৩. নত্থিপুত্তসমসুত্তৱণ্ণনা

১৩. পুত্তপেমং পুত্তগ্গহণেন গহিতং উত্তৰপদলোপেনাতি আহ ‘‘পুত্তপেমসম’’ন্তি. গোসমিতন্তি গোহি সমং কতং. তেনাহ ‘‘গোহি সম’’ন্তি. সূৰিযস্স সমাতি সূৰিযসমা. অৱযৱসম্বন্ধে চেতং সামিৱচনং. অৱযৱো চেত্থ আভা এৱাতি ৱিঞ্ঞাযতি ‘‘অনন্তৰং আভা’’তি ৱুচ্চমানত্তাতি আহ ‘‘সূৰিযাভায সমা’’তিআদি. মহোঘভাৱেন সৰন্তি সৱন্তীতি সৰা, মহন্তা জলাসযা. সব্বে তে সমুদ্দপৰমা ওৰিমজনেহি অদিট্ঠপৰতীৰত্তা তস্স.

নত্থি অত্তসমং পেমন্তি গাথায পঠমগাথাযং ৱুত্তনযেন অত্থো ৱেদিতব্বো. অত্তপেমেন সমং পেমং নাম নত্থীতি অযমত্থো. অনুদককন্তাৰে ঘম্মসন্তাপং অসহন্তিযা অঙ্কে ঠপিতপুত্তকং কন্দন্তং ভূমিযং নিপজ্জাপেত্ৱা তস্স উপৰি ঠত্ৱা মতইত্থিৱত্থুনা দীপেতব্বং. তেনাহ – ‘‘মাতাপিতাদযো হি ছড্ডেত্ৱাপি পুত্তধীতাদযো’’তি. তথা চাহ –

‘‘সব্বা দিসা অনুপৰিগম্ম চেতসা,

নেৱজ্ঝগা পিযতৰমত্তনা ক্ৱচি;

এৱং পিযো পুথু অত্তা পৰেসং,

তস্মা ন হিংসে পৰমত্তকামো’’তি. (সং. নি. ১.১১৯; উদা. ৪১; নেত্তি. ১১৩);

ধঞ্ঞেন সমং ধনং নাম নত্থি, যস্মা তপ্পটিবদ্ধা আহাৰূপজীৱীনং সত্তানং জীৱিতৱুত্তি. তথাৰূপে কালেতি দুব্ভিক্খকালে. একদেসংযেৱ ওভাসন্তীতি একস্মিং খণে চতূসু মহাদীপেসু ওভাসং ফৰিতুং অসমত্থত্তা সূৰিযস্সপি, পগেৱ ইতৰেসং. বোধিসত্তস্স উদযব্বযস্স ঞাণানুভাৱেন সকলজাতিখেত্তং একালোকং অহোসীতি আহ ‘‘পঞ্ঞা…পে… সক্কোতী’’তি. তমং ৱিধমতীতি পুব্বেনিৱাসঞাণাদযো পঞ্ঞা যত্থ পৱত্তন্তি, তমনৱসেসং ব্যাপেত্ৱা একপ্পহাৰেন পৱত্তনতো. ‘‘ৱুট্ঠিযা পন পৱত্তমানায যাৱ আভস্সৰভৱনা’’তি পচুৰৱসেন ৱুত্তং.

নত্থিপুত্তসমসুত্তৱণ্ণনা নিট্ঠিতা.