৫. সুভাসিতজযসুত্তৱণ্ণনা

২৫১. ‘‘ছেকতাযা’’তি ৱত্ৱা তস্স ৱত্তুং ছেকভাৱং দস্সেতুং ‘‘এৱং কিৰস্সা’’তিআদিমাহ. গাহন্তি লদ্ধিং. মোচেত্ৱাতি যস্স পুন ‘‘চোৰো’’তি উত্তৰি ৱত্তুং ন সক্কোতি, এৱং ৱিমোচেত্ৱাতি পঠমং ৱত্তুং ন সক্কা. গৰূতি ভাৰিযং, দুক্কৰন্তি অত্থো. পচ্ছাতি ‘‘পৰস্সা’’তি ৱুত্তো সো কিঞ্চি পঠমং ৱদন্তো অত্তনো অধিপ্পাযং পৱেদেতি নাম, তং যথাসত্তি ৱিদিতমনো তস্স উত্তৰি ৱত্তুং সক্কোতি. তেনাহ ‘‘পৰস্স ৱচনং অনুগন্ত্ৱা পন পচ্ছা সুখং ৱত্তু’’ন্তি. অপি চ অসুৰিন্দেন ‘‘হোতু, দেৱানমিন্দ, সুভাসিতেন জযো’’তি পঠমং ৱুত্তং, ৱিসেসো চ পুব্বং উপনেন্তং অনুৱত্ততি. ৱচসি কুসলো সক্কো দেৱৰাজা তং ৱিসেসং তেনেৱ পুব্বং উপনযাপেন্তো উপলাপনৱসেন ‘‘তুম্হে খ্ৱেত্থা’’তিআদিমাহ. পুব্বদেৱাতি সক্কপমুখায দেৱপৰিসায লোকে পুব্বেৱ উপ্পন্নত্তা ‘‘পুব্বদেৱা’’তি পসংসৱচনং. ৱেপচিত্তিং সন্ধায ‘‘তুম্হে’’তি ‘‘পুব্বদেৱা’’তি চ ৱুত্তত্তা ‘‘তুম্হাকং তাৱ পৱেণিআগতং ভণথা’’তি ৱুত্তং. গাৰৱট্ঠানিযত্তা ৱেপচিত্তিনো বহুৱচনপযোগো. দণ্ডেন অৱচাৰো অৱচৰণং দণ্ডাৱচৰো, নত্থি এত্থ ৱুত্তো দণ্ডাৱচৰোতি অদণ্ডাৱচৰা, সক্কেন ৱুত্তা গাথাযো.

সুভাসিতজযসুত্তৱণ্ণনা নিট্ঠিতা.