৱা যুত্তপযুত্তচিত্তেন ভৱিতব্বং, নাতিৱেলং তেসং সঞ্ঞত্তিবহুলেন. থেৰো পন তদা কেনচি কাৰণেন বহুৱেলং গিহিসঞ্ঞত্তিবহুলো অহোসি, তং সন্ধায ৱুত্তং ‘‘অতিৱেল’’ন্তিআদি. ইদানি তমত্থং ৱিভাৱেতুং ‘‘ভগৱতী’’তিআদি ৱুত্তং. তন্তি তং তাদিসং সঞ্ঞাপনং সন্ধায এতং ‘‘অতিৱেলং গিহিসঞ্ঞত্তিবহুলো’’তি ৱচনং ৱুত্তং. ভিক্খুসঙ্ঘস্স কথং সুত্ৱাতি সঙ্ঘস্স মজ্ঝে নিসীদিত্ৱা থেৰেন কথিতত্তা ৱুত্তং. সত্থুসাসনন্তি পিটকত্তযং ৱদতি.

পসক্কিযাতি উপসক্কিত্ৱা গন্ত্ৱা. তং পন তত্থ অজ্ঝোগাহনং হোতীতি আহ ‘‘পৱিসিত্ৱা’’তি. সঙ্খাৰদুক্খতো নিব্বিন্নহদযস্স সব্বসঙ্খাৰৱিনিস্সটং নিব্বানং যাথাৱতো পচ্চৱেক্খন্তস্স সম্মদেৱ সমস্সাসকৰং হুত্ৱা উপট্ঠহন্তং তং উপৰি অধিগমায উস্সুক্কং কৰোন্তো নিব্বানং হদযে নিক্খিপতি নামাতি আহ – ‘‘নিব্বানং…পে… ওপেতি নামা’’তি. নিব্বানং…পে… আৰম্মণতো ওপেতি নামাতি আনেত্ৱা সম্বন্ধো. অত্থৱিৰহিতা ‘‘বিড়িবিড়ী’’তি পৱত্তকিৰিযা বিড়িকা, অযং পন গিহিসঞ্ঞত্তিকথা থেৰস্স অত্তনো সামঞ্ঞত্থঅসাধনতো দেৱতায বিড়িকা ৱিযাতি বিড়িবিড়িকাতি ৱুত্তা.

আনন্দসুত্তৱণ্ণনা নিট্ঠিতা.

৬. অনুৰুদ্ধসুত্তৱণ্ণনা

২২৬. অনন্তৰে অত্তভাৱেতি অতীতানন্তৰে দেৱত্তভাৱে. থেৰো হি তাৱতিংসদেৱলোকা চৱিত্ৱা ইধূপপন্নো. অগ্গমহেসীতি কাচি পৰিচাৰিকা দেৱধীতা চিত্তপণিধানমত্তেন ইদানিপি দেৱকাযে ভৱিস্সতি উপচিতকুসলধম্মত্তাতি মঞ্ঞমানা তস্মিং ৱত্তমানং ৱিয কথেন্তী ‘‘সোভসী’’তি আহ. এৱং অতীতম্পিস্স দিব্বসোতং পচ্চুপ্পন্নং ৱিয মঞ্ঞেয্য নাতিচিৰকালত্তাতি দস্সেন্তো ‘‘পুব্বেপি সোভসী’’তি আহ. সুগতিনিৰযাদিদুগ্গতিযা ৱসেন দুগ্গতা এতৰহীতি অধিপ্পাযো. পটিপত্তিদুগ্গতিযা কামেসু সম্মুচ্ছিতভাৱতো.

পতিট্ঠহন্তোতি নিৱিসন্তো. অট্ঠহি কাৰণেহীতি চিৰকালপৰিভাৱনায ৱিৰুড়্হমূলেহি অযোনিসোমনসিকাৰাদিপচ্চযমূলকেহি ৱুচ্চমানেহি অট্ঠহি কাৰণেহি. ৰত্তো ৰাগৱসেনাতি সভাৱতো সঙ্কপ্পতো চ যথাসমীহিতে ইট্ঠাকাৰে সক্কাযে সঞ্জাতৰাগৱসা ৰত্তো গিদ্ধো গধিতো. পতিট্ঠাতীতি ওৰুয্হ তিট্ঠতি. দুট্ঠো দোসৱসেনাতি সভাৱতো সঙ্কপ্পতো চ যথাসমীহিতে অনিট্ঠাকাৰে সক্কাযে সঞ্জাতদোসৱসেন দুট্ঠো ৰুপিতচিত্তো. মূড়্হো মোহৱসেনাতি অসমপেক্খনেন মূড়্হো মুয্হনৱসেন. ৱিনিবদ্ধোতি অহংকাৰেন ৱিসেসতো নিবন্ধনতো মানৱত্থুস্মিং বন্ধিতো. মানৱসেনাতি তেন তেন মঞ্ঞনাকাৰেন. পৰামট্ঠোতি ধম্মসভাৱং নিচ্চাদিৱসেন পৰতো আমট্ঠো. দিট্ঠিৱসেনাতি মিচ্ছাদস্সনৱসেন. থামগতোতি ৰাগাদিকিলেসৱসেন থামং থিৰভাৱং উপগতো. অনুসযৱসেনাতি মগ্গেন অপ্পহীনতায অনু অনু সন্তানে সযনৱসেন. অপ্পহীনট্ঠো হি তেসং অনুসযট্ঠো. অনিট্ঠঙ্গতোতি সংসযিতো. ৱিক্খেপগতোতি ৱিক্খিত্তভাৱং উপগতো. উদ্ধচ্চৱসেনাতি চিত্তস্স উদ্ধতভাৱৱসেন. তাপীতি তাপি দেৱকঞ্ঞাযো. এৱং পতিট্ঠিতাৱাতি যথাৱুত্তনযেন ৰত্তভাৱাদিনা সক্কাযস্মিং পতিট্ঠিতা এৱ. নৰদেৱানন্তি পুৰিসভূতদেৱানং.

পটিগন্তুন্তি অপেক্খাৱসেন ততো অপগন্তুং অপেক্খং ৱিস্সজ্জেতুং. দুস্সন্তন্তি দসন্তং, ‘‘ৱত্থ’’ন্তি কেচি. সূচিং যোজেত্ৱাতি সিব্বনসুত্তেন সূচিং যোজেত্ৱা পাসে চ পৱেসেত্ৱা. মনাপকাযে দেৱনিকাযে জাতা মনাপকাযিকা. তেসং পভাৱং দস্সেতুং ‘‘মনসা’’তিআদি ৱুত্তং. সমজ্জন্তি সংহিতং. গমনভাৱন্তি গমনজ্ঝাসযং. ৱিক্খীণোতি ৱিচ্ছিন্দনৱসেন খীণো. দেৱতানং উত্তৰিমনুস্সধম্মাৰোচনে দোসো নত্থীতি তাসং পুন অনাগমনত্থং অৰহত্তং ব্যাকাসি.

অনুৰুদ্ধসুত্তৱণ্ণনা নিট্ঠিতা.

৭. নাগদত্তসুত্তৱণ্ণনা

২২৭. অতিকালেনাতি অতিৱিয পুব্বণ্হকালেন, কালস্সেৱাতি অত্থো. কোটিসম্মুঞ্জনিযাতি সম্মুঞ্জনিকোটিযা, সম্মুঞ্জনিযা একদেসেনেৱাতি অত্থো. ইমিনা সম্মজ্জনে অমনাপকাৰিতং দস্সেতি. মজ্ঝন্হিকে ৱীতিৱত্তেতি গিহিসংসগ্গৱসেন কালং ৱীতিনামেন্তো মজ্ঝন্হে বহুৱীতিৱত্তে. অঞ্ঞেহি ভিক্খূহীতি নাতিকালং পৱিট্ঠেহি. নিস্সক্কৱচনঞ্চেতং. ভাযামি নাগদত্তন্তি তস্স পটিপত্তিং ভাযিতব্বং কত্ৱা দেৱতা ৱদন্তী পটিপত্তিযং নিযোজেতি. সুপ্পগব্ভন্তি কাযপাগব্বিযাদীহি অতিৱিয সমন্নাগতং.

নাগদত্তসুত্তৱণ্ণনা নিট্ঠিতা.

৮. কুলঘৰণীসুত্তৱণ্ণনা

২২৮. ওগাহপ্পত্তোতি ৱিস্সাসৱসেন অনুপ্পৱেসং পত্তো. অঞ্ঞতৰং কুলন্তি তস্মিং কুলে জাযম্পতিং সন্ধায ৱদতি. ‘‘বহূপকাৰং মে এতং কুলং চিৰং সপ্পাযাহাৰদানাদিনা; তস্মা ইধাহং অগ্গদক্খিণেয্যো জাতো; ইমেসংযেৱ দেয্যধম্মপটিগ্গণ্হনেন পুঞ্ঞং ৱড্ঢেস্সামী’’তি চিন্তেসি. তেনাহ ‘‘অঞ্ঞত্থ গন্ত্ৱা কিং কৰিস্সামী’’তিআদি. সাতি দেৱতা. উভোপেতেতি তং ভিক্খুঞ্চ ঘৰণিঞ্চ সন্ধায ৱদতি. পটিগাধপ্পত্তাতি পটিগাধং পত্তা অঞ্ঞমঞ্ঞস্মিং পতিট্ঠিতৱিস্সাসেন.

ৱিস্সমপ্পত্তিৱসেন সন্তিট্ঠন্তি এত্থাতি সণ্ঠানং, ৱিস্সমনট্ঠানং. সমাগন্ত্ৱাতি সন্নিপতিত্ৱা. পটিঞ্ঞূদাহৰণেহি মন্তযতীতি মন্তনং, ঞাপকং কাৰণং. পটিলোমসদ্দাতি পটিলোমভাৱেন পতিতত্তা অসচ্চৱিভাৱনা পটিকূলসদ্দা. তেন কাৰণেনাতি তেন কাৰণপটিৰূপকেন মিচ্ছাৱচনেন. ন মঙ্কুহোতব্বং অকাৰকভাৱতো. সদ্দেন পৰিতস্সতীতি পৰেহি অত্তনি পযুত্তমিচ্ছাসদ্দমত্তেন পৰিতস্সনসীলো. ৱতং ন সম্পজ্জতীতি যথাসমাদিন্নৱতং লহুচিত্ততায ন পাৰিপূৰিং গচ্ছতি. সম্পন্নৱতোতি পৰিপুণ্ণসীলাদিৱতগুণো

কুলঘৰণীসুত্তৱণ্ণনা নিট্ঠিতা.

৯. ৱজ্জিপুত্তসুত্তৱণ্ণনা

২২৯. ৱজ্জিৰট্ঠে ৰাজপুত্তোতি ৱজ্জিৰট্ঠে জাতসংৱদ্ধো ৱজ্জিৰাজপুত্তো. সব্বৰত্তিচাৰোতি ছণসম্পত্তিযা ইতো চিতো চৰন্তেহি অনুভৱিতব্বনক্খত্তমহো. তেনাহ ‘‘কত্তিকনক্খত্তং ঘোসেত্ৱা’’ তিআদি. একাবদ্ধং হোতীতি যস্মা চাতুমহাৰাজিকদেৱা তস্মিং দিৱসে নক্খত্তং ঘোসেত্ৱা অত্তনো পুঞ্ঞানুভাৱসিদ্ধায দিব্বসম্পত্তিযা মহন্তং নক্খত্তকীড়াসুখং অনুভৱন্তি, তস্মা তং তেহি একাবদ্ধং ৱিয হোতি. ভেৰিআদিতূৰিযানন্তি ভেৰিমুদিঙ্গসঙ্খপণৱৱীণাদিতূৰিযানং. তাড়িতানন্তি আৰদ্ধলযানুৰূপং পহটানং. ৱীণাদীনন্তি ৱীণাৱেণুগোমুখীআদীনং. ৱাদিতানন্তি যথাৰদ্ধমুচ্ছনানুৰূপং সঙ্ঘট্টিতানং. অভাসীতি তেন সদ্দেন আকড্ঢিযমানহদযো অযোনিসো উম্মুজ্জিত্ৱা ‘‘মহতী ৱত মে জানী’’তি অনুত্থুনন্তো অভাসি. ছড্ডিতদাৰুকং ৱিযাতি ৱনে ছড্ডিতনিৰত্থককড়িঙ্গৰং ৱিয. লামকতৰোতি নিহীনতৰো. দেৱতা পঠমপ্পিতং আণিং পটাণিযা নীহৰন্তী ৱিয তেন ভিক্খুনা ৱুত্তমত্থং অপনেন্তী ‘‘তস্স তে বহুকা পিহযন্তী’’তি অৱোচাতি ৱুত্তন্তি দস্সেন্তো ‘‘থেৰো’’তিআদিমাহ. সগ্গং গচ্ছন্তানং যথা নেৰযিকা পিহযন্তি, এৱং সম্মাপটিপন্নস্স তুয্হং বহূ পিহযন্তি, তস্মা ত্ৱং ‘‘পাপিযো’’তি অত্তানং মা মঞ্ঞিত্থাতি অধিপ্পাযো.

ৱজ্জিপুত্তসুত্তৱণ্ণনা নিট্ঠিতা.

১০. সজ্ঝাযসুত্তৱণ্ণনা

২৩০. নিস্সৰণপৰিযত্তিৱসেনাতি অদ্ধা ইমং পৰিযত্তিং নিস্সায ৱট্টদুক্খতো নিস্সৰিতুং লব্ভাতি এৱং নিস্সৰণপৰিযত্তিৱসেন. সজ্ঝাযনতোতি ৱিমুত্তাযতনসীসে ঠত্ৱা সজ্ঝাযনতো. ইদানি তস্স নিস্সৰণপৰিযত্তিৱসেন সজ্ঝাযনকৰণং, পটিপত্তিৱসেন ৱত্তপটিৱত্তকৰণং, ৱিপস্সনাভাৱনঞ্চ দস্সেতুং ‘‘সো কিৰা’’তিআদি ৱুত্তং. অৰহত্তং পত্তদিৱসে পটিপত্তিকিত্তনায পুৰিমদিৱসেসুপি তথা পটিপজ্জি, ৱিপস্সনং পন উস্সুক্কাপেতুং নাসক্খীতি দস্সেতি. কালং অতিৱত্তেতীতি ইদং ‘‘সঙ্কসাযতী’’তি পদস্স অত্থৱচনং. থেৰস্সাতি সজ্ঝাযকত্থেৰস্স.

ধম্মপদানীতি সীলাদিধম্মক্খন্ধদীপকানি পদানি. তেনাহ ‘‘সব্বম্পি বুদ্ধৱচনং অধিপ্পেত’’ন্তি. ন গণ্হাসি উদ্দেসন্তি অধিপ্পাযো. পাড়িযং ‘‘ভিক্খূহি সংৱসন্তো’’তি ইমিনা তেসং ধম্মস্সৱনত্থাযপি ধম্মো পৰিযাপুণিতব্বোতি দস্সেতি. ৱিৰজ্জতি এতেনাতি ৱিৰাগো, অৰিযমগ্গো. জানিত্ৱাতি পৰিঞ্ঞাভিসমযৱসেন দিট্ঠসুতাদিং যাথাৱতো জানিত্ৱা পটিৱিজ্ঝিত্ৱা. ৱিস্সজ্জনন্তি পহানং. ন বুদ্ধৱচনস্স ৱিস্সজ্জনং. ভণ্ডাগাৰিকপৰিযত্তিযাপি অনুঞ্ঞাতত্তা পগেৱ নিস্সৰণত্থায, তত্থ পন মত্তা জানিতব্বাতি দস্সেন্তো ‘‘এত্তাৱতা’’তিআদিমাহ.

সজ্ঝাযসুত্তৱণ্ণনা নিট্ঠিতা.

১১. অকুসলৱিতক্কসুত্তৱণ্ণনা

২৩১. অকুসলে ৱিতক্কেতি অকোসল্লসম্ভূতট্ঠেন অকুসলে মিচ্ছাৱিতক্কে. যোনি ৱুচ্চতি উপাযো, তস্মা অসুভাদিকে সুভাদিৱসেন মনসিকাৰো অযোনিসোমনসিকাৰোতি আহ ‘‘অনুপাযমনসিকাৰেনা’’তি. পাসাদিককম্মট্ঠানন্তি পসাদাৱহং বুদ্ধানুস্সতিআদিকম্মট্ঠানং. বলৱপীতিঞ্চ সুখঞ্চাতি নীৱৰণৱিক্খম্ভনতো বলৱন্তং উপচাৰজ্ঝানসহগতং পীতিঞ্চ সুখঞ্চ.

অকুসলৱিতক্কসুত্তৱণ্ণনা নিট্ঠিতা.

১২. মজ্ঝন্হিকসুত্তৱণ্ণনা

২৩২. নন্দনৱগ্গেতি নন্দনৱগ্গৱণ্ণনাযং তত্থ ইধাপি গাথায ৱিসেসাভাৱতো. যদি এৱং কস্মা তত্থ সঙ্গীতং ইধ গহিতন্তি? দেৱতাপটিসংযুত্ততং উপাদায দেৱতাসংযুত্তে সঙ্গহিতম্পি অট্ঠুপ্পত্তিযা পটিসংযুত্তত্তা ইধ গহিতং.

মজ্ঝন্হিকসুত্তৱণ্ণনা নিট্ঠিতা.

১৩. পাকতিন্দ্ৰিযসুত্তৱণ্ণনা

২৩৩. তেৰসমে যং ৱত্তব্বং, তং ৱিত্থাৰিতমেৱাতি যোজনা. জন্তুদেৱপুত্তসুত্তেতি জন্তুদেৱপুত্তসুত্তসংৱণ্ণনায. ‘‘তত্থ সঙ্গীতং ইধাপী’’তিআদি অনন্তৰসুত্তৱণ্ণনাযং ৱুত্তনযমেৱ.

পাকতিন্দ্ৰিযসুত্তৱণ্ণনা নিট্ঠিতা.

১৪. গন্ধত্থেনসুত্তৱণ্ণনা

২৩৪. গন্ধাৰম্মণং উপনিজ্ঝাযতীতি গন্ধসঙ্খাতং আৰম্মণং উপেচ্চ নিজ্ঝাযতি, ৰূপাৰম্মণেন ৱিয ৱিঞ্ঞাণেন ৰূপং, গন্ধাৰম্মণেন তং উপেচ্চ নিজ্ঝাযতি পচ্চক্খতো, যাথাৱতো সভাৱতো পটিৱিজ্ঝতীতি অত্থো. উপসিঙ্ঘিস্সতীতি তণ্হাৱসেন উপগন্ত্ৱা সিঙ্ঘিস্সতি.

একঙ্গমেতং থেয্যানন্তি আৰম্মণৱসেন থেয্যৱত্থূসু ৱিভজিযমানেসু একমঙ্গমেতং গন্ধাৰম্মণন্তি আহ ‘‘থেনিতব্বান’’ন্তিআদি. ওজাপেক্খায থেয্যায পৱত্তমানায ধম্মাৰম্মণতাপি তস্সা সিযা, সা পন ন মধুৰা থেয্যকতা চাতি ‘‘পঞ্চকোট্ঠাসান’’ন্তি ৱুত্তং. কামঞ্চ তং গন্ধাৰম্মণং কেনচি পৰিগ্গহিতং ন হোতীতি আদিযিতুং সক্কা, সত্থাৰা পন অননুঞ্ঞাতত্তা ন যুত্তো তস্স পৰিভোগো. যং পন তেন ভিক্খুনা ৱুত্তং ‘‘ন হৰামি ন ভঞ্জামী’’তি, তস্সপি অযমেৱ পৰিহাৰো. ৱণ্ণীযতি ফলং এতেনাতি ৱণ্ণং, কাৰণন্তি ৱুত্তং ‘‘ৱণ্ণেনাতি কাৰণেনা’’তি.

তস্মিন্তি তস্মিং ভিক্খুস্মিং. আকিণ্ণকম্মন্তোতি তণ্হাদিট্ঠিআদিৱসেন অকুসলকম্মন্তো দিট্ঠিমোহতণ্হাদিৱসেন আদিতো পট্ঠায কুসলকম্মানং পটিক্খেপনতো. দিট্ঠিৱসেন চ কথিনকক্খড়খৰিগতত্তা ‘‘অখীণকম্মন্তো কক্খড়কম্মন্তো’’তি ৱুত্তং.

আকিণ্ণলুদ্দোতি আকিণ্ণো হুত্ৱা কক্খড়ো. তেনাহ ‘‘বহুপাপো’’তিআদি. মক্খিতোতি লিত্তো. তন্তি দেৱতাচোদনং. তস্মাতি অতিক্কম্ম ঠিতত্তা‘‘ত্ৱঞ্চাৰহামি ৱত্তৱে’’তি এৱমাহ.

গৱেসন্তস্স অত্তনো সন্তানে উপ্পাদনৱসেন পৰিযেসন্তস্স. অনেকযোজনাযামৱিত্থাৰং গগনতলং ব্যাপেত্ৱা উপ্পন্নৱলাহককূটপ্পমাণং ৱিয. সুদ্ধোতি সীলেন পৰিসুদ্ধো অযন্তি জানাসি. সুগতিন্তি সুন্দৰনিব্বত্তিং. তেন নিব্বানস্সপি সঙ্গহো সিদ্ধো.

গন্ধত্থেনসুত্তৱণ্ণনা নিট্ঠিতা.

সাৰত্থপ্পকাসিনিযা সংযুত্তনিকায-অট্ঠকথায

ৱনসংযুত্তৱণ্ণনায লীনত্থপ্পকাসনা সমত্তা.