১৪১. পৱাৰণাট্ঠপনকথা

২৩৬. সব্বং সঙ্গণ্হাতীতি সব্বসঙ্গাহিকং. পুগ্গলস্স ঠপনং পুগ্গলিকং. তত্থাতি দ্ৱীসু পৱাৰণাট্ঠপনেসু. সব্বসঙ্গাহিকে ঠপিতা হোতীতি সম্বন্ধো. যাৱ ৰেকাৰো অত্থি, তাৱাতি যোজনা. ভাসিযিত্থাতি ভাসিতা. লপিযিত্থাতি লপিতা. ন পৰিযোসিযিত্থাতি অপৰিযোসিতা. এত্থন্তৰেতি এতস্মিং সুকাৰৰেকাৰানং অন্তৰে. একপদেপীতি পিসদ্দো একক্খৰেপীতি অত্থং সম্পিণ্ডেতি. ঠপিতাতি ‘‘সুণাতু মে ভন্তে সঙ্ঘো, ইত্থন্নামো পুগ্গলো সাপত্তিকো, তস্স পৱাৰণং ঠপেমী’’তি ঞত্তিযা ঠপিতা. য্যকাৰেতি ‘‘পৱাৰেয্যা’’তি এত্থ য্যকাৰে. ততোতি য্যকাৰতো. পুগ্গলিকট্ঠপনে পন অট্ঠপিতা হোতীতি সম্বন্ধো. সংকাৰতোতি ‘‘সঙ্ঘং ভন্তে’’তি এত্থ সংকাৰতো. সব্বপচ্ছিমোতি তীসু ৱাৰেসু ততিযৱাৰে সব্বেসং অক্খৰানং পচ্ছিমো টিকাৰো অত্থীতি যোজনা. এত্থন্তৰেতি এতস্মিং সংকাৰটিকাৰানং অন্তৰে. তস্মাতি যস্মা পৰিযোসিতা হোতি, তস্মা. ‘‘এসেৱ নযো’’তি ৱুত্তৱচনং ৱিত্থাৰেন্তো আহ ‘‘এতাসুপি হী’’তিআদি. তত্থ এতাসুপীতি দ্ৱেৱাচিকএকৱাচিকসমানৱস্সিকাসুপি. পিসদ্দো তেৱাচিকমপেক্খতি. ঠপনখেত্তন্তি ঠপনস্স ভূমি. ইতিসদ্দো পৰিসমাপনত্থো.

২৩৭. অনুযুঞ্জিযমানোতি এত্থ অনুযুঞ্জসদ্দো পুচ্ছনত্থোতি আহ ‘‘পুচ্ছিযমানো’’তি. পৰতোতি পৰস্মিংযেৱ খন্ধকেতি (মহাৱ. ২৩৭) অত্থো. অলং ভিক্খু মা ভণ্ডনন্তিআদীনীতি এত্থ আদিসদ্দেন ‘‘মা কলহং, মা ৱিৱাদ’’ন্তিৱচনানি সঙ্গণ্হাতি, ৱচনানি ৱত্ৱা ওমদ্দিত্ৱাতি যোজনা. ৱচনোমদ্দনাতি ৱচনেনেৱ ওমদ্দনা. হীতি সচ্চং. ইধাতি ইমস্মিং পৱাৰণাট্ঠপনট্ঠানে. অনুদ্ধংসিতং পটিজানাতীতি এত্থ পটিজাননাকাৰং দস্সেন্তো আহ ‘‘অমূলকেন পাৰাজিকেন অনুদ্ধংসিতো অযং মযা’’তি. ‘‘লিঙ্গনাসনাযা’’তি ইমিনা দণ্ডকম্মনাসনসংৱাসনাসনানি নিৱত্তেতি.

২৩৮. এতন্তি ‘‘অসুকা আপত্তী’’তি ৱচনং. কলহস্স মুখন্তি কলহস্স উপাযো.