১১৮. পটিস্সৱদুক্কটাপত্তিকথা

২০৭. পটিস্সৱে আপত্তি দুক্কটস্সাতি এত্থ কিং ৱস্সাৱাসপটিস্সুতেযেৱ দুক্কটাপত্তি হোতীতি আহ ‘‘ন কেৱল’’ন্তিআদি. এতস্সেৱাতি ৱস্সাৱাসস্সেৱ. এৱমাদিনাপীতি পিসদ্দো ‘‘পটিস্সৱে’’তি এত্থ যোজেতব্বো. ‘‘পটিস্সৱেপী’’তি হি অত্থো. তস্স তস্সাতি কম্মস্স. তঞ্চ খোতি তঞ্চ দুক্কটং ৱিসংৱাদনপচ্চযা হোতীতি যোজনা. পঠমম্পীতি পিসদ্দো ‘‘পচ্ছাপী’’তি পদং সম্পিণ্ডেতি. পঠমম্পি হি পাচিত্তিযং, পচ্ছাপি দুক্কটন্তি অত্থো.

সো তদহেৱ অকৰণীযোতিআদীসু এৱং ৱিনিচ্ছযো ৱেদিতব্বোতি যোজনা. পুৰিমিকা চ ন পঞ্ঞাযতীতি এত্থ পুৰে ভৱা পুৰিমা, সা এৱ পুৰিমিকা, পাটিপদতিথী. নানাসীমায দ্ৱীসু আৱাসেসু ৱস্সং উপগচ্ছন্তস্স দুতিযে ‘‘ৱসিস্সামী’’তি পঠমাৱাসস্স উপচাৰতো নিক্খন্তমত্তে পঠমসেনাসনগ্গাহস্স পস্সম্ভনং সন্ধায ৱুত্তং ‘‘পুৰিমিকা চ ন পঞ্ঞাযতী’’তি. অৰুণং অনুট্ঠাপেত্ৱাতি ৱস্সং উপগমনৱিহাৰে অৰুণং অনুট্ঠাপেত্ৱা. তদহেৱাতি তস্মিং ৱস্সূপগমনঅহনি এৱ, পক্কন্তস্সাপীতি সম্বন্ধো. পিসদ্দস্স গৰহত্থং দস্সেন্তো আহ ‘‘কো পন ৱাদো’’তিআদি. আলযোতি চিত্তস্স অল্লীযনং. অসতিযাতি সতিপমুট্ঠেন. ৱস্সং ন উপেতীতি ‘‘ইমস্মিং ৱিহাৰে ইমং তেমাসং ৱস্সং উপেমী’’তি (মহাৱ. অট্ঠ. ১৮৪) ৱচীভেদং কত্ৱা ৱস্সং ন উপেতি.

সত্তাহন্তি সত্তাহেন, অনাগতাযাতি সম্বন্ধো. নৱমিতোতি পুব্বকত্তিকমাসস্স জুণ্হপক্খনৱমিতো, পচ্ছিমকত্তিকমাসস্স জুণ্হপক্খনৱমিতো ৱা. মা ৱা আগচ্ছতু, অনাপত্তীতি ৱস্সংৱুত্থত্তা মা ৱা আগচ্ছতু, অনাপত্তীতি অত্থো.

ইতি ৱস্সূপনাযিকক্খন্ধকৱণ্ণনায যোজনা সমত্তা.