৬. নিদ্দাতন্দীসুত্তৱণ্ণনা

১৬. পচ্ছিমে মাসে পচ্ছাভত্তং পিণ্ডপাতপ্পটিক্কন্তো চতুগ্গুণং সঙ্ঘাটিং পঞ্ঞপেত্ৱা দক্খিণেন পস্সেন সতো সম্পজানোতি এত্তকং পাঠং সঙ্খিপিত্ৱা ‘‘নিদ্দং ওক্কমিতা’’তি ৱুত্তং. কিৰিযামযচিত্তেহি অৱোমিস্সো ভৱঙ্গসোতো অব্যাকতনিদ্দা. সা হি খীণাসৱানং উপ্পজ্জনাৰহা, তস্সা পুব্বভাগাপৰভাগেসু…পে… উপ্পন্নং থিনমিদ্ধং ইধাধিপ্পেতা নিদ্দা, সা অখীণাসৱানং যেভুয্যেন অনিযতকালা, তব্বিধুৰনিযতসব্ভাৱং দস্সেন্তো ‘‘অতিচ্ছাত…পে… আগন্তুকং আলসিয’’ন্তি আহ. কাযালসিযপচ্চযা ৱীৰিযস্স পটিপক্খভূতা চত্তাৰো অকুসলক্খন্ধা তন্দী নাম. তন্দীতি সভাৱনিদ্দেসো. তন্দিযনাতি আকাৰনিংদ্দেসো. তন্দীমনতাতি তন্দীভূতচিত্ততা. আলস্যন্তি অলসভাৱাহৰণং. আলস্যাযিতত্তন্তি অলসভাৱপ্পত্তি. কাযৱিজম্ভনাতি কাযস্স ৱিনামনা. অকুসলপক্খা উক্কণ্ঠিততাতি অকুসলপক্খিযা অনভিৰতি. ভত্তকিলমথোতি যথাৱুত্তস্স ভত্তৱত্থুকস্স আহাৰস্স ৱসেন সৰীৰে উপ্পজ্জনকখেদো. উপক্কিলিট্ঠোতি পঞ্ঞায দুব্বলীকৰণেন উপক্কিলিট্ঠচিত্তো. চিত্তস্স অসমাহিতত্তা নিৱাৰিতপাতুভাৱো. অৰিযমগ্গস্স জোতনং নাম উপ্পজ্জনমেৱাতি আহ ‘‘ন জোততি, ন পাতুভৱতীতি অত্থো’’তি. ন হি অৰিযমগ্গো জোতিঅজোতিনামো পৱত্ততি.

মগ্গসহজাতৱীৰিযেনাতি লোকিযলোকুত্তৰমগ্গসহজাতৱীৰিযেন. মিস্সকমগ্গো হি ইধ অধিপ্পেতো. নীহৰিত্ৱাতি নীহৰণহেতু. হেতুঅত্থো হি অযং ত্ৱা-সদ্দো ‘‘পঞ্ঞায চস্স দিস্ৱা’’তিআদীসু (ম. নি. ১.২৭১) ৱিয. তেন ‘‘মগ্গো ৱিসুজ্ঝতী’’তি ৱচনং সমত্থিতং হোতি. ‘‘অৰিযমগ্গং ৱিসুজ্ঝতী’’তি কেচি পঠন্তি.

নিদ্দাতন্দীসুত্তৱণ্ণনা নিট্ঠিতা.