৭. বুদ্ধৱন্দনাসুত্তৱণ্ণনা

২৬৩. উট্ঠহাতি উট্ঠানং কাযিকৱীৰিযং কৰোহি. তেনাহ ‘‘ৱিচৰ, লোকে’’তি. চেতসিকৱীৰিযং পন ভগৱতা মত্থকং পাপিতমেৱ. তেনাহ ‘‘ৱিজিতসঙ্গামা’’তি. দ্ৱাদসযোজনিকস্স উচ্চভাৱেন. ৱিত্থাৰতো পন আযামতো চ অনেকযোজনসতসহস্সপৰিমাণচক্কৱাড়ং অতিব্যাপেত্ৱা ঠিতস্স. পন্নভাৰাতি পাতিতভাৰ. নিক্খেপিতব্বতো ভাৰাতি আহ ‘‘ওৰোপিতখন্ধা’’তিআদি. তে হি তংসমঙ্গিনো পুগ্গলস্স সম্পাতনট্ঠেন ভাৰা নাম. ৱুত্তঞ্হেতং ‘‘ভাৰা হৱে পঞ্চক্খন্ধা’’তি (সং. নি. ৩.২২). তদেকদেসা চ কিলেসাভিসঙ্খাৰা. পন্নৰসায পুণ্ণমায ৰত্তিন্তি যথা পন্নৰসপুণ্ণমায ৰত্তিযং পৰিপুণ্ণকালে উপক্কিলেসৱিমুত্তো চন্দো সোভতি, এৱং তৱ চিত্তং সব্বসো উপক্কিলেসৱিমুত্তং সোভতীতি অধিপ্পাযো.

বুদ্ধৱন্দনাসুত্তৱণ্ণনা নিট্ঠিতা.