৫. সণমানসুত্তৱণ্ণনা

১৫. ঠিতে মজ্ঝন্হিকেতি পুব্বদ্ধং নিক্খমিত্ৱা অপৰদ্ধং অপ্পত্ৱা ঠিতমজ্ঝন্হে. সন্নিসীৱেসূতি পৰিস্সমৱিনোদনত্থং সব্বসো সন্নিসীদন্তেসু. দ-কাৰস্স হি ৱ-কাৰং কত্ৱা নিদ্দেসো. তেনাহ ‘‘সন্নিসিন্নেসু ৱিস্সমমানেসূ’’তি. সব্বসত্তানন্তি সব্বেসঞ্চ আহাৰূপজীৱিতসত্তানং ঘম্মতাপনে সন্তত্তকাযানং ইৰিযাপথদুব্বল্যকালোতি ঠানাদিইৰিযাপথস্স অসমত্থকালো. সণতি ৱিযাতি সদ্দং কৰোতি ৱিয, যথা তং অঞ্ঞম্পি মহাৱনং ৱক্খমাননযেন. তেনাহ ‘‘তপ্পটিভাগং নামেত’’ন্তি ছিদ্দৱেণুপব্বানন্তি ৰন্ধজাতকীচকমহাৱেড়ুপব্বানং. দুতিযকং সহাযং অলভন্তী অনভিৰতিপৰিতস্সনায এৱমাহ. অনপ্পকং সুখন্তি ৱিপুলং উড়াৰং ৱিৱেকসুখং.

একৱিহাৰতায সুঞ্ঞাগাৰং পৱিট্ঠস্স. তেন কাযৱিৱেকং দস্সেতি. অনিচ্চানুপস্সনাদীহি নিচ্চসঞ্ঞাদিপ্পহানেন সন্তচিত্তস্স. তেন চিত্তৱিৱেকং দস্সেতি. সংসাৰে ভযং ইক্খনতো ভিক্খুনো উভযৱিৱেকসম্পন্নস্স, ততো এৱ উত্তৰিং মনুস্সধম্মতো ৰতিং লাভিনো. অমানুসী ৰতীতি ভাৱনাৰতি. পুৰতোতি পুৰিমভাগে. পচ্ছতোতি পচ্ছিমভাগে. অপৰোতি অঞ্ঞো. পুৰতোতি ৱা অনাগতে, অনাগতং আৰব্ভাতি অত্থো. পচ্ছতোতি অতীতে অতীতং আৰব্ভ পটিপত্তিযা ৱিবাধনতো. পৰোতি কোধো চিত্তপটিদুস্সনতায. ন পৰোতি অপৰো, লোভো, সো চে ন ৱিজ্জতি. এতেন অনাগতপ্পজপ্পনায অতীতানুসোচনায চ অভাৱং দস্সেতি. অতীৱ ফাসু ভৱতীতি নীৱৰণজেট্ঠকস্স কামচ্ছন্দস্স ৱিগমেন ৱিক্খম্ভিতনীৱৰণস্স ঝানস্স ৱসেন অতিৱিয ফাসুৱিহাৰো হোতি. একস্স ৱসতো ৱনেতি তণ্হাদুতিযিকাভাৱেন একস্স অৰঞ্ঞে ৱিৱেকৱাসং ৱসতো. সেসং তাদিসমেৱাতি সেসমেত্থ যং ৱত্তব্বং, তং পঠমগাথাযং ৱুত্তসদিসমেৱ.

সণমানসুত্তৱণ্ণনা নিট্ঠিতা.