১১. সক্কসংযুত্তং

১. পঠমৱগ্গো

১. সুৱীৰসুত্তৱণ্ণনা

২৪৭. অভিযংসূতি যুদ্ধসজ্জাভিমুখা হুত্ৱা গচ্ছিংসু. তত্ৰাতি তস্মিং অসুৰানং অভিযানে অযং দানি ৱুচ্চমানা অনুপুব্বতো কথা. তেত্তিংস পুৰিসে গহেত্ৱাতি তেত্তিংস পুৰিসে পুঞ্ঞকিৰিযায সহাযভূতে গহেত্ৱা. ‘‘যাৱজীৱং মাতাপিতুভৰো অস্স’’ন্তিআদিনা সমাদিন্নানি সত্ত ৱতপদানি পূৰেত্ৱা. অধিগণ্হন্তং অভিভৱন্তং. পুত্তহতাযাতি হতপুত্তায. সা সুৰা ন হোতি, ন সুৰং পিৱিম্হাতি অধিপ্পাযো. ততো পট্ঠাযাতি ‘‘ন সুৰা’’তি ৱুত্তকালতো পট্ঠায. ‘‘ন সুৰন্তি ন দিব্বন্তীতি অসুৰা’’তি কেচি. হেট্ঠিমতলে অন্তোভূমিযং আযামতো দসযোজনসহস্সং.

উৰগাদিসহচৰিতানি ঠানানি উৰগাদীনীতি আহ ‘‘উৰগাদীসু পঞ্চসু ঠানেসূ’’তি. পঠমালিন্দেতি পঠমে পৰিভণ্ডে. পঞ্চযোজনসহস্সৱিত্থাৰপুথুবহলাহি সিনেৰুস্স চতূসুপি পস্সেসু চত্তাৰো পৰিভণ্ডা. সিনেৰুস্স হি তস্মিং তস্মিং পস্সে যুগন্ধৰাদীসু পঞ্চসতপৰিত্তদীপপৰিৱাৰে মহাদীপে চ লভিতব্বস্স মহতো অত্থস্স ৱসেন মহত্থা. কুপিতাৱিলচিত্তাতি কুপিতেন কোপেন আকুলচিত্তা. যুদ্ধেসীতি যুদ্ধেসিনো. সেসেসূতি সেসেসু পৰিভণ্ডেসু. সেসাতি সুপণ্ণাদযো.

ৱম্মিকমক্খিকাতি সপক্খিকউপচিকা. ওসক্কিত্ৱাতি পিট্ঠিভাগেন নিৱত্তিত্ৱা.

পমাদং আপাদেসীতি সক্কস্স আণায পমাদং আপজ্জি. সট্ঠিযোজনং ৱিত্থাৰেন. সুৱণ্ণমহাৱীথিন্তি সুৱণ্ণমযভূমিজগতিৱীথিং.

অনুট্ঠহন্তোতি উট্ঠানং কাযিকৱীৰিযং অকৰোন্তো. অৱাযমন্তোতি ৱাযামং চেতসিকৱীৰিযং অকৰোন্তো. কিঞ্চি কিচ্চন্তি কসিৱাণিজ্জাদিভেদং অঞ্ঞতৰং কিচ্চং কত্তব্বকম্মং. ৱৰন্তি পৱৰং. তেনাহ ‘‘উত্তম’’ন্তি. তঞ্চ খো কসিতব্বট্ঠানং অধিপ্পেতন্তি আহ ‘‘ওকাস’’ন্তি. কম্মং অকত্ৱাতি কিঞ্চিপি জীৱিতহেতুভূতং কম্মং অকত্ৱা. জীৱিতট্ঠানং নামাতি তস্স জীৱিতস্স হেতু নাম. নিব্বানস্স মগ্গোতি নিব্বানস্স অধিগমুপাযভূতো মগ্গো.

সুৱীৰসুত্তৱণ্ণনা নিট্ঠিতা.

২. সুসীমসুত্তৱণ্ণনা

২৪৮. অন্তৰেতি অব্ভন্তৰে. এৱংনামকন্তি ‘‘সুসীমো’’তি এৱংনামকং. একং পুত্তমেৱ অঞ্ঞতৰং অত্তনো পুত্তমেৱ.

সুসীমসুত্তৱণ্ণনা নিট্ঠিতা.

৩. ধজগ্গসুত্তৱণ্ণনা

২৪৯. সমুপব্যূড়্হোতি উভিন্নং সহ এৱ সমাগমো, ভুসং ৱা ব্যূড়্হোতি অত্থো. ভুসা পনস্স ব্যূড়্হতা দ্ৱিন্নং সেনানং সমাগন্ত্ৱা সম্পিণ্ডিতভাৱেনাতি আহ ‘‘সম্পিণ্ডিতো ৰাসিভূতো’’তি. পচ্ছিমন্তোতি ৰথপঞ্জৰস্স পৰন্তো পচ্ছিমন্তো পচ্ছিমকোট্ঠাসো. ৰথসন্ধিতোতি ৰথপঞ্জৰস্স কুব্বৰেন সদ্ধিং সম্বন্ধনট্ঠানতো. তদেৱ পমাণন্তি তদেৱ ‘‘দিযড্ঢযোজনসতাযামো’’তি ৱুত্তপ্পমাণমেৱ. দিগুণং কত্ৱাতি ‘‘পচ্ছিমন্তো সতযোজনো’’তিআদিনা দিগুণং কত্ৱা. চন্দমণ্ডলসূৰিযমণ্ডলকিঙ্কিণিকজালাদিভেদস্স সেসালঙ্কাৰস্স. পস্সন্তানং দেৱানং. ৰাজা নোতি অম্হাকং ৰাজা দেৱসেট্ঠো. দুতিযং আসনং লভতীতি সক্কে নিসিন্নে তস্স অনন্তৰং দুতিযং আসনং লভতি. তস্মা দেৱসেট্ঠতায সক্কো ৱিয গাৰৱট্ঠানিযো, যতো সক্কো ‘‘তস্স ধজগ্গং উল্লোকেয্যাথা’’তি আহ. এস নযো সেসেসুপি. অসুৰেহি পৰাজিতোতি অসুৰেহি পৰাজযং আপাদিতো. ৰজধজং দিস্ৱাতি পৰসেনায উপগচ্ছন্তিযা উট্ঠিতৰজমত্তম্পি দিস্ৱা ঠিতোপি তং ৰজধজং দিস্ৱা ভীৰুভাৱেন পলাযনধম্মো.

যস্স ধজগ্গপৰিত্তস্স. আনুভাৱো ৱত্ততি অসম্মুখীভূতাহিপি দেৱতাহি সিৰসা সম্পটিচ্ছিতব্বতো. চোৰভযাদীহীতি আদি-সদ্দেন ৰোগভযাদীনঞ্চেৱ ৱট্টদুক্খস্স চ সঙ্গহো দট্ঠব্বো ৱিধিনা ভাৱিতে পৰিত্তস্স অত্থে উপচাৰজ্ঝানাদীনম্পি ইজ্ঝনতো.

দীঘৱাপীনামকে গামে চেতিযং দীঘৱাপিচেতিযং. মুদ্ধৱেদিকা নাম হম্মিযং পৰিক্খিপিত্ৱা কতৱেদিকা. বুদ্ধগতং সতিং উপট্ঠপেত্ৱা পৰিত্তৰক্খগুত্তিং আহ. পৰিত্তস্স আনুভাৱেন দ্ৱে ইট্ঠকা…পে… অট্ঠংসু. তথা হি তস্মিং নিস্সেণিযং ঠিতে…পে… অট্ঠংসূতি.

ধজগ্গসুত্তৱণ্ণনা নিট্ঠিতা.

৪. ৱেপচিত্তিসুত্তৱণ্ণনা

২৫০. ‘‘মহানুভাৱতায অসুৰানং চিত্তৱেপনেন ৱেপচিত্তী’’তি ৱদন্তি. ইসীহি পন অভযং যাচিতে ‘‘ভযমেৱ দদামী’’তি ৱত্ৱা তেহি ‘‘অক্খযং হোতু তে ভয’’ন্তি অভিসপৱসেন ৱুত্তকালতো পট্ঠায ৱেপনচিত্ততায ‘‘ৱেপচিত্তী’’তি ৱুচ্চতি, যং লোকিযা ‘‘পুলোমো’’তি চ ৱদন্তি. নিপাতপদানিপি কানিচি অত্থৱিসেসজোতকানি হোন্তীতি আহ ‘‘নিপাতমত্ত’’ন্তি হেতুঅত্থাদীনমেত্থ অসম্ভৱতো. তন্তি সক্কং দেৱানমিন্দং. কণ্ঠে পঞ্চমেহীতি কণ্ঠবন্ধনপঞ্চমেহি, ৱিভত্তিঅলোপেন নিদ্দেসো. চিত্তেনেৱাতি ‘‘ইমং বন্ধামি, অযং বজ্ঝতূ’’তি উপ্পন্নচিত্তেনেৱ. বজ্ঝতি বদ্ধো হোতি, অযং দেৱানুভাৱো. মুচ্চতীতি এত্থাপি এসেৱ নযো. দসহীতি ‘‘চোৰোসী’’তিআদিনা ইধ ৱুত্তেহি দসহি. তেনাহ ‘‘ইমেহী’’তি. নিব্বত্তিত্ৱা চিৰকালতং উপাদায খুংসনৱসেন ৱদতি ‘‘জৰসক্কা’’তি. ন তং অক্কোসং মনসি কৰোতি দীঘৰত্তং খন্তিসোৰচ্চেসু নিৰুড়্হঅজ্ঝাসযত্তা. মহাপটিগ্গহণন্তি মহন্তং উপসমব্যঞ্জনং. অস্সাতি ৱেপচিত্তস্স.

পটিসংযুজেতি পটিসত্তু হুত্ৱা সংযুদ্ধং কৰেয্য. তেনাহ ‘‘পটিপ্ফৰেয্যা’’তি. উপসমং…পে… মঞ্ঞে উপসমেনেৱ পচ্চত্থিকস্স নাযকভূতস্স কোধস্স পটিসেধনতো. তাদিসে হি কোধো পটিকিৰিযং অলভন্তো অনুপাদানো ৱিয জাতৱেদো ৱূপসম্মতি. যদা-সদ্দো হেতুঅত্থো, ন কালত্থোতি আহ ‘‘যস্মা তং মঞ্ঞতী’’তি. তাৱদেৱ দ্ৱে গাৱো যুজ্ঝন্তেতি তস্মিংযেৱ খণে দ্ৱীসু গোণেসু যুজ্ঝন্তেসু.

খন্তিতো উত্তৰিতৰো অঞ্ঞো অত্থো ন ৱিজ্জতি অনন্তৰেৱ অস্স ৱিৰোধং অনত্থং পটিবাহিত্ৱা দিট্ঠধম্মিকস্স চেৱ সম্পৰাযিকস্স চ সংৱিধানতো. তং খন্তিং পৰমং আহু সেট্ঠবলং ৱিৰোধপচ্চযং অভিভুয্য পৱত্তনতো. বালযোগতো বালো, তস্স বলং বালবলং, অঞ্ঞাণন্তি আহ ‘‘বালবলং নাম অঞ্ঞাণবল’’ন্তি. তং যস্স বলন্তি তং অঞ্ঞাণবলং যস্স পুগ্গলস্স বলং, অবলমেৱ তং পঞ্ঞাবলেন ৱিদ্ধংসেতব্বতো. পটিৱত্তা ন ৱিজ্জতীতি ধম্মট্ঠং পটিপ্ফৰিত্ৱা অভিভৱিত্ৱা পৱত্তা নত্থি. পটিৱচনমত্তং পন কোচি ৱদেয্যাপি, তং অকাৰণন্তি দস্সেন্তো ‘‘পটিপ্ফৰিত্ৱা ৱা’’তিআদিমাহ. বালবলন্তি ‘‘পটিপ্ফৰিত্ৱা’’তি ৱচনস্স কাৰণৱচনং. তস্সেৱ পুগ্গলস্স পটিকুজ্ঝনকস্স. নানত্তাৱিতক্কনতো উভিন্নং অত্থং. তিকিচ্ছন্তন্তি অনত্থপটিবাহনমুখেন পণ্ডিতকিচ্চকৰণেন পটিসেধেন্তং. ‘‘বালো অয’’ন্তি এৱং পঞ্ঞপেতুং হেতুফলানং অনৱবোধতো চতুসচ্চধম্মে অছেকাতি.

ৱেপচিত্তিসুত্তৱণ্ণনা নিট্ঠিতা.

৫. সুভাসিতজযসুত্তৱণ্ণনা

২৫১. ‘‘ছেকতাযা’’তি ৱত্ৱা তস্স ৱত্তুং ছেকভাৱং দস্সেতুং ‘‘এৱং কিৰস্সা’’তিআদিমাহ. গাহন্তি লদ্ধিং. মোচেত্ৱাতি যস্স পুন ‘‘চোৰো’’তি উত্তৰি ৱত্তুং ন সক্কোতি, এৱং ৱিমোচেত্ৱাতি পঠমং ৱত্তুং ন সক্কা. গৰূতি ভাৰিযং, দুক্কৰন্তি অত্থো. পচ্ছাতি ‘‘পৰস্সা’’তি ৱুত্তো সো কিঞ্চি পঠমং ৱদন্তো অত্তনো অধিপ্পাযং পৱেদেতি নাম, তং যথাসত্তি ৱিদিতমনো তস্স উত্তৰি ৱত্তুং সক্কোতি. তেনাহ ‘‘পৰস্স ৱচনং অনুগন্ত্ৱা পন পচ্ছা সুখং ৱত্তু’’ন্তি. অপি চ অসুৰিন্দেন ‘‘হোতু, দেৱানমিন্দ, সুভাসিতেন জযো’’তি পঠমং ৱুত্তং, ৱিসেসো চ পুব্বং উপনেন্তং অনুৱত্ততি. ৱচসি কুসলো সক্কো দেৱৰাজা তং ৱিসেসং তেনেৱ পুব্বং উপনযাপেন্তো উপলাপনৱসেন ‘‘তুম্হে খ্ৱেত্থা’’তিআদিমাহ. পুব্বদেৱাতি সক্কপমুখায দেৱপৰিসায লোকে পুব্বেৱ উপ্পন্নত্তা ‘‘পুব্বদেৱা’’তি পসংসৱচনং. ৱেপচিত্তিং সন্ধায ‘‘তুম্হে’’তি ‘‘পুব্বদেৱা’’তি চ ৱুত্তত্তা ‘‘তুম্হাকং তাৱ পৱেণিআগতং ভণথা’’তি ৱুত্তং. গাৰৱট্ঠানিযত্তা ৱেপচিত্তিনো বহুৱচনপযোগো. দণ্ডেন অৱচাৰো অৱচৰণং দণ্ডাৱচৰো, নত্থি এত্থ ৱুত্তো দণ্ডাৱচৰোতি অদণ্ডাৱচৰা, সক্কেন ৱুত্তা গাথাযো.

সুভাসিতজযসুত্তৱণ্ণনা নিট্ঠিতা.

৬. কুলাৱকসুত্তৱণ্ণনা

২৫২. ৰথসদ্দোতি ৰথালঙ্কাৰভূতানং কিঙ্কিণিকজালাদীনং সদ্দো. তথা ধজসদ্দো. আজানীযসদ্দোতি আজানীযানং হসিতসদ্দো চ. কৰুণাসমাৱজ্জিতহদযোতি পাণানং অনুপৰোধেন পণামিতচিত্তো. ঈসামুখেনাতি ৰথকপ্পৰমুখেন. পুঞ্ঞপচ্চযনিব্বত্তোতি উড়াৰং সুৱিপুলং পুঞ্ঞং পচ্চযং কত্ৱা নিব্বত্তো. ন সজ্জতি কত্থচি অপ্পটিঘট্টনেন গচ্ছন্তো. সিম্বলিৱনেনাতি সিম্বলিৱনমজ্ঝেন. ৱিভগ্গং নিম্মথিতন্তি ইতো চিতো ৱিভগ্গঞ্চেৱ নিৰৱসেসতো মথিতঞ্চ হোতি.

কুলাৱকসুত্তৱণ্ণনা নিট্ঠিতা.

৭. নদুব্ভিযসুত্তৱণ্ণনা

২৫৩. সুপচ্চত্থিকোতি সুট্ঠু অতিৱিয পচ্চত্থিকো পটিসত্তু. গহিতোসীতি দেৱপাসেন বন্ধিত্ৱা গহিতো অসি. বদ্ধোৱ অহোসি সক্কস্স পুঞ্ঞানুভাৱেন. চেতিযৰাজা কিৰ ইমস্মিং কপ্পে ততো পুব্বে কেনচি অৱুত্তপুব্বং খৰমুসাৱাদং অভাসি, তাৱদেৱ ৱিৰজ্ঝিত্ৱা মহাপথৱিযা ৱিৱৰে দিনে নিপতিত্ৱা অৱীচিঅগ্গিজালানমিন্দনমহোসি. তং সন্ধায ৱুত্তং ‘‘চেতিযৰঞ্ঞো পাপং সন্ধাযা’’তি. মহাপাপানীতি মহন্তানি গৰুতৰানি পাপানি. তথা হি ৱেপচিত্তিনো সপথকৰণে নিদস্সনভাৱেন এতানি অট্ঠকথাযং আগতানীতি.

নদুব্ভিযসুত্তৱণ্ণনা নিট্ঠিতা.

৮. ৱেৰোচনঅসুৰিন্দসুত্তৱণ্ণনা

২৫৪. দ্ৱাৰপালৰূপকানি ৱিযাতি দ্ৱাৰপালাকাৰেন কতপটিমাযো ৱিয. ৱাযমেথেৱ, ন অন্তৰা সংকোচং আপজ্জেয্যাতি অধিপ্পাযো. নিপ্ফন্নসোভনেসূতি নিপ্ফন্নভাৱেন সুন্দৰেসু. সব্বে হি অনিপ্ফন্না অত্থা ন সোভন্তি. কিচ্চজাতাতি ৱিপ্পকতভাৱেন সঞ্জাতকিচ্চা. অকিচ্চজাতোতি অসঞ্জাতকিচ্চো কিচ্চৰহিতো নাম নত্থি গমনট্ঠিতসযননিসজ্জাদিৱসেন উপ্পজ্জনকদুক্খৱিনোদনভাৱতো. সংযোগপৰমাত্ৱেৱ সম্ভোগাতি ইমেসং সত্তানং সংভুঞ্জিতব্বৱত্থূনি নাম পকতিযা ৱিৰোধসীলানিপি অসংযোগেন ৱা অসুন্দৰানিপি, তানি অভিসঙ্খৰণপচনসংযোজনপৰমানি ৱেদিতব্বানি তথা সতি সম্ভোগাৰহভাৱূপগমনতো. তেনাহ ‘‘পাৰিৱাসিকওদনাদীনী’’তিআদি. উণ্হাপেত্ৱা পৰিভুঞ্জিতব্বযুত্তে পৰিভজ্জিত্ৱাতি অধিপ্পাযো.

ৱেৰোচনঅসুৰিন্দসুত্তৱণ্ণনা নিট্ঠিতা.

৯. অৰঞ্ঞাযতনইসিসুত্তৱণ্ণনা

২৫৫. জামাতিকা ৱুচ্চতি ধীতুপতি, সসুৰো ভৰিযায পিতা, তস্মা ইমে অন্তৰৱত্তিনো দ্ৱে জনা সক্কৱেপচিত্তিনো সুজায ৱসেন জামাতিকসসুৰা. ‘‘চিৰদিক্খিতান’’ন্তি দিক্খিত্ৱা পব্বজিত্ৱা চিৰকালানং ৱতসমাদানৱসেন ইতো বাহিৰকানং পব্বজিতানন্তি আহ ‘‘চিৰসমাদিন্নৱতান’’ন্তি. ইতো পটিক্কমাতি ইতো যথাঠিতট্ঠানতো অপেহি অপক্কম. ন পটিক্কূলসঞ্ঞিনো গুণে গাৰৱযোগতো. দেৱা হি যেভুয্যেন ‘‘মযং পুব্বে গুণৱন্তে পযিৰুপাসিত্ৱা তেসং ওৱাদে ঠত্ৱা পুঞ্ঞানি উপচিনিত্ৱা ইধূপপন্না’’তি গুণৱন্তেসু আদৰভাৱং উপট্ঠপেন্তি.

অৰঞ্ঞাযতনইসিসুত্তৱণ্ণনা নিট্ঠিতা.

১০. সমুদ্দকসুত্তৱণ্ণনা

২৫৬. চক্কৱাড়মহাসমুদ্দপিট্ঠিযন্তি চক্কৱাড়পব্বতপাদসমন্তা মহাসমুদ্দতীৰপিট্ঠিযং. যথেৱ সিনেৰুসমীপে মহাসমুদ্দো অনুপুব্বনিন্নো অনুপুব্বপোণো অনুপুব্বপব্ভাৰো, এৱং যেভুয্যেন চক্কৱাড়পাদসমীপেপি. তেনাহ ‘‘ৰজতপট্টৱণ্ণে ৱালুকপুলিনে’’তি. ৱুত্তপ্পকাৰাসূতি অনন্তৰসুত্তে ৱুত্তপ্পকাৰাসু. অস্সমপদেনাতি অস্সমপদৱেমজ্ঝেন. এৱং চিন্তযিংসূতি ‘‘যং নূন ময’’ন্তিআদিনা যথা পাড়িযং আগতং, এৱং মন্তযিংসু.

ইচ্ছিতকৰোতি যদিচ্ছিতকৰণং. দুট্ঠানন্তি দুৰাসযানং. তে পন দুট্ঠজ্ঝাসযা ৱিৰুদ্ধা হোন্তীতি আহ ‘‘দুট্ঠানং ৱিৰুদ্ধান’’ন্তি. পৱুত্তন্তি বীজং সন্ধায ৱপিতং. তেনাহ ‘‘খেত্তে পতিট্ঠাপিত’’ন্তি.

সাযমাসভত্তন্তি সাযং অসিতব্বভোজনং. যথাৱাৰং ভক্খিতমেতং দেৱানং ৱিয সুখুমং গুৰুৱাসঞ্চ ন হোতীতি ‘‘ভত্ত’’ন্তি ৱুত্তং. গেলঞ্ঞজাতন্তি সঞ্জাতগেলঞ্ঞং. ৱেপতীতি কম্পতি পৱেধতি.

সমুদ্দকসুত্তৱণ্ণনা নিট্ঠিতা.

পঠমৱগ্গৱণ্ণনা নিট্ঠিতা.

২. দুতিযৱগ্গো

১. ৱতপদসুত্তৱণ্ণনা

২৫৭. সমাদাতব্বতো ৱতানি, অঞ্ঞমঞ্ঞং অসঙ্কৰসভাৱেন পব্বজিতব্বতো পদানি, ততো এৱ অসংকিণ্ণভাগাতি কত্ৱা ‘‘ৱতকোট্ঠাসানী’’তি ৱুত্তং. সমত্তানীতি পুঞ্ঞৱিসেসতায পুজ্জভৱফলনিব্বত্তনেন কিত্তিসঞ্ঞানেন চ সমং অত্তানি সমত্তানি. পৰিপুণ্ণানীতি অখণ্ডাদিভাৱেন সব্বসো পুণ্ণানি. সমাদিন্নানীতি তত্থ সক্কচ্চকাৰিতায সম্মা আদিন্নানি. মাতুলানীতি পিতুভগিনী, ন যা কাচি মাতুলস্স ভৰিযা কুলজেট্ঠকানং অধিপ্পেতত্তা, ভৰিযাপি ৱা মাতুলসম্বন্ধতো গহেতব্বা, তথা সতি মহাপিতুভৰিযাদীনম্পি সঙ্গহো দট্ঠব্বো.

আদি-সদ্দেন জেট্ঠভগিনীনং সঙ্গহো. অপচিতিকাৰকোতি তেসং পচ্চুট্ঠানকৰো. যো কোচি দদন্তোপি সাপেক্খো দেতি, সো মুত্তচাগো ন হোতি, অযং পন ন এৱন্তি ‘‘মুত্তচাগো হোতী’’তি ৱুত্তং. ৱিস্সট্ঠচাগোতি নিৰপেক্খপৰিচ্চাগোতি অত্থো. যথা পাণাতিপাতবহুলো ‘‘লোহিতপাণী’’তি ৱুচ্চতি, তথা দানবহুলো ‘‘পযতপাণী’’তি ৱুত্তোতি আহ ‘‘দেয্যধম্মদানত্থায সদা ধোতহত্থো’’তি. ৱোস্সগ্গৰতোতি দেয্যধম্মস্স পৰিচ্চজনে অভিৰতো. পৰেহি যাচিতব্বাৰহোতি পৰেহি যাচিতুং যুত্তো ইচ্ছিতস্স অত্থস্স তাৱদেৱ ৱিস্সজ্জনতো. দানেনেৱ যুত্তোতি সব্বকালং দানেনেৱ যুত্তো অভিণ্হং পৱত্তমহাদানত্তা. দানে চ সংৱিভাগে চাতি পৰস্স সম্পুণ্ণং কত্ৱা পৰিচ্চজনসঙ্খাতে দানে চ অত্তনা পৰিভুঞ্জিতব্বতো সংৱিভজনসঙ্খাতে সংৱিভাগে চ ৰতো অভিৰতো.

ৱতপদসুত্তৱণ্ণনা নিট্ঠিতা.

২. সক্কনামসুত্তৱণ্ণনা

২৫৮. মনুস্সভূতোতি মনুস্সেসু ভূতো, মনুস্সত্তং ৱা পত্তো. আৱসথন্তি নিৱাসট্ঠানং কাৰেত্ৱা অদাসি, তস্মা ৱাসং অদাসীতি ৱাসৱো. অত্থ-সদ্দো ইধ কাৰণপৰিযাযোতি আহ ‘‘সহস্সম্পি কাৰণান’’ন্তি. স্ৱাযমত্থো হেট্ঠা ৱিভাৱিতোৱ. ৱিনিচ্ছিনতি, তস্মা সহস্সং পঞ্ঞাঅক্খীনি এতস্সাতি সহস্সক্খো. মঘং ৱুচ্চতি ধনং, তং পন সদ্ধাসঙ্খাতং মঘং অস্স অত্থীতি মঘৱা. পুৰে দানং দদাতীতি পুৰিন্দদো অনুনাসিকলোপং অকত্ৱা. পুঞ্ঞানি কাতুং সক্কোতীতি সক্কো.

সক্কনামসুত্তৱণ্ণনা নিট্ঠিতা.

৩. মহালিসুত্তৱণ্ণনা

২৫৯. সোতি সক্কো দেৱৰাজা. বহুৱচনে ৱত্তব্বে একৱচনং ৱুত্তং. ৱুচ্চতীতি ৱচনং, অত্থো. তস্মা বহুৱচনেতি বহুম্হি অত্থেতি অত্থো. যথা পটিপজ্জন্তো অনুক্কমেন তে ধম্মে সমাদিযিত্ৱা সক্কো সক্কত্তং অজ্ঝগা, তং পটিপত্তিং দস্সেতুং ‘‘সক্কো কিৰা’’তিআদি ৱুত্তং. অনন্তৰেতি সক্কভাৱস্স অতীতানন্তৰে অত্তভাৱে. তং সব্বন্তি সক্কস্স মঘমাণৱকালে সম্মাপটিপত্তিং, তায সক্কভাৱূপগমনঞ্চাতি তং সব্বং. ৱুত্তো, তস্মা তত্থ ৱুত্তনযেনেৱ ৱেদিতব্বোতি অধিপ্পাযো.

মহালিসুত্তৱণ্ণনা নিট্ঠিতা.

৪. দলিদ্দসুত্তৱণ্ণনা

২৬০. মনুস্সদলিদ্দোতি মনুস্সেসু দুগ্গতো. মনুস্সকাৰুঞ্ঞতন্তি মনুস্সেসু পৰমনিহীনতং. মনুস্সকপণোতি মনুস্সেসু ৱা পৰমনিহীনো. তস্মিং ঠানেতি তস্স দেৱপুত্তস্স তস্মিং উপ্পজ্জনট্ঠানে. লামকতো চিন্তেন্তীতি তস্স পুৰিমৱত্থুং নিস্সায হীনতো চিন্তেন্তি. কথেন্তীতি তমেৱ পৰেসং কথেন্তি. ৱিত্থাৰেন্তীতি ৱুত্তমত্থং ৱিত্থাৰিকং কৰোন্তি. সব্বদা পৰিচ্ছিজ্জ পৰিৱাৰসম্পন্নো হুত্ৱা অড্ঢট্ঠৰতনে হত্থিক্খন্ধে মহচ্চৰাজানুভাৱেন নিসিন্নত্তা জনকাযেন সমুল্লোকিযমানো. অৱলম্বন্তীতি ওলম্বন্তি. ৱন্দনমত্তং ৱা নাহোসি, অঞ্ঞদত্থু পচ্চেকবুদ্ধতো অত্তনো সমানাদৰকিৰিযং পচ্চাসীসতি. তেন ৱুত্তং ‘‘সো’’তিআদি. ক্ৱাযন্তি কো অযন্তি ব্যাপন্নৱসেন ৱদতি. কাড়ৰত্তেহি সুত্তেহি সিব্বিতত্তা ৱণ্ণৱিকাৰং দিস্ৱা ‘‘কুট্ঠিচীৱৰানি পাৰুতো’’তি আহ. মহানিৰযে নিব্বত্তিত্ৱা মহাদুক্খং পচ্চনুভোতি. তদনুৰূপপাপকম্মস্স ৱিপাকাৱসেসেন লদ্ধোকাসেন ৰাজগহে…পে… পটিসন্ধিং গণ্হি. কামঞ্চ এত্থ পটিসন্ধিগ্গহণং কুসলকম্মেনেৱ, তস্স পন অকুসলকম্মস্স ৱিপাকিনো বলৱভাৱতো ৱুত্তং ‘‘ৱিপাকাৱসেসেনা’’তি. তেনাহ ‘‘গহিতকালতো…পে… নিক্খন্তো’’তি. ভিক্খায চৰিতুং সমত্থকালতো পট্ঠায ৰোগস্স বলৱতায মংসানি…পে… পতন্তি. ঞাণং পেসেত্ৱাতি ৱিপস্সনাপটিপাটিযা ভাৱনাঞাণং নিব্বানং পটিপেসেত্ৱা পৱত্তেত্ৱা. ইন্দ্ৰিযানং পৰিপক্কত্তা সত্থু দেসনাৱিলাসেন সোতাপত্তিফলে পতিট্ঠিতো. চুম্বটন্তি পাদচুম্বটং. কুট্ঠিনো হি সকলপাদতলং মা ৰুজীতি চুম্বটং কত্ৱা তং পাদতলে বন্ধিত্ৱা গচ্ছন্তি, মত্তিকপাতিং ভিন্দিত্ৱা ৱিয তথা নিহীনমনুস্সত্তভাৱতো চৱিত্ৱা সুৱণ্ণপাতিং পটিলভন্তো ৱিয দেৱত্তভাৱং গণ্হন্তো চুতিচিত্ততো দুতিযচিত্তৱাৰে আদানচিত্তক্খণে দেৱলোকে নিব্বত্তো.

মগ্গেনাগতাতি মগ্গাধিগমনেন আগতা উপ্পন্না. অৰিযকন্তসীলন্তি অৰিযানং কন্তং মনাপং মনোৰমং সীলধম্মং. অৰিযানং অধিচিত্তঅধিপঞ্ঞাসিক্খা ৱিয অধিসীলসিক্খাপি সব্বা অতিৱিয কন্তা এৱাতি আহ ‘‘কিঞ্চাপী’’তিআদি. ইমস্মিং পনত্থেতি ইমস্মিং সোতাপন্নস্স ভৱসঙ্খাতে অত্থে নিদ্ধাৰেত্ৱা ৱুচ্চমানে. পঞ্চসীলম্পি যস্মা দিট্ঠি ৱিয ভৱন্তৰেপি অপ্পহীনং.

দলিদ্দসুত্তৱণ্ণনা নিট্ঠিতা.

৫. ৰামণেয্যকসুত্তৱণ্ণনা

২৬১. আৰমন্তি এত্থ সত্তাতি আৰামা, মনোৰমা উপৱনাদযো. তে এৱ চেতেন্তি এত্থ সদ্ধায অত্তনো পীতিসোমনস্সং সন্ধহন্তীতি চেতিযাতি চ ৱুচ্চন্তি. মনুস্সৰমণীযভাৱস্সাতি মনুস্সানং আৰমণীযভাৱস্স. তস্স পন সীলাদিগুণৱসেন অচিন্তেয্যাপৰিমেয্যানুভাৱতাপি হোতীতি ভগৱা ‘‘নাগ্ঘন্তি সোড়সি’’ন্তি অৱোচ. অচেতনায ভূমিযা ৰমণীযতা নাম গুণৱিসিট্ঠানং অৰিযানং সেৱনৱসেন ৱেদিতব্বাতি ৱুত্তং ‘‘ইদানি…পে… গামে ৱাতিআদিমাহা’’তি.

ৰামণেয্যকসুত্তৱণ্ণনা নিট্ঠিতা.

৬. যজমানসুত্তৱণ্ণনা

২৬২. যজন্তানন্তি দক্খিণেয্যং উদ্দিস্স দেন্তানং. অট্ঠুপ্পত্তিকো সুত্তনিক্খেপোতি দস্সেত্ৱা অত্থৱণ্ণনং কাতুং ‘‘তদা কিৰা’’তিআদি ৱুত্তং. অগ্গন্তি সেট্ঠং. তেহি তেহি ৱা যথালদ্ধসপ্পিআদযো মা নস্সন্তু, অগ্গভাৱেন গহিতানি সপ্পিআদীনি কেৱলং অগ্গিম্হি ঝাপনেন, দেৱা মনুস্সা মিচ্ছাগাহেন মা নস্সন্তু. তক্কেনাতি তক্কমত্তেন. ‘‘কথেমা’’তি অম্হে মঞ্ঞথ, ইদানি পস্সথ, পচ্চক্খতো অযং ৱো…পে… আগচ্ছতীতি আহংসূতি যোজনা.

উপধিৱিপাকন্তি উপধীসু ৱা ৱিপচ্চতি, উপধযো ৱা ৱিপাকা এতস্সাতি উপধিৱিপাকং. ৱিপ্ফাৰৱন্তং হোতি ৱিপুলপক্খতায. ভিক্খুসঙ্ঘস্স অদংসু ‘‘সম্মাসম্বুদ্ধেন মহাব্ৰহ্মুনা চ এৱং ওৱাদো দিন্নো’’তি.

যজমানসুত্তৱণ্ণনা নিট্ঠিতা.

৭. বুদ্ধৱন্দনাসুত্তৱণ্ণনা

২৬৩. উট্ঠহাতি উট্ঠানং কাযিকৱীৰিযং কৰোহি. তেনাহ ‘‘ৱিচৰ, লোকে’’তি. চেতসিকৱীৰিযং পন ভগৱতা মত্থকং পাপিতমেৱ. তেনাহ ‘‘ৱিজিতসঙ্গামা’’তি. দ্ৱাদসযোজনিকস্স উচ্চভাৱেন. ৱিত্থাৰতো পন আযামতো চ অনেকযোজনসতসহস্সপৰিমাণচক্কৱাড়ং অতিব্যাপেত্ৱা ঠিতস্স. পন্নভাৰাতি পাতিতভাৰ. নিক্খেপিতব্বতো ভাৰাতি আহ ‘‘ওৰোপিতখন্ধা’’তিআদি. তে হি তংসমঙ্গিনো পুগ্গলস্স সম্পাতনট্ঠেন ভাৰা নাম. ৱুত্তঞ্হেতং ‘‘ভাৰা হৱে পঞ্চক্খন্ধা’’তি (সং. নি. ৩.২২). তদেকদেসা চ কিলেসাভিসঙ্খাৰা. পন্নৰসায পুণ্ণমায ৰত্তিন্তি যথা পন্নৰসপুণ্ণমায ৰত্তিযং পৰিপুণ্ণকালে উপক্কিলেসৱিমুত্তো চন্দো সোভতি, এৱং তৱ চিত্তং সব্বসো উপক্কিলেসৱিমুত্তং সোভতীতি অধিপ্পাযো.

বুদ্ধৱন্দনাসুত্তৱণ্ণনা নিট্ঠিতা.

৮. গহট্ঠৱন্দনাসুত্তৱণ্ণনা

২৬৪. পুথুদ্দিসাতি বহুদিসা. কা পন তাতি আহ ‘‘চতস্সো দিসা চতস্সো অনুদিসা চা’’তি. অনুদিসাগহণেন চেত্থ উদ্ধং অধোপি গয্হতীতি চ দস্সেতি. ভূমিৱাসিনোতি ভূমিপটিবদ্ধৱুত্তিনো. এতেন ৰুক্খপব্বতনিৱাসিনোপি গহিতা হোন্তি. চিৰৰত্তসমাহিতচিত্তেতি উপচাৰপ্পনাঝানানি উপ্পাদেত্ৱা অপৰিহীনজ্ঝানতায চিৰকালং সমাহিতচিত্তে. আপাণকোটিকন্তি জীৱিতপৰিযন্তং যাৱজীৱং. এৱমাদীতি আদি-সদ্দেন অৱসেসপুঞ্ঞকিৰিযৱত্থূনি সঙ্গণ্হাতি. নিচ্চসীলৱসেন পঞ্চহি, নিযমসীলৱসেন দসহি. পি-সদ্দেন ততো কতিপযেহি উপোসথসীলৱসেন অট্ঠহিপীতি দস্সেতি. ধম্মিকেহীতি ধম্মতো অনপেতেহি. পমুখোতি পমোক্খো.

গহট্ঠৱন্দনাসুত্তৱণ্ণনা নিট্ঠিতা.

৯. সত্থাৰৱন্দনাসুত্তৱণ্ণনা

২৬৫. ব্ৰহ্মজাণুকোতি দক্খিণজাণুমণ্ডলং পথৱিযং ঠপেত্ৱা ৱন্দমানো ব্ৰহ্মজাণুকো নাম তথাভূতো হুত্ৱা. যজিতব্বতো যক্খো, পূজনীযো. এৱং পূজাৱিসেসযোগতো সক্কোতি আহ ‘‘সো যক্খোতি সো সক্কো’’তি. সক্কস্স নমক্কাৰভাজনভূতঞ্হি পুচ্ছন্তো মাতলি ‘‘কো নাম সো যক্খো’’তি আহ. গুণনেমিত্তকেহীতি গুণহেতুকেহি অনন্তানি হি বুদ্ধানং নামানি, তানি চ খো সব্বানিপি গুণনেমিত্তকানেৱ. অনন্তগুণত্তা. ৱুত্তঞ্হেতং –

‘‘অসঙ্খ্যেয্যানি নামানি, সগুণেন মহেসিনো;

গুণেন নামমুদ্ধেয্যং, অপি নামসহস্সতো’’তি. –

তস্মা অনোমনামন্তি পৰিপুণ্ণগুণনামন্তি অত্থো. সমতিক্কমেনাতি সম্মা সমুচ্ছিন্দনৱসেন অতিক্কমনেন. কিলেসাৰীনং অপেতচযোতি অপচযো, সো আৰমিতব্বট্ঠেন আৰামো এতেসন্তি অপচযাৰামা. তেনাহ ‘‘ৱট্টৱিদ্ধংসনে ৰতা’’তি.

সত্থাৰৱন্দনাসুত্তৱণ্ণনা নিট্ঠিতা.

১০. সঙ্ঘৱন্দনাসুত্তৱণ্ণনা

২৬৬. পূতিম্হি দেহে মাতু সৰীৰে সযনতো, অত্তনো এৱ ৱা পূতিদেহং সৰীৰং তস্মিং ঠিততায অৱত্থৰিত্ৱা সযনতো পূতিদেহসযাতি যোজনা. কুণপম্হেতেতি এতে মনুস্সা অসুচিদুগ্গন্ধজেগুচ্ছপটিক্কূলে মাতুকুচ্ছিসঙ্খাতে কুণপস্মিং দস মাসে নিমুগ্গা. তেসং কিন্নাম ত্ৱং পিহযসীতি যোজনা. এতেসং এতং ৱিহযামীতি এতেসং ইসীনং এতং সম্মাপটিপত্তিং ৱিহযামি. ইদানি তং পটিপত্তিং দস্সেতুং ‘‘ন তে সং কোট্ঠে ওপেন্তী’’তি ৱুত্তং. ধঞ্ঞং কোট্ঠে ন পক্খিপন্তি পক্খিপিতব্বস্স চ অভাৱতো. তেনাহ ‘‘ন হি এতেসং ধঞ্ঞ’’ন্তি. পৰেসং নিট্ঠিতন্তি পৰেসং গহিতং সন্তকং তেসং পাকায নিট্ঠিতং. ভিক্খাচাৰৱত্তেনাতি পিণ্ডাচৰিযায. এসমানা পৰিযেসন্তা. এৱং পৰিযিট্ঠেন. যাপেন্তি, ন এসন্তি অনেসনং. সুসমাদিন্নসুন্দৰৱতাতি সুট্ঠু সমাদিন্নসোভনৱতা.

এৱং সুভাসিতভাসিনোতি গন্থধুৰৱিপস্সনাধুৰানং ৱসেন গুণপৰিমাণসুভাসিতস্সেৱ ভাসনসীলা. অৰিযেন তুণ্হীভূতেন তুণ্হীভূতা. ততো এৱ মনস্স সাতিসযং সমঞ্চৰা. গহিতদণ্ডেসু পৰামাসাদিপযুত্তেসু দণ্ডাদানাদিহেতু উপ্পজ্জনককিলেসপৰিড়াহাভাৱতো নিব্বুতা. তেনাহ ‘‘ৱিস্সট্ঠদণ্ডা’’তি. সাদানেসূতি সভৱাদানেসু. অনাদানাতি তব্বিৰহিতা. তেনাহ ‘‘ভৱযোনী’’তিআদি.

সঙ্ঘৱন্দনাসুত্তৱণ্ণনা নিট্ঠিতা.

দুতিযৱগ্গৱণ্ণনা নিট্ঠিতা.

৩. ততিযৱগ্গো

১. ছেত্ৱাসুত্তৱণ্ণনা

২৬৭. ৱুত্তত্থমেৱ হেট্ঠা দেৱপুত্তসংযুত্তৱণ্ণনাযং.

ছেত্ৱাসুত্তৱণ্ণনা নিট্ঠিতা.

৩. দুব্বণ্ণিযসুত্তৱণ্ণনা

২৬৮. দুব্বণ্ণো দুদ্দসিকো ৱিৰূপৱণ্ণো. ওকোটিমকোতি ৰস্সভাৱেন অৱৰকোটিমকো. সক্কেন গহিতনামমেৱেতং, ন পন সো তথাৰূপো কোচি যক্খো. তেনাহ ‘‘একো ৰূপাৱচৰব্ৰহ্মা’’তি. যদি এৱং কস্মা সো তথাৰূপো হুত্ৱা আগতোতি আহ ‘‘সক্কো কিৰা’’তি. কথং পনেত্থ ঞাযতি ‘‘সো একো ৰূপাৱচৰব্ৰহ্মা, ন পনেসো অৱৰুদ্ধকযক্খো’’তি যুত্তিং দস্সেন্তো ‘‘অৱৰুদ্ধকযক্খা পনা’’তিআদিমাহ. দেৱানং ৱচনং সুত্ৱা. ফৰুসেনাতি ফৰুসসমাচাৰেন. ‘‘কো নাম ময্হং আসনে সন্নিসিন্নো’’তি অক্খন্তিং অনুপ্পাদেন্তো খন্তিযং ঠত্ৱা. বলৱচিত্তীকাৰন্তি গৰুতৰং সক্কাৰবহুমানং. নীচৱুত্তিযাতি পৰমনিপচ্চকাৰে সুৱূপসমনে চ দস্সিযমানে. সক্কস্স তায এৱ আচাৰসম্পত্তিযা সক্কাসনে ঠাতুং, অত্তনো চ আৱিকাতুং অসক্কোন্তো অন্তৰধাযি. উপহতচিত্তোম্হীতি খন্তিমেত্তানুদ্দযাসব্ভাৱতো পৰস্মিং উপহতচিত্তোম্হীতি সক্কো অত্তনো সভাৱং ৱদতি. কোধৱসে ৱত্তেতুন্তি কোধেন অত্তনো ৱসে নিব্বত্তেতুং ন সুকৰোম্হি, অথ খো কোধং ময্হং ৱসে ন ৱত্তেমীতি অধিপ্পাযো. চিৰং ন কুজ্ঝামীতি যদি মে কদাচি কোধো উপ্পজ্জেয্য, তং কোধং অনুৱত্তেন্তো চিৰকালং ন কুজ্ঝামি. ন উপনয্হামীতি অন্তো সচে মে কোধো উপ্পজ্জেয্য, খিপ্পমেৱ চ নং পটিৱিনেয্যন্তি তং মে পুব্বেৱ ৱতং পৰিপূৰিতং.

দুব্বণ্ণিযসুত্তৱণ্ণনা নিট্ঠিতা.

৩. সম্বৰিমাযাসুত্তৱণ্ণনা

২৬৯. আবাধিকোতি আবাধো অস্স অত্থীতি আবাধিকো. ৱাচেসীতি সিক্খাপেসি. সম্বৰো নাম অসুৰমাযায আদিপুৰিসো পুৰাতনো অসুৰিন্দো. তং সন্ধাযাহ ‘‘যথা সম্বৰো’’তিআদি. এৱং পচ্চতি অঞ্ঞোপি মাযাৱী মাযং পযোজেত্ৱা. উপৱাদন্তৰাযো নাম খমাপনে সতি ৱিগচ্ছতি, পাকতিকমেৱ হোতীতি আহ ‘‘এৱমস্স ফাসু ভৱেয্যা’’তি. তেনাতি ৱেপচিত্তিনা সম্বৰৱিজ্জায অদানেন ৱঞ্চিতত্তা. তথা অকত্ৱাতি ইসীনং সন্তিকং নেত্ৱা খমাপনৱসেন কাতব্বং অকত্ৱা.

সম্বৰিমাযাসুত্তৱণ্ণনা নিট্ঠিতা.

৪. অচ্চযসুত্তৱণ্ণনা

২৭০. সম্পযোজেসুন্তি অঞ্ঞমঞ্ঞং ৱাচসিকং ফৰুসং পযোজেসুং. তেনাহ ‘‘কলহং অকংসূ’’তি, ৱিৱাদং অকংসূতি অত্থো. অতিক্কম্মৱচনন্তি ৱচীসংৱৰং অতিক্কমিত্ৱা ৱচনং. যস্মা অচ্চযে দেসিযমানে তং খীণযতি অঞ্ঞমঞ্ঞস্স খমমানস্স খমনং পটিগ্গণ্হতো, তস্মা ৱুত্তং ‘‘নপ্পটিগণ্হাতীতি ন খমতী’’তি. তুম্হাকং ৱসে ৱত্ততু, ৱিসেৱিতং অকত্ৱা যথাকামকৰণীযো হোতু. মিত্তধম্মো ইধ উত্তৰপদলোপেন ‘‘মিত্তো’’তি ৱুত্তোতি আহ ‘‘মিত্তধম্মে’’তি. কৰণৱচনন্তি ‘‘মিত্তেহী’’তি কৰণৱচনং ভুম্মত্থে. তেনাহ ‘‘মিত্তেসূ’’তি. যথা নিব্বত্তসভাৱস্স ভাৱতো অঞ্ঞথত্তং জৰা, এৱং মিত্তভাৱতো ৱুত্তৱিপৰিযাযো অমিত্তধম্মো জৰাপৰিযাযেন ৱুত্তো. অগাৰয্হং অনৱজ্জং সব্বসো পহীনকিলেসং. তেনাহ ‘‘খীণাসৱপুগ্গল’’ন্তি.

অচ্চযসুত্তৱণ্ণনা নিট্ঠিতা.

৫. অক্কোধসুত্তৱণ্ণনা

২৭১. কোধো তুম্হে মা অভিভৱীতি এত্থ কোধেন অনভিভৱনীযত্তং খন্তিমেত্তাকৰুণাদিতপ্পটিপক্খধম্মপৰিব্ৰূহনেন. তথা হি তংসমঙ্গিনো কোধো অভিভুয্যতীতি আহ ‘‘তুম্হেৱ কোধং অভিভৱথ. কুজ্ঝন্তানং মা পটিকুজ্ঝিত্থা’’তি. পটিপদাতি এসা পটিপত্তি. মেত্তাতি অপ্পনাপ্পত্তা মেত্তা. তদুপচাৰো মেত্তাপুব্বভাগো. ন ৱিহিংসতি কিঞ্চি এতাযাতি অৱিহিংসা. কৰুণাতি অপ্পনাপ্পত্তকৰুণা ৱেদিতব্বা. তদুপচাৰো কৰুণাপুব্বভাগো. লামকজনন্তি খন্তিআদীসু যোনিসোমনসিকাৰাভাৱেন গাৰয্হসমাচাৰসমাযোগেন চ নিহীনং জনং. পচ্চযপৰিসুদ্ধিযা কোধো অভিমদ্দমানো পুগ্গলং অভিমদ্দতি, তস্স সো পটিসঙ্খানভাৱনাবলেহি সম্মদেৱ পহাতব্বোতি.

অক্কোধসুত্তৱণ্ণনা নিট্ঠিতা.

ততিযৱগ্গৱণ্ণনা নিট্ঠিতা.

সাৰত্থপ্পকাসিনিযা সংযুত্তনিকায-অট্ঠকথায

সক্কসংযুত্তৱণ্ণনায লীনত্থপ্পকাসনা সমত্তা.

নিট্ঠিতা চ সাৰত্থপ্পকাসিনিযা

সংযুত্তনিকায-অট্ঠকথায সগাথাৱগ্গৱণ্ণনা.

পঠমো ভাগো নিট্ঠিতো.