৫. চন্দনসুত্তৱণ্ণনা

৯৬. হেট্ঠাতি কামভৱে. তত্থ হি পৰিব্ভমন্তস্স পতিট্ঠা দুল্লভা যেভুয্যেন তত্থ সত্তা নিমুগ্গা এৱ হোন্তি, তস্মা হেট্ঠা অপ্পতিট্ঠো সংসাৰো. উপৰীতি মহগ্গতভৱে. তত্থ হি নিব্বত্তস্স নিব্বানং আৰুহিতুং আলম্বনা দুল্লভা, ঝানাভিৰতিযা তত্থেৱ নিকন্তি তেসং বলৱতী হোতি, তস্মা উপৰি অনালম্বনো সংসাৰো. পেসিতত্তোতি নিব্বানং পতি পেসিতচিত্তো. তযো কম্মাভিসঙ্খাৰাতি পুঞ্ঞাভিসঙ্খাৰাদযো তযো অভিসঙ্খাৰা. তেন ‘‘নন্দীপুব্বকো কম্মভৱো’’তি ৱত্ৱা ‘‘নন্দিং জনেত্ৱা’’তি ৱুত্তো. কামসঞ্ঞাসীসেন কামচ্ছন্দস্স গহণং, কামচ্ছন্দপমুখানি চ ওৰম্ভাগিযসংযোজনানি গহিতানীতি আহ ‘‘কামসঞ্ঞাগহণেন পঞ্চোৰম্ভাগিযসংযোজনানী’’তি. ৰূপভৱো ৰূপং ভৱপদলোপেন. ৰূপভৱগ্গহণেন চেত্থ সেসভৱস্সপি গহণং. তস্স সংযোজনগ্গহণেন পঞ্চ উদ্ধম্ভাগিযসংযোজনানি গহিতানি. মহোঘেতি সংসাৰমহোঘে. তেসন্তি কামভৱাদীনং গহণেন ভৱভাৱেন তদেকলক্খণতায. অৰূপভৱো গহিতো লক্খণহাৰনযেন. সেসং সুৱিঞ্ঞেয্যমেৱ.

চন্দনসুত্তৱণ্ণনা নিট্ঠিতা.